Cumh Pâuz 3

1Naih ah noib, beengc cloo Zâu nyăngz săngx huđ, Pi-tê cloon Yô-hanx ninyh wa bongc Zâu Tênb-Huungh nyăngz pyau, six pôz săngx huđ. 2Naih ah lanh munh, tăng yămz nzif nyăngz nyâuđ njaf steengb taih bix quac, munh zeengz nănh taih, wax tauh munh six muif noib munh tăpx nănh ănz wa, nzac bongc Zâu Tênb-Huungh nyăngz pyau wax tungđ jeengh, six hipđ ayx Jeengh Quai, nongc joođ nyanh tăng wax đomc munh ninyh nzac wa, bongc Zâu Tênb-Huungh nyăngz pyau, 3phătc Pi-tê cloon Yô-hanx cayx ninyh nzac bongc Zâu Tênb-Huungh nyăngz pyau, nănh songđ joođ stiz nyăngz nyanh. 4Six Pi-tê cloon Yô-hanx njinh luh mangc nzac nănh ninyh, yâuc coong: “Phanv mangc buz geh!” 5Nănh songđ njinh luh mangc stiz, nyâyh coong stiz cayx phunz tix huungđ. 6Six, Pi-tê coong: “sămz nyanh, yaz six max naih, six yaz naih nyăngz, yaz sađ phunz mâyh. Tim Zâu Yê-su Jix-Tuz nyăngz bux Na-sa-leetx munh, nyoongz quef yăngh gôh.” 7Pi-tê nzauf nănh nyăngz byaoh saz puf tanyđ nănh nyoongz quef, nănh nyăngz staux pên căn staux mâyc stung, songđ toongx sangf tuz njoongh staox taih. 8Nănh nzeengc nyoongz quef songđ hayh yăngh, nănh yâuc lêpc stiz ninyh wa bongc Zâu Tênb-Huungh nyăngz pyau, cun đanyz stêub cun ninyh yâuc tanv Zâu Tênb-Huungh. 9Songx munh phătc nănh hayh yăngh songđ tinyh đoih tanv Zâu Tênb-Huungh. 10Stiz saz coong nănh six njinh leox stâyv wa bongc Zâu Tênb-Huungh nyăngz pyau Jeengh Quai cah sinh joođ nyanh wax tauh, năngđ nâyx stiz songđ numđ nyâyh ganc nzongf yâuc numđ njingc, wâyc nâyx lanh munh nyăngz dlayc setb taih.

11Wax zanyf, nănh jinh đangh lêpc nzauf Pi-tê cloon Yô-hanx, songx munh nyâyh ganc songđ tinyh đoih tinyh ênz taih nzoomf wa jeengh cah đangc, yămz wa hipđ ayx Sa-lô-môn njiuh. 12Six Pi-tê phătc nâyx songđ coong ănz songx munh coong:

“I-sa-la-ên nyăngz songx munh lex, săngh laix nyâuh bix numđ nâyx đomc dlayc njingc heh? Nyâuh mangc nzac buz ninyh, ayx cayx năngđ six buz păngc cănh nyăngz jab, max six păngc cănh cumh pâuz gongx, ayx phunz nâyx lanh munh hayh yăngh? 13Apx-la-ham nyăngz Zâu Tênb-Huungh, I-sakx nyăngz Zâu Tênb-Huungh, cloon Ya-côpx nyăngz Zâu Tênb-Huungh, six pănh nyăngz claof jex nyăngz Zâu Tênb-Huungh, ayx phunz Nănh nyăngz pâuz tuz gwăngz eeng, senz nyâuh zoz jaoz phunz Phi-latx wax Tauh Zâu Yê-su, Phi-latx oix pungx Nănh wax zanyf, nyâuh yâuc yămz Phi-latx nyăngz cah đangc nzêmh max nongc. 14Nyâuh nzêmh Đăngb Zeengh yâuc Peengh Stimz wax Tauh, bix joođ êu pungx tayx munh wax tauh phunz nyâuh, 15nyâuh tayx Săngh Mengc Nyăngz Coonz wax Tauh, six Zâu Tênb-Huungh ayx phunz tăng tayc săngh taih wax Tauh, buz six ayx zanyx manyf phunz nâyx đomc jau. 16Nây six wâyc zen yămz Nănh nyăngz manyh, bix nyâuh phătc yâuc pâyz nâyx tauh munh tuz njoongh taih yămz Nănh nyăngz manyh. Yâuc wâyc nongc zen stimz yămz Nănh, bix nâyx tauh munh tuz gongx njoongh taih năngđ nâyx, yămz nyâuh tinyh đoih nyăngz cah đangc. 17Yâuf pez lex, nâyx zanyf yaz pâyz coong nyâuh cloon nyâuh wax đomc ayx côx munh, six wâyc max pâyz luungđ bix ayx năngđ nâyx. 18Six Zâu Tênb-Huungh nongc wax đomc muif tauh tâuc wac munh nyăngz nzetx, tâuc taih quaix đangc nyăngz wac, coong tauv Nănh nyăngz Zâu Jix-Tuz six zuc tanyđ zâuđ, Nănh yâuc ayx phunz setb taih toix nzuf năngđ nây nâyx. 19Wâyc nây, nyâuh oix zuc nhlimc stoif, bix phunb đangz lauf, phunz nyâuh nyăngz stoif tuz quanyf queengx, 20ayx phunz Zâu tingc taih wax đomc săngb nzêuh nyăngz săngx huđ tauv, Zâu Tênb-Huungh songđ paiđ Nănh tingc săngh wax Tauh taih phunz nyâuh, six Zâu Yê-su Jix-Tuz, 21Nănh six oix zuc muf yămz wa Tênb-toongh, zu tauv beengc săngx huđ, muif huungđ tuz njăpc săngb nyăngz staox taih, senz Zâu Tênb-Huungh tăng lôx noib, nongc Nănh wax đomc đăngb zeengh tâuc wac munh nyăngz nzetx coong quaix taih nyăngz jau. 22Năngđ nâyx Mô-sê songđ coong: ‘Zâu, six pănh nyăngz Zâu Tênb-Huungh six phunz ah tauh tâuc wac munh taih phunz nyâuh, tăng nyâuh nyăngz yâuf pez cah njaf, cayx năngđ yaz nâyx. Nyâuh six oix zuc mungv Nănh, yâuc ayx âyz Nănh coong ănz nyâuh nyăngz muif zâux wac. 23Six năngđ coong laiv lanh max mungv wax tauh tâuc wac munh nyăngz wac, wax tauh munh six zuc zoz setb Zâu nyăngz pec stingx.’ 24Muif lanh tâuc wac nyăngz munh tăng Sa-mu-ên ninyh tauv cah đangz stipx nănh wax đomc, phanv stiz goib nzetx coong, stiz six lauf cungb coong tauv nâyx đomc nyăngz noib. 25Nyâuh six săngh wax đomc tâuc wac munh nyăngz sây stunz, yâuc săngh nyunc wac nyăngz Zâu Tênb-Huungh njăpc nyunc wac cloon pănh nyăngz claof jex, Apx-la-ham, coong: ‘Tăng mâyh nyăngz ah lanh sây stunz, guungh đi manf stingx munh six tuz pôz.’ 26Zâu Tênb-Huungh phunz Nănh nyăngz pâuz nzac taih, tah yetx six phunz nyâuh đangc, Nănh paiđ wax Tauh taih nongc sađ pôz phunz nyâuh, six nongc ayx phunz muif lanh munh quanyf stiz ayx huđ nyăngz jau.”