Wale Magar Kham
मर्कुस 3
उकुइ स्याङो मी
होकामटानि फरि टखेप येसु यहुडीरं याडुप्सिने ज़ीःमलं ओनाव। होलं टोबो उकुइ स्याङो मी लेव। कैलेकं नाःसिने डिनछ्याम हो मीलाई याससोमोखे भने आरोप लैने वार्डे मीरं येसुलो उचिवारे चुङडे यालिज़्याव। होकाम येसुये उकुइ स्याङो मीलाई हैओडोव, “ङाःङ गरानके।” होकाम येसुये नो मीरंलाई हैओडोवरं, “नाःसिने डिन छ्याम चाव येःन डोने सै माचाव येःन डोने, पोहोन जोगैने सै नास झैने कडि येःन चाव?”
होकाम नोरं काङ्का पनि गाइगुइ मालेरंये। नो मीराई यायुङ खाव उलिज़्याव रःङडे येसुये उयुङ माचाव झैडे होला स्यान्टै मीरंलाई उरिसैये टखेप ओरोःङोरं, होकाम हो मीलाई ऐ ओडोव, “नकुइ गपंलाके।” होये उकुइ ओपंलाव होकाम उकुइ ओसोमो। होकाम फरिसीरं होलाम पुलुडे नाडे कैजैडे येसुलाई नास झैने वार्डे नोराई चानोज़ हेरोडलो उमीरासं डुप्सिडे येसुलो उबिरोडलं सल्ला याडोव।
डह गोराटं माहुले मीरं
मत्ती १२:१५-१६; लुका ६:१७-१९
येसु उसिसरासं गालील डह लेवडे ओनाव, होकाम गालीललाम माहुले मीरं येसुलो उझिन्ट यहुडिया, यरुसलेम, इडुमीआ प्रडेसलाम, यर्डन भै होपटा टुरोस सोनो सीडोनलो ओछ्योयालाम माहुले मीरं येसुये ओडोव अचम्बला येःनलो ओबारेलं ठैडे येसु लेवकं याराव। माहुले मीराई ओललाई टासिरंकं वार्डे उसिसरंलाई ओलागिटं टोबो आलिज़ा डोङ्गा तयारं झोयो उपरिःङोरं। येसुये बनै भ्या मीरंलाई ओससोमो कारनये रोगो लागिव मी भरिये येसुलाई छुने वार्डे बनै के-केः याछुइसिरिव। जोकं माचाव आत्माराई येसुलाई रःङरं, होकंज़ येसुलो ओङाःकं फुलुप्सिडे ऐ वार्डे किःरंये, “नङ परमेस्वरलो ओज़ा ची।”
होकाम येसुये, आव ङाडोव येःनटं ङामिन टारैच्यो वार्डे होरंलाई कर्रा आग्या ओयोवरं।
बारं जना प्रेरितरं ओझोयोरं
मत्ती १०:१-४; लुका ६:१२-१६
होकामटानि येसु डान्डाटं पुलुडे उयुङ्का मीरंलाई उखुलोरं, होकाम होरं येसु लेवकं याराव। येसुये ओल्स लेने लागिटं सोनो प्रचार डोव परिःङनेलो लागिटं बारं जनारंलाई उरुजिवरं। होकाम येसुये होरंलाई प्रेरित यामिन नैडेओयोवरं। होकाम होरंलाई ज़्याःरंलाई हाइने अडिकार पनि ओयोवरं।
हो बारंजना प्रेरितरं आवरंज़ सिमोन, जोलाई येसुये उमिन पत्रुस ओनैड्योव, जब्डियालो ओज़ा याकुब सोनो याकुबलो ओभाइ युहन्नानिलाई बोअनर्गेस वार्ने मिन ओनैड्योवनी। आवलो ओमाने गर्जिनेलो ओज़ारं टाये। अन्ड्रियास, फिलिप, बारठोलोमाइ, मत्ती, ठोमा, अल्फयसलो ओज़ा याकुब, ठेडियस, सिमोन कनानी, होसोनो यहुडा इस्करियोत, जोये येसुलाई ढोका ओयोव।
येसु सोनो बालजिबुल
मत्ती १२:२१-२३; लुका ११:१४-२१
होकाम येसु फरि ज़ीःमडे ओनाव। फरि पनि मीरं बनै भ्या याडुप्सिव, येसु सोनो उसिसराई काङज़ ज़्याव माडैरंये। आव रोः ठैडे येसुलो उज़ीःमलारं, येसुलाई चनरिःने याराव, कडालेकं मीराई येसुलाई उडिमाक ओपोकं माले वार्डे हैयाडोज़्याव।
यरुसलेमलाम राव सास्त्रटा न्याम पैने मीराई हैयावारो, “नोसं बालजिबुल लिज़्या, हो ज़्याःराई यासेःर मुन्घुलो ओसक्तिये ज़्याःरंलाई पुलैज़्यावरं।”
होकाम येसुये होरंलाई ओछ्योकं खुल्डे सात्रोङाम हैओडोवरं, “सैतानये सैतानलाई कैजैडे हाइडुव?” कोइ राज्यलं या-याज़ मामिलिरंखे भने हो राज्य नास टाडे नाये। कोइ ज़ीःमलं पनि या-याज़ मामिलिरंखे भने हो ज़ीःम पनि नास टाडे नाये। कडालेकं ज़्याःये ज़्याःलो उबिरोडि टाडे फुट यारोयोखे भने नो नास टाये, कडावार्क होलो नास टाने ओबेला राव टाये।
काङ्कायेज़ बल्ल्या मीलाई माकीडे उज़ीःमलं पसिडे ओढन पैसा मालुटिडुव। ङाःडे नोये नो बल्ल्या मीलाई किडे मान्त्राज़ नो मीलो उज़ीःम लुटिडुव। ङा डस्साज़ जेलाई हैङाडाच्योज़्या, मीलो स्यान्टै ओपाप छेमा टाने ले, सोनो परमेस्वरलो उबिरोड डोनेलाई छेमा टानेले, हैनि पनि चोखो आत्मालो उबिरोड डाडे बिज्यात झैनेलाई, खर्कज़ छेमा टाने माले, कडालेकं हो मी खर्कज़ छेमा माटाने पापी येःन्ट डोसि टानेले। मीराई “आवसं माचाव आत्मा लिज़्या” वार्डे येसुलाई हैयाडोव कारनये आव रोः ओपाङो।
येसुलो वामा सोनो ओभाइरं
मत्ती १२:४६-५०; लुका ८:१९-२१
होकाम येसुलो वामा सोनो ओभाइरं राडे, पाखाङज़ च्याङसिडे येसुलाई खुल्ने वार्डे मी यापरिःङो। येसुलो ओछ्योयालं माहुले मीरं चुङडे यालिज़्याकं हो मीराई येसुलाई हैयाडोव, “रःङखेने नामा, नभाइरं सोनो नबैनीरं नङलाई पाखाङ खिम्सनज़्यारं।”
येसुये नोरंलाई हैओडोवरं, “ङामा सोनो ङाभाइरं काङ्कारं?” होकाम होकाला मीरं लेवडे रःङडे येसुये हैओवारो, “गरःङच्योरंके, आवरंज़ ङामा सोनो ङाभाइरं। कडालेकं जोरं परमेस्वरलो उइछ्या अनंसार बारं होरंज़ ङामा, ङाभाइरं सोनो ङाबैनीरं।”
Wale Magar Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.