Wale Magar Kham
मर्कुस 4
ढुर वानेलो ओसात्रो
मत्ती १३:१-२३; लुका ८:४-१५
येसु फरि गालील डहंलो ओछ्योकं चुङडे पैने सुरु ओडोव, हो बेलाकं ओछ्योयालं बनै भ्या मीरं याडुप्सिव। मीरं आढङ भ्या लेवरं, येसु डहला टोबो डोङ्गाटं पुलुडे होटंज़ उचुङो। होकाम मी भरि डहंलो ओछ्योकं नामलं च्याङसिव लेवरं। येसुये सात्रोङाम नोरंलाई भ्या रोः ओपोयोरं। येसुये ऐ वार्डे सिछ्या ओयोवरं,
“ठैच्यो! टोबो ढुर वाने मी ढुर वाने ओनाव। ढुर ओवाज़्याकं कोइ येम छ्योयालं याटेःव, नो येमछ्योयाला टेःव ढुररं बाज़ारं राडे याज़्योव। कोइ ढुर ढान्ड लेव येःङलं याटेःव, गम टिगिडा टाडे चानोज़ उपरिव। निमीये उहिपो बेलाकं ओजरा नामलं भ्या मागाडिसिव टाडे चानोज़ ओठोङो। कोइ ढुररं ज़ु घार्ल याटेःव। होकाम ज़ुरं घ्योडे नोलाई याछ्यापो होकाम पिपिरुरु टाडे ओसै माझाडे ओडान्ठ्या याटाव। होकाम कोइ ढुर के गमस्यालं ओटेःव। परिडे घ्योडे ओसै बनै झाडे कोइये तीस गुना, कोइ साठी गुना कोइये, सय गुना बनै ओसोयो।”
येसुये होला ठैनेरंलाई हैओडोवरं, “जो मीलो ओना ले हो मीये ओठोयोकं।”
सात्रोङाम कडाने पाङने
मत्ती १३:१०-१७; लुका ८:९-१०
येसु ओबाठंङ उलिज़्याकं मीरं यानाव झिन्डे बारं जना उसिसरं सोनो ओल्स बारिज़्याव मीराई येसुलाई नझाव सात्रोलो ओमाने कडि वार्डे यापजोयो। येसुये होरंलाई हैओडोवरं, “जेलाई परमेस्वरलो ओराज्यला गुप्त रोःरं स्यान्टै प्रस्टज़ यासिव लिज़्या,” बुरु यहुडीरंकाम उरुका मीरंलाई के सात्रोङामज़ हैडाने टाज़्या। हैजैडे,
नो मीराई भाल्सिने के भाल्सिज़्यारं,
हैनि पनि मारःङरंये।
ठैने के ठैज़्यारं,
हैनि पनि माबुझिरंये।
नेटाव याम्टाखिनके, परमेस्वर लेवडे यायुङ यासोवोलरंहो,
होकाम नोये यापाप छेमा याडोड्योवरंहो।1
ढुर वाने सात्रोलो ओमाने
येसुये नो मीरंलाई हैओडोवरं, “जे आव सात्रोलो ओमाने जेमसनये? आव सात्रोलो ओमाने जेमसनखे भने छुटं सात्रोरं झन कैजैडे जेसन्केड? ढुर वानेये परमेस्वरलो ओपाङ वावये। कोइ मीरं येम छ्योयाला वासिव ढुर स्यानाव टारंये। नोरं परमेस्वरलो ओपाङ याठोयोपानाज़ यायुङला वासिव बचनलो ढुर सैतानये लाङोये। हैजैडेज़ ढान्डला परिव ढुर स्यानाव मीरं एटाव टारं, जोराई बचन ठैरंये होमान्त्राज़ रेङये-रेङये यायुङलं नैरंये। होकाम नोराई याजरा याम्झावये नोरं भ्या माटिकिडुरं। होकाम बचनलो ओकारनये डुखं डैरं होसोनो सहटैसिव निःरं, नोरं चानोज़ ढलिरंये। ज़ुराई याघार्ला परिव ढुर नोरंज़, जोराई परमेस्वरलो ओपाङ ठैरं, होकाम आव प्रिठीबीला चिन्ता, ढन सोनो उरु रोःराई यालोभये बचनलाई मेःरंये, होकाम ओडान्ठ्या ओटाव स्याव टारंये। चाव गमस्या लेव येःङलं वासिवरं नोरंज़ जोराई परमेस्वरलो ओपाङ ठैडे हो अनंसार बाडे तीस, साठी सोनो सय गुना यासै झारंये।”
डियाटोटा नैसिव टुक्कि
लुका ८:१६-१८
येसुये हो मीरंलाई टोबो एटाव सात्रो झाडे ओयोवरं, “काङ्का मीये पनि भाङ खाङडे पराटये माकपो होसोनो खाटं डुङलं मानोयो। होकाम नोये डियाटोटं नैने वार्डेज़ माखाङोये डोरो? हो मान्टि जो बस्त मोःडे नैसिवले हो पाखाटं रःन्नेले, जो बस्त कप्सिव ले हो फैसिनेले। जो मीलो ठैने ओना ले होये ओठोयोकं।”
येसुये फरि नोरंलाई हैओडोवरं, “जे जो रोः जेठैज़्या नो रोः चावसं ठैच्यो। जो जालाम जे फोडे जेयोज़्यारं हो जालामज़ फोडे जे पनि डैनेजेले। होकाम जे झन भ्या डैनेजेले। कडालेकं जोसं लिज़्या होये उरु पनि डैनेले, होकाम जोसं माले होसं लिज़्याव पनि नान्सिने ले।”
सम्फरिव ढुरलो ओसात्रो
येसुये फरि ऐ ओवारो, “परमेस्वरलो ओराज्य एटाव ची, टोबो मीये येःङलं ढुर वावये, होकाम नो मी रिलं ओइस्यानि पनि, लाकं सन्सिव ओलेनि पनि नो ढुर लाकं रिलं परिये, घ्योये। नो ढुर कैजैडे परिडे ओघ्योज़्याव हो नो मीये मासोनो। येःङये ओल्ज़ नो पिमा ढुरलाई सपरिवये होकामटा ङाःडे कोङ्कल्याडे घ्योडे ओबाला ठाङ्डे ओसै झावये। अन्न उमिःनो मान्त्रा नो मीये हङस्याये क्यावये, कडालेकं बाली सयारिने बेला राव टाये।”
सुरसुङलो उढुर
मत्ती १३:३१-३२,३४; लुका १३:१८-१९
येसुये फरि हैओवारो, “परमेस्वरलो ओराज्यलाई गे कडिसं गेडान्जिके? होसोनो कडि सात्रो झाडे आवलो ओमाने ङापलाड्याच्यो के? परमेस्वरलो ओराज्य टोबो सुरसुङलो उढुर स्यानाव लिज़्या, नो येःङलं वासिये। स्यान्टैराई भन्डा आलिज़ा ढुर आवलोज़ ओटानि पनि नो नामलं वासिये होकाम नो परिडे घ्योये, स्यान्टै ङःनराई याबिरवा भन्डा नो घ्योव टाये, होसोनो घ्यो-घ्योव ओखार ओखिर झावये होकाम नमटा भुर्ज़्याव बाज़ारं ओछायाँलं याज़ीःम झैरंये।”
मीराई याबुझिडुव समं परमेस्वरलो ओपाङ गुबुझिरंकं वार्डे एटाव बनै भ्या सात्रोङाम नोरंलाई ओपोयोरं। येसुये सात्रो माझाडे मीरंलाई मापोयोरंये, उसिसरंलाईयाज़ याबाठङ यालेकं नो सात्रोलो ओमाने खुलिड्योवरंये।
येसुये घुइरंलाई ओठकनोयो
मत्ती ८:१८,२३-२७; लुका ८:२१-२५
हो छ्याम रीःमडे येसुये उसिसरंलाई हैओडोवरं, “बा, गे डहं होपंटं गेनाके।” माहुले मीरासं याभासिव पाना येसु जो डोङ्गाटं पुलुडे उलिज़्याव हो डोङ्गाटंज़ चुसिडे उसिसरासं यानाव यासं उरु डोङ्गारं पनि लेवरं। यानाज़्याकं बनै घ्योव घुइरं राडे डोङ्गालाई रीःलं पल्टैने ओपानो रीःलो ओछल्का डोङ्गालं पसिडे डोङ्गालाई बुडैने ओपानो। होबेलाकं येसु डोङ्गाटं उझिन्ङ उगुम झैडे ऐस्याडे ङःल्डे उलिज़्याव। उसिसराई येसुलाई सोचैडे हैयाडोव “गुरबा गे के बुडिडे गिसिरिडुखे वार्ने नङलाई चिन्ता माले?”
येसु सनसिडे च्याङसिडे घुइरंलाई हक्लैडे रीःलाई पनि “चिम लेन! गाइगुइटालेङन” वार्डे आग्या ओयोव। होकाम बतासं ओठकंनिव, रीः पनि ओअडिव। होकाम स्यान्टै च्याम-चिम ओटाव। येसुये नोरंलाई हैओडोवरं “जे कडाने जेछेज़्याव? जेसं बिस्वासज़ उम्लिज़्यावरो?”
नोरं बनै छेडे या याज़ हैयावारो, आव मी काङ्का? घुइरंये सोनो रीःलो ओछल्काये पनि ओपाङची ठैज़्यारं।
Source notes (1)
- Cross-reference यसैया ६:९-१०
Wale Magar Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.