Skip to content
BibleKenya

Wale Magar Kham

मर्कुस 5

येसुये माचाव आत्मा लेव मीलाई ससोमोये

मत्ती ८:२८-३४; लुका ८:२६-३९

येसुरं उसिसरासं गालील डह होपंटं गेरासेनस प्रडेसलं याराव। येसु डोङ्गाटाम उझरिवपानाज़ माचाव आत्माये क्योःडे ओनैज़्याव टोबो मी खाडर लेव पोलाम राडे येसुसं ओडैसिव। नो मी एकसप्ड्या खाडरयालंज़ लेये। नोलाई काङ्काये पनि साङ्गलये माकीडुरंये। नो मीलाई भ्या पालाज़ क्योःडे साङ्गलये किडे हलालं झासिव लेव। साङ्गलये याकिनि पनि पाटा नि पटं छाङडे हलारं पनि केःडे ख्याने सक्ति लेव, हैजैडे काङ्कायेज़ माक्योःडुरंये। नो, लाकं रिलं एकसप्ड्याज़ खाडरयालं, डान्डायालं किःवग्यान ओक्याङयालं लुङये रुमडे बारिये।

नोये येसुलाई टाडाङं ओरोःङोपानाज़ ज़ोरिडे उघुन्डा टिकिडे ओखङटाम ढो ओडोव। बनै कस्सिडे किःडे ऐ ओवारो, “ए घ्योव परमेस्वरलो ओज़ा येसु, ङा नङसं कडि समन्ड उलिज़्याव ड? परमेस्वरलो उमिनङाम ङा नङलाई हैङाडान, ङालाई डुखं टायाङ।” कडालेकं येसुये होलाई ए माचाव आत्मा नो मीलो ओक्याङटाम पुलुङंन वार्डे ङाःडेज़ हैडाडे ओनैज़्याव।

येसुये नोलाई हैओडोव, “नमिन कडि?”

नोये हैओवारो, “ङा ङामिन के ‘फौजी’ ची गे के बनै भ्या ची गेले।” नो माचाव आत्माराई येसुलाई ऐ वार्डे बनै बिन्ती याडोव, गेलाई आव पोलाम टापुलैसि।

नो बेलाकंज़ याछ्योका डान्डाटं घ्योव टबगाल वोरं यालाज़्याव। नो माचाव आत्माराई येसुलाई “गेलाई नो वोराई याक्याङटं नाव गयासिके गे नोराई लेवटंज़ गेपंसि” वार्डे बिन्ती याडोव। येसुये नोरंलाई गनाच्योके वार्डे हैओडोरंकं नो माचाव आत्मारं नो मीलो ओक्याङटाम पुलुडे वोराई याक्याङटं यापसिव। होमान्त्राज़ नो वोरं डान्डाटाम मेडे उरालाडे गुर्किडे रहलं टेःडे होलंज़ बुडिडे यासिव। नो वोराई याबगाललं नेहजारया लेवरं।

नो रःङडे वो ग्वालारं याछ्यासैये ढोङ्डे सहर, नाङखारयालं बात्रा याडोनाव। नो रोः ठैने भरि कै ओटाव वार्डे यारःङरिव। नो मीरं येसु लेवकं याराकं नो फौजी ज़्याः लागिव मी ज़्याःराई राःडे ओक्वारं क्वाइसिडे चावसंज़ सम्डे चाव युङसं चुङडे उलिज़्याव रःङडे रःङने मीरं बनै याछेव। नो रःङनाव मी भरिये मारःङनाव मीरंलाई ज़्याः लागिव मीलाई सोनो वोरंलाई कै ओटाव वार्डे हैयाडोनावरं।

हैजैडे आव गेरासेनस प्रडेसलाम पुलुडे गनानके वार्डे येसुलाई बिन्ती याडोव।

येसु डोङ्गाटं उपुलुनारिज़्याकं नो ज़्याः लागिव मीये ङालाई पनि नङसं लाङसंङ वार्डे बिन्ती ओडोव।

येसुये नो माचाव आत्माये ओडापो मीलाई ओल्स लाङने माभनड्योवये “बुरु नङ नज़ीःमडे नाडे ननै नमीरंलाई प्रभुये ङालाई डया डाडे बनै घ्योव येःन ओडाड्याङो वार्डे हैडोनारं” वार्डे येसुये हैओडोव।

हैजैडे नो मी डेकापोलिस नाङखार भरिलं नाडे येसुये ओलागिटं डाडेओयोव बनै घ्योव येःनलो प्रचार ओडोनाव। नो रोः ठैने मी भरि बनै अचम्बज़ याटाव।

याइरसलो मेमा ओज़ा सोनो येसुलो ओक्वा छुने मेमा

मत्ती ९:१८-२६; लुका ८:४०-५६

येसु फरि डोङ्गाटंज़ वोल्डे डह आफंटं ओराकं बनै भ्या मीरं ओछ्योयालं याडुप्सिव। ओल डह छ्योकंज़ उलिज़्याव। नो बेलाकंज़ यहुडीरं याडुप्सिने ज़ीःमला टोबो याइरस उमिन लेव सेःर मी राडे, येसुलाई रःङडे येसुलो ओखङटंज़ उफुलुप्सिव, “ज़ीमज़ा मेमाङाज़ा सिनेपान्ज़्या राडे नोलो ओक्याङटं नकुइ नैडे नयोखिन नो सम्डे बान्चिने ले” वार्डे बिन्ती ओडोव।

येसु नो मीसंज़ ओनाव। बनै भ्या मीरं येसुलो उझिन-उझिन आसै-होसै यालं केःकेः याछुइसिनाव।

नो मीराई याखार्ल बार बर्सकाम्टानि ओक्याङटाम झी भोने रोगो लागिव टोबो मेमा पनि लेव। नो मेमा सम्नेलो लागिटं बैडरं लेवकं नाडे ओल्स लिज़्याव स्यान्टै ओढन सम्पति खेम्डे पनि मासमये झन भ्या ठलिडे उलिज़्याव। येसुलो ओबारेलं नो मेमाये ठैडेओनैज़्याव, हैजैडे मीराई याखार्ल पसिडे येसुलो उझिनङाम राडे ओक्वाटं उछुव। नो मेमाये उयुङ-उयुङलं, “येसुलो ओक्वाटं मान्त्राज़ छुवङाडैनि पनि ङासम” वार्डे हैओवारो।

येसुलो ओक्वा उछुवपानाज़ नो मेमालो ओक्याङटाम झी भोने रोगो ओसोमो, नो रोगो ओसोमो ओक्याङटंज़ ठा ओसोनो।

होपानाज़ येसुये ओक्याङटाम सक्ति उपुलुव ठा ओसोनो होकाम उझिन्डे न्याःडे “काङ्काये ङाक्वा उछुड्याङो?” वार्डे हैओडोवरं।

येसुलो उसिसराई आला मीरं केःकेः छुइसिवलं पनि नङ कडि “काङ्काये ङालाई उछुसोङो?” नवार्ज़्याव वार्डे हैयाडोव।

होकाम ङालाई छुने काङ्का वार्डे येसुये आडे होडे ओरोःङो। नो मेमाये ङासमडुखे वार्ने सन्डे छेडे गुये-गुये राडे येसुलो ओखङटं फुलुप्सिडे ओललाई कै ओटाव नो स्यान्टै सत्य रोः येसुलाई हैओडोव। येसुये हैओडोव, “ए मेमाङाज़ा नबिस्वासयज़ नङलाई ससम्डे नैसोनो। चावसं नान। नो रोगो ओसम्क।”

येसु नो मेमासं ओपाङज़्याकज़ यहुडीरं याडुप्सिने ज़ीःमला सेःर मीलो उज़ीःमङाम मीरं राडे “आबो गुरबालाई कडाने डुखं नयोज़्याव? मेमा नज़ा के यासिडु” वार्डे हैयाडोव।

नो मीराई यापाङ माठैडे येसुये यहुडीरं याडुप्सिने ज़ीःमला सेःर मी याइरसलाई “टाछेन बिस्वास याज़ डो” वार्डे हैओडोव। येसुये पत्रुस, याकुब सोनो याकुबलो ओभाइ युहन्नालाई याज़ ओल्स ओलाङोरं, उरुकारंलाई मालाङोरंये। येसुरं यहुडीरं याडुप्सिने ज़ीःमला सेःर मीलो उज़ीःमकं याकेराकं मीरं बनै कस्सिडे याघरज़्याव येसुये ओरोःङो। येसु नो ज़ीःमलं पसिडे होला घर्ज़्याव मीरंलाई हैओडोवर, “जे कडाने जेघर्ज़्याव? आव लुज़ा सिव माङ्कची ऐज़ ऐस्याडे उलिज़्याव ची।”

येसुलो ओपाङ ठैडे मीरं बनै यासाःव। येसुये मी भरिरंलाई पाखाडे पुलैडे लुज़ालो ओबाबु, वामा सोनो सोमबऱ्याङ उसिसरंलाई लाङडे लुज़ा लेव पोकं यानाव। नो लुज़ालो उकुइटं क्योःडे येसुये हैओडोव, “तालिता कुमी।” तालिता कुमीलो ओमाने ए बची गोसोनके।

होपानाज़ नो लुज़ा ठर्च्याङसिडे आडे होडे ओबारिव। नो लुज़ा बारं बर्सका लेव। नो रःङडे मीरं बनै अचम्ब याटाव। होकाम येसुये ओल्स लेनेरंलाई ऐ वार्डे कर्रा आग्या ओयोवरं, “आव रोः काङ्कालाईज़ हैटाडाच्योरं” होकाम फरि हैओडोवर, “आव लुज़ालाई ज़्याने ज़्याव रैडे याच्यो।”

Wale Magar Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.