Wale Magar Kham
मर्कुस 2
येसुये टोबो नसालो रोगो लागिव मीलाई ओससोमो
मत्ती ९:१-८; लुका ५:१७-२६
जामा डिनका येसु कफर्नहुमलं वोल्डे ओराव, होकाम होला मीरं येसु ज़ीःमलंज़ लिज़्या वार्ने रोः याठोयो। होलं बनै भ्या मीरं याडुप्सिव होकाम ज़ीःमलं मासुन्डे झला येमकाम पाखाङ पनि पोज़ माडैरंये, येसुये होला मीरंलाई परमेस्वरलो ओबारेलं प्रचार ओडोज़्याव। होकाम चार जना मीरं टोबो नसालो रोगो लागिव मीलाई घुर्डे येसु लेवकं यारोयो। नलं बनै भ्या मीरं लेवरं हैजैडे हो मीलाई येसुलो ओछ्योकं मारैडुडे हो मीराई येसु उलिज़्याव सोराटं रोटं छाने कोडे, होलाम नसालो रोगो लागिव मीलाई ऐस्याडे उलिज़्याव ओटानसंज़ मेलं याकेव। येसुये नो मीराई याबिस्वास रंःङडे नसालो रोगो लागिव मीलाई हैओडोव, “ए ङाज़ा नपाप छेमा याटाडु।”
नकं नेबऱ्याङया सास्त्रटा न्याम पैने मीरं चुङडे यालिज़्याव, होरं यायुङलं एटाव बिचार याडोज़्याव, “आव मीये कडाने ऐ लेडे ओपाङज़्याव? आव के परमेस्वरलो उबिज्याट ची। टोबो, परमेस्वरकाम उरु काङ्काये पाप छेमा डोडुवडं?”
होकाम होरं एटाव बिचार डोज़्यारं वार्डे होपानाज़ येसुये ओआत्मालं सन्डे हैओवारो, “जे कडाने जियुङलं एटाव बिचार जेडोज़्याव? नसालो रोगो लागिव मीलाई ‘नपाप छेमा याटा’ हैडोने सजालो सै ‘सोङन, होकाम नटान छेन्डे नान’ हैडोने, कडि सजालो टा? मानवालो ओज़ालाई प्रिठीबीलं पाप छेमा डोने अडिकार ले वार्ने रोः सन्डेनैच्यो।” होकाम येसुये हो नसालो रोगो लागिव मीलाई हैओडोव, “ङा नङलाई हैङाडानज़्या, गोसोनके, नटान गछेन्के, होकाम नज़ीःमडे गनानके।”
नो मी सोडे, चानोज़ ओटान छेन्डे हो मीराई याङाःकाम ओनाव। होला स्यान्टै मी भरि बक्क टाडे हैयावारो, “एटावके खर्कज़ गेरोःङो माले” वार्डे परमेस्वरलो ओप्रसन्सा याडोव।
येसुये लेबीलाई उखुलो
मत्ती ९:९-१३; लुका ५:२७-३२
येसु फरि टखेप गालील डहंलो ओगोराटं ओनाव। होकं बनै भ्या मीरं येसु लेवकं याराव, होकाम येसुये हो मीरंलाई ओपोयोरं। होकाम येसु ओनाज़्याकं अल्फयसलो ओज़ा लेबीलाई सिरमा डुप्नेराई यापोलं चुङसिडे उलिज़्याव ओरोःङो, होकाम नोलाई हैओडोव, “ङाछिन्ट गराङन्के।” हो च्याङसिडे येसुलो उझिन्ट ओराव।
होकाम येसु लेबीलो उज़ीःमलं काङ ज़्याने चुङडे उलिज़्याकं बनै भ्या सिरमा डुप्नेरं सोनो पापीरं पनि येसु सोनो उसिसरासं चुङडे यालिज़्याव। कडालेकं येसुलो उझिन्ट नाने मीरं बनै भ्या लेवरं। येसुये पापीरं सोनो सिरमा डुप्नेरासं चुङडे ओज़्योज़्याव रःङडे फरिसी1रासंका न्याम पैने मीराई येसुलो उसिसरंलाई हैयाडोवरं, “नोये कडाने सिरमा डुप्नेरं सोनो उरु पापीरासं चुङडे ओज़्योज़्याव?”
हो ठैडे येसुये नो मीरंलाई हैओडोवरं, “माठलिवरंलाई बैड माचाहिये, रोगीरंलाई याज़ चाहिये। ङा सहि मीराई यालागिटं ङाराव माङ्क, ङा के पापीरंलाई खुल्ने ङाराव ची।”
उपासिने बारेलं प्रस्न
मत्ती ९:१४-१७; लुका ५:३३-३९
टखेप बप्तिस्मा याने युहन्नालो उसिसरं सोनो फरिसीरं उपासिडे यालिज़्याव। नेबऱ्याङया मीरं राडे येसुलाई हैयाडोव, “युहन्नालो उसिसरं सोनो फरिसीराई यासिसरं उपासिरंये होकाम नङ नसिसरं कडा माउपासिरं?”
येसुये होरंलाई हैओडोवरं, “डुलाहा जन्तिरासं उलिज़्याकंज़ जन्तिरं उपासिरं डोरो? डुलाहा जन्तिरासं ओलेव समं नोरं माउपासिरंये होकाम बेला रानेले, जोकं डुलाहालाई जन्तिराई लेवकाम टाडा झैनेलेरं, होकं होरं उपासिनेलेरं।”
“काङ्कायेज़ पुरानो क्वाटं साःरौ क्वालो टाला माटालिव, मानिके पुरानो क्वा चिडे टालिसिव टाला सेलसिडे हाइसिये, होकाम चिउ झन माचाव रंःनये। काङ्कायेज़ आलो मड्डलाई पुरानो पिर्गुललं माझाव, मानिके हो मड्डये छालालो पिर्गुललाई अचीचिवये, होकाम पिर्गुल सोनो मड्ड नेबऱ्याङज़ खेर्डे नाये। हैजैडे आलो मड्डलाई साःरौ जालंज़ नैसिये।”
नाःसिने छ्यामका प्रभु
मत्ती १२:१-१४; लुका ६:१-११
टछा नाःसिने डिन छ्याम येसु उसिसरासं अन्न लेव येःङलाग्यानटं यानाज़्याव। होलाग्यानटं यानाज़्याकं उसिसराई याबै-याबैटं अन्नलो ओबाला याटिव। नो रःङडे फरिसीराई येसुलाई हैयाडोव, “रःङखेने, नाःसिने डिन छ्याम जो माडोने वार्सिवले आवरं कडाने होज़ याडोज़्याव?”
येसुये होरंलाई हैओडोवरं, “जो बेलाकं डाउड सोनो ओल्स लिज़्यावरं ज़्याव माडैडे याकरेव बेलाकं डाउड कै ओलेव? कडा जे खर्कज़ जिम्परिये रो? मुख्या सेवा डोने मी अबियाठारलो ओपालालं डाउड परमेस्वरलो उज़ीःमलं उपसिव, होकाम परमेस्वरलाई चरैःसिव बरे ओज़्योव, नो बरे मुख्या सेवा डोने मीकाम उरु काङ्कायेज़ ज़्याने माटाये, हो बरे ओल्स लेनेरंलाई पनि ओयोवरं।”
होरंलाई येसुये हैओडोवरं, “नाःसिने डिन मीलो ओलागिटं टाव ची, मीलाई नाःसिने डिनलो ओलागिटं झैसिव माङ्कची। हैजैडेज़ मानवालो ओज़ा नाःसिने डिन छ्यामका पनि प्रभु ची।”
Source notes (1)
- Footnote फरिसी येसुलो ओसमयका पैने मीरं
Wale Magar Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.