Skip to content
BibleKenya

Katu Bible Literal Text

Lu-ka 12

Xók bhêêl achêk, xók ganơr manưih bơk kaaq bhaan manưih karong madhiq lóóiq patơk mơ đâq grơl xóng ađêi, nek laloom tââm, Ađó tââp praaq palơq nôôq môôn-đô ađêi: “Nek chagơn jư ađêi kala tââq piêng ưng manưih Pha-ri-si, biêh nek paliêm hót nguôi. Bơơi kah ve rau bâân kadrêi palââp hơq e kah bâân tapakah, môôiq palââp hơq e kah bâân palââng n'nal. Kơi ađek hayơq, la rau dhơơm đu adhi anó móón kalóóng kanam e bâân xâng dhiq brương, lơq rau dhơơm adhi anó kabââp dhiq katór kalóóng buông kiêr e bâân praaq pakah dhiq pabhung đong. Dhơ kơi ađek, aku praaq palơq adhi anó nek nôôq manưih parjơơk ưng aku, óóq kakhin nek manưih leng chêt chak araang, hayơq tatun ađek kah rau chóóm têêng lơh dyơq. Bơơi aku e pakah đóng adhi anó n'nal phaai kakhin ngaai. Nek kakhin Yaang, xong xók ơi leng chêt chak araang, ve mataai m'peq palââng leq bóng óih. Alua, aku móón palơq adhi anó, nek kakhin Yaang achêk. Eh alua xââng panong achim a-iih bâân baan palơq janaaq bơơr đông jêên hơ? Hơq yươq n'đó panong dhiq kalóóng nôôq ađek nek bâân lơơi havil dhiq toom mat Yaang Pleng. Kơi ađek hơq xok dhiq akoq adhi anó patơk mơ ơi bâân yaap luch. Óóq kakhin: adhi anó ađaang janaaq lơh marchơng palơq bơk achim a-iih. Aku praaq palơq adhi anó la ngaai đơơp n'tóól aku toom mat palââng, nek Akóón Manưih e kung đơơp n'tóól ađó ađek toom nôôq dhơn pleng ưng Yaang Pleng, dyơq ngaai dyiin aku toom mat palââng nek e bâân dyiin lóóiq toom nôôq dhơn pleng ưng Yaang Pleng. Lơq dhơ dhangaai praaq paraaq tajơl lóóiq palơq Akóón Manưih e bâân lơơi, bơơi palơq manưih praaq chôlô tơk Chuôq Yaang Liêm e kah bâân lơơi lơt. Bơơi xók palââng kóóp đââng adhi anó leq nôôq đong gươl, kabhuh kadhâng akoq lơq nôôq đu têêng takóh, óóq karaang ađêi phaai paq ađêi kala ng'kơi môôiq hau rau, môôiq hau rau ađêi phaai papraaq, ơi kalóóng chênh jơ achêk, Chuôq Yaang Liêm e pachóóm adhi anó nôôq rau phaai praaq.”

Tatun ađek, mưi nak kalóóng ganơr manưih móón palơq Ađó: “Thêi ơơi, nhan kayua anó aku blah kavaan leq aku.” Bơơi Chuôq ââi palơq ađó ađek: “Amei ađek, ngaai kayua aku têêng takóh xêi xanêi môôiq manưih m'pơng blah kavaan đóng bơơr anhưa?” Hayơq Ađó praaq palơq piđó: “Phaai chagơn lơq jư ađêi kala tââq dyóp rau đu n'thaam, taai parmông ưng mưi nak eh rau dhiq xưa raai tââq kavaan ađêi.” Tatun ađek, Ađó truuih leq piđó mưi babi kơi ađô: “Dham hare ưng mưi nak kavaan tôôh liêm aviq, lơq ađó tư kanóq dhiq lóóm kơi ađô: ‘Aku e hau têêng ađôk, ơi aku kah dyơq ve dham đóng kađôôq aviq dhong ưng ađêi?’ Ađó móón: ‘Aku e têêng nô kơi: “Aku e rơh nôôq jơơng aku, kadhơng nôôq jơơng gamak lơh, lơq kađôôq leq ađek paluch haró aviq palơq nôôq ađô liêm ưng aku.” Hayơq aku e móón palơq ravaai aku: “Ravaai ơơi, amei ơi ve bơk kavaan kabhôôq lơơi koom đóng bơk kamó. Nek rathaai, cha, ơm lơq bhuui bhe.”’ Bơơi Yaang Pleng praaq palơq ađó ađek: ‘Manưih đu ngôôk tôôh, chênh hayum ađô ravaai amei e bâân tapei lóóiq, hayơq nôôq rau dhơơm amei ơi pasam e chô ngaai leq?’ Manưih koom karong karvaan kabhôôq leq ađêi hơq kah ve kavaan kalóóng Yaang Pleng kung kơi ađek.”

Hayơq Ađó praaq palơq nôôq môôn-đô ađêi: “Ơi taai ađek, aku móón palơq adhi anó, óóq karaang leq parmông ađêi, e hau cha — kung óóq karaang leq chak araang ađêi, e hau xơp n'đóh. Ơi parmông nek kiiq lơh tarmông, lơq chak araang kiiq lơh kun aau. Nek lêi achim a-aak, ađek nek piđó kah chóói kung kah xóót, kung kah ve jơơng môôiq đong kađôôq đóng leq piđó, hơq Yaang Pleng ban piđó. Adhi anó kiiq lơh nôôq achim n'nal n'đơq! Kơi lââng, ngaai kalóóng adhi anó, taai karaang, ve chóóm payaal kơơq đóng tangêi kaxe đơơi ađêi magamleh mat kah? Kơi ađek, la adhi anó dyơq kah chóóm têêng chapiên mưi tarnêêng katưưiq katit achêk, nek hau adhi anó vil karaang leq nôôq tarnêêng lââng? Phaai lêi leq pô dhalôôm — lêi piđó chat gamak ng'kơi. Piđó kah têêng nhưh, kung kah bhliiq hangươn. Bơơi aku praaq adhi anó n'nal, patơk kơi bhua Sa-lô-môôn, palơq tabhơt cha-iil tabah ưng bhua achêk, kung kah bâân xơp kun aau liêm kơi pô đu liêm kalóóng nôôq piđó. Manưih đu m'bưưiq lóóm huuiq, la Yaang Pleng dyơq paxơp kơi ađek đóng leq pô bhơơi dhiq klung nek m'ma ađôk dyơq rayiiu m'peq leq óih, nek adhi anó dyơq liêm lơh n'nal n'đơq. Adhi anó óóq chik chêk hau ađêi cha lơq hau ơm, kung óóq karaang. Ơi dyóp dhanuôr dhiq hóng katiêk buôn chik chêk nôôq rau ađek, bơơi Ama ưng adhi anó ơi n'nal kơi adhi anó kơng nôôq rau ađek. Dhơ kơi ađek, phaai chik chêk katiêk ưng Ađó, nek nôôq rau achêk e bâân đóng kơơq leq adhi anó. Kabhuh katưưiq ơơi, óóq kakhin, taai Ama ưng adhi anó bhuui lóóm đóng katiêk pleng leq adhi anó. Phaai baan kavaan ưng ađêi lơq nh'xóóng đóng manưih ngeeo. Phaai pasam đóng ađêi chadhung yươq bâân tanteek — nek kavaan yươq chóóm hư bil dhiq pleng, nek dhiq manưih tatông yươq chóóm pađan, gru kóót kung yươq chóóm pahư. Ơi drươp karvaan adhi anó n'dhiq tơơt nek lóóm adhi anó kung e tơơt dhiq ađek.

Tarveng ưng adhi anó phaai xeet lóóiq, lơq dhơu adhi anó phaai bâân jư đóng aang, lơq adhi anó phaai kơi nôôq manưih đu đương lêi kala ưng ađêi xók ađó val chô tââq bhiêk đaam, đóng xong xók tơk lơq takóq palóng, piđó n'drươh ve chóóm lóng đóng kala. Phươk đóng nôôq dhơn ratơơq ađek nek nôôq manưih xong xók chô tơk, kala e lêi nôôq dhơn ratơơq dyơq blââk đương. Lalua, aku móón palơq adhi anó kơi ađô kala e xeet tarveng ađêi, lơq kayua piđó ađek tơơt leq baang chacha, hayơq kala pơh yaauq piđó xók vôôiq yaauq ting chanak. Patơk mơ xók kala chô leq m'pơng hayum, môôiq patơk mơ leq đan brương, lơq kala ve chóóm lêi kơi ađek, nek phươk đóng nôôq dhơn ratơơq ađek. Bơơi phaai n'nal kơi ađô, ađek nek la kala đong ơi n'nal n'đó jơ manưih tatông bhral, nek ađó lalua kah đóng đong ađêi bâân manưih tatông mót. Adhi anó kung phaai ravang lơơi, taai jơ đu adhi anó kah ve n'nal, nek Akóón Manưih e bhral.”

Hơq Phi-e-rơ tamóh: “Kakoh Chuôq, Amei truuih babi ađô đóng nôôq yi, môôiq kung đóng dyóp ngaai?” Lơq Chuôq ââi: “Hayơq nek, ngaai nek manưih jư lêi bhơt lóóm, tabech galang, nek manưih đu kala e pajaau đóng lêi dhiq piing nôôq dhơn ratơơq ưng ađêi, đóng nh'xóóng phơn tarmông leq piđó xók pâng jơ? Phươk đóng dhơn ratơơq ađek, nek manưih hayơq kala ađêi, xók vôôiq lêi, e lêi xók têêng pâng kơi ađek. Alua, aku móón palơq adhi anó kơi ađô kala e pajaau dhơn ratơơq achêk kadhâng tabhơt drươp karvaan ưng ađêi. Bơơi la dhơn ratơơq ađek praaq kalóóng lóóm ađêi, kơi ađô: ‘Kala aku dyơq đươnh ve chô,’ hơq tââp m'pah m'bhiiq nôôq dhơn padruuih lơq dhơn pađiil, n'drươh cha n'drươh ơm, vaaih ból plơ, nek kala ưng dhơn ratơơq achêk e chô tơk kalóóng tangêi hayơq ađó kah n'nal, alua, xók jơ đu ađó kah n'nal, lơq kala e m'bhiiq ađó gavar xar tapaleh, hayơq patơơt dham ađó đóng madhiq palơq nôôq manưih đu môôp huông. Dhơn ratơơq ađek, nek n'nal karnóq kala ađêi hơq kah ravang môôiq têêng ting karnóq kala, e glêh tabhiiq bơk. Bơơi dhơn ratơơq kah n'nal hayơq têêng tarnêêng ađaang taphaak e bâân tambhiiq m'bưưiq. Kơi lââng, ngaai, nek đu ơi bâân tađóng bơk, hayơq bơk rau e bâân nhan lóóiq tââq manưih ađek, lơq palơq ngaai ơi bâân pajaau đóng bơk, rau dhơơm e bâân nhan tââq manưih ađek lóóiq dhương bơk lơh.

Aku ơi bhral đóng m'peq óih leq katiêk, lơq aku hau rau rââm la ađó ơi bâân yuur róh aq. Bơơi aku dyơq phaai đơơp mưi pheep bap-teem, lơq aku ka-ai karuôq n'nal n'đơq đóng tơk xók ađó bâân xong! Adhi anó ngóq kơi ađô aku bhral đóng đââng yươq rauha leq hóng katiêk hơ? Eh rau, aku praaq palơq adhi anó, pâng lơh nek rau tablah. Ơi tââq ađôk, mưi parlóng đong e ve xââng chanak nek tablah xóng piđó — pe tarjơl lóóiq bơơr lơq bơơr tarjơl lóóiq pe. Piđó nek tablah xóng piđó, akonh tarjơl lóóiq akóón padruuih, lơq akóón padruuih tarjơl lóóiq akonh, akan tarjơl lóóiq akóón pađiil lơq akóón pađiil tarjơl lóóiq akan, yaya tarjơl lóóiq akóón mamaai ađó lơq akóón mamaai tarjơl palơq yaya.”

Hayơq Ađó kung praaq palơq tanóói manưih dhanuôr: “Xók adhi anó lêi mưi garboq dhaluk vaaih hót mat blót, adhi anó n'drươh móón kơi ađô: ‘Pleng bó ravang tơk,’ lơq tarnêêng vaaih pâng kơi ađek. Dyơq xók adhiiq charhóóng hóng pruung, adhi anó móón kơi ađô: ‘E ve parang parđiêq,’ nek tarnêêng vaaih kơi ađek. Kabhuh đu paliêm hót nguôi giêl! Adhi anó n'nal chik lók nôôq karnal ưng pleng lơq ưng katiêk, bơơi ng'hau adhi anó kah chóóm n'nal đóng chik lók ganah bhêêl xók ađôk? Hau adhi anó patơk mơ kah tư ađêi kanóq xâng hau rau nek pâng? Ơi n'drươh xók adhi anó ting vôôiq palơq manưih kaauq ađêi tơk leq takóh xêi xanêi, phaai têêng tabhlơng praan đóng praaq paliêm dyóp rau palơq manưih ađek xók dhiq kalơng, đóng m'bưưiq m'bâ palââng yươq galôôi adhi anó tơk takóh xêi xanêi, hayơq takóh xêi xanêi pajaau adhi anó đóng kabhuh linh, lơq kabhuh linh król adhi anó leq đong kanam. Aku móón palơq adhi anó, lalua adhi anó e kah bâân gluh tââq đong kanam patơk xók adhi anó chróót luch đông jêên tatun.”

Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.