Lu-ka 13

1Maphơn manưih ve mat leq xók ađek truuih lóóiq đóng Ađó leq nôôq manưih Ga-li-lê đu Phi-laat ơi pei ahaam nôôq manưih achêk kaluk palơq bhanuôih ưng piđó. 2Xók ââi lóóiq, Ađó móón palơq piđó: “Nôôq pe ngóq kơi nôôq manưih Ga-li-lê achêk nek matu lơt lơh dyóp ngaai manưih Ga-li-lê đu lââng taai piđó phaai đơơp kơi ađek hơ? 3Aku móón palơq nôôq pe, eh rau kơi ađek. Dhơ kơi ađek, la nôôq pe kah klôôq lóóm, nek paluch kung e bâân chêt bil kơi ađek. 4Môôiq kơi majêt takóól manưih tôôh, hơq đong yaal dhiq Si-lô-ê ơi kalơm hachươp katơq lơq leng chêt piđó: Nôôq pe ngóq kơi piđó nek nôôq manưih matu lơt bhlơng lơh dyóp nak mamông dhiq Jê-ru-sa-leem alua? 5Aku móón palơq nôôq pe, eh rau kơi ađek. Bơơi la nôôq pe kah klôôq lóóm, nek tabhơt kung e chêt bil kơi ađek.”

6Hayơq Ađó truuih babi ađô: “Manưih achêk ve choh tââm tarung dhiq kalóóng bhươn nho ađêi, lơq ađó vôôiq chêk pale dhiq tââm n'lóóng ađek bơơi kah ve lêi. 7Ađó móón palơq manưih têêng bhươn: ‘Amei lêi nô, pe kamó tââq xók đu aku vôôiq chêk pale dhiq tââm tarung ađô hơq kah ve lêi. Nek kươl ađó vaq. Ơi hau rau taai hơq ađó patơk mơ padhêh katiêk kah malơơi?’ 8Bơơi xók ââi lóóiq, ađó ađek praaq palơq kala: ‘Abhươp ơơi, nhan nek lơơi ađó lóóiq mưi kamó ađô kơơq dyơq, tơk mơ hơq aku ơi uôch katiêk xirvir ađó lơq bui mathuk. 9M'bưưiq m'bâ nek, leq tatun ađó ve chóóm bóóng pale … dyơq la lalua kah ve rau, e amei kươl ađó!’”

10Ađó xók truuih pachóóm kalóóng mưi đong gươl leq tangêi Sa-baat, 11lơq tôôh, mưi manưih pađiil bâân abhưi ka-ai bóq bhluuch majêt takóól kamó, ađó bâân vang hóng lơq kah chóóm dyương tapat đuôh. 12Xók Chuôq Jê-su lêi akan ađek, Ađó kayua dhaloong hayơq móón palơq akan ađek: “Anó ơơi, anó ơi bâân pagluh tââq rau talum ka-ai dreh ưng amei.” 13Ađó lơơi têi dhiq akan ađek, n'drươh akan ađek yuur dyương tapat, lơq bhi haanh Yaang Pleng. 14Bơơi xók manưih jư lêi đong gươl yuur praaq, ơi pagrâ taai Chuôq Jê-su ơi payươh kalóóng tangêi Sa-baat, hayơq ađó móón palơq ganơr manưih kơi ađô: “Ve chapat tangêi đu kalóóng nôôq tangêi ađô nek phaai matêêng. Ơi kơi ađek, phaai tơk payươh leq nôôq tangêi achêk, bơơi eh rau leq tangêi Sa-baat.” 15Bơơi Chuôq ââi lóóiq akonh ađek, lơq Ađó móón: “Kabhuh paliêm hót nguôi giêl! Kah alua leq tangêi Sa-baat dyóp chanak nôôq pe maar lêh tarlêi chanoq karók môôiq axeh ưng ađêi gluh tââq karól đóng keh ađó vôôiq ơm đơơk alua? 16Dyơq manưih pađiil ađô, nek akóón pađiil ưng Ap-ra-haam, nek manưih đu Sa-taan ơi klooiq kadhâng, lêi tôôh, kalóóng bhluuch majêt takóól kamó, ađó ađôk kah kơng bâân paloh tââq et ađô leq tangêi Sa-baat alua?” 17Xók Ađó praaq nôôq paraaq achêk, dyóp ngaai đu jơl Ađó maar kachiit mat, dyơq luch tanóói dhanuôr bơk nek bhuui marhaal leq tabhơt nôôq tarnêêng chrih liêm bâân tatêêng taai Ađó.

18Hayơq kơi ađek, Ađó móón: “Katiêk ưng Yaang Pleng nek thê kơi palơq hau rau, lơq aku e marchơng ađó palơq hau rau? 19Katiêk achêk nek makơi mưi kaliêng habhêi đu mưi nak pei chóói kalóóng bhươn ađêi, hayơq ađó yuur gamak vaaih xar mưi tanââm n'lóóng, lơq achim pleng têêng đong dhiq đóóng ưng ađó.”

20Ađó vil praaq: “Aku e marchơng katiêk ưng Yaang Pleng palơq hau rau? 21Katiêk achêk nek thê kơi piêng đu mưi chanak pađiil pei karluk leq pe xanuk mun patơk xók mun yuur chơh.”

22Hayơq Ađó vôôiq leq nôôq charvaal lơq bhươl kanóón, n'dhương truuih pachóóm n'dhương bhiêk vôôiq kalơng tơk leq Jê-ru-sa-leem. 23Xók achêk, mưi manưih tôôh tamóh Ađó: “Kakoh Chuôq, eh alua chapiên m'bưưiq manưih bâân paq?” Ađó ââi lóóiq piđó: 24“Phaai tabhlơng đóng vôôiq mót leq palóng kardyiên, taai aku móón palơq adhi anó n'nal, bơk nak e chêk tabâân đóng mót hơq kah bâân. 25Xong xók kala đong ơi yuur dyương lơq kliêng palóng lóóiq, adhi anó hơq dyương hót nguôi lơq takóq palóng, dhaloong kơi ađô: ‘Kakoh Chuôq, nhan lóng đóng nôôq yi.’ Nek xók ââi lóóiq adhi anó, manưih kala e móón: ‘Aku kah n'nal nôôq pe, môôiq nôôq pe n'tââq bhral.’ 26Xók achêk, adhi anó e pơơh bóóp đóng móón kơi ađô: ‘Nôôq yi ơi ơm cha toom mat amei, lơq amei ơi pachóóm dhiq nôôq kalơng kanóón ưng nôôq yi.’ 27Bơơi kala đong e yuur praaq, móón palơq adhi anó: ‘Aku kah n'nal nôôq pe n'tââq bhral. Phaai xooq changaai tââq aku, tabhơt kabhuh têêng makông kah liêm tôôh!’ 28Dhiq ađek, e ve nhiim griit lơq kakreet kaniêng xók adhi anó lêi Ap-ra-haam, I-saak, lơq Ja-kôôp, palơq tabhơt nôôq manưih đââng taruuih tơơt kalóóng katiêk Yaang Pleng, hơq kah ve adhi anó, ơi bâân m'peq leq nguôi. 29Palââng e bhral tââq mat blo lơq mat bhlót, tââq hót lóóm lơq hót hóng, lơq piđó e tơơt cha bhiêk kalóóng katiêk ưng Yaang Pleng. 30Tôôh, ve nôôq manưih tơơt tatun hơq piđó e val xar laloom, lơq ve bơk manưih tơơt laloom hơq piđó e val xar tatun.”

31Leq chênh jơ ađek, nôôq manưih Pha-ri-si achêk tơk pađan, praaq palơq Ađó: “Nhan thêi yuur xooq lơq phaai xooq changaai tââq ađôk taai Hê-rôôt kiêng leng thêi.” 32Ađó móón palơq piđó: “Nek vôôiq, móón akóón kapuh chêk: ‘Lêi ađô, aku đuôi abhưi lơq têêng nôôq tarnêêng payươh tangêi ađô lơq rayiiu, hayơq mót tangêi đu pe aku têêng xong dyóp liêm.’ 33Dhơ kơi ađek, palơq aku, rau đu liêm nek phaai bhiêk vôôiq kalơng tangêi ađô, rayiiu lơq tangêi tôôh, ơi palơq mưi manưih đââng taruuih, kah ve chóóm chêt dhiq nguôi kanóón Jê-ru-sa-leem. 34Jê-ru-sa-leem, Jê-ru-sa-leem ơơi, amei leng nôôq manưih đââng taruuih lơq glơm dhơl nôôq manưih bâân kayua vôôiq leq amei. Ơi n'nal mơ chu aku kiêng panhoom akóón anaaq ưng amei lóóiq kơi đu atưưch akan oop akóón ađêi dhiq nanang, hơq nôôq pe kah kiêng. 35Tôôh, đong ưng nôôq pe bâân tablah tââq nôôq pe. Aku móón palơq nôôq pe, nôôq pe lalua kah lêi aku patơk xók ganah achêk e tơk, nek xók nôôq pe móón: ‘Đaang bhi haanh Yaang tơk kalóóng achak Chuôq.’”