Katu Bible Literal Text
Lu-ka 11
Chiên ơi vaaih xók Ađó dyơq nhan gavơh dhiq mưi dham achêk, xók Ađó nhan gavơh xong, mưi nak kalóóng nôôq môôn-đô móón palơq Ađó: “Kakoh Chuôq, nhan pachóóm nôôq yi nhan gavơh, kơi Jang kung ơi pachóóm nôôq môôn-đô ađó.” Hayơq Ađó praaq palơq piđó: “Xók adhi anó nhan gavơh, nek móón:
‘Kakoh Ama, nhan achak Ama bâân bhi liêm.
Nhan katiêk Ama bâân tơk.
Nhan đóng nôôq akóón tarmông dheng cha dyóp tangêi ưng nôôq akóón.
Nhan lơơi lơt nôôq akóón leq matu lơt ưng nôôq akóón,
ơi nôôq akóón kung lơơi lơt đóng dyóp ngaai
têêng lơt nôôq akóón.
Lơq óóq đóng nôôq akóón mót leq dharơơl galơơk.’”
Lơq Chuôq Jê-su praaq palơq piđó: “Ngaai kalóóng adhi anó ve parjơơk, lơq m'pơng hayum vôôiq leq ađó ađek, hayơq móón palơq ađó achêk: ‘Parjơơk ơơi, đóng aku vaq pe beq beng, taai mưi nak parjơơk ưng aku tââq changaai tơk palơq aku, hơq aku kah ve rau đóng dhoon leq ađó achêk’? Xók manưih tôôh ââi lóóiq tââq hót kalóóng đong, ađó ađek ve kơơq móón: ‘Óóq têêng panhok aku. Palóng ơi takliêng aq, lơq nôôq akóón aku xók ađôk bêch dhiq dharââng palơq aku. Aku kah chóóm yuur pei đóng amei dyơq.’ Aku móón palơq adhi anó, patơk mơ dhơ manưih achêk kah yuur pei beng đóng ađó tôôh taai nek parjơơk ưng ađêi, bơơi taai bhiêk nhan panhel ưng ađó tôôh, hayơq kung phaai yuur, manưih ađô e pei đóng ađó tôôh dyóp mơ beng ađó tôôh đươi. Aku kung móón palơq adhi anó, phaai nhan, nek rau ađek e bâân đóng leq adhi anó; phaai chêk, nek adhi anó e lum; phaai takóq palóng, nek palóng e lóng đóng adhi anó. Ơi la ngaai nhan e bâân; ngaai chêk nek lum; lơq palóng e bâân lóng đóng ngaai đu takóq. N'đó manưih akonh kalóóng adhi anó, xók akóón ađêi nhan kadhóóng, hayơq manưih achêk đóng ađó akóón kaxênh klóóih nek kadhóóng? Môôiq akóón nhan karau tưưch, hơq manưih achêk đóng ađó agót? Hayơq kơi ađek, la adhi anó, biêh nek môôp, ơi n'nal nôôq kaliim liêm đóng leq akóón anaaq ađêi, hayơq Ama nek Yaang tââq pleng e đóng Chuôq Yaang Liêm leq manưih nhan Ađó bơk lơh n'nal n'đơq?”
Ađó tame đuôi mưi panong abhưi kamoom. Hayơq kơi ađek, tarnêêng ơi vaaih xók abhưi ơi gluh xooq, manưih kamoom chóóm praaq, lơq ganơr dhanuôr lóng hêq lêi. Bơơi bơơr pe nak kalóóng nôôq achêk móón: “Ađó ađek đuôi abhưi, ganơơm Bê-êên-xê-buun, nek chuôq abhưi.” Dyơq nôôq đu lââng, ơi đóng klêêu lêi Ađó, piđó nhan tââq Ađó mưi karnal chrih tââq pleng. Bơơi taai ơi n'nal karnóq ưng piđó ađek, Ađó praaq palơq piđó ađek: “N'đó katiêk xók bâân tư tablah tư tarjơl lóóiq ađêi hayơq bâân têêng đóng hư tarơh, lơq dhanong đong tarjơl dhanong đong hayơq tarơh hachươp. La Sa-taan kung bâân tablah tư tajơl lóóiq chênh ađó, nek ng'kơi têêng katiêk ưng ađó ve chóóm mưng? Ơi nôôq pe móón aku đuôi abhưi ganơơm Bê-êên-xê-buun. La kơi aku đuôi abhưi ganơơm Bê-êên-xê-buun, nek ganơơm ngaai hơq akóón chachau nôôq pe đuôi abhưi? Ơi taai ađek, piđó e nek nôôq manưih xêi xanêi nôôq pe. Dhơ kơi ađek, la aku đuôi abhưi ganơơm kabró têi ưng Yaang Pleng, nek katiêk ưng Yaang Pleng ơi tơk palơq nôôq pe. Xók mưi chanak karơ mapraan bâân kadhâng bhươt kóóih dyóp jư lêi đong ađêi, nek karvaan ưng ađó achêk bâân yươq rauha, bơơi xók mưi nak karơ lơh ađó ađek ruul đenh, nek manưih achêk đươk lơh ađó ađek, pei luch bhươt kóóih ưng ađó, nek rau đu ađó ganơơm leq, hayơq manưih achêk tablah kavaan n'drooih bâân tââq ađó ađek. Ngaai đu xók kah tơơt palơq aku nek jơl lóóiq aku, lơq ngaai đu xók kah karong maleq palơq aku nek tachêh tavươk. Xók abhưi nhơơp ơi gluh tââq mưi nak, ađó vôôiq leq nôôq dhiq góh ka-iil chêk tabâân dhiq dhêi. Lơq xók kah tating chêk, ađó móón: ‘Aku e val chô leq đong aku, nek dham đu aku ơi gluh xooq.’ Xong xók chô tơk, ađó lêi đong ơi bâân tapiih dhoon sek se lơq ralap rapaq kre liêm. Xók achêk, ađó vôôiq lơq pajươk tapól abhưi đu lââng grâ lơh ađó ting mót mamông kalóóng đong ađô. Lơq kơi ađek xók tatun ưng manưih achêk val xar môôp lơh xók tanââp.”
Chiên ơi vaaih xók Ađó dyơq praaq nôôq paraaq ađô, mưi manưih pađiil tôôh tââq bhlưa ganơr manưih yuur praaq, amooq móón palơq Ađó: “Phươk đóng luônh ơi đađââng amei lơq toh đu amei ơi mam.” Bơơi Ađó ââi: “Lalua nek, phươk leq ngaai xâng paraaq Yaang Pleng lơq pei jư.”
Xók tanóói manưih dhanuôr n'dhương bơk lơh dyơq, Ađó tââp praaq: “Dhong nooi ađô nek dhong nooi đu môôp aak. Ađó chik chêk mưi karnal, hơq e kah ve karnal đu bâân đóng leq ađó chapiên mơ karnal ưng Jô-na. Taai Jô-na ơi xar karnal ng'kơi đóng dhanuôr kanóón Ni-ni-ve, nek Akóón Manưih kung e nek karnal kơi achêk đóng dhong nooi ađô. Kalóóng tangêi praaq xêi Bhua Pađiil Hót Charhóóng Hóng e yuur dyương palơq manưih ưng dhong nooi ađô, lơq kaauq lơt piđó, taai ađó ơi vôôiq tââq dhiq parluch ưng katiêk đóng xâng paraaq tarbech galang ưng bhua Sa-lô-môôn, lơq lêi nô, mưi Yaang bhi chap lơh Sa-lô-môôn dhiq ađô. Kalóóng tangêi praaq xêi, dhanuôr kanóón Ni-ni-ve nek yuur dyương palơq dhong nooi ađô lơq e kaauq lơt ađó, taai piđó ơi klôôq lóóm toom paraaq pachóóm ưng Jô-na, lơq lêi nô, mưi Yaang dyơq bhi chap lơh Jô-na dhiq ađô.
Xong xók bat dhơu, kah ngaai patơơt ađó dhiq dham lââp, kung kah dhiq raraal thung kađôôq, bơơi lơơi dhiq dyung dhơu đóng dyóp ngaai bhadyaang mót ve chóóm lêi brương. Par-aang dhơu ưng chak araang nek kaliêng mat ưng adhi anó. Xók mat adhi anó nek liêm, tabhơt chak adhi anó kung bâân bing bhlaai brương. Bơơi xók ađó môôp, chak araang adhi anó kung bing kanam. Ơi kơi ađek, nek chagơn, ve kơq brương kalóóng adhi anó nek kanam. Kơi ađek la bhơt chak adhi anó bing bhlaai brương, yươq ve phơn đu kanam, nek ađó e bhơt brương chalóng, kơi xók dhơu klaaq brương adhi anó.”
Hayơq, xók Ađó praaq xong, mưi manưih Pha-ri-si kayua Ađó kơi đóng Ađó ve chóóm cha vaar madhiq palơq ađêi. Xók ơi vôôiq tơk, Ađó tơơt leq baang chacha. Xók lêi kơi ađek, manưih Pha-ri-si lóng hêq lêi taai Chuôq kah raau têi laloom xók ravang chacha. Bơơi Chuôq praaq palơq ađó: “Xók ađôk, manưih Pha-ri-si nôôq pe raau hót nguôi li lơq choom, dyơq hót kalóóng nôôq pe nek bing rau đu n'thaam lơq môôp aak. Nôôq manưih ngôôk tôôh! Kah alua Yaang ơi têêng hót nguôi kung têêng hót kalóóng hơ? Dhơ kơi ađek, nek đóng nh'xóóng rau dhơơm dhiq hót kalóóng kơi tarnêêng liêm, lơq lêi ađô, dyóp rau nek sek tabah leq nôôq pe.
Dhơ kơi ađek, ayô đóng manưih Pha-ri-si nôôq pe, taai nôôq pe tapôông phơn majêt bak ha, dhaak thum lơq dyóp rau bhơơi kalóóng bhươn, hơq nôôq pe m'peq lơơi rau bhơt liêm lơq lóóm nh'nhơr Yaang Pleng. Bơơi kơng phaai têêng nôôq tarnêêng ađô, lơq kah chóóm m'peq lơơi nôôq tarnêêng tôôh. Ayô đóng manưih Pha-ri-si nôôq pe, ơi nôôq pe kiêng tơơt dhiq tanơơt liêm tââm kalóóng đong gươl, lơq nôôq paraaq chap yayar m'pơng chơơq. Ayô đóng nôôq pe, ơi nôôq pe thê kơi ping ti dhiq booiq, lơq palââng kah n'nal xók tađâq dhiq piing.”
Tatun ađek, đóng ââi lóóiq, mưi kalóóng nôôq takóh pachóóm gani móón palơq Chuôq Jê-su: “Thêi ơơi, thêi kung praaq môôp nôôq yi xók praaq kơi ađek.” Bơơi Ađó móón: “Ayô đóng kabhuh pachóóm gani nôôq pe dyơq! Ơi nôôq pe tagơơn leq palââng nôôq ganeng kah đuôh geng, dyơq chênh ađêi nôôq pe kah xuui mưi beq kabró ađêi leq ganeng ađek. Ayô đóng nôôq pe, taai nôôq pe têêng ping đóng nôôq manưih đââng taruuih, dyơq abhươp avuôq nôôq pe ơi leng chêt piđó. Kơi ađek, nôôq pe truuih đuui lơq ting đươi tarnêêng ưng avuôq abhươp ađêi, taai piđó ơi leng nôôq manưih đââng taruuih, dyơq nôôq pe têêng ping. Kung taai ađek, rau tabech galang ưng Yaang Pleng praaq: ‘Aku e kayua nôôq manưih đââng taruuih lơq nôôq sưưq-đô tơk leq nôôq piđó, bơơi nôôq piđó e leng lơq janah bơk ngaai kalóóng sôôq piđó’ đóng ahaam ưng tabhơt nôôq manưih đââng taruuih ơi n'toh tââq xók tââp vaaih pleng katiêk phaai bâân patu dhiq klaang đơơi ađô, tââq ahaam ưng A-bêên đóng patơk ahaam ưng Xa-cha-ri, nek manưih ơi taleng dhiq m'pơng baang bhanuôih lơq đong bhanuôih. Alua, aku móón palơq nôôq pe, ahaam achêk e bâân patu lóóiq tââq klaang đơơi ađô. Ayô đóng kabhuh pachóóm gani nôôq pe, ơi nôôq pe pei paxooq khanuôq ưng tarbech; chênh nôôq pe kah mót, hơq nôôq pe kajơq manưih lââng mót.”
Xong xók Ađó gluh tââq ađek, nôôq takóh pachóóm gani lơq manưih Pha-ri-si nek tââp tajơl Ađó tabhlơng lơq tarkaai palơq Ađó leq bơk rau, tabâân xók đóng kaleh paxruuk Ađó leq bóóp praaq gluh tââq bóóp Ađó.
Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.