Lu-ka 10

1Tatun nôôq tarnêêng achêk, Chuôq kung chaleq tapól jêt bơơr chanak đu lââng dyơq, lơq kayua piđó ting tabơơr vôôiq loom toom mat Ađó tơk dyóp leq kanóón lơq bhươl kanóón đu chênh Ađó ravang vôôiq. 2Ađó praaq palơq piđó: “Dhơ nil chaxóót alua pâng aviq, bơơi manưih đu xóót nek m'bưưiq bhlơng. Kơi ađek nek nhan gavơh Chuôq ưng nil chaxóót đóng Ađó kayua manưih xóót mót leq nil chaxóót ưng Ađó. 3Nek yuur vôôiq. Lêi tôôh, aku kayua adhi anó vôôiq kơi trưưu akóón tơơt dhiq m'pơng kabhuh axing. 4Óóq đââng chadhung jêên, chadhung vôôiq kalơng, jêi dheep, lơq óóq chik tamóh ngaai dhiq kalơng vôôiq. 5La n'đó đong adhi anó mót, laloom kơ phaai móón: ‘Yươq rauha leq đong ađô.’ 6La akóón ưng đu yươq rauha tơơt dhiq ađek, nek đu yươq rauha ưng adhi anó e tơk dhiq manưih achêk; dyơq la kah, ađó e val chô palơq adhi anó. 7Nek bhiêk tơơt lóóiq kalóóng dhanong đong ađek, cha lơq ơm rau dhơơm đơơp tââq piđó, ơi manưih têêng makông ađaang bâân kông janaaq ađêi. Óóq xooq tââq đong ađô leq đong tôôh. 8La kanóón đu adhi anó vôôiq mót lơq piđó pơh yaauq adhi anó, nek cha rau dhơơm bâân dhoon leq adhi anó, 9nek payươh manưih ka-ai dhiq ađek, lơq praaq palơq piđó, ‘Katiêk Yaang Pleng ơi tơk đan palơq adhi anó.’ 10Dyơq la kanóón đu adhi anó vôôiq mót hơq piđó kah đơơp pơh yaauq adhi anó, nek xong xók gluh leq nguôi kalơng ưng kanóón achêk, nek praaq: 11‘Tơk mơ katiêk puui dhiq kanóón ưng nôôq pe bóq leq dyung nôôq yi, nek nôôq yi tapiêh pasek đóng kaauq patu nôôq pe! Bơơi phaai n'nal rau ađô, ađek nek katiêk ưng Yaang Pleng ơi đan.’ 12Aku praaq palơq adhi anó kơi ađô palơq kanóón Sô-đôôm leq tangêi ađek, ađó e ađaang lơơi lơt lơh kanóón achêk. 13Ayô đóng amei, kanóón Kô-ra-xiin! Ayô đóng amei, kanóón Bêêt-saai-đa! Ơi la nôôq tarnêêng mataai raman, hơq piđó ơi têêng dhiq m'pơng nôôq pe, ơi bâân đóng vaaih tơk dhiq Ti-rơ lơq Si-đôôn, nek piđó lalua ơi klôôq lóóm lơt, xók tơơt dhiq bló puui palơq xơp aau mahaak tââq đươnh vaq. 14Hayơq kơi ađek, e ađaang lơơi lơt đóng Ti-rơ lơq Si-đôôn kalóóng đu xêi xanêi lơh nôôq pe. 15Dyơq amei, Ka-bê-na-um, ve kơq amei e bâân padyók tơk leq pleng? Amei e bâân bhlêh dhaluônh tơk leq maraaih. 16Manưih đơơp xâng adhi anó nek đơơp xâng aku, lơq manưih kah xâng adhi anó nek kah xâng aku, bơơi manưih kah xâng aku nek kah xâng Yaang ơi kayua aku.”

17Hayơq tapól jêt bơơr môôn-đô val chô palơq rau bhuui marhaal, móón: “Kakoh Chuôq, kalóóng achak Amei, patơk mơ nôôq abhưi kung bâân thua toom nôôq yi.” 18Bơơi Ađó praaq palơq piđó: “Aku biêh ơi lêi Sa-taan tââq pleng n'tôq kơi kamlaaq. 19Nek lêi, aku ơi đóng leq adhi anó kataai xanêi đóng đâq kadhaat dhiq kaxênh lơq agót, lơq dhiq dyóp rau kataai karơ ưng aróp brau, hayơq lalua yươq ve dhơ dharau ve chóóm têêng tabhrê adhi anó. 20Dhơ kơi achêk, óóq bhuui marhaal leq tarnêêng achêk, chênh nek tarnêêng nôôq yaang bâân thua toom adhi anó, hơq nek bhuui marhaal taai achak ưng adhi anó ơi bâân xaraq dhiq katiêk pleng.”

21Dhiq ganah bhêêl ađek, Ađó bhuui marhaal bhlơng kalóóng Chuôq Yaang Liêm, lơq praaq: “Kakoh Ama, nek Chuôq ưng pleng lơq katiêk, akóón bhi haanh Ama taai Ama ơi kadrêi palââp nôôq rau ađô tââq nôôq manưih tarbech galang lơq nôôq manưih bhriêl n'nal, hơq Ama vil pakah nôôq ađek đóng akóón paniên. Kakoh Ama, alua, ơi kơi ađek nek rau liêm kre toom mat Ama.” 22“Dyóp rau tarnêêng ơi bâân pajaau leq akóón tââq Ama ưng akóón, kah ngaai n'nal Akóón nek ngaai chapiên Ama, lơq kah ngaai n'nal Ama nek ngaai chapiên Akóón lơq manưih đu hơq Akóón kiêng pakah đóng.” 23Hayơq xong xók palâh leq nôôq môôn-đô, Ađó praaq panlei palơq piđó: “Phươk đóng mat lêi rau đu adhi anó lêi. 24Ơi aku praaq đóng adhi anó n'nal kơi ađô bơk manưih đââng taruuih lơq bhua chuôq ơi rââm lêi rau đu adhi anó lêi, bơơi kah bâân lêi, lơq xâng rau adhi anó xâng, hơq kah bâân xâng.”

25Lơq tôôh, ve mưi nak pachóóm gani achêk yuur dyương tamóh đóng klêêu lêi Ađó, xók praaq: “Thêi ơơi, aku e bâân đơơp parmông taluôn luôn xók têêng hau rau?” 26Bơơi Chuôq praaq palơq ađó ađek: “Hau rau bâân xaraq kalóóng gani? Amei đok lêi ng'kơi?” 27Xók ââi bóóp, ađó ađek móón: “Akóón phaai nh'nhơr Chuôq nek Yaang Pleng ưng akóón palơq tabhơt lóóm ađêi, palơq tabhơt ravaai ađêi, palơq tabhơt praan ađêi, palơq tabhơt karnóq ađêi, lơq phaai nh'nhơr manưih đan tóór ưng ađêi pakơi chênh ađêi.” 28Hayơq nek Chuôq praaq palơq ađó: “Amei ââi dhalam bhlơng. Phaai têêng kơi ađek nek amei e mamông.” 29Bơơi ơi kiêng tư paliêm ađêi bhơt liêm, ađó ađek ââi palơq Chuôq Jê-su: “Hayơq ngaai nek manưih đan tóór ưng aku?” 30Hayơq đóng ââi, Chuôq Jê-su praaq: “Mưi nak achêk xók vôôiq tââq kanóón Jê-ru-sa-leem dhuônh leq kanóón Jê-ri-kô, hayơq ađó pâng tarlum têi kabhuh tatông papei, nek piđó pei n'drooih sek ađô ađó lơq xong xók m'bhiiq vei palâh palaang, kabhuh ađek yuur xooq, mak kơi ađó m'pơng mamông m'pơng chêt. 31Tôôq tarlum, mưi takóh kadhâng bhanuôih achêk xók vôôiq dhuônh kalơng ađek, lơq xók chalaang lêi akonh ađek, ađó róch leq hót tôôh. 32Kung kơi ađek, mưi manưih Lê-vi, xók vôôiq tơk leq ađô lơq lêi manưih bâân bhrê, ađó achêk kung róch hót tôôh. 33Bơơi ve mưi chanak manưih Sa-ma-ri achêk, xók vôôiq kalơng, ơi tơk dhiq manưih bâân bhrê, lơq xók lêi, nek ađó vaaih lóóm kayô ka-er. 34Xók ơi vôôiq pađan, ađó pươr đóng dham bhrê ưng manưih bhrê, xut dhơu lơq alak. Xong xók tơq manưih bhrê leq hóng axeh ưng ađêi, ađó đââng manưih achêk tơk leq mưi đong dhanêi lơq gamang đóng manưih ađô. 35Leq tangêi tatun, xók pei bơơr đơ-ni-ê, ađó đóng leq kala mađong lơq pató: ‘Phaai gamang akonh ađek, lơq la amei phaai payươh gleh lơh dhơ dhakơi, nek xók aku val lóóiq, aku e chróót đóng leq amei.’ 36Amei kanóq ngaai kalóóng pe nak ađek ơi xar manưih đan tóór palơq manưih bhrê bâân talum leq têi kabhuh tatông papei?” 37Ađó ađek ââi: “Manưih ơi pakah lóóm kayô ka-er đóng leq manưih bhrê.” Kơi ađek nek Chuôq Jê-su yua ađó: “Amei nek vôôiq lơq têêng kơi ađek.”

38Xók piđó vôôiq dhiq kalơng, Chuôq Jê-su mót leq kalóóng mưi bhươl tôôh, lơq mưi pađiil achêk achak Ma-thê pơh yaauq Ađó. 39Ađó ve adhi pađiil achak Ma-ri, tơơt dhiq dyung Chuôq Jê-su, tameng xâng paraaq Ađó. 40Bơơi Ma-thê xók bhiêk gamang palơq bơk bhlơng tarnêêng ravang, hayơq ađó tơk móón: “Kakoh Chuôq, Amei kah lêi kơi adhi pađiil aku lơơi mưi aku têêng yaauq dhơq? Kơi ađek, nhan yua adhi aku, đóng ađó ve chóóm jóói aku.” 41Dhơ kơi ađek, xók ââi bóóp, Chuôq praaq palơq ađó: “Ma-thê ơơi, Ma-thê, amei karaang lơq nhok karnóq leq bơk rau tarnêêng, 42bơơi chapiên mưi rau tarnêêng nek kơng giêl. Taai Ma-ri ơi chââih phơn liêm, nek phơn e yươq rau bâân tapei paxooq tââq ađó ađek.”