Skip to content
BibleKenya

Katu Bible Literal Text

Tarnêêng Nôôq Sưưq-đô 4

Xók achêk, xók piđó dyơq praaq lơq manưih dhanuôr, nôôq takóh kadhâng bhanuôih, palơq linh bhlơng jư đong bhanuôih lơq nôôq manưih Sa-đu-sê pơh tơk leq piđó, kabhróónh bhlơng taai bơơr nhiđó dyơq truuih pachóóm manưih dhanuôr lơq truuih pakah đu mamông lóóiq tââq akan chêt kalóóng Chuôq Jê-su. Hayơq kabhuh piđó kóóp lơơi bơơr nhiđó lơq tamót leq đong kanam đương tơk brương yóng rayiiu, taai xók ađek ơi kanam aq. Bơơi phơn bơk kalóóng sôôq nôôq manưih xók ơi xâng taruuih ađek ơi huuiq, lơq sôôq manưih padruuih ơi tơk mơ xââng ngaan.

Tarnêêng vaaih xók tangêi rayiiu, kabhuh takóh têêng gamak ưng piđó palơq nôôq takóh bhươl lơq nôôq thêi pachóóm gani bâân karong lóóiq dhiq Jê-ru-sa-leem, lơq An-ne, takóh kadhâng bhanuôih bhơt liêm, palơq Kaai-phe, Jang, A-lek-xan-đơ lơq tabhơt nôôq manưih mađó leq kabhuh takóh kadhâng bhanuôih bhơt liêm. Xók ơi đââng bơơr nhiđó gluh dhiq m'pơng, piđó tamóh: “Ađó tââq mataai raman, môôiq vơn achak ngaai hơq nôôq pe ơi têêng tarnêêng ađek?” Leq xók ađô, taai bâân bing bhlaai Chuôq Yaang Liêm, Phi-e-rơ ơi praaq lơq piđó: “Nhan móón nôôq pe đu têêng gamak ưng manưih dhanuôr lơq nôôq takóh bhươl, la mađôk nôôq yi glêh bâân tamóh leq tarnêêng liêm palơq mưi nak ka-ai, kơi n'đó hau ganơơm ađó achêk ơi bâân yươh, nek đôk phaai nek rau bâân tabhơt nôôq pe lơq tabhơt dhanuôr I-sơ-ra-êên n'nal tơk, kơi vơn achak Jê-su Chuôq Paq Manưih manưih Na-xa-reet, Yaang đu nôôq pe ơi teeng dhiq n'lóóng baang chatông, Yaang đu Yaang Pleng ơi têêng mamông lóóiq tââq akan chêt, achêk nek ganơơm Yaang ađek hayơq manưih ađô dyương khe karơ dhiq toom mat nôôq pe. Ađó nek kaliêng dhơl ơi bâân takađiq taai nôôq pe, chênh nek nôôq thơơq-xêi, hơq ơi xar bhangôh dhơl n'tól đong. Kah ve đu paq jóói dhiq dhơ dhangaai lââng, ơi dhiq raal pleng kah ve achak ngaai lââng chóóm đóng leq dhiq m'pơng akóón manưih đóng nôôq he phaai ganơơm ađek bâân paq.”

Xók lêi đu garâ nhóól ưng Phi-e-rơ lơq Jang, lơq n'nal giit kơi ađô bơơr nhiđó nek nôôq manưih kah ve hok lơq dhanuôr, nek piđó hêq lêi, piđó kung bâân n'nal bơơr nhiđó, kơi ađô nhiđó ơi glêh tơơt lơq Chuôq Jê-su. N'drươh xók ađek, taai lêi manưih padruuih ơi bâân yươh dyương lơq bơơr nhiđó, hayơq piđó kah ve rau chóóm tapraaq lóóiq. Xók achêk, lơh tââq xók kayua đóng nôôq manưih ađek gluh tââq đong xêi xanêi, piđó praaq tamóh palơq xóng piđó, kơi ađô: “Nôôq he hau chóóm têêng palơq nôôq manưih ađô? Achêk nek ơi mưi mataai chrih dyóp ngaai kung lêi ơi vaaih tââq nôôq manưih ađôk, alua nek drêh dróói palơq tabhơt nôôq ngaai dyơq mamông dhiq Jê-ru-sa-leem, lơq nôôq he kah chóóm kah đươi. Dhơ kơi ađek, đóng tarnêêng ađôk óóq tanđôôr leq lơh dyơq m'pơng kalóóng manưih dhanuôr, nôôq he phaai praaq trêh piđó óóq dyơq pei vơn achak achêk đóng praaq leq dhơ dhangaai.” Kơi ađek, xók đóng dhaloong bơơr nhiđó mót, piđó praaq kayua óóq praaq môôiq truuih pachóóm pei ve rau dyơq vơn achak Chuôq Jê-su. Bơơi xók Phi-e-rơ lơq Jang ââi, bơơr nhiđó ơi praaq lơq piđó: “Ve lua nek pâng dhiq toom mat Yaang Pleng xók ting xâng bóóp nôôq pe lơh Yaang Pleng? Nôôq pe nek kanóq lêi. Ơi nôôq yi kah chóóm pat praaq leq rau dhơơm ađêi ơi lêi lơq xâng.” Kơi ađek hayơq, xók ơi gaam kơơq, piđó paloh bơơr nhiđó vôôiq, taai kah rau lêi rauriq đóng hơq piđó ve chóóm phaak bơơr nhiđó, ơi nek taai manưih dhanuôr, taai dyóp ngaai maar bhi haanh Yaang Pleng leq tarnêêng ơi vaaih. Ơi manưih padruuih tôôh, manưih đu mataai chrih payươh ađô vil vaaih, nek ơi lơh puôn jêt tuôi.

Xók achêk, xong xók bâân paloh, bơơr nhiđó tơk palơq adhi anó akóón dhơn chuôq ưng ađêi lơq truuih lóóiq dyóp rau đu nôôq takóh kadhâng bhanuôih bhơt liêm lơq nôôq takóh bhươl ơi praaq lơq nhiđó. Xók ơi xâng, piđó mưi lóóm karơ dhariêng đak leq Yaang Pleng lơq móón: “Kakoh Chuôq, Amei nek Yaang ơi tavaaih pleng, katiêk lơq taxiiq, palơq dyóp rau dhiq kalóóng ađek, nek Yaang, ơi tââq avuôq nôôq yi bơơi Chuôq Yaang Liêm, tââq dhiq bóóp ưng Đa-viit dhơn ratơơq Amei, ơi praaq kơi ađô:

‘Hau chóóm nôôq katiêk pagrâ jar-ââih,

lơq nôôq dhanuôr mangê hư bil?

Nôôq bhua dhiq hóng katiêk yuur dyương,

lơq nôôq kuôn kadhâng akoq bâân karong lóóiq xóng ađêi

jơl lóóiq Chuôq, lơq jơl lóóiq Yaang đơơp xut dhơu ưng Amei.’

Ơi kalóóng alua, bhơt Hê-rôôt lơq Bôôn-xơ Phi-laat, nek palơq nôôq dhanuôr katiêk palââng lơq dhanuôr I-sơ-ra-êên, ơi bâân karong chô maleq dhiq kalóóng kanóón ađôk jơl lóóiq Dhơn Ratơơq tabah liêm ưng Amei nek Chuôq Jê-su, Yaang đu Amei xut dhơu, đóng têêng dyóp rau tarnêêng đu têi Amei lơq tarnêêng ưng Amei ơi kanóq loom đóng vaaih. Xók ađôk, Chuôq ơơi, nhan phaai lêi chamet nôôq paraaq gaam ưng piđó, lơq nhan đóng leq nôôq dhơn ratơơq ưng Amei truuih xêi paraaq Amei lơq tabhơt lóóm nhóól xók Amei jarơ têi ưng Amei vaq đóng rau payươh, nôôq kanal chrih lơq nôôq tarnêêng raman chrih bâân vaaih tơk ganơơm achak ưng Dhơn Ratơơq tabah liêm Amei, nek Chuôq Jê-su.” Xók piđó ơi gavơh nhan xong, dhiq đu piđó xók nhoom lóóiq veq dha-ơr, hayơq tabhơt piđó maar bâân bing bhlaai Chuôq Yaang Liêm lơq praaq taruuih paraaq ưng Yaang Pleng nek palơq lóóm nhóól.

Xók achêk, nôôq manưih kabhuh ganơr bơk ơi huuiq maar ve makơi mưi lóóm lơq yaang lóóm. Kah ngaai lêi mưi rau kalóóng nôôq rau chô leq ađêi nek ưng ađêi, hơq palơq piđó, dyóp rau nek ưng xóng ađêi. Palơq mataai raman karơ gamak, nôôq sưưq-đô pakah paraaq truuih leq đu mamông lóóiq ưng Chuôq Jê-su, lơq phươk liêm yaal gamak tơơt dhiq tabhơt piđó. Ơi kah ve ngaai manưih thiêuq hat m'pơng kalóóng piđó, ơi la nôôq ngaai nek manưih kala katiêk môôiq đong xaang, nek xong xók baan, piđó đââng tơk sôôq jêên ơi ve bâân, hayơq lơơi dhiq dyung nôôq sưưq-đô, lơq jêên achêk ơi nh'xóóng đóng dyóp nak manưih ting kơi manưih ađek ve rau kơng đươi.

Xók achêk, Jô-seep, manưih ơi nôôq sưưq-đô đóók nek Ba-na-ba (achak bâân lók kiêng móón Akóón ưng Đu Bhơơl Chut Lóóm), nek mưi manưih Lê-vi, dhanuôr Chiip-rơ, xong xók baan dham ruông mađó leq ađêi, ađó ơi đââng jêên tơk lơq lơơi dhiq dyung nôôq sưưq-đô.

Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.