Katu Bible Literal Text
Tarnêêng Nôôq Sưưq-đô 5
Xók achêk, mưi nak achêk achak A-na-nia, palơq Sa-phi-ra, kađiêl ađêi, ơi baan mưi dham katiêk, hayơq ađó ađek ha-ơu jư panlei đóng ađêi mưi phơn tââq sôôq jêên achêk (manưih kađiêl kung n'nal) lơq xong xók ơi đââng mưi phơn tôôh tơk, ađó ađek lơơi dhiq dyung nôôq sưưq-đô. Bơơi Phi-e-rơ praaq: “A-na-nia, ơi hau Sa-taan bing bhlaai lóóm amei têêng đóng amei praaq galơơk Chuôq Yaang Liêm hơq ha-ơu panlei đóng ađêi mưi phơn tââq jêên ưng dham katiêk ađek? Xók dyơq ađek, kah alua dham katiêk dyơq nek ưng amei, lơq xók ơi tabaan vaq, sôôq jêên dyơq raal kataai ưng amei kah alua? Ng'kơi têêng hayơq amei karnóq chiên ađôk kalóóng lóóm ađêi? Eh rau amei praaq galơơk akóón manưih dhơq, hayơq nek lơq Yaang Pleng.” Kơi ađek hayơq, xók ơi A-na-nia xâng nôôq paraaq achêk, ađó pat parhââm hơq kalơm, lơq rau kakhin kapơn gamak bhlơng n'toh dhiq tabhơt nôôq ngaai xâng rau tarnêêng ađô. Xók achêk, xók ơi yuur dyương, nôôq manưih n'dhóm raleng ađó ađek lơq xók ơi glâk leq nguôi hayơq piđó đââng vôôiq tơp.
Bơơi tarnêêng vaaih tơk mơ pe jơ tatun ađek, kađiêl ađó ađek vôôiq mót, kah ve n'nal rau chiên ơi vaaih. Phi-e-rơ praaq palơq pađiil: “Nek praaq đóng aku n'nal ve alua bơơr anhưa ơi baan dham katiêk achêk mơ janaaq kah?” Hayơq pađiil móón: “Lalua, janaaq achêk n'đơq.” Bơơi Phi-e-rơ kayua pađiil: “Hau chóóm hayơq chiên ađek bâân bơơr nhưa makơi lóóm karnóq hơq klêêu Yaang Liêm ưng Chuôq? Nek lêi tôôh, tapaang dyung ưng nôôq manưih ơi tơp kayiik amei dyương dhiq palóng, hơq e piđó kung đââng amei vôôiq tơp.” N'drươh, pađiil ađek kalơm dhiq dyung ađó lơq pat parhââm. Xók achêk, xók jađaang mót, nôôq manưih n'dhóm lêi xaak pađiil, xong xók ơi glâk pađiil leq nguôi, piđó tơp pađiil dhiq tóór kayiik ađó. Đu kakhin kapơn dhaang gamak n'toh dhiq tabhơt Akóón Dhơn Chuôq lơq dhiq tabhơt nôôq ngaai xâng leq nôôq chiên ađô.
Xók achêk, tââq tapaang têi ưng nôôq sưưq-đô, bơk kanal chrih lơq tarnêêng chrih liêm val vaaih dhiq kalóóng dhanuôr manưih, lơq piđó maar makơi lóóm tơơt dhiq Palóng Kriing Ving Sa-lô-môôn. Bơơi kah ngaai lââng khin ting mót lơq piđó, dhơ dhanuôr manưih biêh xók bhi haanh piđó. Xók achêk, n'dhương bơk manưih bâân mót leq xók pei lóóm huuiq dhiq Chuôq lơh dyơq, parbơk bơk bhlơng luch padruuih palơq pađiil, patơk mơ palââng patơk đââng manưih ka-ai gluh leq kalơng, tabêch dhiq chong lơq alơơq, đóng xók Phi-e-rơ vôôiq lalơh, nek bhơt m'bưưiq a-ô ưng ađó ve chóóm pađơp dhiq ngaai ađek kalóóng piđó. Mưi tanóói manưih bơk bhlơng kung taruiq xóng piđó tââq nôôq kanóón xirvir Jê-ru-sa-leem, ting đââng manưih ka-ai lơq nôôq manưih bâân abhưi nhuq bóq janah, hayơq tabhơt piđó maar bâân yươh.
Bơơi xong xók yuur dyương, takóh kadhâng bhanuôih bhơt liêm lơq tabhơt nôôq manưih ting ađó ađek (nek nôôq manưih maleq kabhuh Sa-đu-sê) bing bhlaai lóóm makhinh, hayơq nôôq manưih achêk pei têi dhiq nôôq sưưq-đô lơq tamót piđó leq đong kanam król madhiq. Bơơi xók hayum, mưi dhơn pleng ưng Chuôq ơi lóng palóng đong kanam, đââng piđó gluh leq nguôi, hơq pató: “Nek vôôiq, lơq xong xók dyương kalóóng đong bhanuôih, nek truuih palơq manưih dhanuôr dyóp paraaq ưng parmông ađô.” Kơi ađek hayơq, xók ơi xâng kơi ađek, piđó vôôiq mót leq đong bhanuôih xók pleng marư-rư brương lơq truuih pachóóm. Xók achêk, xong xók thêi kadhâng bhanuôih bhơt liêm lơq nôôq manưih ting ađó ađek vôôiq tơk, piđó dhaloong pahoop Nôôq Takóh Xêi Xanêi lơq tabhơt nôôq takóh bhươl kalóóng dhanuôr I-sơ-ra-êên, hayơq kayua manưih tơk đong kanam đóng đââng nôôq sưưq-đô tơk. Bơơi xók tơk dham, nôôq kabhuh linh kah rau lêi nôôq sưưq-đô kalóóng đong kanam, kơi achêk nek xong xók val chô lóóiq, piđó truuih xêi, móón kơi ađô: “Nôôq yi lêi đong kanam ơi bâân takađơp palơq dyóp tarnêêng tamưng, lơq linh jư nek dyương nham palóng, bơơi xong xók lóng, nôôq yi kah lêi ngaai tơơt hót kalóóng dyơq.” Xók achêk, n'drươh xók nôôq piđó ơi xâng nôôq paraaq achêk, luch kuôn kadhâng koq kabhuh linh đong bhanuôih lơq nôôq takóh kadhâng bhanuôih bhơt liêm maar nhok karnóq leq nôôq truuih móón, hau chóóm chiên kơi ađek lóóiq ve chóóm val vaaih. Kơi ađek hayơq, mưi ngaai ađek, xong xók vôôiq tơk, ơi truuih palơq piđó kơi ađô: “Nek lêi tôôh, nôôq manưih đu nôôq pe król leq đong kanam nôk xók tơơt kalóóng đong bhuôih, ơi dyương truuih pachóóm manưih dhanuôr!” Xók ađô, kuôn kadhâng koq, vôôiq palơq nôôq linh, ơi đââng piđó chô, bơơi kah pei grâ karơ, ơi piđó kakhin manưih dhanuôr e nh'jau ađêi bâân taglơm lơq dhơl. Xók ơi đââng nôôq sưưq-đô chô, nôôq manưih achêk lơơi piđó m'pơng Nôôq Takóh Xêi Xanêi, hayơq takóh kadhâng bhanuôih bhơt liêm praaq tamóh piđó, kơi ađô: “Nôôq yi ơi praaq leq nôôq pe kah đóng pheep truuih pachóóm kalóóng achak ađô, hơq lêi tôôh, nôôq pe ơi têêng Jê-ru-sa-leem bing bhlaai đu pachóóm ađêi, lơq nôôq pe nek kiêng đââng ahaam ưng ađó achêk n'toh dhiq piing nôôq yi.” Bơơi xók ââi lóóiq, Phi-e-rơ lơq nôôq sưưq-đô praaq: “Phaai huuiq xâng Yaang Pleng lơh nek palââng. Yaang Pleng ưng avuôq nôôq he ơi têêng Chuôq Jê-su mamông lóóiq, Ađó nek Yaang đu nôôq pe ơi leng, xók yông dhiq n'lóóng chatông. Yaang Pleng ơi padyók Yaang achêk dyók têêng Bhua lơq Yaang Paq Manưih tơơt hót atươm ađêi, lơơi đóng rau klôôq lóóm leq I-sơ-ra-êên palơq rau lơơi matu lơt. Nôôq yi nek manưih truuih đuui ưng nôôq tarnêêng achêk, nek palơq Chuôq Yaang Liêm, Yaang đu Yaang Pleng ơi đóng leq nôôq manưih xâng huuiq Ađó.”
Bơơi xók xâng paraaq achêk, piđó kabhróónh bhlơng hơq kiêng leng chêt nôôq sưưq-đô. Xók achêk, xók mưi nak tôôh yuur dyương m'pơng Nôôq Takóh Xêi Xanêi, nek mưi manưih Pha-ri-si, achak nek Ga-ma-li-êên, takóh pachóóm gani, bâân tabhơt dhanuôr bhi chap, ađó kayua đââng nôôq sưưq-đô gluh leq nguôi maxưưiq. Hayơq ađó praaq palơq piđó: “Nhan móón nôôq pe, nôôq manưih I-sơ-ra-êên, phaai chagơn palơq ađêi kala leq rau đu nôôq pe karnóq têêng đóng nôôq manưih ađô. Taai laloom tangêi ađô, Thêêu-đa ơi yuur dyương, tư móón ađêi nek mưi manưih ng'kơi ađek, parbơk manưih padruuih ơi mót kabhuh palơq ađó leq mơ puôn hariêng, hơq ađó ơi bâân taleng nek tabhơt nôôq manưih đu bâân huuiq xâng ting ađó maar bâân tablah, hayơq kabhuh piđó vôôiq tơk dham kah dyơq ngaai. Xong ađó ađô, Ju-đa manưih Ga-li-lê ơi yuur vaaih kalóóng ganah yaap lêi dhanuôr lơq paxuq garuiq manưih dhanuôr ting ađêi. Ađó ađek kung chêt, hayơq tabhơt nôôq manưih đu bâân huuiq xâng ting ađó maar bâân tachêh tavươk. Xók ađôk aku praaq palơq nôôq pe rau ađô: Phaai xooq changaai tââq nôôq manưih achêk lơq takê piđó, ơi la karnóq ađô môôiq tarnêêng ađô nek tââq akóón manưih, nek ađó e bâân hư bil, bơơi la rau ađek nek tââq Yaang Pleng, nek nôôq pe e kah đuôh têêng pahư kalơm piđó, hơq kah machưng nôôq pe tơk mơ ve chóóm bâân lêi nek manưih tajơl palơq Yaang Pleng.” Kơi ađek nek, piđó bâân huuiq xâng kơi ađó. Xong xók đóng dhaloong nôôq sưưq-đô, xók ơi m'bhiiq xong, piđó praaq kayua kah chóóm pheep truuih pachóóm vơn achak Chuôq Jê-su, hayơq piđó paloh đóng vôôiq. Kơi ađek hayơq, nôôq sưưq-đô vôôiq kalơng xooq tââq đu toom mat palơq Nôôq Takóh Xêi Xanêi, bhuui marhaal taai piđó ơi bâân móón nek đaang đơơp jruôn taai Achak Chuôq. Dyóp tangêi, tââq kalóóng đong bhanuôih lơq kalóóng ting đong, piđó kah dhêi truuih pachóóm lơq truuih pakah Taruuih Liêm — Chuôq Jê-su nek Chuôq Paq Manưih.
Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.