Skip to content
BibleKenya

Katu Bible Literal Text

Tarnêêng Nôôq Sưưq-đô 6

Xók achêk, kalóóng nôôq tangêi ađek, xók nôôq môôn-đô n'dhương yuur bơk, nek rau pambhoonh ơi vaaih tââq manưih Jo Thaaiq chapiên praaq dhariêng Hi-laap palơq manưih Hê-bơ-rơ, taai nôôq manưih kamaai ưng piđó xók bâân m'peq lơơi kalóóng tarnêêng poor yaauq dyóp tangêi. Kơi ađek hayơq, xong xók majêt bơơr sưưq-đô dhaloong karong manhoom bơk bhlơng nôôq môôn-đô, piđó praaq: “Đôk nek rau kah ve đươi chóóm palơq nôôq yi xók m'peq lơơi paraaq ưng Yaang Pleng leq tatun đóng têêng yaauq baang chana. Bơơi, nhan móón adhi anó, nhan chââih tââq m'pơng adhi anó tapól chanak manưih padruuih ve tanđôôr liêm, bing bhlaai Yaang Liêm lơq rau tabech, nek nôôq manưih đu nôôq yi ve chóóm pajaau kayua đóng tarnêêng ađô. Dyơq nôôq yi nek e bhiêk taluôn kalóóng rau gavơh nhan lơq tarnêêng truuih pachóóm paraaq Chuôq.” Bóóp paraaq ađek têêng liêm lóóm toom mat tabhơt akóón dhơn Chuôq. Hayơq nek, piđó chââih Ê-tiên, mưi manưih bing bhlaai lóóm huuiq lơq Chuôq Yaang Liêm, Phi-liip, Bô-kô-rơ, Ni-ka-nô, Ti-môôn, Ba-mê-na lơq Ni-kô-la, manưih An-ti-ôôt ting huuiq taruuih Jo Thaaiq, nek nôôq manưih đu piđó đââng tơk đóng dyương toom mat nôôq sưưq-đô, lơq xong xók gavơh nhan, nôôq sưưq-đô lơơi têi dhiq nôôq manưih achêk.

Hayơq ađek, paraaq ưng Yaang Pleng bhiêk tanđôôr, lơq parbơk môôn-đô dhiq Jê-ru-sa-leem n'dhương dyók bơk lơh, patơk mơ manhoom bơk bhlơng nôôq takóh kadhâng bhanuôih ơi đươi xâng lóóm huuiq.

Xók achêk, Ê-tiên bing ơơn lơq mataai raman, têêng tarnêêng chrih liêm lơq mataai chrih gamak kalóóng manưih dhanuôr. Bơơi masôôq manưih ơi yuur vaaih, nek nôôq manưih mađó leq đong gươl tôôh, dhiq bâân đóók nek “Nôôq Manưih Rathaai,” palơq nôôq manưih Si-reen, manưih A-lek-xan-tri, lơq nôôq manưih tââq Si-li-si lơq A-si, tarkaai palơq Ê-tiên. Hayơq hơq, piđó kah ve chóóm đuôh jơl lóóiq đu tabech lơq Yaang Liêm đu ađó ơi paraaq pakah ganơơm Yaang achêk. Tatun ađek, piđó paxuq dharơơl nôôq manưih đóng praaq kơi ađô: “Nôôq yi ơi xâng ađó ađek praaq nôôq paraaq chôlô jơl lóóiq palơq Môôi-se lơq Yaang Pleng.” Piđó paxuq luch manưih dhanuôr palơq nôôq takóh bhươl palơq nôôq takóh pachóóm gani, lơq xong xók ruul tơk, piđó kóóp ađó lơq garuiq tơk Nôôq Takóh Xêi Xanêi. N'drươh xók ađek, piđó loom ravang lơơi nôôq manưih praaq galơơk, truuih kơi ađô: “Manưih ađô kah dhêi praaq nôôq paraaq chôlô tơk leq dham tabah liêm lơq gani. Taai nôôq yi ơi xâng ađó praaq kơi Jê-su manưih Na-xa-reet tôôh e pahư bhơt dham ađôk lơq tadhơ nôôq xanêi đu Môôi-se ơi truuih lóóiq đóng nôôq he.” Xók lêi li mrang leq ađó, tabhơt nôôq manưih xók tơơt dhiq kalóóng Nôôq Takóh Xêi Xanêi lêi moh mat ađó kơi ngóq moh mat ưng dhơn pleng.

Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.