Tarnêêng Nôôq Sưưq-đô 7

1Xók achêk, takóh kadhâng bhanuôih bhơt liêm móón: “Nôôq tarnêêng ađek ve pâng kơi achêk môôiq kah?” 2Hayơq nek, ađó ââi:

“Nhan móón palơq nôôq pe, nôôq adhi anó lơq nôôq taha takóh, nhan tameng xâng: Yaang Pleng cha-iil tabah ơi pakah palơq avuôq Ap-ra-haam ưng nôôq he xók ađó tơơt dhiq Mê-sô-bô-ta-mi, laloom kah ơi xók ađó tơơt at dhiq Cha-raan; 3lơq Yaang Pleng praaq palơq ađó kơi ađô: ‘Phaai xooq tââq xưưq xaang ưng amei, kung kơi tââq xóng anó kabhuh ưng amei, lơq amei nek vôôiq tơk xưưq đu Aku dhakơi e chaleq đóng amei.’ 4Xong ađek, xong xók gluh tââq xưưq ưng dhanuôr Ken-đê, ađó mamông dhiq Cha-raan. Hayơq tââq ađek, xong xók ama ađó ơi bil, Yaang Pleng ơi đââng ađó mót leq xưưq ađô, kalóóng dham đu nôôq pe xók tơơt mamông. 5Yaang Pleng ơi kah đóng leq ađó mưi drươp karvaan kalóóng xưưq, tơk mơ mưi dham mađơq tapaang dyung kung kah. Hayơq đu Yaang Pleng ơi hươq đóng xưưq leq ađó đóng chô leq têi ađêi kala, palơq đóng dhong nooi ưng manưih n'niên tatun ađó, dhơ ađó kah ơi ve akóón. 6Dhơ kơi ađek, Yaang Pleng ơi praaq kơi ađô, kơi dhong nooi ađó e nek dhanuôr tơơt at dhiq mưi xưưq changaai chrih, hayơq palââng e kóóp piđó têêng dhơn xól hơq janah kalóóng puôn hariêng kamó. 7Yaang Pleng praaq: ‘Lơq Aku e phaak katiêk đu piđó ơi phaai têêng dhơn, hayơq tatun ađek, piđó e gluh vôôiq lơq bhuôih haanh Aku dhiq dham ađô.’ 8Yaang Pleng kung ơi đóng leq ađó raket bóóp leq tarnêêng iêt ng'kar, lơq taai kơi ađek, ađó n'niên I-saak lơq têêng tarnêêng iêt ng'kar đóng akóón ađêi xók tangêi đu takóól; I-saak têêng kơi ađek đóng Ja-kôôp, lơq Ja-kôôp kung têêng kơi achêk đóng majêt bơơr chanak takóh kabhuh. 9Ơi nôôq takóh kabhuh makhinh lơq Jô-seep, piđó ơi baan ađó leq Ai Kơp; hơq Yaang Pleng tơơt palơq ađó, 10lơq paq jóói ađó tââq dyóp rau jarnah xangaat ưng ađó, Yaang Pleng kung đóng ơơn lơq đu tabech leq ađó dhiq toom mat Pha-ra-ôôn, bhua Ai Kơp, lơq bhua achêk ơi đóng ađó dyók têêng gamak jư lêi Ai Kơp palơq tabhơt đong ađêi. 11Xók achêk, mưi ganah ha-ul yuur tơk vaaih dhiq plok xưưq Ai Kơp lơq Ka-na-aan, lơq đu bhrê hư lóng gamak, lơq nôôq avuôq ưng nôôq he kah tââq chik bâân tarmông. 12Kơi ađek hayơq, xong xók xâng dhiq Ai Kơp ve aviq mi, Ja-kôôp kayua nôôq avuôq nôôq he tơk ađek đu mưi chu. 13Lơq kalóóng dharơp đu bơơr, Jô-seep ơi tư pakah ađêi kala đóng nôôq anó ađêi, hayơq parlóng đong ưng Jô-seep bâân Pha-ra-ôôn n'nal tơk. 14Xók achêk, xong xók kayua nôôq anó chô, Jô-seep kayua kêch Ja-kôôp, ama ađêi, palơq tabhơt m'bhuh xóng, palơq masôôq manưih nek tapól jêt xââng. 15Kơi ađek nek, Ja-kôôp vôôiq dhuônh tơk Ai Kơp, hayơq ađó xir, lơq nôôq avuôq ưng nôôq he kung kơi ađek. 16Piđó bâân đââng tơk Si-cheem lơq tơp kalóóng ping đu Ap-ra-haam ơi kơl lơq janaaq palơq baak tââq nôôq akóón padruuih ưng Hê-mô dhiq Si-cheem. 17Xók achêk, ting kơi ganah tangêi ưng paraaq hươq hơq Yaang Pleng ơi hươq palơq Ap-ra-haam ơi đan tơk, nek sôôq dhanuôr n'dhương bơk lơq bâân bơk bhlơng dhiq Ai Kơp, 18patơk xók mưi abhua lââng dyók têêng kadhâng kala Ai Kơp, hơq abhua achêk biêh kah n'nal Jô-seep. 19Ơi mangê tabhrê manưih dhanuôr nôôq he, abhua achêk ơi janah avuôq nôôq he, têêng đóng nôôq paniên par-aang ưng piđó bâân m'peq lơơi, kah chóóm jư đóng mamông. 20Leq xók hơq Môôi-se bâân n'niên, ađó liêm kre toom mat Yaang Pleng. Ađó bâân ban paar pe kaxe kalóóng đong ama ađêi. 21Xók achêk, xók ađó bâân tapakah, akóón pađiil ưng Pha-ra-ôôn ơi đââng ađó chô lơq ban paar ađó kơi akóón padruuih ađêi. 22Môôi-se bâân pachóóm kalóóng dyóp rau tabech ưng manưih Ai Kơp, ađó dyơq ve kataai kalóóng bóóp paraaq lơq tarnêêng têêng ưng ađêi. 23Bơơi xók ganah puôn jêt tuôi ơi tơk palơq ađó, vaaih karnóq kalóóng lóóm ađó kiêng vôôiq tham adhi anó ađêi, nek akóón chachau I-sơ-ra-êên. 24Xók lêi mưi chanak tôôh bâân tajanah, ađó ơi yuur dyương paq lơq yuur têêng đu charóót đóng manưih bâân tajanah xók m'bhiiq chêt manưih Ai Kơp tôôh, 25ađó dyơq ngóq adhi anó n'nal kơi Yaang Pleng taai têi ađêi xók đââng tơk đu paq jóói đóng piđó, bơơi piđó kah n'nal. 26Tangêi tatun, ađó tabhral m'pơng piđó xók tarkaai, lơq ađó praaq pahêêl piđó đââng tơk rau paliêm, kơi ađô: ‘Adhi anó ơơi, nôôq pe maar nek adhi anó. Ơi hau nôôq pe têêng ka-ai karuôq xóng ađêi?’ 27Bơơi manưih xók kađiq kalươm manưih tóór ađêi ơi dhalươq ađó xooq, tamóh: ‘Ngaai ơi kayua amei têêng manưih kadhâng akoq lơq xêi xanêi dhiq nôôq yi? 28Ve kơq nek amei xók kiêng leng aku kơi tarnêêng đu amei ơi leng manưih Ai Kơp tangêi manua?’ 29Kơi ađek hayơq, Môôi-se mut klôôn toom bóóp praaq achêk, lơq ađó val xar tamóói tơơt kađơu kalóóng xưưq Ma-đi-aan, dhiq đu ađó bâân n'niên bơơr akóón padruuih. 30Xók puôn jêt kamó ơi lơh, mưi dhơn pleng tabhral lơq ađó dhiq kruung vơng leq bôôl Si-naai, dhiq mưi par-aang óih róh dhiq tââm xông. 31Xók achêk, xók móng lêi kơi ađek, Môôi-se lêi lóng chrih leq tapakah ađek, hayơq xók ađó vôôiq pađan đóng lêi chóóm giit, nek ve dhariêng ưng Chuôq: 32‘Aku nek Yaang Pleng ưng avuôq amei, Yaang Pleng ưng Ap-ra-haam, ưng I-saak lơq ưng Ja-kôôp.’ Xók ađek, ơi rau kakhin kapơn dhuum tơk, Môôi-se kah khin lêi. 33Hayơq Chuôq praaq lơq ađó: ‘Nek lêh jêi gluh tââq dyung amei, ơi dham hơq amei xók dyương nek katiêk tabah liêm. 34Taai ơi chamet lêi, Aku ơi móng lêi rau hadhaap janah ưng dhanuôr Aku dhiq Ai Kơp, Aku ơi xâng dhariêng xaxih ưng piđó, lơq Aku ơi dhaluônh đóng paq jóói piđó. Xók ađôk, nek vôôiq pađan leq ađô, Aku kayua amei vôôiq leq Ai Kơp.’ 35Môôi-se ađô, manưih hơq piđó ơi kah đươi xók móón: ‘Ngaai ơi kayua amei têêng manưih kadhâng akoq môôiq kuôn xêi xanêi?’ — Yaang Pleng kayua ađó n'drươh têêng manưih kadhâng akoq n'drươh têêng manưih paq jóói, taai têi ưng mưi dhơn pleng ơi tabhral palơq ađó dhiq tââm axông. 36Ađó ơi đââng piđó gluh, xong xók têêng nôôq raman chrih lơq kanal chrih dhiq xưưq Ai Kơp lơq dhiq Taxiiq Bhrôông, kung kơi kalóóng kruung vơng bhluuch puôn jêt kamó. 37Achêk nek Môôi-se, ađó ơi praaq palơq akóón anaaq I-sơ-ra-êên kơi ađô: ‘Yaang Pleng e hayuur mưi manưih đââng taruuih đóng adhi anó thê kơi aku, tââq kalóóng m'pơng nôôq adhi anó ưng nôôq pe.’ 38Ađô nek manưih tơơt kalóóng manưih dhanuôr dhiq kruung vơng palơq dhơn pleng, Yaang ơi praaq lơq ađó dhiq bôôl Si-naai, lơq palơq nôôq avuôq nôôq he, ađó nek manưih ơi pei đơơp paraaq mamông đóng đââng leq nôôq he, 39hơq nek palơq ađó, avuôq nôôq he kah kiêng đơơp huuiq; palâh lóóiq, piđó kah đươi lơq palâh lóóm ađêi jamoh leq Ai Kơp, 40xók kayua A-rôôn: ‘Phaai têêng đóng nôôq yi nôôq yaang e kađââng nôôq yi. Leq phơn Môôi-se ađô, ađó ơi đââng nôôq yi gluh tââq xưưq Ai Kơp, nôôq yi kah n'nal hau rau chiên ơi vaaih đóng ađó achêk.’ 41Kơi ađek nek, piđó têêng mưi kabhêi karók akóón kalóóng nôôq tangêi achêk lơq tapôông adhah bhuôih đóng leq kabhêi ađek, hayơq bhuui marhaal ơi tarnêêng ưng têi ađêi. 42Xók achêk, Yaang Pleng palâh hóng lơq lơơi mak kơi piđó bhuôih haanh nôôq chatur charo dhiq pleng, kơi ơi xaraq kalóóng bha-aar ưng nôôq manưih đââng taruuih, kơi ađô:

‘Đong I-sơ-ra-êên ơơi, ve kơq

nôôq pe ơi tapôông đóng Aku nôôq adhah bhuôih lơq bhanuôih kalóóng bhluuch puôn jêt kamó kalóóng kruung vơng?

43Nôôq pe ơi glâk pơơq bhanuôih ưng yaang Mo-lok lơq

chatur charo yaang Room-phaan ưng nôôq pe,

— nôôq kabhêi hơq nôôq pe ơi têêng đóng bhuôih haanh piđó —

lơq Aku e patââi đââng nôôq pe hót tôôh Ba-bi-lôôn.’

44Pơơq bhanuôih tơơt palơq avuôq nôôq he kalóóng kruung vơng, i kơi Yaang praaq palơq Môôi-se ơi truuih pachóóm, phaai têêng pơơq achêk ting markơi đu ađó ơi lêi, 45hơq nek palơq pơơq achêk, xong xók đuui ting đơơi, avuôq nôôq he kung ơi đââng ting raal đơơi Jô-suê kalóóng kalơng vôôiq pei xưưq ưng nôôq dhanuôr đu Yaang Pleng ơi đuôi xooq toom mat avuôq nôôq he đóng patơk đơơi Đa-viit, 46nek manưih bâân ơơn toom mat Yaang Pleng, lơq ađó ơi nhan tamóh đóng chêk mưi dham patơơt đóng đong ưng Ja-kôôp. 47Kơi ađek hayơq, Sa-lô-môôn ơi xêi kadhơng đong leq Yaang Pleng. 48Dhơ kơi ađek, Yaang Bhơt Yaal kah tơơt at kalóóng dham têi manưih ơi têêng, kơi manưih đââng taruuih ve praaq:

49‘Chuôq praaq: Pleng nek tanơơt Aku, lơq katiêk nek parđâq lơơi dyung Aku.

Nôôq akóón e xêi kadhơng đong ng'kơi đóng Aku?

Môôiq dhiq dham ravang đóng đu dhêi drơq ưng Aku?

50Eh alua têi Aku ơi tavaaih tabhơt nôôq rau ađô?’

51Nôôq manưih kađiq ơơi, lóóm lơq katór kah đơơp iêt ng'kar tôôh! Nôôq pe taluôn tajơl Chuôq Yaang Liêm. Avuôq ưng nôôq pe ng'kơi, nôôq pe kung kơi achêk. 52N'đó manưih đu kalóóng nôôq manưih đââng taruuih hơq avuôq ưng nôôq pe ơi kah kóóp róp? Piđó ơi leng nôôq manưih đââng taruuih laloom leq rau tơk ưng Yaang Bhơt Liêm, hơq nôôq pe nôk xók ơi xar manưih đu tajơl lơq manưih leng chêt Yaang achêk, 53chênh nek nôôq manưih ơi đơơp gani ơi rau truuih praaq ưng nôôq dhơn pleng, hơq kah pei jư.”

54Xók achêk, xong xók xâng nôôq paraaq achêk, piđó bâân tapraaq môôp pagrâ kalóóng lóóm ađêi, lơq piđó kap mênh kaniêng palơq ađó. 55Bơơi xók bâân bing bhlaai Chuôq Yaang Liêm, xong xók lêi li mrang leq pleng, ađó lêi đu cha-iil tabah ưng Yaang Pleng lơq Chuôq Jê-su dyương dhiq hót atươm Yaang Pleng. 56Ađó praaq: “Lêi têêh, aku lêi nôôq talaang pleng bâân talóng bhươh, lơq Akóón Manưih dyương dhiq hót atươm Yaang Pleng.” 57Xók achêk, xong xók lalơu karơ dhariêng, piđó kapit katór ađêi lóóiq hayơq maar pơh ruul leq ađó. 58Xók ơi galôôi gluh leq nguôi kanóón, piđó glơm dhơl ađó. Nôôq manưih đương lêi lơơi aau nguôi ưng ađêi dhiq dyung mưi padruuih n'dhóm bâân đóók nek Saau-lơ. 59Piđó glơm dhơl Ê-tiên xók bhêêl ađó nhan gavơh, kơi ađô: “Kakoh Chuôq Jê-su, nhan đââng chô ravaai akóón.” 60Kơi ađek hayơq, xong xók chakoh takól chok leq, ađó lalơu karơ dhariêng: “Chuôq ơơi, Amei yươq n'toh matu ađô leq piđó.” Xók praaq paraaq achêk xong nek ađó bêch.