Tarnêêng Nôôq Sưưq-đô 3

1Xók achêk, Phi-e-rơ lơq Jang đơk leq đong bhanuôih mót jơ gavơh nhan, nek mót jơ đu takiêh. 2Mưi nak achêk, ơi khuch tââq kalóóng luônh amêêq ađêi, ơi bâân glâk tơk, nek manưih hayơq dyóp tangêi palââng patơơt dhiq palóng ưng đong bhanuôih, dhiq bâân đóók nek Palóng Liêm, đóng nhan jêên poor jóói tââq nôôq manưih mót leq kalóóng đong bhanuôih, 3hayơq xók lêi Phi-e-rơ lơq Jang ravang mót leq kalóóng đong bhanuôih, ađó gavơh nhan đóng đơơp jêên poor jóói. 4Bơơi xong xók nek palơq Jang lêi limrang leq ađó ađek, Phi-e-rơ praaq: “Nek lêi leq nôôq yưa!” 5Kơi ađek ađó lêi chamet leq nhiđó, rââm pei đơơp m'bưưiq ve rau tââq nhiđó. 6Dhơ kơi ađek, Phi-e-rơ praaq: “Vaang lơq baak, kah rau đu ve tơơt dhiq aku, bơơi rau đu aku ve, aku đóng amei ađôk. Vơn achak Chuôq Paq Manưih Jê-su manưih Na-xa-reet, nek bhadyaang vôôiq.” 7Xók ơi kadhâng tamưng anó dhiq têi atươm, ađó tơq anó yuur dyương, nek n'drươh, tapaang dyung lơq mat tapaang dyung ưng anó bâân tiêl karơ. 8Xók xong yuur chaplóng, ađó dyương mưng lơq tââp jađaang vôôiq, hayơq ađó mót leq kalóóng đong bhanuôih palơq nhiđó, drươh vôôiq drươh chaplóng drươh bhi haanh Yaang Pleng. 9Tabhơt dhanuôr hangiêk lêi ađó jađaang vôôiq lơq bhi haanh Yaang Pleng. 10Hayơq piđó đâh n'nal ađó achêk, kơi ađó biêh nek manưih buôn tơơt nhan jêên poor jóói dhiq Palóng Liêm ưng đong bhanuôih, kơi ađek hayơq piđó bâân buur bing rau hêq lêi lơq lóng chrih taai tarnêêng ơi val vaaih đóng ađó.

11Xók achêk, xók ađó achêk bhiêk tapun ting Phi-e-rơ lơq Jang, tabhơt dhanuôr palơq bing rau hêq lêi, ting pajươk yuur mut tơk leq piđó dhiq palóng ving, dhiq bâân đóók nek Palóng Ving Sa-lô-môôn. 12Bơơi xók lêi kơi ađek, Phi-e-rơ ââi lóóiq palơq manưih dhanuôr: “Nhan móón adhi anó, nek manưih dhanuôr I-sơ-ra-êên ơơi, hau adhi anó pei lêi chrih leq tarnêêng ađôk? Môôiq hau adhi anó lêi nôôq yi limrang thê kơi nôôq yi ơi têêng anó achêk bhadyaang vôôiq tââq mataai môôiq tarnêêng liêm n'tua ưng ađêi? 13Yaang Pleng ưng Ap-ra-haam, Yaang Pleng ưng I-saak lơq Yaang Pleng ưng Ja-kôôp, nek Yaang Pleng ưng avuôq nôôq he, ơi bhi haanh Dhơn Ratơơq ưng Ađó, nek Chuôq Jê-su, Yaang đu adhi anó ơi kóóp pajaau lơq kah đươi toom mat Phi-laat xók abhươp ađek ơi kayua paloh Ađó. 14Bơơi adhi anó ơi kah đươi Yaang Cha-iil Tabah lơq Bhơt Liêm, nhan kayua bâân paloh đóng ađêi mưi nak leng manưih, 15bơơi adhi anó ơi leng Yaang Tââp Tanââp Parmông, nek Yaang đu Yaang Pleng ơi têêng mamông lóóiq tââq akan chêt, hơq nôôq yi nek manưih truuih đuui đóng rau ađô. 16Lơq tââq lóóm huuiq dhiq achak Ađó, akonh ađek, manưih đu adhi anó maar lêi lơq n'nal, hayơq achak Ađó ơi têêng đóng karơ. Lóóm huuiq achêk đươi dhiq Ađó ơi đóng akonh achêk đu karơ bhơt kơi achêk drươh toom mat tabhơt adhi anó. 17Xók ađôk, nhan móón adhi anó, aku n'nal nek adhi anó ơi têêng vôôiq kalóóng đu kabaang, lơq nôôq manưih têêng takóh gamak ưng adhi anó kung kơi ađek. 18Bơơi nôôq rau đu Yaang Pleng ơi loom praaq dhiq bóóp ưng tabhơt nôôq manưih đââng taruuih, nek Yaang Paq Manưih ưng Ađó phaai đơơp ka-ai jarnah, nek Ađó ơi têêng tajaap kơi ađek. 19Taai ađek, nek klôôq lóóm, lơq val chô, đóng matu lơt ưng adhi anó bâân katel tabil, 20hơq đóng ganah liêm tame tơk tââq đu ve mat ưng Chuôq, lơq Ađó kayua Yaang ơi bâân chaleq đóng adhi anó, nek Jê-su Chuôq Paq Manưih, 21nek Yaang kơng phaai jư lóóiq dhiq katiêk pleng đóng tơk ganah hayuur lóóiq dyóp rau, nek rau hayơq Yaang Pleng ơi praaq tââq hanua bơơi bóóp nôôq manưih đââng taruuih liêm ưng Ađó. 22Alua kơi ađek, Môôi-se ơi praaq kơi ađô: ‘Chuôq, Yaang Pleng ưng nôôq he e pahayuur đóng adhi anó mưi nak đââng taruuih thê kơi aku tââq m'pơng kalóóng nôôq adhi anó ưng ađêi. Adhi anó e tameng xâng ađó ting kơi dyóp rau dhơ dharau hau rau hayơq ađó praaq palơq adhi anó. 23Bơơi rau e avaaih đóng ngaai manưih hơq la kah tameng xâng manưih đââng taruuih ađek, nek manưih achêk e bâân taleng karchêt tââq manưih dhanuôr.’ 24Kơi ađek hayơq, tabhơt nôôq manưih đââng taruuih tââq Sa-mu-êên lơq nôôq manưih vôôiq tatun ađó, la piđó pơơh bóóp praaq, hayơq piđó kung truuih đuui leq nôôq tangêi ađô. 25Adhi anó nek akóón chachau ưng nôôq manưih đââng taruuih lơq ưng raket bóóp đu Yaang Pleng ơi têêng palơq avuôq ađêi, xók praaq lơq Ap-ra-haam, kơi ađô: ‘Lơq tââq mưi akóón chachau ưng akóón, tabhơt nôôq dhong nooi dhiq katiêk e bâân phươk.’ 26Laloom tââm lơq adhi anó, xong tââq pahayuur Dhơn Ratơơq ađó, Yaang Pleng ơi kayua Yaang achêk tơk đóng phươk leq adhi anó nek têêng palâh lóóm dyóp ngaai tââq đu môôp aak ưng ađêi.”