Katu Bible Literal Text
Tarnêêng Nôôq Sưưq-đô 2
Xók tangêi Bhiêk Xââng Jêt Tangêi ơi tơk vaq, tabhơt piđó tơơt nek palơq xóng ađêi dhiq mưi dham. Parmat, mưi dhariêng tââq pleng xuul, thê kơi ploong dhiiq karơ bâân pruung tơk, lơq ađó mót bing plok kalóóng đong dhiq piđó xók tơơt. Lơq nôôq n'taak ngóq kơi palơq óih pakah palơq piđó, xók ơi nh'xóóng mađơq, hơq nôôq ađek jrươp bóq dhiq ting chanak manưih kalóóng piđó. Tabhơt piđó bâân bing bhlaai Chuôq Yaang Liêm lơq tââp tanââp praaq palơq nôôq dhariêng lââng, ting kơi Yaang Liêm đóng leq piđó praaq.
Xók ađek ve nôôq manưih Jo Thaaiq xók tơơt at dhiq Jê-ru-sa-leem, nek nôôq manưih bhi huuiq tââq dyóp ađó katiêk ưng nôôq dhanuôr raal pleng. Xók dhariêng ađek xuul tarlóng, ganơr manưih krong madhiq lơq bâân nhok nhói taai dyóp ngaai maar xâng piđó praaq palơq dhariêng ưng ađêi. Tabhơt dhanuôr maar hêq lêi lơq lêi lóng chrih, móón kơi ađô: “Lêi tôôh, eh dhơq tabhơt nôôq manưih xók praaq ađek nek dhanuôr Ga-li-lê eh alua? Ng'kơi têêng nôôq he xâng dyóp chanak kalóóng piđó praaq palơq dhariêng n'tua ưng ađêi kalóóng xưưq đu nôôq he bâân n'niên? Nek manưih Baat-thê, manưih Mê-đi, manưih Ê-la-miit, nôôq manưih tơơt at dhiq Mê-sô-bô-ta-mi, Ju-đê, ve dyơq Kaap-ba-đôk, Bông, A-si, kung kơi Phi-ri-gi, Baam-phi-li, Ai Kơp, nôôq xưưq kalóóng Li-bi đan Si-reen, lơq nôôq tamóói Rô-ma bóói tham, tabhơt manưih Jo Thaaiq lơq manưih đu huuiq taruuih Jo Thaaiq, manưih Kơ-rêêt lơq manưih A-rơp, nôôq he maar xâng piđó praaq palơq dhariêng ưng nôôq he leq nôôq tarnêêng gamak mataai ưng Yaang Pleng.” Tabhơt piđó maar hêq xâng lơq lêi kah n'nal kakơi, manưih ađô praaq palơq manưih tôôh: “Chiên ađô kiêng móón nek hau rau?” Dyơq masôôq lââng ajóóch ơi praaq kơi ađô: “Nôôq manưih ađek nek xók bâân ból buôh baq!”
Bơơi xók ơi yuur dyương, Phi-e-rơ palơq majêt mưi sưưq-đô ơi pei praaq lơq móón palơq piđó:
“Nhan móón lơq adhi anó, manưih dhanuôr Jo Thaaiq lơq tabhơt nôôq ngaai dyơq tơơt at dhiq Jê-ru-sa-leem, chiên ađôk phaai xar rau keen palơq adhi anó, lơq nhan nek tameng katór xâng paraaq aku. Taai nôôq manưih ađô yươq bâân ból kơi adhi anó ngóq, ơi xók ađôk nek jơ đu pe kalóóng tangêi. Dhơ kơi ađek, ađô nek rau ơi bâân praaq tââq Jô-êên manưih đââng taruuih:
‘Yaang Pleng praaq: “Tarnêêng e vaaih tơk kalóóng nôôq tangêi xariêq,”
“Aku e n'toh Yaang Liêm Aku dhiq dyóp ng'kar m'bech,
Akóón padruuih lơq akóón pađiil nôôq akóón e praaq đââng taruuih,
padruuih n'dhóm ưng nôôq akóón e lêi rau tapalêi,
lơq nôôq manưih takóh ưng nôôq akóón e m'pó lêi parnó.
Patơk mơ dhiq nôôq dhơn padruuih, dhơn pađiil ưng Aku kalóóng nôôq tangêi ađek,
Aku e n'toh Yaang Liêm Aku, lơq piđó e praaq đââng taruuih.
Aku e đóng nôôq parnó chrih dhiq pleng yaal
lơq nôôq kanal chrih dhiq katiêk êêp,
ahaam lơq óih nek palơq kabul gayươk.
Mat tangêi e bâân vaaih xar kanam,
dyơq mat hayum nek xar ahaam,
xók kah ơi tơk tangêi gamak lơq cha-iil taklaaq ưng Chuôq.
Lơq dhơ dhangaai manưih đu gavơh nhan achak ưng Chuôq nek e bâân tapaq.”’
Nhan móón lơq adhi anó, nôôq manưih I-sơ-ra-êên, nhan tameng xâng nôôq paraaq ađô: Chuôq Jê-su manưih Na-xa-reet nek manưih bâân Yaang Pleng alua pakah palơq adhi anó palơq nôôq tarnêêng mataai, raman chrih lơq kanal chrih hơq tââq Ađó, Yaang Pleng ơi têêng dhiq m'pơng adhi anó, kơi chênh adhi anó ơi n'nal. Yaang achêk ơi takóóp, ting kơi tarnêêng ơi ravang lơơi lơq rau n'nal laloom ưng Yaang Pleng, adhi anó ơi leng karchêt xók teeng dhiq n'lóóng baang chatông tââq têi nôôq manưih kah gani, Ađó nek Yaang đu Yaang Pleng ơi têêng mamông lóóiq, xong xók paxooq lơh tââq đu jarnah ưng kan chêt, taai ađó kah ve đuôh jư kadhâng Ađó hót raal ađêi. Ơi bhua Đa-viit praaq leq Ađó kơi ađô:
‘Aku taluôn luôn lêi Chuôq tơơt toom mat aku
ơi Ađó tơơt hót tươm aku, đóng aku yươq bâân kakhin kapơn.
Taai kơi ađek, lóóm aku bhuui sương lơq n'taak aku bhuui marhaal.
Bơơi dyơq lơh ađek, achak araang aku e kung tơơt at kalóóng lóóm rââm.
Ơi Ađó e kah m'peq lơơi ravaai aku kalóóng bóng maraaih,
e kung kah lơơi đóng Yaang Tabah Ađó lêi đu nh'xoq kluuiq.
Ađó ơi pakah đóng aku kalơng parmông;
Ađó e têêng đóng aku bing bhlaai lóóm bhuui sương nek palơq moh mat ưng Ađó.’
Nhan móón nôôq pe, nhan móón adhi anó, palơq rau taniih, rau ve chóóm praaq palơq adhi anó leq abhươp Đa-viit, nek ađó ơi chêt lơq ơi bâân tơp, ping ưng ađó dyơq dhiq m'pơng nôôq he patơk tangêi ađôk. Lơq hayơq, ơi nek manưih đââng taruuih lơq ơi n'nal kơi Yaang Pleng ơi đóng paraaq ng'kóh palơq ađêi đóng patơơt mưi akóón chachau mađó leq dhong nooi ađêi dhiq tanơơt ađêi, hayơq xong xók lêi loom tarnêêng ađô, bhua ơi praaq leq đu mamông lóóiq ưng Chuôq Paq Manưih, kơi ađô:
Ađó yươq rau bâân m'peq lơơi kalóóng bóng maraaih,
m'bech ng'kar Ađó kung yươq rau lêi nh'xoq kluuiq.
Yaang Pleng ơi têêng Chuôq Jê-su ađô mamông lóóiq, tabhơt nôôq yi nek manưih truuih đuui đóng rau ađek. Ơi kơi ađek, xók ơi bâân padyók tơơt hót atươm Yaang Pleng lơq đơơp pei paraaq hươq leq Chuôq Yaang Liêm tââq Ama, nek Ađó ơi n'toh tarnêêng kơi ađô, nek rau đu adhi anó xók lêi lơq xâng.
Taai Đa-viit ơi kah dyók leq pleng, bơơi chênh ađó praaq:
‘Chuôq praaq palơq Chuôq aku: “Nek tơơt hót atươm Aku,
đóng patơk xók Aku têêng nôôq brau ưng Akóón xar parđâq ng'gơq dyung ưng Akóón.”’
Kơi ađek hayơq, tabhơt đong I-sơ-ra-êên phaai n'nal kơi tamưng nek Yaang Pleng ơi đóng Ađó têêng Chuôq lơq Yaang Paq Manưih, chênh nek Chuôq Jê-su ađô, manưih đu adhi anó ơi teeng đinh.”
Xók ơi xâng kơi ađek, piđó ka-ai karuôq kalóóng lóóm, hayơq móón palơq Phi-e-rơ lơq nôôq sưưq-đô đu dyơq, kơi ađô: “Nôôq manưih adhi anó ơơi, hau nôôq yi phaai têêng?” Hayơq Phi-e-rơ praaq palơq piđó: “Phaai klôôq lóóm lơq dyóp ngaai kalóóng adhi anó phaai đơơp pheep bap-teem vơn achak Chuôq Paq Manưih Jê-su đóng bâân talơơi matu lơt ưng ađêi, hayơq adhi anó e bâân đơơp kaliim nek Chuôq Yaang Liêm. Ơi praaq hươq ađek nek ravang đóng leq adhi anó, đóng akóón chachau ưng adhi anó lơq đóng leq tabhơt nôôq manưih tơơt changaai, chêk nek dhơ dhangaai đu Chuôq nek Yaang Pleng nôôq he alua ơi dhaloong.” Palơq bơk paraaq lââng dyơq, ađó ơi truuih đuui lơq pató pachóóm piđó, kơi ađô: “Phaai đóng ađêi bâân paq jóói tââq dhong nooi môôp aak ađôk.” Kơi ađek, xók xong pei đơơp paraaq ưng ađó, piđó đơơp bap-teem, pamơ pe ngaan ravaai ơi bâân mót leq Akóón Dhơn Chuôq kalóóng tangêi achêk. Hayơq, piđó bhiêk taluôn kalóóng paraaq pachóóm ưng nôôq sưưq-đô lơq kalóóng marau tarnêêng, kalóóng đu veh beng lơq kalóóng paraaq gavơh nhan.
Rau kakhin kapơn n'toh dhiq dyóp ngaai, lơq bơk rau chrih liêm palơq kanal chrih pakah tââq nôôq sưưq-đô. Tabhơt nôôq manưih huuiq hayơq krong lóóiq dhiq mưi dham lơq đươi makơi dyóp rau, piđó baan katiêk karuung lơq drươp karvaan ađêi, hayơq nh'xóóng piđó đóng leq dyóp ngaai, ting kơi dyóp chanak ve kơng đươi hau rau, dyóp tangêi dyơq bhiêk mưi lóóm tơơt kalóóng đong bhanuôih, drươh veh beng dhiq dyóp đong, piđó ơi nh'xóóng tarmông kalóóng bhuui sương lơq bhơt lóóm lalua, bhi haanh Yaang Pleng lơq ve têêng mót lóóm palơq tabhơt manưih dhanuôr, dyơq Chuôq xók dyơq đóng kơơq nôôq manưih bâân paq mót leq kalóóng kabhuh achêk dyóp tangêi.
Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.