Tarnêêng Nôôq Sưưq-đô 1

1Nhan móón Thê-ô-phi-lơ, dhiq kalóóng bha-aar laloom hei aku ve xaraq leq dyóp rau hơq Chuôq Jê-su ơi tââp têêng lơq truuih pachóóm, 2patơk tangêi Ađó bâân tađââng chô leq pleng, xók ơi đóng praaq kayua tââq Chuôq Yaang Liêm đóng nôôq sưưq-đô đu Ađó ơi chââih, 3kung nek nôôq manưih hơq Ađó ơi tơk pakah chênh ađêi xók mamông đóng piđó, xong xók Ađó ơi đơơp janah ka-ai, palơq bơk pan-nal, ơi taai pakah palơq piđó kalóóng puôn jêt tangêi lơq praaq nôôq chiên leq katiêk ưng Yaang Pleng. 4Xók talum mat palơq piđó, Ađó ơi kayua đóng piđó kah chóóm xooq tââq Jê-ru-sa-leem, bơơi phaai đương paraaq hươq ưng Ama, “nek rau hơq adhi anó ơi xâng tââq thêi, 5kơi Jang ơi têêng bap-teem palơq đơơk, bơơi adhi anó e bâân bap-teem palơq Chuôq Yaang Liêm kah meen đươnh tââq nôôq tangêi ađô.”

6Taai kơi ađek, xók mandrươh vôôiq tơk, piđó tamóh Ađó kơi ađô: “Chuôq ơơi, ve lua Amei pachô katiêk đóng I-sơ-ra-êên leq bhêêl ađôk?” 7Kơi ađek bơơi Ađó praaq lơq piđó: “Rau koom đóng adhi anó bâân n'nal eh rau nek tangêi jơ môôiq kaxe kamó đu Ama ơi kanóq ting mataai karơ ưng Ađó. 8Dhơ kơi ađek, adhi anó e pei đơơp mataai raman xók Chuôq Yaang Liêm dhaluônh jaq dhiq ađêi, lơq adhi anó e nek nôôq manưih truuih đuui leq thêi dhiq Jê-ru-sa-leem, kalóóng luch xưưq Ju-đê, xưưq Sa-ma-ri, lơq patơk xariêq pale katiêk.” 9Xong xók praaq nôôq paraaq achêk, xók piđó dyơq chaling lêi, nek Ađó bâân padyók, lơq mưi gaboq dhaluk pađơp Ađó lơh tââq mat piđó. 10Xók bhêêl piđó dyơq đương chamet lêi leq pleng xók Ađó chô leq pleng, lơq lêi tôôh, bơơr chanak padruuih xơp aau bhóók tơk dyương hót tóór piđó. 11Nhiđó praaq: “Nôôq manưih Ga-li-lê tôôh, hau nôôq pe dyương chaling lêi leq pleng? Chuôq Jê-su ađôk, Yaang ơi bâân padyók chô leq pleng lơh tââq nôôq pe, e kung tơk kơi kalơng đu nôôq pe ơi lêi Ađó dyók leq pleng.”

12Kơi achêk hayơq, tââq akoq bôôl bâân đóók nek Ô-liiu, piđó val chô tơk Jê-ru-sa-leem, hơq bôôl ađek đan dhiq Jê-ru-sa-leem, ve magral kalơng vôôiq kalóóng mưi tangêi Sa-baat. 13Xók piđó ơi chô tơk, piđó vôôiq dyók leq buông yaal dhiq piđó xók tơơt at, nek ve Phi-e-rơ, lơq Jang, palơq Ja-kơ lơq En-rê, Phi-liip lơq Thô-ma, Ba-thê-lê-mi lơq Ma-thi-ơ, Ja-kơ akóón padruuih A-phê lơq Si-môôn Xê-lôôt, palơq Ju-đe, akóón ưng Ja-kơ. 14Tabhơt piđó maar pajêi makơi lóóm kalóóng rau nhan gavơh, palơq nôôq manưih pađiil palơq Ma-ri, amêêq ưng Chuôq Jê-su, lơq palơq nôôq adhi padruuih ưng Ađó.

15Kalóóng nôôq tangêi ađek, xong xók yuur dyương dhiq bhlưa kalóóng nôôq adhi anó ađêi (parbơk nôôq manưih dhiq dham ađô nek mơ mưi hariêng bơơr jêt), Phi-e-rơ praaq: 16“Nhan praaq, nôôq manưih adhi anó, ađô nek rau dhakơi phaai bâân tajaap kalóóng Bha-aar Yaang Pleng, nek paraaq đu Chuôq Yaang Liêm ơi loom móón dhiq bóóp bhua Đa-viit leq Ju-đa, ađó vaaih xar manưih đââng kalơng đóng kabhuh kóóp Chuôq Jê-su. 17Taai ađó ơi bâân đóók maleq palơq nôôq he lơq ơi đơơp phơn ađêi leq tarnêêng ađôk.” 18(Kơi ađek hayơq ađó ơi kơl mưi kalung klung tââq jêên makông ưng tarnêêng kah dhalam, lơq xong xók bâân chabươp tapajuk akoq, ađó bhraaiq luônh, dyơq luch luônh ađó bâân tapươi leq nguôi. 19Chiên ađôk vaaih xar rau keen palơq tabhơt nôôq ngaai tơơt at dhiq Jê-ru-sa-leem. Taai kơi ađek, kalung klung ađek bâân đóók palơq dhariêng praaq ưng piđó nek “Hak-een-đa-ma”, kluôh nek “Kalung Klung Ahaam”.) 20“Taai tarnêêng achêk ơi bâân xaraq kalóóng bha-aar Haanh Yaang Pleng:

‘Phaai lơơi kalung klung ađó bâân bhahi bhatoong,

kung óóq ve ngaai mamông dhiq ađek,’ lơq

‘Phaai lơơi manưih đu lââng pei đơơp tarnêêng ưng ađó.’

21Taai kơi ađek, kơng phaai ve nôôq manưih ơi ting vôôiq palơq nôôq he kalóóng bhluuch tangêi kaxe đu Chuôq Jê-su vôôiq val bhlưa nôôq he, 22tanââp tââq pheep bap-teem ưng Jang đóng patơk tangêi hơq Ađó bâân padyók lơh tââq nôôq he — mưi kalóóng nôôq manưih chêk phaai xar manưih truuih đuui leq đu mamông lóóiq ưng Ađó nek palơq nôôq yi.” 23Piđó kayua bơơr chanak, Jô-seep bâân đóók nek Ba-sa-ba, hơq ađó nek bâân đóók achak nek Juk-tu, lơq Ma-thia. 24Xók nhan gavơh, piđó móón: “Kakoh Chuôq, chênh Amei, Yaang n'nal kalóóng lóóm ưng dyóp ngaai, nhan chaleq mưi kalóóng bơơr chanak ađô hơq Amei ơi chââih nek ngaai 25hơq đóng pei đơơp tanơơt ưng tarnêêng đôk palơq tarnêêng sưưq-đô đu Ju-đa ơi m'peq lơơi đóng vôôiq tơk dham ưng ađó.” 26Piđó pei padhơơch leq bơơr nak chêk, nek dhơơch chaleq pâng Ma-thia, hơq nek ađó bâân chââih maleq palơq majêt mưi sưưq-đô.