Kaike Standard Traslation
प्रे 4
येहूदीवन किम अदालतन ङू पत्रुस रे यूहन्ना
पत्रुस रे यूहन्ना सिमिवन ङ्याबो ल्होई र्वायङ ङ्याह्, पुजारीव, आराधनालयन सेनापति रे सदुकीव ख्युन स्याह् स्वाबो। मन प्रेरित ङेह्पावजै “येसु सिह्पालै सम्पु ग्युर्बो, मन्नकारन घङ सिह्पान सिमिव यङ सम्पु ग्युर्नान ङ्याह्।” र्वार्वा पर्मान बिम्बो। अन्नकारन सदुकिव सुतूबो। तब ख्युई अजोवग जुङ्बो, रे नाप्चेन बेर ज्यालग नाह्म्बो, तैङर्वाङिन अन्तौ ङ्याजे रातपा ङ्याह्। जेङ्नै बचन ङ्यान्नानवन बर्ग लैःजै बिस्वास खेबो, बिस्वास खेनानवन ताँका क्वाईमाल्ला: हजार ङा रह्पा।
नाप्चे अजोवन सासकव, अगुवाव रे कानुन लन्नान्न सिमिव यरूसलेमग जोम्पा ङ्याह्। प्रधान पुजारी हन्नास, कैयाफा, यूहन्ना, अलेक्जेन्दर रे प्रधान पुजारीन पयार पुरू स्याह् ङ्याह्। ख्युई पत्रुस रे यूहन्नाः घूँ सोलसोल लोप्पो, “कन सक्तिलम आथबा सुन मिह्नग ङेनजै अन खेपा जेङ्पा?”
तब पबित्र आत्माई नाङ्पा राह्राह् पत्रुसजै ख्युकाङ्मोः र्वाबो, “सिमिवन हाकिम रे अगुवा हो, त्या ङी खोर्या सिमिदीन ङ्या धोन लःदी खेपान भारेः नु कुजुई ताःबो र्वार्वा ल्होङ्ङिन, ङेन पुरूग रे इस्राएलन सिमि पुरूग क्युई रायो, कि ङेनजै क्रुसग चुम्पान रे परमेस्वरजै सिह्पालै सम्पु दोङ्पा, नुई नासरतन येसू मसिहन मिह्न्न सक्तिग अन सिमि ङेन ङू सिम राह्राह् थाङ्थाङ् छ्युङ्पा ङ्याह्।” येसु ती जेङ्पा सुन भिह्तु पबित्रसास्त्रजै र्वाङ, “कन लुङग ङेन खार्बावजै काम मीपा र्वार्वा छुछु पप्पो, अनै कोप्चान धुरन-लुङ रह्बो।1 घङ सुई र्वार्वा मुक्ति मया, तैङर्वाङिन सिमिवजै मुक्ति देच्चेन भिह्तु पान्नाङन पोँ सिमिकाङ्मोः घङ मिह्न तये बिम्पा मया।”
जब ख्युई पत्रुस रे यूहन्नान हिम्मत रङ्बो, रे अजोव छोए मलम्पा रे साधारन सिमिव जेअँ र्वार्वा क्युई रह्पा, तब ख्यु हालाईबो, रे अजोव येसुन ङ्याबो छ्युँ र्वानान ख्युकाङ्मोः क्युई रह्पा। जेङ्नै ताःपान सिमी पत्रुस रे यूहन्नान ङ्याबो थाङ्थाङ् छ्युङ्पा रङरङ ख्युन बिरोधग ल्होई तये र्वा मतैबो। अन्नकारन अजोवग यहूदीवन किम अदालतलै खोलोः वया र्वार्वा ख्युई राह्ङराङ्साः फोब्लि खेबो, “अन सिमिकाङ्मोः ता ङ्योअजै तै खेचे जेम? तैङर्वाङिन तेम्माई अजोवलम ताईलुवान धोनदी रह्पा ङ्याह् र्वानान यरूसलेमग छ्युङ्नान पुरूजै रङ्तपा ङ्याह्, रे ङि अन अस्वीकार खे मतैनान। जेङ्नै अन ल्होई सिमिकाङ्मोः नफेलाःयो र्वार्वा ‘ह्याङ ङेन येसुन मिह्नग सिमि सुईनै ङ्याबो ल्होई तये नर्वा’ र्वार्वा ङ्योअजै अजोवग चेतावनी बिनत्वानान।”
आलै अजोवग स्वा र्वार्वा “त्यान धेरा येसुन मिह्नग ल्होई नर्वा रे तये नलना” र्वार्वा ख्युई आदेस बिम्बो।
जेङ्नै पत्रुस रे यूहन्नाई ख्युकाङ्मोः झब बिम्बो, “परमेस्वरन ल्होई ङ्यान्चेन खेरे ङेनकोन ल्होई ङ्यान्चे परमेस्वरन ङू लः जेङ्पा कि नङ्पा ङेह्ः छोए ख्या। तैङर्वाङिन ङ्योअजै रङ्पा रे ताह्पा ल्होईव ङ्योअग मर्वारे छ्युङ मतैनान।” ख्युई सजाय बिन्चे मेसो तये मर्हारे अजोवग हेँ ह्याल्म फ्याङफ्याङ फाप्पो, तैङर्वाङिन कन घतना घती रह्पा ङ्याह् अन्न पत सिमि पुरूवजै परमेस्वरन महिमा खेपाई ङ्याह्। तैङर्वाङिन कन सिमि ताईलुवान धोनलम ताःफाम्पा ङ्याह्, नुन उमेर परा ङेथलन खेरे ह्याल्म ङ्याह्।
बिस्वासीवन सोअताप
छुतकरा देद्दे पत्रुस रे यूहन्ना जेँन फुरीवन स्याह् स्वाबो, रे ङोत्वा पुजारीव रे अगुवाजै र्वापा ल्होई पुरूव ख्युकाङ्मोः स्याप्पो। जब बिस्वासीवजै अन ताह्बो, तब ख्युई ङ्याबो परमेस्वरक्याँ जेँन केह्ः छ्युछ्यु र्वाबो, “हे प्रभु, सुई पान्नाङ, पिर्थीबी, समुन्द्र रे मनग रह्पा तैस्याङ पुरू दोङ्बो, 2 सुई पबित्र आत्मालम जेँन सेवक ङिन खेपुल दाऊदन ङुरलै र्वाबो, ‘यहूदीन खोलोःन सिमिव तैङ सुतूबो, रे सिमिव भाछ्योवाग तैङ सदेन्त्र धोँ? परमप्रभुन बिरोधग रे नुन अभिसिक्त सिमिन बिरोधग पिर्थीबिन झलीव च्याङ्बो, रे हाकिमव ङ्याबो जोम्बो।’”3
तैङर्वाङिन तेम्माई ङेनजै अभिसेक खेपा, “ङेन पबित्र सेवक येसुन बिरोधग हेरोद रे पन्तियस पिलातस ङ्योरुम, यहूदीन खोलोःन सिमि रे इस्राएलीवन ङ्याबो अनै सहरग जोम्पा ङ्याह्।4 अनै खेचेन पत तै ङेन पाःपुङ्लम रे ङेन योजना अन्सार ङूलै ठहर्याई खेपा ङ्याह्। ता हे प्रभु, ख्युन धम्की सेह्ना, रे नान राङ्पाकाङ्मोः यामयाम हिम्मत खेखे नान बचन र्वाफाना, रे ताफान्चेन पत ङेनजै जेँन पाःपुङ क्याङ्तौ, जेँन पबित्र सेवक येसुन मिह्नलम ताईलुवान धोन रे हालाईचेन धोन रायो।”
ख्युई सोअताप्मी ख्यु जोम्पू दार्बो, रे ख्यु पुरू पबित्र आत्माई नाङ्बो, रे ख्युई हिम्मत खेखे परमेस्वरन बचन र्वाबो।
बिस्वासीवजै जेँन क्यु पीमा खेपा
बिस्वास खेनानवन मोङ पुरू सम ती रे ती आत्मान रह्पा ङ्याह्, रे ख्युन बर्ग तीजै जेँन क्युन तयाः अन ङन जेँन जेङ्पा र्वार्वा मर्वाङ, जेङ्नै ख्युन तैस्याङ पुरू पीमा ङ्याह्। मन प्रेरितवजै यामयाम सक्ति ङ्याबो प्रभु येसु सिह्पालै सम्पु ग्युर्पान साँचि बिङ्ङ, रे ख्यु पुरून लाह्ः परमेस्वरन दया किम लुईपा ङ्याह्। ख्युन बर्ग सुई र्वार्वा तैनै कोम्म मराँ, तैङर्वाङिन सुन ङ्याबो खेः रे यिम ङ्याह्, ख्युई मन र्युर्यु, ग्युर्पा चिजवन मोल सङ्ङ, रे प्रेरितवन स्याह् नाह्ङ्ङ, रे सुवा-सुवाः तयाः-तयाः त्वाङ, अन पुरूग परेङ।
ता साइप्रस देसन लेवी खान्दान्न योसेफ, सू प्रेरितवजै बरनाबास र्वार्वा मिह्न नाम्पा ङ्याह् (कन्न अर्थ जेङ्पा हौसला बिन्नान्न सिमि), नुई जेँन खेः र्युप्पो रे अन सोह्ङ सस्सै प्रेरितवन चरनग नाह्म्बो।
Source notes (4)
- Cross-reference भजन ११८:२२-२३; दान २:३४-३५
- Cross-reference प्रस २०:११; नहे ९:६; भजन १४६:६
- Cross-reference भजन २:१-२
- Cross-reference मत्ती २७:१-२; मर्क १५:१; लुक २३:१; ७:११; यूह १८:२८-२९; यसै ६१:१
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.