Kaike Standard Traslation
प्रे 5
हननिया रे सफिरा
जेङ्नै हननिया मिह्न्न ती सिमि रे नुन मिसा सफिराई तयाः खेः र्युबो, रे अन्न मोललम नुन मिसानै सल्लाग ङाई जेँन ङ्याबो नाह्म्बो, रे ङाई वव्वै प्रेरितवन चरनग नाह्म्बो। जेङ्नै पत्रुसजै र्वाबो, “ए हननिया, पबित्र आत्मा ङ्याबो लबार र्वानान रे खेःन र्युप्पान मोललम ङाई जेँन ङ्याबो नान्चेन ल्होई सैतानजै कुजुई नान सम्म नाह्म्बो? मन मग्युर्नान्न बेर तै मन नान जेँनै मह्यायौ? रे मन ग्युर्मी यङ मन नानै आङग मह्या तै? झाःम धोन खेचेन नावा नान समग कुजुई स्वाबो? नाई सिमिकाङ्मोः ता नङ्पा, जेङ्नै परमेस्वरगै लबार र्वापा ङ्याह्।” अन ल्होई ताह्ताह् हननिया साः घ्याबो रे नुई परान पप्पो। अन ताह्नान पुरूव ङिह्म्बो। तब छबावजै च्याङच्याङ नू घोलाङजै कप्पो रे खोलोः हुरहुर वप्पो, रे लुँह्म्बो। तै रातपा ङ्याह् अन क्युई मरारे क्वाईमाल्ला: घन्ता सुमन ङिक नुन मिसा रे झिङ स्वाबो। पत्रुसजै नू लोप्पो, “ङाः र्वा, ङेनजै खेः अकेगै र्युप्पा जेङ्पौ?” आलै नुई र्वाबो, “अँ, अकेगै जेङ्पा।” जेङ्नै पत्रुसजै नू र्वाबो, “ङेनजै प्रभुन आत्मान छोए सेह्म्म कुजुई दीदी सल्ला खेपा? सेह्ना, नान पसाः लुम्नानव झलागै ङ्याह् रे ख्युई ना हुरहुर खोलोः वन्नान ङ्याह्।” आलै तुरुन्तै अन नुन लेह्न रह्म्म दिम्बो रे परान पप्पो। जब छबाव झिङ स्वाबो, नू सितपा रङरङ खोलोः हुरहुर वप्पो, रे नुन पसान रह्म्मः लुँह्म्बो। पुरू मन्दलिव रे अन ल्होई ताह्नान पुरू ङिनङिन लै आत्ति रह्पा।
प्रेरितव लम ताईलुवान धोनव रे हालाईचेन धोनव रह्पा
ता प्रेरितवन ल्हालै लैः ताईलुवान धोनव रे हालाईचेन धोनव सिमिन घूँ थङ्ङ, रे बिस्वासी पुरू सोलोमन मिह्न्न नाह्पू ङ्याबो जोम्ङ। जेङ्नै घङव बर्ग सुईनै ख्युन ङ्याबो धोमः स्वाचेन हिम्मत मरह्पा, जेङ्नै सिमिवजै ख्युकाङ्मोः सम्मान खेँ। प्रभू बिस्वास खेनान चोलोङ्चा रे चिमिचाव ङ्योरुमन मोङ झन ह्याल्म पोह्न राम जाःबो, सिथाल कि सिमिवजै लम-लमग खङ्नानकाङ्मोः सप्पो, रे पत्रुस स्वातौ नुन तिप्सो मात्र रानै ख्युन बर्ग कान-कान्न ङ्या थेबाःयो र्वार्वा ल्हौ रे खातवग ख्युकाङ्मोः आःफानफान नाह्ङ्ङ। यरूसलेमन धेँवछोँन सहरलमै लै सिमिवजै खङ्नानव रे आत्मा बाःपाई तेपफाम्पाकाङ्मोः वव्वै स्वाङ रे मन पुरू ताःङ।
प्रेरितकाङ्मोः तेपफाम्पा
प्रधान पुजारी रे नुन फुरीव पुरू, कन सदुकी पातीन ङ्याह् थादोवाई नाङ्नाङ् प्रेरितवन बिरोधग च्याङ्बो, रे प्रेरितकाङ्मोः कूकू सरकारी झ्यालखानाः कह्बो। जेङ्नै प्रभुन ती दुतजै छान्जे झ्यालखानान झलाव पोङ्बो, रे ख्युकाङ्मोः खोलोः सस्सै र्वाबो, “वया रे आराधनालयग च्याङ्च्याङ अन सार्बा जिन्दगीन ल्होन् पुरू सिमिकाङ्मोः स्यारा।” अन ताह्मी ख्यु नाप्पर्म आराधनालयन झिङ जाःजाः लह्म्मः जाःबो। जेङ्नै प्रधान पुजारी रे नुन फुरीवजै स्वाबो, आलै यहूदीन अदालत किम, आथबा इस्राएलीवन जोम्पा पुरून पुरू सिमिकाङ्मोः घ्वाबो, रे प्रेरितकाङ्मोः झ्यालखानालै सम्म सिमिव फेप्पो। जेङ्नै अधिक्रितवजै झ्यालखानाः ताप्ताप् सेन्तौ ख्युकाङ्मोः मदोतौ होलहोल स्वाबो। आलै अन ल्होन स्याप्पो, “ङ्योअजै झ्यालखानाः लः खेखे कोल्च्योवा फ्याङ्पा रे पालेव झलावग थाङ्थाङ् छ्युङ्पा रङ्पा, जेङ्नै झला पोङ्तौ ङ्योअजै झिङ सुई मदोपा।” अन ताह्ताह् आराधनालयन सिपाहीवन सेनापति रे ङोत्वा पुजारीव हालाईबो, ख्युई तै रह्पा ङ्याह् र्वार्वा नावाई खे मतैबो। जेङ्नै कान तीपाई स्वास्वा ख्युकाङ्मोः र्वाबो, “सेह्ना, ङेनजै कन सिमिकाङ्मोः झ्यालखानाः नाम्पा ङ्याह् ख्यु आराधनालयग च्याङच्याङ सिमिकाङ्मोः लम्पाई ङ्याह्।” तब अफिसर र सिपाहीव वैवै प्रेरितकाङ्मोः हलजफत मखेरे सप्पो, तैङर्वाङिन सिमिवजै ख्युकाङ्मोः लुङजै फ्याङ्दरा र्वार्वा ख्यु ङिह्म्बो।
ख्युकाङ्मोः प्रेरितकाङ्मोः सस्सै यहूदीवन अदालत किमन ङू सोल्बो, रे प्रधान पुजारीजै ख्युकाङ्मोः लोप्पो, “ङ्योअजै ङेनकाङ्मोः येसू मसिहन मिह्नग तये नलना र्वार्वा करा आग्या बिम्पा ङ्याह्, जेङ्नै ङेनजै जेँन छोएजै यरूसलेम पुरू काङ्तबो, रे मन सिमिन कहन दोस ङिन लाह्ः सस्सुम खेनौ।”1 जेङ्नै पत्रुस रे घङ प्रेरितवजै र्वाबो, “ङ्योअजै सिमिवन नङ्पा जेङ्नै परमेस्वरन र्वापा ङ्यान्त्वानान। ङिन खेपुलन परमेस्वरजै येसू सिह्पालै सम्पु दोङ्बो, सू ङेनजै क्रुसग किला थिङथिङ सप्पा ङ्याह्।2 परमेस्वरजै इस्राएलन घ्योप्पान पत रे ख्युन तीपावन माफ बिम्म नू ताङ्बोन अगुवा रे मुक्तिदाता दोङ्दोङ् जेँन पाःपुङ याईपाई किम दोङ्बो।3 ङि अन ल्होई पुरून साँचि ङिह्पा, रे उजुईखेखे पबित्र आत्मा रे, सू परमेस्वरजै जेँन र्वापा ङ्यान्नानकाङ्मोः बिम्पा ङ्याह्।”
जेङ्नै जब यहूदी जोम्पुन सदस्यवजै अन ताह्बो। तब ख्यु मिह्दा सुतुबो, रे ख्युकाङ्मोः सच्चे फाप्पो। जेङ्नै कानुन लन्नान्न सिमि रे जनताग माननीय गमलिएल मिह्न्न फरिसीजै यहूदी जोम्पू च्याङच्याङ ख्युकाङ्मोः यिप्पुदीन भिह्तु खोलोः वैफाम्बो, रे नुई यहूदीवन अदालत किमन सिमिकाङ्मोः र्वाबो, “इस्राएली हो, अन सिमिकाङ्मोः ङेनजै तै खेसुम खेपा ङ्याह्, अनग सापसाप छ्योवा। तैङर्वाङिन त्यान खेरे ङू थुदास र्वानान्न सिमिदी जेँगै सिमि किम जेङ्पा र्वार्वा च्याङ्बो। जेङ्नै नू सह्प्पो रे नुन ङिक जाःनान्न क्याम लीतौ सिमि पुरूव खातत्त्या होई आलै नुन मिह्नै मोल्बो। मन्न छाम्म सिमिन ताँका जेर्नान्न भेलाः यहूदा र्वानान गालीलन सिमि च्याङ्बो, रे हातिपा सिमिकाङ्मोः जेँनक्याँ परेःबो। अन रे सिबो, रे नु तेन्नानव खातत्त्या होई। चोँन अन भारेः ङा ङेनकाङ्मोः र्वाचे, कि अजोव सिमिवलम भाभा छ्योवा, रे अजोवग ख्योवा, तैङर्वाङिन अजोवन अन योजना आथबा अन धोन सिमिवलम राङिन नुँह् सिह्नान ङ्याह्। जेङ्नै यदि अन परमेस्वरलम जेङ्ङिनता ङेनजै अनग काःमतैनान। तेमन्ता ङेन परमेस्वरन बिरोध च्याङ्पा ठहरी राह्नान ङ्याह्।” तब ख्युई नुन सल्ला ङ्याम्बो। आलै ख्युई प्रेरितकाङ्मोः झिङ घ्वाघ्वा फ्याङ्बो, रे “येसुन मिह्नग ल्होई नर्वा” र्वार्वा ख्युकाङ्मोः ख्योवाबो। तब येसुन मिह्नग अपमान कूचेन सम स्योरस्योरलैम ठहरी रह्पा र्वानान्न ल्होईग स्याङैस्याङै प्रेरितव यहूदी जोम्पुन ङूलै गेग्गे होई। आलै एकुरो ख्युई आराधनालयग रे यिम-यिम वैवै येसू र्वार्वा मसिह जेङ्पा र्वार्वा लह्म्मः रे ताह्फेम्मः मख्योवाबो।
Source notes (3)
- Cross-reference मत्ती २७:२५
- Cross-reference कानुन २१:२२,२३
- Cross-reference लुक २४:४७
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.