Kaike Standard Traslation
प्रे 6
फुरी खेनान ङेह्पाव
मन दिनग जब चेलावन ताँका छारै वैपा ङ्याह्, तब हिब्रुवन बिरोधग ग्रीक-यहूदीवजै गनगन खेबो, तैङर्वाङिन बात्तैन साह्ई बिन्तौ ख्युन लम्मावजै त्वानान्न साह्ई मदेङ्ङ। तब प्रेरित च्योङेपावजै चेलावन मोङग स्वा र्वार्वा र्वाबो, “परमेस्वरन बचन ताह्फेम्मः ख्योवाख्योवा झाफान्नान-थुङ्फान्नान्न सेवा खेचे ङी लः मराह्नान। अन्नकारन जिङ्कोव हो, ङेनकोन बर्गलै पबित्र आत्मा, बुद्धिजै नाङ्पा रे पुरून आदर देप्पान सिमि नेपा फा सू ङी अन धोनग दम्मता। जेङ्नै ङ्योअ ता सोअताप रे भेला पुरू बचन ताह्फेच्चेन धोन खेपाई छ्युङ्नान ङ्युँ।”
अन ल्होई मोङन पुरूग सम थाबो रे जोम्पा पुरूग ल छुबो, रे ख्युई पबित्र आत्मा रे बिस्वासजै नाङ्पा स्तिफनस, फिलिप, प्रखरस, निकनोर, तीमोन, पर्मिनास रे एन्तिओखियान यहूदीन ल्हूलाम ङ्यान्नान निकोलाउसग दम्बो। ख्युई अन सिमिकाङ्मोः प्रेरितवन ङू सप्पो। प्रेरितवजै सोअताप्पो रे अजोवन लाह्ः जेँन लाह् नाह्म्बो।
परमेस्वरन बचन छारै होई, रे चेलावन ताँका यरूसलेमग मिह्दा पोह्न रह्पा। पुजारीव बर्ग लैजे अन बिस्वासग स्वीकार खेबो।
स्तिफनसग जुङ्पा
स्तिफनसजै परमेस्वरन दया रे सक्तिजै नाङनाङ सिमिवन घूँ किम-किम ताईलुवान धोन रे हालाईचेन धोनव खेबो। जेङ्नै हातिपा सिमिव चन नुन बिरोध खेमः जाःबो। ख्यु यहूदीवन आराधनालयन “स्वतन्त्र” र्वानान पातिन सिमिव आलै अलेक्जेन्द्रिया सहर रे कुरेनी, किलिकिया रे एसिया छेत्रलम स्वापान यहूदीव ङ्याह्। ख्यु पुरु दीदी स्तिफनस ङ्याबो खाथू खेमः जाःबो। नु कन बुद्धिजै रे आत्मा लम ल्होई र्वाङ, ख्युई नुन सामना खे मतैबो। तब ख्युई फाक सिमिकाङ्मोः घुस बिमबिम झाम र्वा फाम्बो, “मोसा रे परमेस्वरन बिरोधग अनजै ल्हुई झपा ङी ताह्पा।” तब ख्युई सिमिव, अगुवा रे कानुन लन्नान्न सिमिकाङ्मोः उल्बाङ खेबो, रे ख्युकाङ्मोः फ्याङ्बो रे जुङ्जुङ् यहूदी जोम्पू सप्पो। ख्युई झाम र्वानान्न लबारन साँचिव ङू साःबो, “अन सिमिजै पबित्र ठाउँ रे कानुन्न बिरोधग ल्होईव र्वाचे मख्योवानान।1 तैङर्वाङिन अनजै झाम र्वापा ङ्योअजै ताह्पा, ‘नासरतन येसुई अन ठाउँग मीपा दोङ्नान ङ्याह्, रे मोसाई ङ्योअग बिम्पा ल्हूलाम यङ फिन्नान ङ्याह्’।” यहूदी जोम्पू छ्युङ्पा मन पुरूजै स्तिफनस ती खेखे सेम्बो, रे नुन नमी स्वर्गदुतन नमीलैम रङ्बो।
Source notes (1)
- Cross-reference यर २६:११
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.