Kaike Standard Traslation
प्रे 3
तीपा खोर्या ताःफाम्पा
पत्रुस रे यूहन्ना ङिजे तिन बजे सोअताप्चेन भेला आराधनालयग वैयङ ङ्याह्। आराधनालयन झिङ जाःनानवन ङ्याबो भीक तोल्मः तीपा केतौलैन खोर्याः सिमिव हुरहुर सङ्ङ रे एकुरो आराधनालयन सुन्दर मिह्न्न झलाः नाह्ङ्ङ। पत्रुस रे यूहन्नाः आराधनालयन झिङ जाम जाःपा रङरङ नुई भीक तोल्बो। यूहन्नान ङ्याबोई पत्रुसजै नू तीह् सेनसेन र्वाबो, “स्यीह् सेह्ना!” ख्युन लम तयाः देच्चेन आस खेखे नुई ध्यान बिमबिम ख्युकाङ्मोः सेह्म्बो।
तब पत्रुसजै र्वाबो, “मुल रे मर ता ङन ङ्याबो मीपा। जेङ्नै तै ङन ङ्याबो ङिह्पा, अन ङा नाः बिन्चे। नासरतन येसु मसिहन मिह्नग च्याँ आलै ल्हेना!” नुई लुल्यान लाह् याईपा जुङ्जुङ् नू सोल्बो, रे तुरुन्तै नुन तीङ्पाव रे लेह्न छीवग तोप स्वाबो। आलै नु हतपत च्याङ्बो रे ल्हेम्म जाःबो, रे ल्हेनैल्हेनै, बोरैबोरै परमेस्वरन प्रसङ्सा खेईखेई ख्युन ङ्याबो आराधनालयग जाःबो। जब सिमि पुरूवजै नू लेनयङ खेपा रे परमेस्वरन प्रसङ्सा खेपाई रह्पा रङ्बो। तब ख्युई नू आराधनालयन सुन्दर मिह्न्न झलाः भीक तोल्मः छ्युङ्पाछ्युङ्त्वा खेनान अनै जेङ्पा र्वार्वा स्योःबो, रे नुन लाह्ः रह्पान ल्होईग ख्युई यामयाम हालाईबो।
आराधनालयग पत्रुसन खाईकोए
अन सिमि पत्रुस रे यूहन्नान ङिह्ङिह् जाःपा रङरङ सिमि पुरूव मिह्दा हालाईलाई सोलोमन मिह्न्न नाह्पू ङ्याबो ख्युन स्याह् धालैधालै स्वाबो। अन रङरङ पत्रुसजै सिमिकाङ्मोः र्वाबो, “इस्राएलन सिमि हो, अन ल्होईग ङेन तैङ हालाईनान? ङेन ङ्योअग झामखेखे सेह्ङ्ङ कि कन सिमि सक्ति आथबा भक्तिलम ङ्योअजै अनग ल्हेनतैनान दोङ्पालैम ङ्योअग तैङ झामखेखे सेन्नान? अब्राहाम, इसहाक रे याकूबन परमेस्वर, ङिन खेपुलन परमेस्वरजै जेँन सेवक येसू महिमित दोङ्बो, सू ङेनकोजै जुङ्फाम्बो, रे पिलातसजै नू फेच्चेन फैसला खेचे फात्तौ यङ ङेनकोजै नू नुनै ङू अस्वीकार खेबो।1 ङेनजै मन पबित्र रे धर्मी येसू अस्वीकार खेबो, आलै झाम छुपा कि सिमि सन्नानदीग ङेनकोन भिह्तु फेराःयो।2 रे जिन्दगी सोम्फान्नान सिमी ङेनजै सह्प्पो, सू परमेस्वरजै सिह्पालै सोल्बो, ङि अन्न साँचि ङिह्पा। नुन मिह्न्न लाह्ः खेपा बिस्वासजै रे नुनै मिह्नजै ङेनजै रङ्पा रे क्युई रह्पा अन सिमी ङार्छेम दोङ्बो। येसुलम देप्पा बिस्वासजै अन सिमी ङेन पुरून ङू पुरा ताःफाम्बो।”
ता हे इस्राएली जिङ्को हो, ङाः क्युई ङिह्पा, कि ङेनजै छतर्याःग उजु खेबो, रे ङेन हाकिमवजै र्वार्वा उजुई खेबो। नुन मसिहजै तूरि हुरत्वानान र्वार्वा परमेस्वरजै भबिस्यबक्ता पुरून ङुरलै र्वापा भबिस्यबानी नुई झामखेखे पुरा खेबो। ता ङेनको जेँ-जेँन तीपा स्वीकार खेखे परमेस्वरक्याँ होला, आलै ङेनकोन तीपा पुरू माफ राह्नान ङ्याह्, झामखेखे ङेनजै परमेस्वरलम आत्माग किम्म रे सक्ति देन्नान ङ्याह्, रे परमेस्वरजै ङेन भिह्तु ङूलै दम्पान मसिह आथबा येसू फेन्नान। परमेस्वरजै ताङ्बोलै जेँन पबित्र भबिस्यबक्तावन ङुरलै र्वापा तैस्याङ पुरू ह्याङ दोङ्चेन भेला मस्वान बेर मसिह स्वर्गः तेम्माई छ्युङ्त्वानान। मोसाई र्वापा ङ्याह्, “परमप्रभु परमेस्वरजै ङाः सोल्पालैम ङेन थिक्कोवन घूँलै तीपा भबिस्यबक्ता ङेन भिह्तु सोल्नान ङ्याह्। नुई ङेनकाङ्मोः तयाः-तयाः र्वानान ङ्याह् मन ल्होई पुरू ङेनजै ङ्यान्त्वानान।3 झाःम राह्नान ङ्याह्, कि मन भबिस्यबक्ताः मङ्यान्नान प्रानी पुरू परमेस्वरन सिमिवलम फानान ङ्याह् रे मीपा राह्नान ङ्याह्।”4
“सामुएललै वव्वै नुन ङिकन भबिस्यबक्ता पुरूव हातिपाई ल्होई र्वापा ङ्याह्, ख्यु पुरूजै अनै दिनवन घोसना खेपा ङ्याह्। ङेन मनै भबिस्यबक्तावन रे मनै रेनरुपान सन्तान जेङ्पा, कन रेनरुपा परमेस्वरजै ङेन खेपुल अब्राहामन ङ्याबो झाःम र्वार्वा झबो, ‘नान जेँन सन्तानग पिर्थीबिन पयार पुरूजै असिका देन्नान ङ्याह्।’5 ङेन पुरूग जेँन अलः लमलै होलहोल ङेनकाङ्मोः असिका बिन्चे र्वार्वा परमेस्वरजै जेँन सेवकग सोल्बो रे ङू ङेन स्याह् फेप्पो।”
Source notes (5)
- Cross-reference प्रस ३:१५
- Cross-reference मत्ती २७:१५-२३; मर्क १५:६-१४; लुक २३:१३-२३; यूह १९:१२-१५
- Cross-reference कानुन १८:१५-१८
- Cross-reference लेवी २३:२९; कानुन १८:१९
- Cross-reference उत २२:१८
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.