Kaike Standard Traslation
प्रे 2
पबित्र आत्मा स्वापा
जब पेन्तिकोसन दिन स्वाबो, तब बिस्वासी सिमि पुरूव तीपू जोम्पा ङ्याह्।1 आलै स्वर्गलै तैमेग लन किमन तोप लैम ती केह्ः स्वाबो, रे ख्यु छ्युङपा यिम पुरू नाङ्बो। आलै मेह्न लहीव लैम ख्युन स्याह् रङ्बो, रे फे-फे राह्राह् ख्यु पुरून लाह्ः छ्युङ्बो। आलै ख्यु पुरू पबित्र आत्माई नाङ्बो, रे पबित्र आत्माई ख्युकाङ्मोः बिम्पा ल्होई र्वाचेन सक्तिलम ख्यु घङ-घङ ल्होईवग ल्होई र्वामः जाःबो। स्वर्गन पोँ रह्पा देस पुरूलम ला तेन्नान यहूदीव अन्तौ यरूसलेमग ङ्याह्। तब अन केह्ः ताह्ताह् मोङ जोम्बो। ख्यु हालाईबो, तैङर्वाङिन पुरूजै जेँ-जेँन ल्होईग ख्युई ल्होई र्वापाई रह्पा ताह्बो। ख्यु पुरू हालाईबो, रे हालाईलाई र्वामः जाःबो।, “तै अन ल्होई र्वानान पुरूव गालीलन सिमिव नङ्पा तै? कुजुई ख्यु पुरूजै ङिन जेँन ल्होईग ल्होई र्वापा ङि ताँ? ङि स्यीह् पार्थीव, मादीव रे एलामीव, रे मेसोपोतामियान, यहूदियान, कापादोकियान, पोन्तस रे एसिया छ्युङ्नानव ङिह्पा। आलै फ्रिगिया, पामफिलिया, मिस्र रे कुरेनीग परि राह्नान लिबियान हातिपा देसव रे रोमलै स्वापा यहूदी रे यहूदी कानुन ङ्यान्नानव ङ्योरुम ङिह्पा, क्रेतग छ्युङ्नानव, रे अरब देसलै स्वापान सिमिव जेङ्पा। ङि यहूदी रा, या यहूदी धर्म मानि खेनान, या यहूदीन खोलोःन सिमि रा। अजोवजै परमेस्वरजै खेनान्न मकेकुकेन किम धोनवन भारेः ल्होई र्वापा चन ङि जेँ-जेँन ल्होईग ताँ।” ख्यु पुरू हालाईबो रे राह्ङराङ्साः र्वामः जाःबो, “अन्न अर्थ तै जेँ?”
जेङ्नै घङवजै बिस्वासीकाङ्मोः रैरै र्वाबो, “ख्यु ता रःसि थुङथुङ योप्पा ङ्याह्।”
पत्रुसन ल्होन
जेङ्नै पत्रुसजै च्युदीपान ङ्याबो च्याङच्याङ केह्ः किम खेखे मोङग र्वाबो, “यहूदियान सिमि हो, रे पुरू यरूसलेमग छ्युङ्नान पुरूव ङेनकाङ्मोः अन ल्होई क्युई रायो, रे ङन ल्होई ङ्याना। तैङर्वाङिन ङेनजै छुपालैम अजोव योप्पा मह्या, तैङर्वाङिन चोँ न्हापन नौ मात्र बजि रह्पा ङ्याह्”। जेङ्नै योएल भबिस्यबक्तालम र्वापा ल्होई अनै जेङ्पा, अन्त्यन भेला झाम राह्नान ङ्याह् र्वार्वा परमेस्वर र्वाङ, ङा सिमि पुरूवन लाह्ः ङन आत्मा हाल्नान ङ्युँ, रे ङेन ङोह्जोव, रे ङेन चमेःवजै भबिस्यबानी र्वानान ङ्याह्, रे ङेन छबावजै दर्सन रङ्नान ङ्याह्, रे ङेन काप्पोव मङ मङ्नान ङ्याह्।2 जेङ्पा, ङा अन्तौ जेँन राङ्पा-राङ्मावन लाह्ः ङन आत्मा हाल्नान ङ्युँ, रे ख्युई भबिस्यबानी र्वानान ङ्याह्। ङा तोह्ः पान्नाङग ताईलुवान धोन रे माह्ः पिर्थीबी हालाईचेन धोनव खेनान ङ्युँ। कह, मेह्, रे तुह्प्पान मूपा थन्नान ङ्युँ। परमप्रभुन मकेकुकेन किम रे गौरवमय दिन स्वाचेन खेरे ङू ङिह्मा नाःतुमाः रे धा कहलैम राह्नान ङ्याह्। आलै सुई परमप्रभुन मिह्न वन्नान ङ्याह्, नुई उद्धार देन्नान ङ्याह्। हे इस्राएली हो, अन ल्होई ङ्याना! नासरतन येसू झाम सिमि ङ्याह्, सू परमेस्वरजै ताईलुवान धोनव, ताईलोवान धोनव रे हालाईचेन धोनवलम ङेन ङू पर्मानित खेबो। ङेनकाङ्मोः क्युई ङ्याह् कि परमेस्वरजै ङेन घूँ अन धोनव येसुलम खेपा जेङ्पा। परमेस्वरजै ठहर्याई खेपान योजन पक्का रे ङूई खेतपा निर्नय अन्सार जुङ्पा अनै येसू पापी सिमिवन ल्हालम ङेनकोजै नू क्रुसग चुनचुन सह्प्पो।3 येसू परमेस्वरजै सिचेन तूरिलै फाफा सम्पु ग्युर्फाम्बो। तैङर्वाङिन नु कालन अधिनग लुईपाई छ्युङ्चे रा मतैनान्न ल्होई ङ्याह्।4 तैङर्वाङिन दाऊदजै नुन भारेः र्वाङ, “ङै प्रभू एकुरो ङन ङू रङ्पा, तैङर्वाङिन ङा नङिनाःयो र्वार्वा नु ङन याईपाक्याँ ङिह्पा।5 अन्नकारन ङन सम किम्म रे ङन ङुर स्याङस्याङ ल्होई र्वाङ। अन नङ्म ङन ल्होजै र्वार्वा आसग सोन्नान ङ्याह्, तैङर्वाङिन ङेनजै ङन परानग पातालग ख्योवानान मह्या। रे जेँन पबित्र सिमिन ल्हो तुर्साः तोह्नफान्नान मह्या। नाई ङाः जिन्दगीन लमव थम्पा ङ्याह्, नान ङ्याबो रातौ ङा यामयाम स्याङ्नान।”6
“ङन इस्राएली भाइ हो, ङिन खेपुल झली दाऊदन भारेः ङा ङेनकाङ्मोः स्पस्त खेखे र्वा तैनान, कि नु सिह्बो रे लुँह्म्बो। आलै त्यान बेर नुन तुर्सा ङ्याह्। जेङ्नै दाऊद भबिस्यबक्ता ङ्याह् रे नुनै सन्तानलम तीपा नुन सिङ्हासनग छ्युङ्नान ङ्याह् र्वानान्न ल्होई नू क्युई ङ्याह्। परमेस्वरजै नुन ङ्याबो अन रेनरुपा ङ्याह्।7 अन स्वानान्न ल्होई रङरङ, नुई मसिहन सिह्सिह् सम्पु ग्युर्पान ल्होई र्वाबो, कि नु पातालग ख्योवाबो, न ता नुन ल्होई तोह्म्बो।”
अनै येसू परमेस्वरजै सिपालै सम्पु दोङ्बो। अन ल्होईन साँचि ङि पुरू ङिह्पा। अन्नकारन परमेस्वरजै नू जेँन याईंपा लाह्ग किम दोङ्बो। आलै परमेस्वर पाई नू पबित्र आत्मा बिम्बो, कन नुई बिन्चेन भिह्तु रेनरुपा ङ्याह्। आलै नुई अन पबित्र आत्मा हाल्बो, कन ङेन चोँ रङ्नान रे ताह्नान। तैङर्वाङिन दाऊद पान्नाङग वैपा मह्या। बरु नुई र्वाबो, “परमप्रभुई ङन प्रभू र्वाबो, ना ङन लाह् याईपाक्याँ छ्योवा,8 जबथाल ङा नान बैरिकाङ्मोः नान ल्हेन तिङ्पान पोँ मनान।”9
“अन्नैकारन इस्राएलीन सिमि पुरूजै अन तेम्माई क्युई रायो, कि येसु, सू ङेनजै क्रुसग चुम्बो, परमेस्वरजै नू प्रभु रे मसिह दोङ्बो।”
अन ताह्ताह् ख्युन सम खङ्बो। आलै ख्युई पत्रुस रे घङ प्रेरितकाङ्मोः लोप्पो, “हे जिङ्को हो, आन ता ङी तै खेचे?” पत्रुसजै ख्युकाङ्मोः र्वाबो, “घ्योप्पा ख्या, ङेन तीपान माफ देच्चेन भिह्तु येसू मसिहन मिह्नग ङेन पुरूजै बप्तिस्मा होरा, रे ङेनजै पबित्र आत्मान बर देन्नान ङ्याह्। तैङर्वाङिन अन रेनरुपा ङेन भिह्तु, ङेन सन्तान्न भिह्तु रे ग्याङ्म ग्याङ्मन सिमि पुरूवन भिह्तु जेङ्पा, पुरू सू प्रभु ङिन परमेस्वरजै जेँन ङ्याबो स्वा र्वानान ङ्याह्।”10
घङ लै ल्होईवलम पत्रुसजै ख्युकाङ्मोः चेतावनी बिम्बो, रे झाःम र्वार्वा खाईकोए यङ बिम्बो, “अन सिमि अलःवन ङ्या स्वानान्न धललम जेँग सोमफाना।”11 तब सुवा-सुवाजै नुन ल्होई स्वीकार खेबो, ख्युई बप्तिस्मा वप्पो, रे अन्नै लाह् क्वाईमाल्ला हजार सुम सिमिव ख्युन मोह्ङ्ग पोह्न रह्बो।
ख्यु प्रेरितवन छोए, सङ्गति रे रोता क्युप्मः रे सोअतापग भक्ति खेखे जाःङ।
बिस्वासीवन जिन्दगी
प्रेरितवजै लै ताईलुवान धोनव रे हालाईचेन धोनव थङ्ङ। मन्नकारन सिमिव परमेस्वरग ङिङ्ङ जाःबो। बिस्वास खेनानव भरी पुरू ङ्याबो छ्युँ, रे ख्युन तैस्याङ पुरू पीमा ङ्याह्।12 ख्युई जेँन क्यु रे खेः र्युर्यु अन सुवा-सुवाः तयाः-तयाः त्वाङ पुरूग परेङ। ख्यु समन ती राह्राह् यरूसलेमन आराधनालयग ङ्याबो जोम्ङ, रे यिम-यिम रोता क्युप्ङ, रे ख्यु स्याङपा रे सम छाङ्मै दीदी झाँ, रे परमेस्वरन प्रसङ्सा खेँ, रे सिमि पुरू नुनलम किम्म ङ्याह्, आलै सु उद्धार देङ्ङ प्रभुई एकुरो ख्युन मोह्ङ्ग पोह्न काँ।
Source notes (12)
- Cross-reference लेवी २३:१५-२१; कानुन १६:९-११
- Cross-reference योए २:२८-३२
- Cross-reference मत्ती २७:३५; मर्क १५:२४; लुक २३:३३; यूह १९:१८
- Cross-reference मत्ती २८:५-६; मर्क १६:६; लुक २४:५
- Cross-reference भजन १६:८-११
- Cross-reference भजन १६:८-११
- Cross-reference २ सामू ७:१२-१३; भजन १३२:११
- Cross-reference भजन ११०:१
- Cross-reference भजन ११०:१
- Cross-reference योए २:३२
- Cross-reference कानुन ३२:५; भजन ७८:८
- Cross-reference प्रे ४:३२-३५
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.