Kaike Standard Traslation
प्रे 1
येसु स्वर्ग वैपा
स्याङ्पान थियोफिलस, येसुई खेमः रे लह्म्मः जाःपा ल्होई पुरून भारेः ङै ङन ङूस्योवान किताबग सर्पा ङिह्पा।1 जेँजै दम्पा प्रेरितकाङ्मोः येसुई पबित्र आत्मान सक्तिलम कोह्मी नु स्वर्गः थीथी वप्पान ल्हान बेरन ल्होई पुरू मन किताबग सर्पा ङ्याह्। जेँन तूरि हुर्मी मिह्दा पक्का पर्मानलम ख्युन ङू नुई जेँगै सम्पु थम्बो। ङेथलर्या थाल नु ख्युन स्याह् रङ्बो। आलै परमेस्वरन राज्यन भारेः ख्युकाङ्मोः स्याप्पो। ख्युन ङ्याबो झाम छ्युङ्तौ नुई ख्युकाङ्मोः झाःम आदेस बिम्बो, “ङेनको यरूसलेमलै खारै नवया, जेङ्नै पाई रेनरुपा ल्होई पुरा रान बेर कुवा। अन्न भारेः ङेनकोजै ङनलम ताह्तपा ङ्याह्।2 तैङर्वाङिन यूहन्नाई ता त्युई बप्तिस्मा बिम्बो, जेङ्नै त्यान खजिर्यान ङिक ङेनकाङ्मोः पबित्र आत्माई बप्तिस्मा बिन्नान ङ्याह्।”3
अन्नकारन जब प्रेरितव जोम्बो, तब ख्युई नू लोप्पो, “हे प्रभु, तै ङेनजै चोँ इस्राएल राज्य ह्याङ दोङ्नौ?”
येसुई ख्युकाङ्मोः र्वाबो, “पाई जेँन आङलम तोकि खेपान भेला रे लाह् क्युई राह्नान ङेनकोन धोन नङ्पा। जेङ्नै पबित्र आत्मा ङेनकोन स्याह् स्वामी ङेनकोजै सक्ति देन्नान ङ्याह्, रे ङेनको यरूसलेमग, यहूदिया पुरूग, सामरियाग रे पिर्थीबिन अन्त्यन नाःथाल ङन साँचि राह्नान ङ्याह्।”4 नुई अन ल्होई र्वामी, ख्युई सेन्तौसेन्तौ नु स्वर्गक्याँ थीबो, रे नु नमलूग ख्युन मीलै मोल्बो।5 जब नु वैयङ खेपा ख्युई ती खेखे पान्नाङक्याँ सेम्पाई छ्युङ्पा ङ्याह्, तब तैमेग पाह्ल्म घोलाङ गोम्पा सिमि ङेपा ख्युन रह्म्म स्वास्वा च्याङ्बो। ख्युई र्वाबो, “हे गालीलन सिमि हो, ङेनको तैङ पान्नाङक्याँ सेनैसेनै थाङथाङ छ्युङ्पा ङिह्पा? अनै येसू, सु ङेनकोलम स्वर्गः वप्पो, चोँ कुजुई ङेनकोजै नू स्वर्गः वैपा रङ्बो, उजुखेखेई नु ह्याङ स्वानान ङ्याह्।”
येसुई मतियासग दम्पा
(मत्ती २७:३-१०)
तब प्रेरितव जैतुन मिह्न्न धुरलै यरूसलेम होल्बो। यरूसलेम सहरलै अन धुर क्वाईमाल्ला: किलोमितर तीतौ ग्याङम ङ्याह्। सहरन झिङ जामी ङ्याल्क्यान तलान जेँ छ्युङ्नान्न कोठाः लिप्पो। ख्यु चन पत्रुस, यूहन्ना, याकूब, अन्द्रियास, फिलिप रे थोमा, बारथोलोमाइ रे मत्ती, अल्फयसन ङोह्जो याकूब रे उग्रपन्थी पातिन सिमोन रे याकूपन ङोह्जो यहूदा ङ्याह्।6
हातिपा चिमिचाव रे येसुन मा मरियम आलै नुन भाइवन ङ्याबो प्रेरित पुरूव सम ती राह्राह् लाईलाई सोअताबाईताबाई छ्युँ। अन्तौ बिस्वासी थिक्कोवन घूँ पत्रुस च्याङ्बो (अन सिमिवन मोङ क्वाईमाल्ला: रूथल ङ्याह्), रे र्वाबो, “बिस्वासी थिक्कोव हो, पबित्रसास्त्रन बचन पुरा रात्वानान, कन बचन येसू जुङ्नानवन ताङ्बोन अगुवा यहूदान भारेः दाऊदन ङुरलम ङूलै पबित्र आत्माई ल्होई र्वापा ङ्याह्।7 तैङर्वाङिन यहूदान जेर्ताँ ङिन ङ्याबोई रह्पा ङ्याह्। रे अनै धोनग नुई ठाउँ देप्पा ङ्याह्।”
येहूदाई तीपान कमाईलै खेःदी र्युबो, आलै युजार्ग घ्याबो रे नुन फौ दिल्बो, रे नुन खोअ पुरू गेप्पो।8 अन ल्होई यरूसलेमग छ्युङ्नान पुरूवग क्युई रह्पा। अन खेःन मिह्न ख्युन जेँन ल्होईग आखेल्दमा नाह्म्बो, आथबा कहन खेः।
पत्रुसजै र्वाबो, “तैङर्वाङिन भजनसङ्ग्रहन किताबग झाम सर्पा ङ्याह्, ‘नुन यिम होङ रायो, रे स्याह् छ्युङ्नान सुई नराःयो रे नुन धोन्न जिम्मा घङजै होराःयो।’”9 अन्नकारन ङिन ङ्याबो छ्युङ्नान सिमिव बर्ग झाम तीपा मफाखाईमे ङ्याह्, कन सिमि प्रभु येसू ङिन घूँ छ्युङछ्युङ खोलोः-झिङ खेतौ एकुरो ङिन ङ्याबो ङ्याह्,
“आथबा झाम सिमि सु यूहन्नान बप्तिस्मालै वव्वै नु ङिनलम स्वर्गक्याँ वप्पान दिन्न बेर ङिन ङ्याबो ङ्याह्। मन सिमि ङिन ङ्याबो ङ्याबोई नु सिपालै सम्पु ग्युर्पान साँचि रात्वानान।”
ख्युई ङेपा, आथबा बरनाबास र्वानान योसेफ, सुन तेम्मा मिह्न युस्तस ङ्याह्, रे मतियास मिह्न नाह्म्बो। ख्युई झामखेखे सोअताप्पो, “सिमि पुरून समन ल्होई क्युई राह्नान प्रभु, अन ङेह्न बर्ग ङेनजै सू दम्पा ङ्याह् अन ङ्योअग थना, रे नु अन सेवा रे प्रेरितन धोनग जाः तयाःयो, कन सेवालम यहूदा ज्यारज्यार जेँन ठाउँ अलःग सिह्बो।” आलै ख्युई मन ङेह्न घूँ चित्ता फ्याङ्बो, रे मतियासन मिह्नग तँम्बो, रे प्रेरित च्युदीवन ङ्याबो नुन जेर्ताँ रह्पा।
Source notes (9)
- Cross-reference लुक १:१-४
- Cross-reference लुक २४:४९
- Cross-reference मत्ती ३:११; मर्क १:८; यूह १:३३
- Cross-reference मत्ती २८:१९; मर्क १६:१५; लुक २४:४७-४८
- Cross-reference मर्क १६:१९; लुक २४:५०-५१
- Cross-reference मत्ती १०:२-४; मर्क ३:१६-१९; लुक ६:१४-१६
- Cross-reference भजन ४१:९
- Cross-reference मत्ती २७:३-८
- Cross-reference भजन ६९:२५; १०९:८
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.