व्यवस्थाविवरण 16

फसह अन हाब्ब

(निर्गमन 12:1-20)

1“आबीब तिंगुळ इक याद माळकु तान परमेश्वर यहोवा अन साटी फसह अन हाब्ब मान्सेत, यतिकी आबीब तिंगुळ दा नीन परमेश्वर यहोवा ईळ्लकी नीनी मिस्र दा टु तेगुकु तंदुन. 2इदुरसाटी जो जागा यहोवा तान हेसुर इन निवास ठहरूसली निवळुस कोंडान, अदा तान परमेश्वर यहोवा अन साटी भेड़-मर्रीगोळ अदिक गोसी-वस्ता फसह माळकु बलि माळेत. 3अदुर सांगुळ यातोदु खमीरी वस्तु तिनबाळेत; येळ दिन ताका अखमीरी रोट्टी जो दुख इन रोट्टी हुन तिनतोगेत; यतिकी नी मिस्त्र द्याश टु उतावली माळकु होटीद; ई रीती देल नीनी मिस्त्र द्याश टु होळोद दिन जिंदगी तिम याद ईत्तीत. 4येळ दिन ताका नीन पुरा द्याश दा नीन हात्ती येल्यारा खमीर कांळ्सकु भी बिळबाळुल; अदिक जो जनावर नी पयला दिशी इन द्यावमुळका बलि माळ्या अदुर मास दा टु येनु व्हातुर ताका मिक्कु ईरबाळुल. 5फसह अक तान यातोदारा फाटक इन बुळ्क, यदरी नीन परमेश्वर यहोवा नीनी कोळुल बलि माळबाळेत; 6जो जागा नीन परमेश्वर यहोवा तान हेसुर इन निवास माळोर साटी निवळुस कोमुल सिर्फ अदा, साल इन अदा समय यदुर दा नी मिस्र टु होटीद, मतलब सुर्य मुळ्कदुर मा द्यावमुळका, फसह अन जनावर बलि माळेत. 7आग अदुर मास अदा जागा दा यदरी नीन परमेश्वर यहोवा निवळुस कोमुल सुटकु तिनेत; बाक व्हातर्या येदकु तान तान ड्यारा अक वापस होटेगेतीर. 8आर दिन ताका अखमीरी रोट्टी तिनतोगेत; अदिक सातवा दिशी नीन परमेश्वर यहोवा अन साटी महासभा ईरूल; आ दिशी यातोदारा प्रकार इन क्याल्सा-कळी माळकु आगबाळुल.”

हप्तागोळ्द हाब्ब

(निर्गमन 34:22; लैव्यव्यवस्था 23:15-21)

9“बाक याग नी केई दा कुळगुल हचली हत्या, आगी टु सुरवात माळकु येळ हप्ता आळेत. 10आग तान परमेश्वर यहोवा अन आशीष इन अनुसार अदुर साटी खुद इन इच्छा देल बलि कोटकु हप्ता अन हेसुर देल हाब्बा मनुसेत; 11अदिक आ जागा दा जो नीन परमेश्वर यहोवा तान हेसुर इन निवास माळली निवळुस कोमुल तान तान पार-पोरगोळ, दास-दासीगितेर समेत नी अदिक नीन फाटकगोळ्द बुळ्क जो लेवी ईरूल, अदिक जो जो परदेशी, अदिक अनाथ, अदिक रांड्यागितेर नीन बीच दा ईरूल, आंदुर सप्पा च्या सप्पा मुंदुर तान परमेश्वर यहोवा अन मुंद खुशी माळुल. 12अदिक याद ईटेत कि नी भी मिस्र दा दास ईर्या; इदुरसाटी ई विधीगोळ्द पालन माळदुर दा चौकसी माळेत.”

झोपळीगोळ्द हाब्ब

(लैव्यव्यवस्था 23:33-43)

13“नी याग तान खलियान अदिक शयद इन कुण्ड दा टु सप्पा येनारा जमा माळ कोंड्या, आग झोपळीगोळ हाब्बा येळ दिन ताका मान्सतेला ईरेत; 14अदिक तान ई हाब्बा दा तान तान पार-पोरगोळ, दास-दासीगितेर समेत नी अदिक जो लेवीगोळ, अदिक परदेशी, अदिक अनाथ, अदिक रांड्यागितेर नीन फाटकगोळ्द बुळ्क ईरूल आंदुर भी खुशी माळुल. 15जो जागा यहोवा निवळुस कोमुल अदुर दा नी तान परमेश्वर यहोवा अन साटी येळ दिन ताका हाब्बा मनुसतेला ईरेत; यतिकी नीन परमेश्वर यहोवा नीन सप्पा बढ़ती दा अदिक नीन सप्पा क्याल्सागोळ दा नीनी आशीष कोट्टान; नी आनन्द अच माळेत. 16साल दा मुर घन, मतलब अखमीरी रोट्टी इन हाब्ब, अदिक हप्ता अन हाब्ब, अदिक झोपळीगोळ्द हाब्ब, ई मुरू हाब्बगोळ दा नीम सप्पा मंळसा तान परमेश्वर यहोवा अन मुंद आ जागा दा जो आव निवळुस कोंडान होगुल. अदिक नोळी, खाली कय यहोवा अन मुंद याऊ होगबाळुल; 17सप्पा मंळसा तान तान पूंजी, अदिक आ आशीष इन अनुसार जो नीन परमेश्वर यहोवा नीनी कोटान, कोळतोगुल.”

न्यायी मंळसा अन नियुक्ति

18नी तान ऊंद ऊंद कुल दा टु, तान सप्पा फाटकगोळ्द बुळ्क यवरी नीन परमेश्वर यहोवा नीनी कोळतान न्यायी अदिक सरदार नियुक्त माळ कोमेत, जो लॉकुर न्याय न्यायीपन देल माळतोगुल. 19नी न्याय बिगळुस बाळेत; नी ना रा पक्षपात माळेत; अदिक ना घूस ताकोमेत, यतिकी घूस बुद्धिमान मंळसा अन कण्णगोळ कुढ्ढ माळ बुळतद, अदिक न्यायीगोळ्द मातगोळ पलटुस बुळतद. 20जो येनारा नितान्त बराबर आद अदुर्दा हींद हतकु ईरेत, यदुर देल नी ऊळ्दकु ईत्या, अदिक जो द्याश नीन परमेश्वर यहोवा नीनी कोळतान अदुर अधिकारी बन्सकु ईत्या.

21नी तान परमेश्वर यहोवा अन जो वेदी बनुस्या अदुर हात्ती यातोदारा प्रकार इन हुळ्ली इन बनुस्द अशेरा देवी इन मुर्ती स्थापना माळबाळेत. 22अदिक ना यातोदु कल्ल इन खंबा निद्रुसेत, यतिकी अदुर देल नीन परमेश्वर यहोवा घृणा माळतान.