व्यवस्थाविवरण 17

1नी तान परमेश्वर यहोवा अन साटी यातोदु वस्ता या भेड़-मर्री बलि माळबाळेत यदुर दा दोष या यातोदारा प्रकार इन खोट ईरूल; यतिकी हींग माळोद नीन परमेश्वर यहोवा अन हात्ती घृणित आद.

2“जो बस्तीगोळ नीन परमेश्वर यहोवा नीनी कोळतान, अगर अऊर दा टु यारदारा मा यावारा मंळसा या आर्त हींग सिकुल, याव नीन परमेश्वर यहोवा अन वाचा मुरूकु हींग क्याल्सा माळीदान, जो आऊन नजर दा बेकार आद, 3मतलब नान आग्या उल्लंघन माळकु दुसरा द्यावगोळ्द, या सुर्य, या बेळदिंग, या आकाश गण दा टु यारदारा उपासना माळीदान, या अवरी दण्डवत माळीदान, 4अदिक ईद मात नीनी हेळकु आगुल अदिक नीन केळदुर दा बरूल; आग भली भाति पुछताछ माळेत, अदिक अगर ईद मात सही आगुल कि इस्राएल दा ईत्ता घृणित कर्म माळकु आग्याव, 5रा याता मंळसा या आर्त ईत्ता बेकार क्याल्सा माळीदार, आ मंळसा या आर्त इक व्हार्या तान फाटकगोळ मा ओतकु हींग पथराव माळेत कि आ मंळसा या आर्त सोतोगुल. 6जो प्राणदण्ड इन योग्य ठहरूसुल आव ऊंदा मंळसा अन गवाही देल कोन्सुसकु आगबाळुल, लेकीन येढ्ढ या मुर मंळसागोळ्द गवाही देल कोन्सुसकु आगुल. 7आऊन कोंदकु आगोर साटी सब से पयले गवाहगोळ्द कय, अदिक आंदुर बाद्दा बाकी सप्पा लॉकुर कय आऊन मा येळुल. ई रीती देल ईत्ता बुराई इक तान न्याड्या दा टु दुर माळेत.”

8“अगर नीन बस्तीगोळ्द बुळ्क यातोदारा झगळा अन मात आगुल, मतलब आपसी नव खुन, या विवाद, या बडाबडी इन यातोदारा मुकदमा येळुल, अदिक अदुर न्याय माळोद नीन साटी कठिन बिळुल, रा आ जागा अक होगकु जो नीन परमेश्वर यहोवा निवळुस कोंडान; 9लेवी याजकगोळ्द हात्ती अदिक आ दिनगोळव न्यायीगोळ्द हात्ती होगकु केळकुळ माळेत, कि आंदुर नीनी न्याय इन मातगोळ हेळुल. 10अदिक न्याय इन गाई मात आ जागा अन लॉकुर जो यहोवा निवळुस कोंडान नीनी हेळबुळुल, अदुर्दा अनुसार माळेत; अदिक जो व्यवस्था आंदुर नीनी कोळुल अदुर्दा अनुसार नळदुर दा सावधानी माळेत; 11व्यवस्था अन जो मात आंदुर नीनी हेळुल, अदिक न्याय इन जो मात आंदुर नीन से अनुल, अदुर्दा अनुसार माळेत; जो मात आंदुर नीनी हेळ्यार अदुर से डाक्या या ऊजवा तिर्गबाळेत. 12अदिक जो मंळसा अभिमान माळकु आ याजक उन, जो अल नीन परमेश्वर यहोवा अन स्यावा टहल माळली उपस्थित ईत्तान, मान्सतीदील, या आ न्यायी मंळसा अन केळतीदील, रा आ मंळसा कोन्सुसकु आगुल; ईत्ता प्रकार देल नी इस्राएल दा टु ईत्ता बुराई इक दुर माळबुळेत. 13इदुर देल सप्पा लॉकुर केळकु अंजेदार, अदिक बाक अभिमान माळतीदील.”

राजागोळ्द चुनाव इन सुचना

14याग नी आ द्याश पोहचुस्या यदरी नीन परमेश्वर यहोवा नीनी कोळतान, अदिक अदुर अधिकारी आद्या, अदिक अऊर दा बसुसकु अनली हत्या, कि नाकु दीकळोद सप्पा जातीगोळ्द घाई ना भी तान म्याकुच राजा ठहरूसाईन; 15आग यारी नीन परमेश्वर यहोवा निवळुस कोमुल जरूर आऊका राजा ठहरूसेत. तान वार्टुर दा टु उच यारीकारा तान म्याकुच राजा ठहरूसेत; यातारा परदेशी इक जो नीन वार्ट आल्लच नी तान म्याकुच राजा ठहरूस सकाल. 16अदिक आव हापाळ घ्वाळागोळ ईटबाळुल, अदिक ना ई मनसा देल तान प्रजा अन लॉकुरी मिस्र दा कळुल कि आऊन हात्ती हापाळ सा घॉळागोळ आगेगुल, यतिकी यहोवा नीम से अंदान, कि नीव आ हादी देल मात्त यागलु होगबाळेतीर. 17अदिक आव हापाळ आर्तेर भी ईटबाळुल, हींग आगबाळुल कि आऊन मन यहोवा अन दी टु तिर्गेगुल; अदिक ना आव तान व्हान्ना बेळ्ली हापाळ वाळुसुल. 18अदिक याग आव राजगद्दी मा विराजमान आगुल, आग ईदा व्यवस्था अन किताब, जो लेवी याजकगोळ्द हात्ती ईत्तीत, अदुर ऊंद नकल तान साटी माळ कोम. 19अदिक आव अदरी तान हात्ती ईटुल, अदिक तान जिंदगी तिम अदरी वाचुस्त ईरूल, यदुर देल आव तान परमेश्वर यहोवा अन अंज्क मानसुल, अदिक ई व्यवस्था अदिक ई विधीगोळ्द सप्पा मातगोळ्द मान्सदुर दा चौकसी माळोद कलुल; 20यदुर देल आव तान मन दा घमण्ड माळकु तान वार्टुरी तुच्छ जान्सबाळुल, अदिक ई आग्यागोळ देल ना रा डाक्या कय दी तिरगुल अदिक ना ऊजवा; यदुर देल कि आव अदिक आऊन वंश इन लॉकुर इस्राएलीगोळ्द बीच दा हापाळ दिन ताका राज्य माळतेला ईरूल.