व्यवस्थाविवरण 18

लेवीगोळ अदिक याजकगोळ्द भाग

1“लेवी याजकगोळ्द, उलटा सप्पा लेवी कुलगोळ्द, इस्त्राएलीगोळ्द सांगुळ यातोदु भाग या अंश ईरबाळुल; आंदुर भोजन होमबली अदिक यहोवा अन कोळ्द भाग ईरूल. 2आंदुर तान वार्टुर बीच दा यातोदु भाग ईरबाळुल; यतिकी तान वचन इन अनुसार यहोवा आंदुर निज भाग ठहरूस्यान. 3अदिक चाहे वस्त-गोसी भेड़-मर्री इन मेलबलि आगुल, आऊन माळावाळेर लॉकुर दी टु याजकगोळ्द हक ईद ईरूल, कि आंदुर आऊन बाक्का अदिक येढ्ढु गाल्ला अदिक व्हाट्टा याजक उक कोळुल. 4नी आऊक तान पयला उपज इन अनाज, अंगुर इन रास्सा, अदिक जैतुन याण्णा, अदिक तान भेड़गोळ्द अद ऊन कोळेत जो पयला घन कातरूसकु आग्याद. 5यतिकी नीन परमेश्वर यहोवा नीन सप्पा कुलगोळ दा टु आऊका निवळुस कोंडान, कि आव अदिक आऊन वंश हमेशा आऊन हेसुर देल स्यावा टहल माळली उपस्थित आगतोगुल.”

6“बाक अगर यावारा लेवी इस्त्राएल इन बस्तीगोळ दा टु यावारा से, यल आव परदेशी इन घाई ईरतीदान, तान मन इन धोळ्द अभिलाषा देल आ जागा मा होगुल यदरी यहोवा निवळुस कोंडान, 7रा तान सप्पा लेवी वार्टुर घाई जो अल तान परमेश्वर यहोवा अन मुंद उपस्थित आदार, आंदुर भी आऊन हेसुर देल स्यावा टहल माळुल. 8अदिक तान पुर्वजगोळ्द भाग इन मोल इक बिटकु आऊक भोजन इन भाग भी आंदुर घाई सिकतोगुल.”

मूर्तिपूजक विधिगोळ से सावधान

9“याग नी आ द्याश दा पोहचुस्या जो नीन परमेश्वर यहोवा नीनी कोळतान, आग अलीद राज्यगोळ्द अनुसार घिनोना क्याल्सा माळोद कलुबाळेत. 10नीम दा यावारा हींग आगबाळुल जो तान पार या पोर इक बेक्की दा होम माळकु येर्सावाळा, या भावी अनावाळा, या शुभ-अशुभ मुहुर्त इन मान्सावाळा, या टोन्हा, या तान्त्रिक, 11या वश दा माळावाळा, या ओझा से केळावाळा, या भूत साधुसावाळा, या भूतगोळी जगुसावाळा ईरूल. 12यतिकी यास हींग हींग क्याल्सा माळतार आंदुर सप्पा यहोवा अन हात्ती घृणित आर; अदिक ईवा घृणित क्याल्सागोळ कारण नीन परमेश्वर यहोवा आंदरी नीन मुंदु टु तेगदुर मा आन. 13नी तान परमेश्वर यहोवा अन हात्ती सिद्ध बनस्कु ईरेत.”

ऊंद भविष्यवक्ता कळोद प्रतिग्या

14“अव राज्यगोळ यार्द अधिकारी नी आगदुर मा आय शुभ-अशुभ मुहुर्त इन मान्सावाळेर अदिक भावी अनावाळेर्द केळतोगताव; लेकीन नीनी नीन परमेश्वर यहोवा हींग माळगोटीदील. 15नीन परमेश्वर यहोवा नीन बीच दा टु, मतलब नीन वार्टुर दा टु नान घाई ऊंद नबी इक पैदा माळ्यान; नी आऊंदा केळेत; 16ईद नीन आ विनती इन अनुसार आदीत, जो नी होरेब पहाळी इन हात्ती सभा अन दिशी तान परमेश्वर यहोवा से माळीद, ‘नानी ना रा तान परमेश्वर यहोवा अन शब्द मात्त केळोद बिळुल, अदिक ना आ धोळ्द बेक्की मात्त नोळोद बिळुल, ईलारा हींग आगबाळुल कि सोतोगाईन.’ 17आग यहोवा नान से अंदुन, ‘आंदुर जो येनारा अनतार ठीक अनतार. 18इदुरसाटी ना आंदुर साटी आंदुर वार्टुर बीच दा टु नीन घाई ऊंद नबी इक नीदुरसाईन; अदिक तान वचन आऊन मन दा हाकाईन; अदिक याता मात इन ना आऊक आग्या कोळाईन अदा आव आंदरी अंदकु केळस्यान. 19अदिक जो मंळसा नान अद वचन जो आव नान हेसुर देल अंदान ग्रहण माळतीदील, ना अदुर हिसाब आऊन से ताकोमाईन. 20लेकीन जो नबी घमण्ड माळकु नान हेसुर देल यातोदारा हींग वचन अनुल यदुर आग्या ना आऊक ईला कोटीदीन, या दुसरा द्यावगोळ्द हेसुर देल येनारा अनुल, आ नबी कोन्सुसकु आगुल.’ 21अदिक अगर नी तान मन दा अंद्या, ‘जो वचन यहोवा अंदिदील, अदरी नाव याता रीती देल अरतेव?’ 22रा पयचान ईद आद कि याग यावारा नबी यहोवा अन हेसुर देल येनारा अनुल, आग अगर अव वचन घटुसाल अदिक पुरा आगेगाल, रा अद वचन यहोवा अन अंदकु आल्लच; लेकीन आ नबी अद मात घमण्ड माळकु अंदान, नी आऊन से अंजबाळेत.”