व्यवस्थाविवरण 19

खुनी मंळसा अन साटी शरण नगर

(गिनती 35:9-28; यहोशू 20:1-9)

1“याग नीन परमेश्वर यहोवा आ राष्ट्रगोळी नष्ट माळुल यार द्याश आव नीनी कोळतान, अदिक नी आंदुर द्याश इन अधिकारी आगकु आंदुर नगरगोळ अदिक मान्नगोळ दा ईरली हत्या, 2आग तान द्याश इन बीच दा यार अधिकारी नीन परमेश्वर यहोवा नीनी माळ बुळतान, मुर नगर तान साटी ब्यार्र माळबुळेत. 3अदिक नी तान साटी हादी भी तयार माळेत, अदिक तान द्याश इन जो नीन परमेश्वर यहोवा नीनी सोप्स बुळतान मुर भाग माळेत, कि हर खुनी अल्या ओळेगुल. 4अदिक जो खुनी अल ओळकु तान जीवा ऊळसुल, अद ईत्ता प्रकार इन ईरूल; मतलब आव यारदारा से बिना पयले दुश्मनी ईटुल या आऊक बिना जान बुजुस्द कोंद बुळावाळा ईरूल 5ह्यांग यावारा यारदारा सांगुळ हुळ्ली कडुली आळी दा होगुल, अदिक मार्र कडुली कोळ्ली कय देल नेगुल, अदिक कोळ्ली डांड दा टु होटकु आ वार्ट उक हींग हतुल कि आव सोतोगुल रा आव आ नगरगोळ दा टु यातारा दा ओळकु जीत्ता ईरूल; 6हींग आगबाळुल कि हादी इन लम्बाई इन कारण खुन इन बदला ताकोमावाळा तान सिट्ट इन बेक्की दा आऊन पीछा माळकु आऊक होगकु हुडुल, अदिक कोंद बुळुल, अगर आव प्राणदण्ड इन योग्य हैलेच, यतिकी आव आऊन से दुश्मनी ईला ईटतोगोन. 7इदुरसाटी ना नीनी ईद आग्या कोळतीन, कि तान साटी मुर नगर ब्यार्र माळकु ईटेत.”

8“अगर नीन परमेश्वर यहोवा आ किर्या अन अनुसार जो आव नीन पुर्वजगोळ से तिंदीदुन नीन सीमा अक वाळुसकु अद सप्पा द्याश नीनी कोळुल, यदुर्द कोळोद वचन आव नीन पुर्वजगोळी कोटीदुन 9अगर नी ई सप्पा आग्यागोळ्द मान्सदुर दा यवरी ना ईंद नीनी केळ्सतीन चौकसी माळ्या, अदिक तान परमेश्वर यहोवा से प्यार ईट्या अदिक हमेशा आऊन हादीगोळ मा नळुतेला ईत्या रा ई मुर नगरगोळ से यक्कुल मात्त मुर नगर ब्यार्र माळ बुळेत, 10इदुरसाटी कि नीन आ द्याश दा जो नीन परमेश्वर यहोवा नीन निज भाग माळकु कोळतान यावारा निर्दोष उन रक्ता वाहुसकु आगबाळुल, अदिक आऊन दोष नीन मा हतबाळुल.”

11“लेकीन अगर यावारा मान्ना हात्तीवाळा से दुश्मनी ईटकु आऊन घात दा हतुल, अदिक आऊन मा झपटुसकु आऊक हींग बडुल कि आव सोतोगुल, अदिक बाक आ नगरगोळ दा टु यातारा दा ओळेगुल; 12रा आ नगर इन पुरनिए यारीकारा कळुकु आऊक अल टु हुडुकु खुन इन बदला ताकोमावाळा अन कय दा सोप्स बुळुल, कि आव कोन्सुसकु आगुल. 13आऊन मा तरस तिनबाळेत, लेकीन निर्दोष उन खुन इन दोष इस्राएल से दुर ईटेत, यदुर देल नीम भला आगुल.”

प्राचीन सीमागोळ

14“जो द्याश नीन परमेश्वर यहोवा नीनी कोळतान, अदुर जो भाग नीनी सिक्कीत, अदुर दा यारदारा सीमा यदरी प्राचीन लॉकुर ठहरूस्यार हटुस बाळेत.”

गवाहगोळ से संबंधित नियम

15“यातारा मंळसा अन खिलाप यातारा प्रकार इन अन्याय या पाप इन बारा दा, चाहे आऊन पाप ह्यांगारा भी येती ईरबाळुल, ऊंदा मंळसा अन गवाही केळबाळेत, लेकीन येढ्ढ या मुर गवाहगोळ्द कयना देल मात पक्का ठहरूसुल. 16अगर यावारा ख्वाटा गवाही कोळावाळा यारदारा खिलाप यहोवा से तिर्गेगोद गवाह कोळली नीदरूल, 17रा आंदुर येढ्ढु मंळसा, यार बीच हींग मुकदमा येदीदाद, यहोवा अन हात्ती, मतलब आ दिनगोळ्द याजकगोळ अदिक न्यायीगोळ्द मुंद निदरूसकु आगुल; 18आग न्यायी भली भाति पुछताछ माळुल, अदिक अगर ई निर्णय मा पोहचुसुल कि आव ख्वाटा गवाह आन, अदिक तान वार्ट उन खिलाप ख्वाटा गवाही कोटान 19रा तान वार्ट उन ह्यांगारा भी नुसक्यान माळसुसोद युक्ति आव माळीदान हांगा नीव भी आऊन माळेतीर; ईदा रीती देल तान बीच दा टु ईत्ता बुराई इक दुर माळेत. 20आग दुसरा लॉकुर केळकु अंज्यार, अदिक मुंद नीन बीच हींग बेकार क्याल्सा माळतीदील. 21अदिक नी बिलकुल तरस तिनबाळेत; जीव इन बदला जीव इन, कण्ण इन बदला कण्ण इन, हल्ल इन बदला हल्ल इन, कय इन बदला कय इन, काल इन बदला काल इन दण्ड कोळेत.”