व्यवस्थाविवरण 20

युद्ध मा होगा नियम

1“याग नी तान दुश्मनगोळ से युद्ध माळली होद्या, अदिक घ्वाळागोळ, रथ, अदिक तान से यक्कुल सेना अक नोळ्या, आग आंदुर से अंजबाळेत; नीन परमेश्वर यहोवा जो नीनी मिस्र दा टु तेगुकु तंदान आव नीन सांगुळ आन. 2अदिक याग नीव युद्ध माळली दुश्मनगोळ हात्ती होदीर, आग याजक सेना अन हात्ती बंदकु अनुल, 3‘हे इस्त्राएलीगोळा केळी, ईंद नीव तान दुश्मनगोळ से युद्ध माळली हात्ती बंदीर; नीम मन कमजोर आगबाळुल; नीव अंजबाळी, अदिक नळ्गबाळी अदिक ना आंदुर मुंद अंजक्या तिनी; 4यतिकी नीम परमेश्वर यहोवा नीम दुश्मनगोळ से युद्ध माळली अदिक नीमी ऊळसोर साटी नीम सांगुळ सांगुळ नळुतान.’ 5बाक सरदार सिपाहीगोळ से ईद अनुल, ‘नीम दा टु याव आन याव व्हाशोद मान्ना माळ्यान अदिक अदुर समर्पन माळीदील? रा आव तान मान्ना अन हादी हुडुल, ईलारा हींग आगबाळुल कि आव युद्ध दा सोतोगुल अदिक दुसरा मंळसा अदुर्द समर्पन माळुल. 6अदिक याव आन याव अंगुर इन वाळी हच्यान, लेकीन अदुर्द काय तिंदीदील? आव भी तान मान्ना अन हादी हुडुल, हींग आगबाळुल कि आव संग्राम दा सोतोगुल, अदिक दुसरा मंळसा अऊर्द काय तिनुल. 7बाक याव आन याव यातारा आर्त इन से मदा अन मात माळकु ईट्यान, लेकीन आक इक मदा माळकु तरली आन? आव भी तान मान्नी होटोगुल, हींग आगबाळुल कि आव युद्ध दा सोतोगुल, अदिक दुसरा मंळसा आकीन से मदा माळुल.’ 8इदुर अलावा सरदार सिपाहीगोळ से ईद भी अनुल, ‘याव-याव मंळसा आन जो अंजभुरकु अदिक कमजोर मन नव आन, आव भी तान मान्नी होटोगुल, हींग आगबाळुल कि आऊन देखासेखी आऊन वार्टुर्द भी हिम्मत कच्चा आगेगुल.’ 9अदिक याग प्रधान सिपाहीगोळ से ईद अंद कोंडार, आग आंदुर मा अगुवाई माळोर साटी सेनापतीगोळी नियुक्त माळुल.”

10“याग नी यातारा नगर टु युद्ध माळली अदुर हात्ती होद्या, आग पयले अदुर से सन्धि माळोद बातणी कोळ. 11अदिक अगर अद सन्धि माळोद स्वीकार माळुल अदिक नीन साटी तान फाटक तेर्दबुळुल, आग यास अदुर दा ईतीदार आंदुर सप्पा नीन अधीन आगकु नीन साटी बेगार माळावाळेर ठहरूसुल. 12लेकीन अगर आंदुर नीन से सन्धि माळालुर, लेकीन नीन से लळाई माळोद चाहसतार, रा नी आ नगर इक घेर्स कोमेत; 13अदिक याग नीन परमेश्वर यहोवा अदरी नीन कय दा सोप्स बुळुल आग अदुर दा टु सप्पा मंळसागोळी तलवार देल कोंदबुळेत. 14लेकीन आर्तेर अदिक चिकोर-चिणगेर, अदिक जनावर आदि याट लुट आ नगर दा आगुल अदरी तान साटी ईट बुळेत; अदिक नीन दुश्मनगोळ्द लुट जो नीन परमेश्वर यहोवा नीनी कोळुल अदरी क्याल्सा दा तरेत. 15ईत्ता प्रकार देल आ नगरगोळ से माळेत जो नीन से हापाळ दुर आव, अदिक जो ईल इन राज्य अन नगर आल्लच. 16लेकीन जो नगर ई लॉकुर अव हुव, यार अधिकारी नीन परमेश्वर यहोवा नीनी ठहरूसदुर मा आन, आंदुर दा टु यातारा प्राणी इक जीत्ता ईटकु बिळबाळेत, 17लेकीन आंदुर जरूर सत्यानाश माळेत, मतलब हित्तीगोळ, एमोरिगोळ, कनानीगोळ, परिज्जिगोळ, हिब्बीगोळ, अदिक यबूसीगोळी, ह्यांग कि नीन परमेश्वर यहोवा नीनी आग्या कोटान; 18हींग आगबाळुल कि यास घिनोना क्याल्सा आंदुर तान द्यावगोळ्द स्यावा दा माळतेला बंदार हांग अच माळोद नीमी भी कलसुल, अदिक नीव तान परमेश्वर यहोवा अन खिलाप पाप माळली हती.”

19“याग नी युद्ध माळतेला यातारा नगर इक जीतुसोर साटी अदरी हापाळ दिन ताका घेर्सकु ईत्या, आग अऊर मार्रगोळ मा कोळ्ली नळ्सकु अवरी नष्ट माळबाळेत, यतिकी अऊर काय नीन तिनली क्याल्सी बंदाव, इदुरसाटी अवरी कडुबाळेत. येन मैदान इन मार्र भी मंळसा हुव कि नी अवरी भी घेर्सकु ईट्या? 20लेकीन याता मार्रगोळ्द बारा दा नी जान्स कोम कि ईऊर काय तिनव आल्लच, रा अवरी कळ्दकु नष्ट माळेत, अदिक आ नगर इन खिलाप आ समय ताका घेराबन्दी माळकु ईरेत यागासताका अद नीन वश दा होटबराल.”