व्यवस्थाविवरण 21

हत्या अन अनसुलझा मामला

1“अगर आ द्याश इन मैदान दा जो नीन परमेश्वर यहोवा नीनी कोळतान यावारा कोंदकु मंळसा अन लाश बिदकु सिकुल, अदिक आऊक यारारा कोंद बुटान ईद पता नळु बाळुल, 2रा नीन पुरनिए अदिक न्यायी होटकु आ लाश से नाकु दीकळोद ऊंद ऊंद नगर इन दुरी इक आळुल; 3आग जो नगर आ लाश इन सब से हात्ती ठहरूसीत, अदुर पुरनिए ऊंद ईत्ता वासरू हुडुकु ईरूल, यदुर देल येनु क्याल्सा ताकोमकु ईला आगीदाद, अदिक यदुर मा जुआळी यागलु ईटकु ईला आगीदाद. 4आग आ नगर इन पुरनिए आ वासरू उक ऊंद बारमासी गांगा अन ईत्ता तराई दा जो ना जोत्सकु अदिक ना बोऊसकु आग्याद ओयुल, अदिक अदा तराई दा आ वासरू उन कुतक्या मुर्द बुळुल. 5अदिक लेवी याजक भी हात्ती बरूल, यतिकी नीन परमेश्वर यहोवा आंदरी निवळुस कोंडान कि आऊन स्यावा टहल माळुल अदिक आऊन हेसुर देल आशीर्वाद कोळतोगुल, अदिक आंदुर कयना अन अनुसार हर ऊंद झगळा अदिक बडाबडी इन मुकदमागोळ्द निर्णय आगुल. 6बाक जो नगर आ लाश इन सबसे हात्ती ठहरूसीत, अदुर सप्पा पुरनिए आ वासरू उन म्याकुच यदुर कुतक्या तराई दा मुर्दकु आग्याद तान तान कय तोळकु अनुल, 7‘ईद खुन नाव माळीदील, अदिक ना ईद नाम कण्ण इन मुंद आग्द क्याल्सा हुन. 8इदुरसाटी, हे यहोवा, तान बिळ्सद् इस्त्राएली प्रजा अन पाप मुचकु निर्दोष उन खुन इन पाप तान इस्त्राएली प्रजा अन ताल्ला मा टु ईळ्स.’ आग आ खुन इन दोष देल आंदरी माफ माळकु आदीत. 9ईद अद क्याल्सा माळकु जो यहोवा अन नजर दा ठीक आद निर्दोष उन खुन इन दोष तान बीच दा टु दुर माळेत.”

युद्ध दा हुळसुसकु आर्त इन सांगुळ मदा

10“याग नी तान दुश्मनगोळ से युद्ध माळली होद्या, अदिक नीन परमेश्वर यहोवा आंदरी नीन कय दा माळबुळुल, अदिक नी आंदरी बन्दी बनुस बुळ, 11आग अगर नी बन्दीगोळ दा टु यातारा सुन्दर आर्त इक नोळकु आकीन मा मोहीत आगेग, अदिक आकीन से मदा माळ कोमोद चाहास्या, 12रा आकीक तान मान्या तरेत, अदिक आक तान ताल्ला मुंडन माळसुसुल, नख कळसुसुल, 13अदिक तान बन्धन इन वस्त्र ईळ्सकु नीन मान्या तिंगुळ तिम ईतकु तान मोय आप्प उन साटी विलाप माळ्त ईरूल; अदुर बाद्दा नी आकीन हात्ती होगेत, अदिक नी आकीन गांड्ड अदिक आक नीन हिंग्स बनसुल. 14बाक अगर आक नीनी वळ्लेर ईला हतालुर, रा यल आक होगोद चाहासतार अल आक इक होगगोळेत; आकी पैस्या ताकोमकु येल्यारा मारबाळेत, अदिक नीन आकीन से शारीरिक संबंध ईरोद, ई कारण आकीन से दासी घाई व्यवहार माळबाळेत.”

पहिलौठा अन अधिकार

15“अगर यावारा मंळसा अक येढ्ढ हिंग्सुर ईरूल, अदिक आऊक ऊंद प्रिय अदिक दुसरा अप्रिय ईरूल, अदिक प्रिय अदिक अप्रिय येढ्ढु आर्तेर चिग्द हाळुल, लेकीन धोळ‍ चिग्द अप्रिय आर्त इनव ईरूल, 16रा याग आव तान पारगोळ दा तान सम्पत्ति इन बटवारा माळुल, आग अगर अप्रिय अन पार जो खराखुरा धोड्डेव आन अगर जीत्ता ईरूल, रा आव प्रिय अन पार उक जेठांस कोळ सकतीदील; 17आव ईद जान्सकु कि अप्रिय अन पार नान पौरुष उन पयला काय हुन, अदिक जेठ उन अधिकार आऊंदा हुन, आऊका तान सप्पा सम्पत्ति दा टु येढ्ढ भाग कोटकु जेठांसी मानसुल.”

जिद्दी पार

18“अगर यारदारा जिद्दी अदिक हेकळ पार ईरूल, जो तान मोय-आप्प उन मात मानसालुन, लेकीन ताड़ना कोळदुर मा भी आंदुर केळालुन, 19रा आऊन मोय-आप्प आऊक हुडुकु तान नगर टु व्हार्या फाटक इन हात्ती नगर इन पुरनिएगोळ हात्ती ओयुल, 20अदिक आंदुर नगर इन पुरनिएगोळ से अनुल, ‘नाम ई पार जिद्दी अदिक हेकळ आन, ईव नाम केळालुन; ईव हारसावाळा अदिक कुडावाळा आन.’ 21आग आ नगर इन सप्पा मंळसा आऊक पथराव माळकु कोंद बुळुल, ईद नी तान बीच दा टु ईत्ता बुराई इक दुर माळेत, आग सप्पा इस्त्राएली केळकु अंजक्या तिंदार.”

अन्य नियम

22“बाक अगर यारदारा से प्राणदण्ड इन योग्य यातोदारा पाप आगीदाद यदुर देल आव कोन्सुसकु आगुल, अदिक नी आऊन लाश इक मार्र मा हिलगुस बुळ, 23रा अद लाश ईळ्लकी मार्र मा हिलगुसकु ईरबाळुल, जरूर अदा दिशी अदरी मुण्ण कोळेत, यतिकी जो हिलगुसकु आग्याद अद परमेश्वर दी टु शापित ठहरूसतद, इदुरसाटी जो द्याश नीन परमेश्वर यहोवा नीन भाग माळकु कोळतान आऊन जमीन इक अशुद्ध माळबाळेत.”