व्यवस्थाविवरण 22

1नी तान वार्ट उन वस्ता-गोसी या भेड़-मर्री इक भटकुस्द नोळकु अनदेखा माळबाळेत, अदरी जरूर आऊन हात्ती पोहचुस कोळेत. 2लेकीन अगर नीन आ वार्ट हात्ती ईला ईरतीदान, या नी आऊक ईला अरूतीद्या, रा आ जनावर इक तान मान्ना अन बुळ्क तनकोमेत, अदिक यागास ताका नीन आ वार्ट अदरी ढुंढ्सालुन आगासताका ताका अद नीन हात्ती ईरूल; अदिक याग आव अदरी ढुंढ्सुल आग आऊक कोट बुळेत. 3अदिक आऊन गदा या वस्त्र अन बारा दा, उलटा आऊन यातोदु वस्तु येती आगबाळुल, जो आऊन से काळदोग्याद अदिक नीनी सिकुल, अदुर बारा दा भी हींग अच माळेत; नी अनदेखा माळबाळेत.

4नी तान वार्ट उन गदा या वस्ता अक हादी मा बिदकु नोळकु अनदेखा माळबाळेत; अदरी नेगदुर दा जरूर आऊन मदत माळेत.

5यातारा आर्त आरी इन पयनावा हाकबाळुल, अदिक ना यावारा मंळसा आर्त इन पयनावा हाकुल; यतिकी ईत्ता क्याल्सागोळ्द सप्पा माळावाळेर नीन परमेश्वर यहोवा अन नजर दा घृणित आद.

6अगर मार्र या जमीन मा नीन मुंद हादी दा यातारा चिड़िया अन गॉदा सिकुल, चाहे अदुर दा पाड्डगोळ ईरूल चाहे तत्ति, अदिक आ पाड्डगोळ या तत्तिगोळ मा अऊर मोय कुर्तकु ईरूल, रा पाड्डगोळ समेत मोय इक हुडुबाळेत; 7पाड्डगोळी तान साटी रा हुडु, लेकीन मोय इक जरूर बिट बुळेत; इदुरसाटी कि नीन भला आगुल, अदिक नीन उमर इन दिनगोळ हापाळ आगुल.

8याग नी व्हासा मान्ना बनुस्या आग अदुर छत मा आळा अन साटी मुण्डागोळ बनुसेत, हींग आगबाळुल कि यावारा छत मा टु बिदोगुल, अदिक नी तान घराना मा खुन इन दोष हच्या.

9तान अंगुर इन बेली दा येढ्ढ प्रकार इनव बींजा बोऊस बाळेत, हींग आगबाळुल कि अदुर सप्पा उपज, मतलब नीन बोऊस्द बींजा अदिक अंगुर इन बेली इन उपज येढ्ढु अपवित्र ठहरूसुल. 10वस्ता अदिक गदा येढ्ढु सांगुळ जोत्सकु नागर नळ्स बाळेत. 11ऊन अदिक सनी इन मिलावट देल बनुस्द कपळा हाकबाळेत. 12तान होद्दोद नाकु दीकळोद क्वाणा मा झालर हचतोगेत.

नैतिकता अन नियम

13“अगर यावारा मंळसा यातारा आर्त इन से मदा माळुल, अदिक आकीन हात्ती होगा होती आक आऊक अप्रिय हतुल, 14अदिक आव आ आर्त इन हेसुर हुडाई माळुल, अदिक ईद अंदकु आकीन मा कुकर्म इन दोष हचुल, ‘ई आर्त इन से ना मदा माळदीन, अदिक याग आकीन से संगती माळदीन आग आकीन दा कुवारा अवस्था अन लक्षण नोळीदील,’ 15रा आ पोर इन मोय-आप्प आकीन कुवारापन इन चिन्ह हुडुकु नगर इन श्याणा लॉकुर हात्ती फाटक इन व्हार्या होगुल; 16अदिक आ पोर इन आप्प श्याणा लॉकुर से अनुल, ‘ना तान पोर ई मंळसा अक मदा माळकु कोट्टीन, अदिक आक आऊक अप्रिय हत्तार; 17अदिक आव रा ईद अंदकु आकीन मा कुकर्म इन दोष हचतान, कि ना नीन पोर इंदा कुवारापन इन लक्षण नोळीदील. लेकीन नान पोर इन कुवारापन इन चिन्ह ईव आव.’ आग आकीन मोय-आप्प नगर इन श्याणा लॉकुर मुंद आ कतळी इक फैलुसुल. 18आग नगर इन पुरनिए आ मंळसा अक हुडुकु ताड़ना कोळुल; 19अदिक आऊन मा सौ शेकेल पैस्या अन दण्ड भी हचकु आ पोर इन आप्प उक कोळुल, इदुरसाटी कि आव ऊंद इस्राएली पोर इन हेसुर हुडाई माळदुन; अदिक आक आऊंदा हिंग्स बनस्कु ईरूल, अदिक आव जिन्दगी तिम आ आर्त इक त्याग्स सकबाळुल. 20लेकीन अगर आ पोर इन कुवारापन इन चिन्ह कांळ्सकु बिळालव, अदिक आ मंळसा अन मात सही ठहरूसुल, 21रा आंदुर आ पोर इक आकिन आप्प उन मान्या अन दरवाजा मा ओयुल, अदिक आ नगर इन मंळसा आकीन मा पथराव माळकु कोंद बुळुल; आक रा तान आप्प उन मान्या वेश्या अन क्याल्सा माळकु बुराई माळ्यार; ईद नी तान बीच दा टु ईत्ता बुराई इक दुर माळेत.”

22“अगर यावारा मंळसा दुसरा मंळसा से मदा माळ्द आर्त इन सांगुळ मिंगतेला सिकुल, रा जो मंळसा आ आर्त इन सांगुळ मिंगीदान आव अदिक आक आर्त येढ्ढु कोन्सुसकु आगुल; ईत्ता प्रकार देल नी ईत्ता बुराई इक इस्राएल दा टु दुर माळेत. 23अगर यातारा कुवारा पोर इन मदा अन मात आगीदाद, अदिक यावारा दुसरा मंळसा आकी नगर दा नोळकु आकीन से कुकर्म माळुल, 24रा नीव आ येढ्ढु मुंदरी आ नगर इन फाटक इन व्हार्या ओतकु आंदुर मा पथराव माळकु कोंद बुळेतीर; आ पोर इक रा इदुरसाटी कि आक नगर दा ईतकु भी चिल्लासीदील, अदिक आ मंळसा अक ई कारण कि आव तान मान्ना हातळववाळा अन आर्त इन कुवारापन भंग माळ्यान; ईत्ता प्रकार देल नी तान बीच दा टु ईत्ता बुराई इक दुर माळेत.”

25लेकीन अगर यावारा मंळसा यातारा पोर इक यार्द मदा अन मात आगीदाद मैदान दा नोळकु बरबस आकीन से कुकर्म माळुल, रा सिर्फ आव मंळसा कोन्सुसकु आगुल याव आकीन से कुकर्म माळ्यान. 26अदिक आ पोर इन से येनु माळ बाळेत; आ पोर इन पाप प्राणदण्ड अन योग्य हैलेच, यतिकी ह्यांग यावारा तान मान्ना हातळव वाळा मा चळाई माळकु आऊक कोंद बुळुल, हांगा ईद मात भी ठहरूसीत; 27कि आ मंळसा आ पोर इक मैदान दा नोळदुन, अदिक आव चिल्लासदुर रा सही, लेकीन आकी याऊ ऊळसावाळा सिकीदील.

28अगर यावारा मंळसा अक यातारा कुवारा पोर सिकुल यार्द मदा अन मात आगली ईरूल, अदिक आव आकी हुडुकु आकीन सांगुळ कुकर्म माळुल, अदिक आंदुर सिकुल, 29रा याता मंळसा आकीन से कुकर्म माळीदान आव आ पोर इन आप्प उक पचास शेकेल पैस्या कोळुल, अदिक आक आऊंदा हिंग्स आगुल, आव आकीन कुवारापन भंग माळदुन, ई कारण आव जिन्दगी तिम आकी त्याग्स सकबाळुल.

30यावारा तान सौतेला मोय इक तान आर्त बनुसबाळुल, आव तान आप्प उन ओढ़ना तेरू बाळुल.