व्यवस्थाविवरण 23

यहोवा अन सभा दा प्रवेश निषेध

1यार गारगोळ मेटकु आदव या मयससार कळ्दकु आग्याव आव यहोवा अन सभा दा बर ईला पायजे.

2यावारा कुकर्म देल पैदा आग्द यहोवा अन सभा दा बर ईला पायजे; लेकीन हत्त पीढ़ी ताका आऊन वंश इन यावारा यहोवा अन सभा दा ईला बर पायजे.

3यावारा अम्मोनी या मोआबी यहोवा अन सभा दा ईला बर पायजे; आंदुर्द हत्त पीढ़ी ताका यावारा यहोवा अन सभा दा ईला बर पायजे;

4ई कारण देल कि याग नीव मिस्त्र दा टु होटकु बरतोगीर आग आंदुर अन्न नीर हुडुकु हादी दा नीम से मुलाकात माळीदील, अदिक ईद भी कि आंदुर अरन्महरैम द्याश इन पतोर नगर वाळेर बोर उन पार बिलाम इक नीनी शराप कोळोर साटी दान दक्षिणा कोट्टुर. 5लेकीन नीन परमेश्वर यहोवा बिलाम उन केळीदील; लेकीन नीन परमेश्वर यहोवा नीन निमित्त आऊन शराप इक आशीष दा बदलुस बुट्टुन, इदुरसाटी कि नीन परमेश्वर यहोवा नीन से प्यार ईटतोगोन. 6नी जिन्दगी तिम आंदुर कुशल अदिक भलाई यागलु चाहासबाळेत. 7यावारा एदोमी से घृणा माळबाळेत, यतिकी आव नीन वार्ट हुन; यावारा मिस्री से भी घृणा माळबाळेत, यतिकी आऊन द्याश दा नी परदेशी आगकु ईतीद. 8आंदुर जो पळनातु पैदा आगुल आंदुर यहोवा अन सभा दा बर पायजे.

छावनी इक शुद्ध ईटोद

9याग नी दुश्मनगोळ से लळाई माळली होगकु छावनी हाक्या, आग सप्पा प्रकार इन बेकार मातगोळ से ऊळ्दकु ईरेत. 10अगर नीन न्याड्या यावारा मंळसा आ अशुद्धता देल जो ईळ्लकी स्वप्नदोष देल अशुद्ध आगीदान, रा आव छावनी टु व्हार्या होट बरूल, अदिक छावनी इन बुळ्क बरबाळुल; 11लेकीन द्यावमुळका अन थ्वाळासा पयले आव मय तोळुल, अदिक याग सुर्य मुळकेगुल आग छावनी दा बरूल.

12छावनी इन व्हार्या नीन आंगुळ दी होगोद ऊंद जागा नियुक्त ईरूल, अदिक अल्या आंगुळ दी होगतोगेत; 13अदिक नीन हातळव औजारगोळ दा ऊंद खंती भी ईरूल; अदिक याग नी आंगुळ दी कुरत्या, आग अदुर देल अगुळकु तान मल इक मुच्च बुळेत. 14यतिकी नीन परमेश्वर यहोवा नीनी ऊळ्सली अदिक नीन दुश्मनगोळी नीन से हारूसली नीन छावनी इन बीच ओयाळतेला ईत्तान, इदुरसाटी नीन छावनी पवित्र ईरली पायजे, हींग आगबाळुल कि आव नीन बीच दा यातारा अशुद्ध वस्तु नोळकु नीन से तिर्गेगुल.

दुसरा नियम

15“जो दास तान स्वामी इन हात्ती टु ओळकु नीन शरण ताकोमुल आऊक आऊन स्वामी इन कय दा हुळसुस बाळेत; 16आव नीन बीच जो नगर आऊक वळ्लीद हतुल अदुर्दा नीन सांगुळ ईरली पायजे; अदिक नी आऊन मा अत्याचार माळबाळेत.”

17इस्राएली पोरगोळ दा टु यातारा वेश्या ईरबाळुल, अदिक ना इस्राएलीगोळ दा टु यावारा मंळसा ईत्ता बेकार क्याल्सा माळवाळा ईरूल. 18नी वेश्यापन इन कमाई या नाय इन घाई कमाई यातारा मन्नत इक पुरा माळोर साटी तान परमेश्वर यहोवा अन मान्ना दा तरबाळेत; यतिकी नीन परमेश्वर यहोवा अन हात्ती ई येढ्ढु च्या येढ्ढु कमाई घृणित कर्म आव.

19तान यावारा वार्ट इक व्याज मा कर्ज कोळबाळेत, चाहे पैस्या ईरूल, चाहे भोजनवस्तु ईरूल, चाहे यातारा वस्तु ईरूल जो व्याज मा कोटकु आगतद, आऊक व्याज मा कोळबाळेत. 20नी परदेशी इक व्याज मा कर्जा रा कोळेत, लेकीन तान यावारा वार्ट उन से हींग माळबाळेत, ताकी याता द्याश इन अधिकारी आगली नी होगेत्या, अल याता याता क्याल्सा दा तान कय हच्या अव सप्पा दा नीन परमेश्वर यहोवा नीनी आशीष कोळुल.

21याग नी तान परमेश्वर यहोवा अन साटी मन्नत मानस्या, रा अदरी पुरा माळदुर दा देर माळबाळेत; यतिकी नीन परमेश्वर यहोवा अदरी जरूर नीन से ताकोम कोंडान, अदिक देर माळदुर देल नी पापी ठहरूस्या. 22लेकीन अगर नी मन्नत ईला मानस्या, रा नीन यातोदु पाप हैलेच. 23जो येनारा नीन बाय दा टु होळुल अदरी पुरा माळदुर दा सावधानी माळेत; नी तान बाय देल वचन कोटकु तान इच्छा देल तान परमेश्वर यहोवा अन ह्यांग मन्नत मानस्या, हांगा स्वतंत्रता पुर्वक अदरी पुरा माळेत.

24याग नी यावारा दुसरा अन अंगुर इन वाळी दा होद्या, आग व्हाट्ट तिम तिनेत, लेकीन तान पात्र दा येनु ईटबाळेत. 25अदिक याग नी यावारा दुसरा अन ऊब्बा केई दा होद्या , आग नी कय देल बालागोळ मुरू सकत्या, लेकीन यावारा दुसरा अन ऊब्बा केई मा कुळगुल हच बाळेत.