Holiya Bible
व्यवस्थाविवरण 24
छोळचिट्टी अदिक पाठ
अगर यावारा मंळसा यातारा आर्त इन से मदा माळ कोमुल, अदिक अदुर बाद्दा आकीन दा येनारा शरम इन मात नोळकु आकीन से नाखुश ईरूल, रा आव आकीन साटी छोळ चिट्टी लिख्सकु अदिक आकीन कय दा कोटकु आकीक तान मान्या टु तेग्द बुळुल, अदिक याग आक आऊन मान्या टु होटबुळुल, आग दुसरा मंळसा नोर आग सकतार. लेकीन अगर आक आ दुसरा मंळसा अक भी अप्रिय हतुल, अदिक आव आकीन साटी छोळ चिट्टी लिख्सकु अदिक आकीन कय दा कोटकु आकीक तान मान्या टु तेग्द बुळुल, या आ दुसरा मंळसा याव आकीक तान आर्त माळ कोंडान सोतोगुल, रा आकीन पयला गांड्ड, याव आकीक तेग्द बुटान, आकीन अशुद्ध आगदुर बाद्दा आकीक तान हिंग्स बनुस बाळुल यतिकी ईद यहोवा अन हात्ती घृणित मात आद. ई प्रकार नी आ द्याश इक यदरी नीन परमेश्वर यहोवा नीन भाग माळकु नीनी कोळतान पापी बनुस बाळेत.
अन्य नियम
याता मंळसा अन ईगल्या अच मदा आग्याद, आव सेना अन सांगुळ होगबाळुल अदिक ना यातारा क्याल्सा अन भार आऊन मा हाक्कु आगुल; आव साल तिम तान मान्या स्वतंत्रता देल ईतकु तान मदा माळ्द आर्त इक खुश माळतेला ईरूल.
यावारा मंळसा चक्की इक या अदुर म्याकळोद पट्टा अक गिरवी ईटबाळुल; यतिकी अद रा मान्सी जीव इक गिरवी ईटोद हुन.
अगर यावारा तान यातारा इस्राएली वार्ट उक दास बनुसली या मार बुळोद विचार देल कदुतेला सिकुल, रा ईत्ता काळ्ल कोंदकु आगुल; ईत्ता बुराई इक तान बीच दा टु दुर माळेत.
कोढ़ इन व्याधि इन बारा दा सावधान ईरेत, अदिक जो येनारा लेवी याजक नीमी कलसुल अदुर्दा अनुसार मयनत देल माळदुर दा चौकसी माळेत; ह्यांग आग्या ना आंदरी कोटीन हांग माळदुर दा चौकसी माळेत. याद ईट कि नीन परमेश्वर यहोवा, याग नीव मिस्र दा टु होटकु बरीर, आग हादी दा मरियम से येन माळदुन.
याग नी तान यावारा वार्ट उक येनारा उधार कोट्या, आग गिरवी इन वस्तु ताकोमोर साटी आऊन मान्ना अन बुळ्क होकबाळेत. नी व्हार्या निदुरकु ईरेत, अदिक यारी नी उधार कोट आवा गिरवी इन वस्तु उक नीन हात्ती व्हार्या तरूल. अदिक अगर आ मंळसा कंगाल ईरूल, रा आऊन गिरवी तान हात्ती ईटकु मिंगबाळेत; द्याव मुळ्क्त मुळ्क्त आऊक अद बन्धक जरूर कोट बुळेत, इदुरसाटी कि आव तान होदोद होदुकु मिंग सकुल अदिक नीनी आशीर्वाद कोळुल; अदिक ईद नीनि परमेश्वर यहोवा अन नजर दा न्याय इन क्याल्सा ठहरूसीत.
यावारा मजदुर जो गरीब अदिक कंगाल ईरूल, चाहे आव नीन वार्टुर दा टु ईरूल चाहे नीन द्याश इन फाटकगोळ्द बुळ्क ईरावाळेर परदेशीगोळ दा टु ईरूल, आऊन मा अंधार माळबाळेत; ईद जान्सकु, कि आव गरीब आन अदिक आऊन मन मजदूरी दा हतकु ईरतद, मजदूरी माळा दिशी का द्यावगा अन पयले नी आऊन मजदूरी कोळेत; हींग आगबाळुल कि आव नीन कारण यहोवा अन दोहाई कोळुल, अदिक नी पापी ठहरूस्या.
पार उन कारण आप्प उक कोन्सुसकु आगबाळुल, अदिक ना आप्प उन कारण पार उक कोन्सुसकु आगुल; याव पाप माळ्यान आवा आ पाप इन कारण कोन्सुसकु आगुल.
यावारा परदेशी मंळसा या अनाथ चिग्द उन न्याय बिगळुस बाळेत, अदिक ना यातारा रांड्यागीत इन कपळा अक बन्धक ईटेत; अदिक इदरी याद ईटेत कि नी मिस्र दा दास ईर्या, अदिक नीन परमेश्वर यहोवा नीनी अल टु बिळ्सकु तंदुन; ई कारण ना नीनी ईद आग्या कोळतीन.
याग नी तान हण्ण केई इक कळद्या, अदिक ऊंद पुळका केई दा भुल्सदुर देल बिट्टोगुल, रा अदरी कडुली मात्त होगबाळेत; आव परदेशी, अनाथ, अदिक रांड्या आर्त इन साटी बिदकु ईरूल; इदुरसाटी कि परमेश्वर यहोवा नीन सप्पा क्याल्सागोळ दा नीनी आशीष कोळुल. “याग नी तान कायवाळा मार्र मा टु काय झाळस्या, आग डगालगोळी दुसरा घन झाळ्स बाळेत; अद परदेशी, अनाथ, अदिक रांड्या आर्त इन साटी ईतोगुल. याग नी तान अंगुर इन बेली इन काय मुरद्या, रा अदुर दाना-दाना मुरू बाळेत; अद परदेशी, अनाथ, अदिक रांड्या आर्त इन साटी ईरूल. अदिक ईदरी याद ईटेत कि नी मिस्त्र द्याश दा दास ईर्या; ई कारण ना नीनी ईद आग्या कोळतीन.
Holiya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.