व्यवस्थाविवरण 25

1“अगर मंळसागोळ बीच यातारा झगळा आगुल, अदिक आंदुर न्याय माळसुसोर साटी न्यायीगोळ हात्ती होगुल, अदिक आंदुर आंदुर्द न्याय माळुल, रा निर्दोष उक निर्दोष अदिक दोषी इक दोषी ठहरूसुल, 2अदिक दोषी बळ्सकोमा लायक ठहरूसुल, रा न्यायी आऊक केळसुसकु तान मुंद ह्यांग आऊन दोष ईरूल अदुर हिसाब देल क्वाळागोळ आळु आळुकु बळसुसुल. 3आव आऊक च्यालीस क्वाळा ताक भी बळसुस सकतान, इदुर से यक्कुल बळसुस सकालुन; हींग आगबाळुल कि इदुर से यक्कुल हापाळ बळ्सकोमदुर देल नीन वार्ट नीन नजर दा तुच्छ ठहरूसुल.

4“गाहनी माळा होती वस्ता अन बाय कट बाळेत.

सोतकु वार्ट उन प्रति जवाबदारी

5“याग हापाळ वार्टुर सांगुळ सांगुळ ईरतीदार, अदिक आंदुर दा टु ऊंद बिना औलाद सोतोगुल, रा आऊन हिंग्स उन मदा दुसरा कुल से माळकु आगबाळुल; आकीन गांड्ड उन वार्ट आकीन हात्ती होगकु आकी तान हिंग्स माळ कोमुल, अदिक आकीन से गांड्ड उन वार्ट उन धर्म पालन माळुल. 6अदिक जो पयला पार आ आर्त इन से पैदा आगुल आव आ सोद्द वार्ट उन हेसुर इन ठहरूसुल, यदुर देल कि आऊन हेसुर इस्राएल दा टु मिटुस बाळुल. 7अगर आ आर्त इन गांड्ड उन वार्ट उक आकीन से मदा माळोद भाऊसाल, रा आ आर्त नगर इन फाटक मा हारोद लॉकुर हात्ती होगकु अनुल, ‘नान गंळ्स उन वार्ट तान वार्ट उन हेसुर इस्राएल दा बन्सकु ईटदुर देल मना माळ बुटान, अदिक नान से गांड्ड उन वार्ट उन धर्म पालन माळोद चाहासालुन.’ 8आग आ नगर इन हाळाबाट्टुर आ मंळसा अक कारसुसकु आऊक समझुसुल; अदिक अगर आव तान मात मा टेक हचुल, अदिक अनुल, ‘नानी ईकीन से मदा माळोद भाऊसाल,’ 9रा आऊन वार्ट उन हिंग्स आ हारोद लॉकुर मुंद आऊन हात्ती होगकु आऊन काल दा टु जुता ईळसुल, अदिक आऊन बाय मा ऊगुळ बुळुल; अदिक अनुल, ‘जो मंळसा तान वार्ट उन वंश इक नळसोद चाहासालुन आऊन से ईत्ता प्रकार इंदा व्यवहार आदीत.’ 10आग इस्राएल दा आ मंळसा अन ईद हेसुर बिद्दीत, मतलब जुता ईळ्स्द मंळसा अन घराना.

अन्य नियम

11“अगर येढ्ढ मंळसा आपस दा बडाबडी माळतीदार, अदिक आंदुर दा टु ऊंद मंळसा अन हिंग्स तान गांड्ड उक बडावाळा अन कय दा टु बिळसोर साटी हात्ती होगुल, अदिक तान कय वाळुसकु आऊन गुप्तांग इक जोर देल वतुल, 12रा आ आर्त इन कय कळ्द बुळेत; आकीन मा तरस तिनबाळेत.

13“तान झ्वारा दा येढ्ढ प्रकार इन बट, मतलब ऊंद गोर्त अदिक दुसरा यक्कुल वजन ईटबाळेत. 14तान मान्या येढ्ढ प्रकार इन, मतलब ऊंद धोळ्द अदिक दुसरा श्यांळ्‍द माप ईटबाळेत. 15नीन बट अदिक माप पुरा पुरा अदिक न्याय इनव ईरूल; इदुरसाटी कि जो द्याश नीन परमेश्वर यहोवा नीनी कोळतान अदुर दा नीन उमर हापाळ आगुल. 16यतिकी ईत्ता क्याल्सागोळ दा यास कुटीलता माळतार, आंदुर सप्पा नीन परमेश्वर यहोवा अन नजर दा घृणित आर.

अमालेकीगोळ्द सर्वनाश इन आग्या

17“याद ईट कि याग नी मिस्र टु होटकु बर्या आग अमालेक नीन से हादी मा येन माळदुन, 18मतलब आंदरी परमेश्वर उन अंज्क ईला ईरोद; ई कारण आव याग नी हादी मा थक्स-माळकु ईर्या, आग नीन मा चळाई माळकु यास कमजोर आगदुर कारण सबसे हींद ईरोर आ सप्पा मुंदरी कोंदुन. 19इदुरसाटी याग नीन परमेश्वर यहोवा आ द्याश दा, जो आव नीन भाग माळकु नीन अधिकार दा माळ बुळतान, नीनी नाकु दिकळव सप्पा दुश्मनगोळ से आराम कोट्टान, आग अमालेक उन हेसुर धरती मा टु मिटुस बुळेत; अदिक नीव ई मात इक मारू बाळेतीर.