व्यवस्थाविवरण 26

पयला उपज इन अर्पण

1“बाक याग नी आ द्याश दा यदरी नीन परमेश्वर यहोवा नीन निज भाग माळकु नीनी कोळतान पोहचुस्या, अदिक अदुर अधिकारी आगकु अदुर दा बसुस्या, 2आग जो द्याश नीन परमेश्वर यहोवा नीनी कोळतान, अदुर जमीन इन भाति-भाति इन जो पयला उपज नी तान मान्या तंद्या, अदुर दा टु थ्वाळासा फुट्टी दा हुडुकु आ जागा मा होगेत, यदरी नीन परमेश्वर यहोवा तान हेसुर इन निवास माळली निवळुस कोमुल. 3अदिक आ दिनगोळ दा याजक उन हात्ती होगकु ईद अनेत, ‘ना ईंद नीन परमेश्वर यहोवा अन मुंद घोषित माळतीन, कि यहोवा नाम लॉकुरी याता द्याश इन कोळोद नाम पुर्वजगोळ से किर्या तिंदीदुन अदुर दा ना होट बंदीन.’ 4आग याजक नीन कय देल अद फुट्टी हुडुकु नीन परमेश्वर यहोवा अन वेदी इन मुंद ईटबुळुल. 5आग नी तान परमेश्वर यहोवा से ई प्रकार अनेत, ‘नान मूल मंळसा ऊंद अरामी मंळसा ईरोन जो ईत्त आत्त भटकुसदुर मा ईरोन; अदिक आव तान श्याणतुसा परिवार समेत मिस्र अक होदुन, अदिक अल परदेशी आगकु ईत्तुन; अदिक अल आऊन से धोळ्द, अदिक सामर्थी, अदिक हापाळ मंळसागोळ देल तुम्द राज्य पैदा आत. 6अदिक मिस्रीगोळ नाम लॉकुर से बेकार बर्ताव माळदुर, अदिक नामी दुख कोट्टुर, अदिक नाम से कठिन स्यावा ताकोंडुर. 7लेकीन नाव तान पुर्वजगोळ परमेश्वर यहोवा अक कारदेव, अदिक यहोवा नाम केळकु नाम दुख-मयनत अदिक अंधार मा दृष्टी माळदुन; 8अदिक यहोवा बलवन्त कय अदिक वाळुस्द भुजबल देल हापाळ भयानक चिन्ह अदिक चमत्कार तोर्सुसकु नामी मिस्र दा टु तेगुकु तंदुन; 9अदिक नामी ई जागा मा पोहचुस्कु ई द्याश याता द्याश दा हाल अदिक शयद इन धारागोळ वाहुसताव नामी कोट बुटान. 10ईग हे यहोवा, नोळ, जो जमीन नी नानी कोट्या अदुर पयला उपज ना नीन हात्ती तंदीन.’ आग नी अदरी तान परमेश्वर यहोवा अन मुंद ईटेत; अदिक यहोवा अक दण्डवत माळेत; 11अदिक यास वळ्लेव पदार्थ नीन परमेश्वर यहोवा नीनी अदिक नीन घराना अक कोळुल, अऊर कारण नी लेवीगोळ अदिक तान बीच दा ईरावाळेर परदेशीगोळ सहित खुशी माळेत.

12“तीसरा साल जो दशमांश कोळोद साल ठहरूस्याद, याग नी तान सप्पा प्रकार इन बळती इन दशमांश इक तेग्द कोंड्या, आग अदरी लेवी, परदेशी, अनाथ, अदिक रांड्या आर्तेरी कोळेत, कि आंदुर नीन फाटकगोळ बुळ्क तिनकु तृप्त आगुल; 13अदिक नी तान परमेश्वर यहोवा से अनेत, ‘ना नीन सप्पा आग्यागोळ्द अनुसार पवित्र ठहरूस्द वस्तुगोळी तान मान्या टु तेगदीन, अदिक लेवी, परदेशी, अनाथ, अदिक रांड्या आर्तेरी कोट बुट्टीन; नीन यातारा आग्यागोळी ना रा टालुसदीन, अदिक ना मार्तीन. 14आ वस्तुगोळ दा टु ना शोक इन समय तिंदीदील, अदिक ना अऊर दा टु यातारा वस्तु अशुद्धता अन दशा दा मान्या टु तेगदीन, अदिक ना येनारा शोक माळावाळेरी कोट्टीन; ना तान परमेश्वर यहोवा अन केळ कोंडीन, ना नीन सप्पा आग्यागोळ्द अनुसार माळीन. 15नी स्वर्ग दा टु, जो नीन पवित्र धाम हुन, दृष्टी माळकु तान प्रजा इस्राएल इक आशीष कोळ, अदिक ई हाल अदिक शयद इन धारागोळ्द द्याश इन जमीन मा आशीष कोळ, यदरी नी नाम पुर्वजगोळ से तिनकु किर्या अन अनुसार नामी कोट्या.’

परमेश्वर उन निज प्रजा

16“ईंद इन दिशी नीन परमेश्वर यहोवा नीनी ईवा विधिगोळ अदिक नियमगोळी मानसोद आग्या कोळतान; इदुरसाटी तान सप्पा मन अदिक पुरा जीवा देल ईऊर्द मान्सदुर दा चौकसी माळेत. 17नी रा ईंद यहोवा अक तान परमेश्वर मान्सकु ईद वचन कोट्या, कि ना नीन हेळ्द हादीगोळ मा नळाईन, अदिक नीन विधिगोळ, आग्यागोळ, अदिक नियमगोळी मान्सतोगाईन, अदिक नीन केळतोगाईन. 18अदिक यहोवा भी ईंद नीनी तान वचन इन अनुसार तान प्रजारूपी निज धन-दौलत मानस्यान, कि नी आऊन सप्पा आग्यागोळी मान्सतोद्या, 19अदिक कि आव तान माळ्द सप्पा राज्यगोळ से यक्कुल प्रशंशा, हेसुर, अदिक शोभा अन बारा दा नीनी प्रतिष्ठित माळुल, अदिक नी आऊन वचन इन अनुसार तान परमेश्वर यहोवा अन पवित्र प्रजा बन्सकु ईर.”