Holiya Bible
व्यवस्थाविवरण 27
कल्ल मा लिख्सदव आग्यागोळ
बाक इस्राएल इन श्याणा लॉकुर समेत मूसा प्रजा अन लॉकुरी ईद आग्या कोट्टुन, “यास आग्यागोळ ना ईंद नीमी केळ्सतीन आ सप्पा अक मान्सेतीर. अदिक याग यरदन इन आप्पाटी आगकु आ द्याश दा पोहचुसीर, जो नीन परमेश्वर यहोवा नीनी कोळतान, आग धोड्ड धोड्डेव कल्ल निद्रुसेत, अदिक अऊर मा चूना पोत्सेत; अदिक पार आगदुर बाद्दा अऊर मा ई व्यवस्था अन सप्पा वचनगोळी लिखसेत, इदुरसाटी कि जो द्याश नीन पुर्वजगोळ्द परमेश्वर यहोवा तान वचन इन अनुसार नीनी कोळतान, अदिक यदुर दा हाल अदिक शयद इन धारागोळ वाहुसताव, आ द्याश दा नी होग सक्या. बाक याता कल्लगोळ बारा दा ना ईंद आग्या कोट्टीन, अवरी नीव यरदन इन आप्पाटी आगकु एबाल पहाळी मा निद्रुसेतीर, अदिक अऊर मा चूना पोत्सेतीर. अदिक अल्या तान परमेश्वर यहोवा अन साटी कल्लगोळ्द ऊंद वेदी बनुसेत, अऊर मा यातोदु औजार नळ्सबाळेतीर. तान परमेश्वर यहोवा अन वेदी कल्लगोळ्द बनुसकु अदुर मा आऊन साटी होमबलि येर्सेत; अदिक अदा मेलबलि भी येर्सकु भोजन माळेत, अदिक तान परमेश्वर यहोवा अन हात्ती खुशी माळेत. अदिक आ कल्लगोळ मा ई व्यवस्था अन सप्पा वचनगोळी स्पष्ट रीती देल लिख्स बुळेत.”
बाक मूसा अदिक लेवी याजकगोळ सप्पा इस्राएलीगोळ से ईद भी अंदुर, “हे इस्राएल, सुंगा ईतकु केळ; ईंद इन दिशी नी तान परमेश्वर यहोवा अन प्रजा आगेग्या. इदुरसाटी तान परमेश्वर यहोवा अन मात मान्सेत, अदिक आऊन जो जो आग्या अदिक विधि ना ईंद नीनी केळ्सतीन अऊर्द पालन माळेत.”
अभिशाप वचन
बाक अदा दिशी मूसा प्रजा अन लॉकुरी ईद आग्या कोट्टुन, याग नीव यरदन आप्पाटी आगेगी आग शिमोन, लेवी, यहूदा, इस्साकार, यूसुफ, अदिक बिन्यामीन, ईंदुर गरिज्जीम पहाळी मा निदुरकु आशीर्वाद केळसुल. अदिक रूबेन, गाद, आशेर, जबूलून, दान, अदिक नप्ताली, ईंदुर एबाल पहाळी मा निदुरकु शराप केळसुल. आग लेवी लॉकुर सप्पा इस्राएली मंळसागोळ से कारूकु अनुल :
श्रापित आगुल आ मंळसा जो यावारा मूर्ति कारीगर देल अगुळ्द या ढालस्द निराला जागा मा स्थापना माळुल, यतिकी इदुर देल यहोवा घृणा माळतान. आग सप्पा लॉकुर अनुल, “आमीन.”
श्रापित आगुल आव जो तान आप्प या मोय इक तुच्छ जानसुल. आग सप्पा लॉकुर अनुल, “आमीन.”
श्रापित आगुल आव जो यावारा दुसरा अन सीमा अक हटुसुल. आग सप्पा लॉकुर अनुल, “आमीन.”
श्रापित आगुल आव जो कुढ्ढ मंळसा अक हादी देल भटकुस बुळुल. आग सप्पा लॉकुर अनुल, “आमीन.”
श्रापित आगुल आव जो परदेशी, अनाथ, या रांड्या आर्त इन न्याय बिगळुसुल. आग सप्पा लॉकुर अनुल, “आमीन.”
श्रापित आगुल आव जो तान सौतेला मोय से कुकर्म माळुल, यतिकी आव तान आप्प उन होद्दोद तेरूतान. आग सप्पा लॉकुर अनुल, “आमीन.”
श्रापितआगुल आव जो यातारा प्रकार इन जनावर से कुकर्म माळुल. आग सप्पा लॉकुर अनुल, “आमीन.”
श्रापितआगुल आव जो तान आकतींग, चाहे सगा ईरूल चाहे सौतेला, से कुकर्म माळुल. आग सप्पा लॉकुर अनुल, “आमीन.”
श्रापित आगुल आव जो तान आत्ता अन सांगुळ कुकर्म माळुल. आग सप्पा लॉकुर अनुल, “आमीन.”
श्रापित आगुल आव जो यारीकारा होचकु कोनुल. आग सप्पा लॉकुर अनुल, “आमीन.”
श्रापित आगुल आव जो निर्दोष मंळसा अन कोन्नोर साटी धन ताकोमुल. आग सप्पा लॉकुर अनुल, “आमीन.”
श्रापित आगुल आव जो ई व्यवस्था अन वचनगोळी मान्सकु पुरा माळालुन. आग सप्पा लॉकुर अनुल, “आमीन.”
Holiya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.