व्यवस्थाविवरण 28

आग्या पालन इन आशीषगोळ

(लैव्यव्यवस्था 26:3-13; व्यवस्थाविवरण 7:12-24)

1“अगर नी तान परमेश्वर यहोवा अन सप्पा आग्यागोळ, जो ना ईंद नीनी केळ्सतीन, चौकसी देल पुरा माळली चित्त हचकु आऊन केळ्या, रा आव नीनी धरती इन सप्पा राज्यगोळ दा श्रेष्ट माळ्यान. 2बाक तान परमेश्वर यहोवा अन केळदुर कारण ई सप्पा आशीर्वाद नीन मा पुरा आदव. 3धन्य आग नी नगर दा, धन्य आग नी केई दा. 4धन्य आगुल नीन औलाद, अदिक नीन जमीन इन उपज, अदिक गोसी अदिक भेड़-मर्री मात्त जनावरगोळव पाड्डगोळ. 5धन्य आगुल नीन फुट्टी अदिक नीन परात. 6धन्य आग नी बुळ्क बरा घनी, अदिक धन्य आग नी व्हार्या होगा होती.

7“यहोवा हींग माळ्यान कि नीन दुश्मन जो नीन मा चळाई माळ्यार आंदुर नीन से हारूसेदार; आंदुर ऊंद हादी देल नीन मा चळाई माळ्यार, लेकीन नीन मुंदु टु येळ हादी देल आग्त ओळेदार. 8नीन केईगोळ मा अदिक यास क्याल्सागोळ दा नी कय हच्या आ सप्पा मा यहोवा आशीष कोट्टान; इदुरसाटी जो द्याश नीन परमेश्वर यहोवा नीनी कोळतान अदुर दा आव नीनी आशीष कोट्टान. 9अगर नी तान परमेश्वर यहोवा अन आग्यागोळी मान्सतेला आऊन हादीगोळ मा नळद्या, रा आव तान किर्या अन अनुसार नीनी तान पवित्र प्रजा माळकु स्थिर ईट्यान. 10अदिक धरती इन द्याश द्याश इन लॉकुर ईद नोळकु, कि नी यहोवा नव अंदकु आगत्या, नीन से अंजेदार. 11अदिक याता द्याश इन बारा दा यहोवा नीन पुर्वजगोळ से किर्या तिनकु नीनी कोळली अंदीदुन, अदुर दा आव नीन औलाद उन, अदिक जमीन इन उपज इन, अदिक जनावरगोळ्द बळती माळकु नीन भलाई माळ्यान. 12यहोवा नीन साटी तान आकाशरूपी उत्तम भण्डार इक तेरूकु नीन जमीन मा समय मा मेह बरसुस तोदान, अदिक नीन सप्पा क्याल्सागोळ मा आशीष कोट्टान, अदिक नी हापाळ सारा जातीगोळी उधार कोट्या, लेकीन यारदारा से नीनी उधार ताकोमोद बिळतीदील. 13अदिक यहोवा नीनी पुछी ईला, लेकीन ताल्ला अच ठहरूस्यान, अदिक नी ल्यालमा ईला, लेकीन म्याकुच अच ईत्या; अगर परमेश्वर यहोवा अन आग्यागोळ जो ना ईंद नीनी केळ्सतीन, नी अऊर्द मान्सदुर दा मन हचकु चौकसी माळ्या; 14अदिक याता वचनगोळ्द ना ईंद नीनी आग्या कोळतीन अऊर दा टु यारदारा से डाक्या या ऊजवा तिर्गकु दुसरा द्यावगोळ्द हींद आगाल, अदिक ना अऊर्द‍ स्यावा माळ्या.

आग्या-उल्लंघन इन दुष्परिणाम

(लैव्यव्यवस्था 26:14-46)

15“लेकीन अगर नी तान परमेश्वर यहोवा अन मात केळतीदील, अदिक आऊन सप्पा आग्यागोळ अदिक विधीगोळ्द पाल्सदुर दा जो ना ईंद केळ्सतीन चौकसी माळतीदील, रा ई सप्पा शराप नीन मा बंदकु बिद्दाव. 16मतलब श्रापित आग नी नगर दा, शापित आग नी केई दा. 17श्रापित आगुल नीन फुट्टी अदिक नीन परात. 18श्रापित आगुल नीन औलाद, अदिक जमीन इन उपज, अदिक गोसीगोळ अदिक भेड़-मर्रीगोळ्द पाड्डगोळ. 19श्रापित आग नी बुळ्क बरा घनी, अदिक शापित आग नी व्हार्या होगा घनी.

20“बाक याता याता क्याल्सा अक नी कय हच्या, अदुर दा यहोवा आगासताका नीनी शराप कोळुल, अदिक उलझन दा हाकुल, अदिक दनकुसतेला ईरूल, यागास ताका नी मिटुसेगाल, अदिक राटनेरी नष्ट आगेगुल; ईद ई कारण आदीत कि नी यहोवा अक त्याग्सकु दुष्ट क्याल्सा माळ्या. 21अदिक यहोवा हींग माळ्यान कि मरी नीन दा फैलुसकु आ समय ताका हतकु ईरूल, यागास ताका याता जमीन इन अधिकारी आगोर साटी नी होगेत्या अदुर मा टु नीन अन्त आगेगाल. 22यहोवा नीनी क्षयरोग देल, अदिक मय, अदिक सुजन, अदिक धोळ्द जलन देल, अदिक तलवार, अदिक झुलस, अदिक फोफुंडी देल बळदान; अदिक ई आ समय ताक नीन पीछा माळ्याव, यागास ताका नीन सत्यानाश आगेगाल. 23अदिक नीन ताल्ला अन म्याकुच आकाश पीतळा अन, अदिक नीन काल दिशी जमीन लॉहा अन आगेदीत. 24यहोवा नीन द्याश दा नीर इन बदला रेतु अदिक धूरा बरसुस्यान; अव आकाश टु नीन मा ईल ताका बरसुस्याव कि नीन सत्यानाश आगेदीत.

25“यहोवा नीनी दुश्मनगोळ से हारूस्यान; अदिक नी ऊंद हादी देल आंदुर सामना माळली होद्या, लेकीन येळ हादी देल आगकु आंदुर मुंदु टु ओळेद्या; अदिक धरती इन सप्पा राज्यगोळ दा मारा मारा टेटाळ्या. 26अदिक नीन लाश आकाश इन अलग अलग प्रकार इन पक्षीगोळ, अदिक धरती इन जनावरगोळ्द आहार आदीत; अदिक अवरी याऊ तुकाळसावाळा ईरतीदील. 27यहोवा नीनी मिस्र घाई फॉळागोळ, अदिक मुरयाद, अदिक दाद, अदिक खुजली देल हींग पीड़ित माळ्यान, कि नी चंगा आग सकतीदील. 28यहोवा नीनी येर्र अदिक कुढ्ढ माळ बुट्टान, अदिक नीन मन इक हापाळ घबरूस बुट्टान: 29अदिक ह्यांग कुढ्ढ अंधार दा ढुंढाळा माळतान हांग अच नी हाट्टा हागुल कुढ्ढ घाई ढुंढाळा माळ्त ओयाळ्या, अदिक नीन क्याल्सा-कळी सफल आगतीदील; अदिक नी हमेशा सिर्फ अंधार सहुस्त अदिक लुटुसतेला अच ईत्या, अदिक नीन यावारा बिळसावाळा ईरतीदील. 30नी आर्त इन से मदा अन मात हच्या, लेकीन दुसरा मंळसा आकी भ्रष्ट माळ्यान; मान्ना नी बनुस्या, लेकीन अदुर दा बसुस सकतीदील; अंगुर इन बेली नी हच्या, लेकीन अदुर काय तिन सकतीदील. 31नीन वस्ता नीन कण्ण इन मुंद कोंदकु आदीत, अदिक नी अदुर्द मास तिन सकतीदील; नीन गदा नीन कण्ण इन मुंद लूट दा होटोदीत, अदिक नीनी बाक सिकतीदील; नीन भेड़ मर्रीगोळ नीन दुश्मनगोळ कय दा हत्तेदाव, अदिक नीन दी टु अऊर्द याऊ बिळसावाळा ईरतीदील. 32नीन पार-पोरगोळ दुसरा द्याश इन लॉकुर कय दा हत्तेदार, अदिक आंदुर साटी चाव देल नोळ्त-नोळ्त नीन कण्णगोळ ईतोदाव; अदिक नीन येनु बस नळुतीदील. 33नीन जमीन इन उपज अदिक नीन सप्पा कमाई ऊंद पराया द्याश इन लॉकुर तिन बुट्टार; अदिक हमेशा नी सिर्फ अंधार सयन माळ्त अदिक आरूकु होग्त ईत्या; 34ईल ताका कि नी आ मातगोळ कारण जो तान कण्णगोळ देल नोळ्या येर्र आगेद्या. 35यहोवा नीन टॉगरागोळ दा अदिक टांगगोळ दा, उलटा नख टु ताल्ला ताका भी असाध्य फॉळागोळ तेगुकु नीनी पीड़ित माळ्यान.

36“यहोवा नीनी आ राजा समेत, यारी नी तान म्याकुच ठहरूस्या, नीन अदिक नीन पुर्वजगोळ साटी पराया ऊंद राज्य अन बीच पोहचुस्यान; अदिक आंदुर बीच दा ईतकु नी काठ अदिक कल्ल इन दुसरा द्यावगोळ्द उपासना अदिक पूजा माळ्या. 37अदिक आ सप्पा राज्यगोळ दा यार बीच दा यहोवा नीनी पोहचुस्यान, अलेर लॉकुर साटी नी चकित आगोद, अदिक दृष्टान्त अदिक मज्याक इन कारण बन्सेद्या. 38नी केई दा बींजा रा च्याच सा ओत्या, लेकीन उपज थ्वाळासा अच आंद्या; यतिकी हत्तीफाफा अदरी तिन बुट्टाव. 39नी अंगुर इन बेलीगोळ हचकु अऊर दा क्याल्सा रा माळ्या, लेकीन अऊर अंगुर इन रास्सा कुडु सकतीदील, उलटा काय भी मुरू सकतीदील; यतिकी कीळागोळ अवरी तिन बुट्टाव. 40नीन पुरा द्याश दा जैतुन इन मार्र रा ईत्ताव, लेकीन अऊर याण्णा नी तान मय इक हच सकतीदील; यतिकी अव झळ्सेदाव. 41नीन पार-पोरगोळ रा पैदा आदार, लेकीन नीनोर ईरतीदील; यतिकी आंदुर हुळसुसकु नीन हात्ती टु दुर होटोदार. 42नीन सप्पा मार्रगोळ अदिक नीन जमीन उन उपज हत्तीफाफा तिन बुट्टाव. 43जो परदेशी नीन बीच दा ईत्तान आव नीन से वाळुसतेला होदान; अदिक नी खुद घटुसतेला होटोद्या. 44आव नीनी उधार कोट्टान, लेकीन नी आऊक उधार कोळ सकतीदील; आव रा ताल्ला अदिक नी पुछी ठहरूस्या. 45नी जो तान परमेश्वर यहोवा अन कोळ्द आग्यागोळ अदिक विधीगोळ्द मान्सली आऊन केळतीदील, ई कारण ई सप्पा शराप नीन मा बंदकु बिद्दाव, अदिक नीन हींद बिदकु ईत्ताव, अदिक नीनी हुळदाव, अदिक आखरी दा नी नष्ट आगेद्या. 46अदिक अव नीन मा अदिक नीन वंश मा हमेशा अन साटी बन्सकु चिन्ह अदिक चमत्कार ठहरूस्याव.

47“नी जो सप्पा पदार्थ अन बहुतायत ईत्तुर मा भी खुशी अदिक प्रसन्नता अन सांगुळ तान परमेश्वर यहोवा अन स्यावा माळतीदील, 48ई कारण नीनी हस्तकु, निरळ्कु, ऊगळा, अदिक सप्पा पदार्थ बिना ईतकु तान आ दुश्मनगोळ्द स्यावा माळोद बिद्दीत यारी यहोवा नीन खिलाप कळ्यान; अदिक यागास ताका नी नष्ट आगेगाल आव नीन म्याड्या मा लॉहा अन जूआळी हाक्कु ईत्तान. 49यहोवा नीन खिलाप दुर टु, उलटा धरती इन ऊंद क्वाना मा टु वेग देल उळुसावाळा गीधाळ इन घाई ऊंद राज्य अक येर्स बुट्टान यार्द भाषा नीनी ऊम्सतीदील; 50आ राज्य अन लॉकुर व्यवहार क्रुर ईत्तीत, आंदुर ना रा हाळाबाट्टुर्द मार्र नोळकु आदर माळ्यार, अदिक ना चिकोर मा दया माळ्यार; 51अदिक आंदुर नीन जनावरगोळ्द पाड्डगोळ अदिक जमीन इन उपज ईल ताका तिंदार कि नी नष्ट आगेद्या; अदिक आंदुर नीन साटी ना अनाज, अदिक ना व्हाशोद अंगुर इन रास्सा, अदिक ना जैतुन इन याण्णा, अदिक ना पाड्डा, ना मेम्ना बिट्टार, ईल ताका कि नी नष्ट आगेद्या. 52अदिक आंदुर नीन परमेश्वर यहोवा अन कोळ्द पुरा द्याश इन सप्पा फाटकगोळ्द बुळ्क नीनी घेर्सकु ईट्यार; आंदुर नीन सप्पा फाटकगोळ्द बुळ्क नीनी आ समय ताका घेर्सकु ईट्यार, यागास ताका नीन पुरा द्याश दा नीन ऊचा-ऊचा अदिक मजबूत शहरपनाहगोळ यऊर मा नी भरोसा माळ्या बिदोगालव. 53आग घेर्सकु आगोद अदिक आ संकट इन समय यदुर दा नीन दुश्मन नीनी हाक्यार, नी तान निज हाळ्द पार-पोरगोळ मास यारी नीन परमेश्वर यहोवा नीनी कोट्टान तिंद्या. 54अदिक नीन दा जो मंळसा कोमल अदिक अति सुकुमार आन आव भी तान वार्ट, अदिक तान प्राणप्रिय अदिक तान मिग्द चिकोरगोळी क्रुर नजर देल नोळ्यान; 55अदिक आव आंदुर दा टु यारीकारा भी तान चिकोर मास दा टु जो आव खुद तिंदान येनु कोळतीदील, यतिकी घेर्सकु आगोद अदिक आ संकट दा, यदुर दा नीन दुश्मन सप्पा फाटकगोळ्द बुळ्क नीनी घेर्स बुट्टार, आऊन हात्ती येनु ईरतीदील. 56अदिक नीन दा जो आर्त ईल ताका कोमल अदिक सुकुमार आर कि सुकुमारपन अदिक कोमलता अन मारा देल जमीन मा काल ईटतेला भी अंजतार, आक भी तान प्राणप्रिय गांड्ड, अदिक पार, अदिक पोर इक, 57तान हाळ्द चिकोरी भी क्रुर नजर देल नोळ्यार, यतिकी घेर्सकु आगोद अदिक आ संकट इन समय यदुर दा नीन दुश्मन नीनी नीन फाटकगोळ्द बुळ्क घेर्सकु ईट्यार, आक सप्पा वस्तुगोळ्द कमी इन मारा देल अवरी होचकु तिंदार.

58“अगर नी ई व्यवस्था अन सप्पा वचनगोळ्द पालन माळदुर दा, जो ई किताब दा लिख्सकु आव, चौकसी माळकु आ आदरणीय अदिक भय योग्य हेसुर इन, जो यहोवा नीन परमेश्वर उन हुन अंज्क मानसाल, 59रा यहोवा नीनी अदिक नीन वंश इक अनोखा-अनोखा महामारी कोट्टान, अव दुष्ट अदिक हापाळ दिन ईरावाळा रोग अदिक भारी-भारी महामारी ईत्ताव. 60अदिक आव मिस्र अन आ सप्पा रोगगोळी मात्त नीन म्याकुच हच बुट्टान, यऊर देल नी अंज्क तुमतोग्या; अदिक अव नीन मा हतकु ईत्ताव. 61अदिक यास रोग आदि दण्ड ई व्यवस्था अन किताब दा लिख्सकु हैलेच, अव सप्पा अक भी यहोवा नीनी ईल ताका हच बुट्टान, कि नीन सत्यानाश आगेदीत. 62अदिक नी जो तान परमेश्वर यहोवा अन मान्सतीदील, ई कारण आकाश इन तारागोळ घाई अनगिनत आगदुर बदला नीन दा थ्वाळासा अच मंळसा मिक्कु ईतोदार. 63अदिक ह्यांग ईग यहोवा अक नीम भलाई अदिक बळती माळदुर देल खुशी आगतद, हांग अच आग आऊक नीम नाश उलटा सत्यानाश माळदुर देल खुशी आदीत; अदिक याता जमीन इन अधिकारी आगली नीव होगदुर मा आईर अदुर मा टु नीव कितकु आदीर. 64अदिक यहोवा नीनी धरती इन ई क्वाना टु हुडुकु आ क्वाना ताका अन सप्पा द्याश इन लॉकुर दा तितर बितर माळ्यान; अदिक अल ईतकु नी तान अदिक तान पुर्वजगोळ साटी अनजान काठ अदिक कल्ल इन दुसरा द्यावगोळ्द उपासना माळ्या. 65अदिक आ राज्यगोळ दा नी यागलु चैन देल ईला ईत्या, अदिक ना नीन कालगोळी ठिकाना सिक्कीत, यतिकी अल यहोवा हींग माळ्यान कि नीन दिल नळ्गतेला ईत्तीत, अदिक नीन कण्णगोळ धुंधरा बिदोदाव, अदिक नीन मन व्याकुल ईत्तीत; 66अदिक नीनी जिन्दगी तिम नित्य सन्देह ईत्तीत; अदिक नी ईळ्लक हागुल नळ्गतेला ईत्या, अदिक नीन जिन्दगी इन येनारा भरोसा ईरतीदील. 67नीन मन दा जो अंज्क बन्सकु ईत्तीत, अदिक नीन कण्णगोळी जो येनारा कांळ्सतेला ईत्तीत, अदुर कारण नी व्हातर्या अक कन्नासकु अंद्या, ‘द्‍याव याग मुळकीत!’ अदिक द्यावमुळका कन्नासकु अंद्या, ‘व्हातुर याग आदीत!’ 68अदिक यहोवा नीनी जहाजगोळ मा येर्सकु मिस्र दा आ हादी देल वापस माळ्यान, यदुर बारा दा ना नीन से अंदीदीन, कि अद मात्त नीन नोळदुर दा बरतीदील; अदिक अल नीव तान दुश्मनगोळ कय दास-दासीगितेर आगोर साटी बिकाऊ रा ईत्तीर, लेकीन नीम याऊ ग्राहक ईरतीदील.”