व्यवस्थाविवरण 29

मोआब द्याश दा परमेश्वर उन वाचा

1इस्राएलीगोळ से जो वाचा कटोद आग्या यहोवा मूसा अक मोआब द्याश दा कोट्टुन आऊन नव ईवा वचन हुव, अदिक जो वाचा आव आंदुर से होरेब पहाळी मा कटीदुन ईद अदुर से अलग आद.

2बाक मूसा सप्पा इस्राएलीगोळी कारूकु अंदुन, “जो येनारा यहोवा मिस्र द्याश दा नीम नोळ्त फिरोन अदिक आऊन सप्पा कर्मचारीगोळ, अदिक आऊन पुरा द्याश से माळदुन अद नीव नोळीर; 3अव धोळ धोळ परीक्षागोळ, अदिक चिन्ह, अदिक धोळ धोळ चमत्कार नीन कण्णगोळ मुंद आदव; 4लेकीन यहोवा ईंद ताका नीमी ना रा समसोद मन, अदिक ना नोळव कण्णगोळ, अदिक ना केळव कीवगोळ कोटान. 5ना रा नीमी आळी दा च्यालीस साल हुडुकु टेटाळदीन; अदिक ना नीम मय मा कपळा हाळव आदव, अदिक ना नीन जुतागोळ नीन कालगोळ दा हाळव आदव; 6रोट्टी जो नीव तिन सकीदील, अदिक अंगुर इन रास्सा अदिक सार्रा जो नीव कुडु सकीदील, अद इदुरसाटी आत कि नीव जान्सी कि ना यहोवा नीम परमेश्वर हुईन. 7अदिक याग नीव ई जागा मा बंदीर, आग हेशबोन इन राजा सीहोन अदिक बाशान इन राजा ओग, ई येढ्ढु युद्ध इन साटी नाम सामना माळली होटकु बंदुर, अदिक नाव आंदुर मा जीत हासिल माळकु आंदुर द्याश ताकोम कोंडेव; 8अदिक रूबेनिगोळ, गादीगोळ, अदिक मनश्शे अन आर्धा कुल अन लॉकुरी निज भाग माळकु कोट्टेव. 9इदुरसाटी ई वाचा अन मातगोळ्द पालन माळी, ताकी जो येनारा माळीर अद सफल आगुल.”

10“ईंद येन श्याणा लॉकुर, नीम मुख्य मुख्य मंळसा, येन अधिकारी, येन कुल कुल नोर नीम सप्पा इस्राएली मंळसा, 11येन नीम चिकोर चिणगेर अदिक आर्तेर, येन लकड़ हारागोळ, येन पानभर्यागळ, येन नीन छावनी दा ईरावाळेर परदेशी, नीव सप्पा च्या सप्पा तान परमेश्वर यहोवा अन मुंद इदुरसाटी निद्रीर, 12कि जो वाचा नीन परमेश्वर यहोवा ईंद नीन से कटतान, अदिक जो किर्‍या आव ईंद नीनी तिन्सतान, अदुर दा नी साझी आगेग; 13इदुरसाटी कि आ वचन इन अनुसार जो आव नीनी कोट्टुन, अदिक आ किर्या अन अनुसार जो आव अब्राहम, इसहाक, अदिक याकूब, नीन पुर्वजगोळ से तिंदीदुन, आव ईंद नीनी तान प्रजा ठहरूसुल, अदिक खुद नीन परमेश्वर ठहरूसुल. 14बाक ना ई वाचा अदिक ई किर्‍या दा सिर्फ नीमी ईला, 15लेकीन आंदरी भी, जो ईंद नाम सांगुळ ईल नाम परमेश्वर यहोवा अन मुंद निदुरकु आर, अदिक जो ईंद ईल नाम सांगुळ हैलेच, साझी माळतीन. 16नीव जान्सतीर कि याग नाव मिस्र द्याश दा ईरतोगेव, अदिक याग हादी दाकळव राज्यगोळ्द बीचो बीच आगकु बरेव, 17आग नीव आंदुर ह्यांग ह्यांग घिनोना वस्तुगोळ, अदिक काठ, कल्ल, बेळ्ली, व्हान्ना अन ह्यांग मुर्तिगोळ नोळदीर. 18इदुरसाटी हींग आगबाळुल, कि नीम लॉकुर दा हींग यावारा मंळसा, या आर्त, या कुल, या गोत्र अन लॉकुर ईरूल यार्द मन ईंद नाम परमेश्वर यहोवा से तिर्गेगुल, अदिक आंदुर होगकु आ राज्यगोळ्द द्यावगोळ्द उपासना माळुल; बाक हींग आगबाळुल कि नीम बीच दा ईत्ता यातारा जड़ ईरूल, यदुर देल जयर या केय बींजा उगुसीदाद, 19अदिक हींग मंळसा ई किर्‍या इन वचन केळकु तान इक आशीर्वाद इन योग्य मान्सुल, अदिक ईद विचार माळकु कि चाहे ना तान मन इन जिद्द मा नळाईन, अदिक तृप्त आगकु निरळ्क इक मिटुस बुळाईन, तरी भी नान कुशल आदीत. 20यहोवा आऊन पाप माफ माळतीदील, उलटा यहोवा अन कोप अदिक जलन इन धुंगा आऊक मुच्‍च बुट्टीत, अदिक यास शराप ई किताब दा लिख्सकु आव अव सप्पा आऊन मा बंदकु बिद्दाव, अदिक यहोवा आऊन हेसुर धरती मा टु मिटुस बुट्टान. 21अदिक व्यवस्था अन ई किताब दा याता वाचा अन चर्चा आद अदुर सप्पा शराप इन अनुसार यहोवा आऊक इस्राएल इन सप्पा कुलगोळ दा टु हानि इन साटी ब्यार्र माळ्यान. 22अदिक बरावाळा पीढ़ीगोळ दा नीम वंश इन लॉकुर जो नीम बाद्दा पैदा आदार, अदिक परदेशी मंळसा भी जो दुर द्याश टु बंदार, आंदुर आ द्याश इन परेशानीगोळ अदिक अदुर दा यहोवा अन फैलुस्द रोग नोळकु, 23अदिक ईद भी नोळकु कि इदुर सप्पा जमीन गन्धक अदिक लोन देल तुम्मेग्याद, अदिक ईल ताका होत्तेग्याद कि इदुर दा ना येनारा बोऊसकु आग सकतद, अदिक ना येनारा जमा माळकु आग सकतद, अदिक ना काड्डा बेळु सकतद, उलटा सदोम अदिक अमोरा, अदमा अदिक सबोयीम इन घाई आगेग्याद यवरी यहोवा तान कोप अदिक जलजलाहट दा उलटुस बुटीदुन; 24अदिक सप्पा राज्य नोर लॉकुर केळ्यार, ‘यहोवा ई द्याश से हींग येती माळदुन? अदिक ई धोळ कोप इन भळकुसोद येन कारण आद?’ 25आग लॉकुर ईद उत्तर कोट्टार, ‘आंदुर पुर्वजगोळ्द परमेश्वर यहोवा जो वाचा आंदुर सांगुळ मिस्र द्याश टु तेगा होती कटीदुन अदरी आंदुर मुरदार, 26अदिक दुसरा द्यावगोळ्द उपासना माळ्यार यारी आंदुर पयले ईला जान्सोर, यहोवा आंदरी ईला कोटीदुन; 27इदुरसाटी यहोवा अन कोप ई द्याश मा भळकुसकु येदाद, कि किताब दा लिख्सद् सप्पा शराप ईदुर मा बंदकु बिद्दव; 28अदिक यहोवा कोप, अदिक जलजलाहट, अदिक हापाळ अच सिट्ट माळकु अवरी आंदुर द्याश दा टु कीतकु दुसरा द्याश दा भिट बुट्टुन, ह्यांग कि ईंद प्रगट आद.’”

29“गुप्त मातगोळ नाम परमेश्वर यहोवा अन वश दा आव; लेकीन जो प्रगट माळकु आग्याव अव हमेशा साटी नाम अदिक नाम वंश इन वश दा ईत्ताव, इदुरसाटी कि ई व्यवस्था अन सप्पा मातगोळ पुरा माळकु आगुल.”