व्यवस्थाविवरण 30

आशीष अदिक पुनस्थापना नव शर्तगोळ

1“बाक याग आशीष अदिक शराप इन ई सप्पा मातगोळ जो ना नीनी अंदकु केळसुसीन नीन मा बितुसुल, अदिक नी आ सप्पा राज्यगोळ्द बीच दा ईतकु, यल नीन परमेश्वर यहोवा नीनी बरबस पोहचुस्यान, ई मातगोळी याद माळ्या, 2अदिक तान औलाद सहित तान पुरा मन अदिक पुरा जीवा देल तान परमेश्वर यहोवा अन दी तिर्गकु आऊन हात्ती बरूल, अदिक ई सप्पा आग्यागोळ अनुसार जो ना ईंद नीनी केळ्सतीन अदुर मात मानसुल; 3आग नीन परमेश्वर यहोवा नीनी बंधुवाई देल वापस तंदान, अदिक नीन मा दया माळकु आ सप्पा द्याशगोळ लॉकुर दा यार बीच दा आव नीनी तितर बितर माळ बुट्टान मात्त जमा माळ्यान. 4चाहे धरती इन क्वाना ताका नीन बरबस पोहचुस्कु आगुल, तरी भी नीन परमेश्वर यहोवा नीनी अल टु तंदकु जमा माळ्यान. 5अदिक नीन परमेश्वर यहोवा नीनी अदा द्याश दा पोहचुस्यान यदुर्द नीन पुर्वजगोळ अधिकारी आगीदुर, अदिक नी मात्त अदुर्द अधिकारी आद्या; अदिक आव नीन भलाई माळ्यान, अदिक नीनी नीन पुर्वजगोळ से भी गिनती दा यक्कुल माळ्यान. 6अदिक नीन परमेश्वर यहोवा नीन अदिक नीन वंश इन मन इन खतना माळ्यान, कि नी तान परमेश्वर यहोवा से तान पुरा मन अदिक पुरा जीवा अन सांगुळ प्यार ईट्या, यदुर देल नी जित्ता ईत्या. 7अदिक नीन परमेश्वर यहोवा ई सप्पा शराप इन मातगोळ नीन दुश्मनगोळ मा जो नीन से दुश्मनी माळकु नीन हींद बिद्दार कळ्यान. 8अदिक नी तिर्ग्या अदिक यहोवा अन केळ्या, अदिक ई सप्पा आग्यागोळी मानस्या जो ना ईंद नीनी केळ्सतीन. 9अदिक यहोवा नीन भलाई इन साटी नीन सप्पा क्याल्सागोळ दा, अदिक नीन औलाद, अदिक जनावरगोळ्द पाड्डगोळ, अदिक जमीन इन उपज दा नीन बड़ती माळ्यान; यतिकी यहोवा मात्त नीन म्याकुच भलाई इन साटी हांग अच आनन्द माळ्यान, ह्यांग आव नीन पुर्वजगोळ म्याकुच माळीदुन; 10यतिकी नी तान परमेश्वर यहोवा अन केळकु आऊन आग्यागोळ अदिक विधिगोळी जो ई व्यवस्था अन किताब दा लिख्सकु आव मान्सतोद्या, अदिक तान परमेश्वर यहोवा दी तान पुरा मन अदिक पुरा जीवा देल मन तिर्गुस्या.”

11“नोळी, ईद जो आग्या ना ईंद नीनी केळ्सतीन, अद ना रा नीन साटी येक्कुल कठिन आद, अदिक ना दुर आद. 12अदिक ना रा ईद आकाश दा आद कि नी अंद्या, ‘याव नाम साटी आकाश दा येरकु अदरी नाम हात्ती तंदान, अदिक नामी केळसुल कि नाव अदरी मान्सेव?’ 13अदिक ना ईद समुद्र आप्पाटी आद कि नी अंद्या, ‘याव नाम साटी समुद्र आप्पाटी होदान, अदिक अदरी नाम हात्ती तंदान, अदिक नामी केळसुल कि नाव अदरी मान्सेव?’ 14लेकीन ईद वचन नीन हापाळ हात्ती, उलटा नीन बाय दा अदिक मन दा अच आद, ताकी नी इदुर मा नळद्या.”

15“केळ, ईंद ना नीनी जीवन अदिक मरण, नुकसान अदिक फायदा तोर्सीन. 16यतिकी ना ईंद नीनी आग्या कोळतीन, कि तान परमेश्वर यहोवा से प्यार ईटेत, अदिक आऊन हादीगोळ मा नळेत, अदिक आऊन आग्यागोळ, विधिगोळ, अदिक नियमगोळ्द पालन माळेत, यदुर देल नी जीत्ता ईर, अदिक वाळुस्त होग, अदिक नीन परमेश्वर यहोवा आ द्याश दा यदुर अधिकारी आगली नी होगेत्या, नीनी आशीष कोळुल. 17लेकीन अगर नीन मन भटकुसेगुल, अदिक नी केळाल, अदिक भटकुसकु दुसरा द्यावगोळी दण्डवत माळ्या अदिक अऊर्द उपासना माळली हत्या, 18रा ना नीमी ईंद ईद चेतावनी कोट बुळतीन कि नीव नि:सन्देह नष्ट आगेदीर; अदिक याता द्याश इन अधिकार माळली नी यरदन आप्पाटी होगेत्या, आ द्याश दा नीव हापाळ दिनगोळ साटी ईर सकतीदील. 19ना ईंद आकाश अदिक धरती येढ्ढु उक नीम मुंद ई मात इन साक्षी बनुसतीन, कि ना जीवन अदिक मरण, आशीष अदिक शराप इक नीम मुंद ईटीन; इदुरसाटी नी जीवन इका अपनुस बुळ, कि नी अदिक नीन वंश येढ्ढु जीत्ता ईरूल; 20इदुरसाटी तान परमेश्वर यहोवा से प्यार ईटी, अदिक आऊन मात मान्सी, अदिक आऊन से चिपकुसकु ईरी; यतिकी नीन जीवन अदिक दीर्घ जीवन ईवा हुन, अदिक हींग माळदुर देल याता द्याश इक यहोवा अब्राहम, इसहाक, अदिक याकूब, नीन पुर्वजगोळी कोळोद किर्या तिंदीदुन आ द्याश दा नी बसुसकु ईत्या.”