व्यवस्थाविवरण 31

मूसा अन उत्तराधिकारी

1मूसा होगकु ई मातगोळ सप्पा इस्राएलीगोळी केळ्सदुन. 2अदिक आव आंदुर से ईद भी अंदुन, “ईंद ना ऊंद सौ ईप्पत साल इनव आईन; अदिक ईग ना नळु अदिक वयाळ सकालीन; यतिकी यहोवा नान से अंदान, कि नी ई यरदन आप्पाटी होग सकतीदील. 3नीन मुंद आप्पाटी होगावाळा परमेश्वर यहोवा अच हुन; आव आ राज्यगोळी नीन मुंदु टु नष्ट माळ्यान, अदिक नी आंदुर द्याश इन अधिकारी आद्या; अदिक यहोवा अन वचन इन अनुसार यहोशू नीन मुंद मुंद आप्पाटी होदान. 4अदिक याता प्रकार यहोवा एमोरिगोळ्द राजा सीहोन अदिक ओग अदिक आंदुर द्याश इक नष्ट माळ्यान, अदा प्रकार आव आ सप्पा राज्यगोळ से भी माळ्यान. 5अदिक याग यहोवा आंदरी नीम से हारूस बुट्टान, आग नीव आ सप्पा आग्यागोळ अनुसार आंदुर से माळेतीर जो ना नीमी केळसीन. 6नी हिम्मत कट अदिक मजबूत आग, आंदुर से अंजबाळ अदिक भयभीत आगबाळ; यतिकी नीन सांगुळ नळावाळा नीन परमेश्वर यहोवा आन; आव नीनी धॉका कोळतीदील अदिक ना बिट्टान.”

7आग मूसा यहोशू उक कारूकु सप्पा इस्राएलीगोळ्द हात्ती अंदुन, “नी हिम्मत कट अदिक मजबूत आगेग; यतिकी ई लॉकुर सांगुळ आ द्याश दा यदरी यहोवा ईंदुर पुर्वजगोळ से किर्या तिनकु कोळली अंदीदुन नी होद्या; अदिक नी ईंदरी अदुर अधिकारी माळ बुट्या. 8अदिक नीन मुंद मुंद नळावाळा यहोवा आन; अदिक आव नीन सांगुळ ईत्तान, अदिक ना रा नीनी ध्वाका कोट्टान अदिक ना बिट बुट्टान; इदुरसाटी अंजबाळ अदिक नीन मन कच्चा आगबाळुल.”

हर सातवा साल व्यवस्था अन वाचुसकु आगोद

9बाक मूसा ईदा व्यवस्था लिख्सकु लेवी याजकगोळी, जो यहोवा अन वाचा अन सन्दुक नेगावाळेर ईरोर, अदिक इस्राएल इन सप्पा श्याणा लॉकुरी सोप्स बुट्टुन. 10आग मूसा आंदरी आग्या कोट्टुन, येळ येळ साल इन बितुसदुर मा, मतलब छुटकारा अन साल दा झोपळीवाळा हाब्ब मा, 11याग सप्पा इस्राएली नीन परमेश्वर यहोवा अन आ जागा मा यदरी आव निवळुस बुट्टान बंदकु जमा आगुल, आग ईद व्यवस्था सप्पा इस्राएलीगोळी वाचुसकु केळसेत. 12येन मंळसा, येन आर्तेर, येन चिकोर, येन नीम फाटक इन बुळ्क इन परदेशी, सप्पा लॉकुरी जमा माळेत कि आंदुर केळकु कलुल, अदिक नीम परमेश्वर यहोवा अन अंज्क मान्सकु, ई व्यवस्था अन सप्पा वचनगोळ्द पालन माळदुर दा चौकसी माळुल, 13अदिक आंदुर चिकोर यार ई मातगोळ केळीदील आंदुर भी केळकु कलुल, कि नीम परमेश्वर यहोवा अन अंज्क आ समय ताका मान्सतेला ईरूल, यागास ताका नीव आ द्याश दा जीत्ता ईरी यदुर अधिकारी आगली नीव यरदन आप्पाटी होगेतीर.

मूसा अक यहोवा अन आखरी सुचना

14बाक यहोवा मूसा से अंदुन, “नीन सायोद दिन हात्ती आद; नी यहोशू उक कारसुस, अदिक नीव येढ्ढु मुंदुर मिलाप इन तम्बु दा बंदकु उपस्थित आगी कि ना आऊक निवळुसाईन.” आग मूसा अदिक यहोशू होगकु मिलाप इन तम्बु दा उपस्थित आदुर. 15आग यहोवा आ तम्बु दा बादल इन खम्बा दा आगकु दर्शन कोट्टुन; अदिक बादल इन खम्बा तम्बु उन दरवाजा मा रूक्सेत.

16आग यहोवा मूसा से अंदुन, “नी रा सोतकु आप्प दादागोळ सांगुळ मिलुसावाळा आय; अदिक ई लॉकुर येदकु आ द्याश इन दुसरा द्यावगोळ्द हींद, यार बीच आंदुर होगकु ईत्तार, व्यभिचारी आगेदार, अदिक नानी त्याग्सकु आ वाचा अक जो ना आंदुर से कटीन मुरदार. 17आ समय नान कोप ईंदुर मा भळकुसीत, अदिक ना भी ईंदरी त्याग्सकु ईंदुर से तान मार्रा होच्च बुळाईन, अदिक ईंदुर आहार आगेदार; अदिक हापाळ सा परेशानीगोळ अदिक क्लेश ईंदुर मा बंदकु बिद्दाव, ईल ताका कि ईंदुर आ समय अंदार, येन ई परेशानीगोळ नाम मा ई कारण रा बंदकु बिदीदील, यतिकी नाम परमेश्वर नाम बीच दा ईतीदील? 18आ समय ना आ सप्पा बुराईगोळ कारण जो ईंदुर दुसरा द्यावगोळ दी तिर्गकु माळ्यार, नि:सन्देह आंदुर से तान मार्रा होच्च बुळाईन. 19इदुरसाटी ईग नीव ईद गाळ लिख्स कोमी, अदिक नी इदरी इस्राएलीगोळी कल्सकु कंठस्थ माळसुस बुळेत, इदुरसाटी कि ईद हाळ आंदुर खिलाप नान साक्षी ठहरूसुल. 20याग ना ईंदरी आ द्याश दा पोहचुसाईन यदरी कोळोद ना ईंदुर पुर्वजगोळ से किर्या तिंदीदीन, अदिक यदुर दा हाल अदिक शयद इन धारागोळ वाहुसताव, अदिक तीन्त-तीन्त ईंदुर व्हाट्ट तुम्मेगुल, अदिक ईंदुर धष्ट-पुष्ट आगेदार; आग ईंदुर दुसरा द्यावगोळ दी तिर्गकु आंदुर्द उपासना माळली हत्यार, अदिक नान तिरस्कार माळकु नान वाचा अक मुर्द बुट्टार. 21उलटा ईग भी याग ना ईंदरी आ द्याश दा यदुर बारा दा ना किर्या तिंदीन, पोहचुस सकीदील, नानी मालुम आद कि ईंदुर येन येन कल्पना माळेत्यार; इदुरसाटी याग हापाळ सारा परेशानीगोळ अदिक क्लेश ईंदुर मा बंदकु बिद्दाव, आग ईद हाळ ईंदुर मा साक्षी कोट्टीत, यतिकी ईंदुर औलाद इदरी यागलु मारूतीदील.”

22आग मूसा अदा दिशी ईद हाळ लिख्सकु इस्राएलीगोळी कल्सदुन.

23अदिक यहोवा नून उन पार यहोशू उक ईद आग्या कोट्टुन, हिम्मत कट अदिक मजबूत आग; यतिकी इस्राएलीगोळी आ द्याश दा यदरी आंदरी कोळोद ना आंदुर से किर्या तिंदीन नी पोहचुस्या; अदिक ना खुद नीन सांगुळ ईराईन.

24याग मूसा ई व्यवस्था अन वचन इक सुरवात टु आखरी ताका किताब दा लिख्स बुट्टुन, 25आग आव यहोवा अन वाचा अन सन्दुक नेगावाळेर लेवीगोळी आग्या कोट्टुन, 26व्यवस्था अन ई किताब इक हुडुकु तान परमेश्वर यहोवा अन वाचा अन सन्दुक इन हात्ती ईट बुळी, कि ईद अल नीन मा साक्षी कोळ्त ईरूल. 27यतिकी नीन बलवा अदिक जिद्द नानी मालुम आद; नोळी, नान जित्ता अदिक सांगुळ ईरतेला भी नीव यहोवा से बलवा माळतेला बंदीर; बाक नान सोत्तुर बाद्दा भी येती माळतीदील! 28नीव तान कुल नोर सप्पा श्याणा लॉकुरी अदिक तान सरदारगोळी नान हात्ती जमा माळी कि ना आंदरी ई वचन केळ्सकु आंदुर खिलाप आकाश अदिक धरती येढ्ढु उक साक्षी बनुसाईन. 29यतिकी नानी मालुम आद कि नान मृत्यु उन बाद्दा नीव बिलकुल बिगळुसेदीर, अदिक याता हादी मा नळोद आग्या ना नीमी केळसीन अदरी भी नीव बिट्ट बुट्टीर; अदिक आखरी इन दिनगोळ दा याग नीव अद क्याल्सा माळकु जो यहोवा अन नजर दा बेकार आद, तान बनुस्द वस्तुगोळ्द पूजा माळकु आऊक सीट्ट तोर्सुसीर, आग नीम मा विपत्ति बंदकु बिद्दीत.

मूसा अन हाळ

30आग मूसा इस्राएल इन सप्पा सभा अक ई हाळ इन वचन सुरवात टु आखरी ताका अंदकु केळ्सदुन :