व्यवस्थाविवरण 32

1हे आकाश, किव हच, कि ना माताळाईन; अदिक हे धरती, नान बाय इन मातगोळ केळ.

2नान उपदेश मेह घाई बरसुसीत, अदिक नान मातगोळ ओद घाई टपकुस्याव, ह्यांग कि हिरवा काड्डा मा माळा अन बौछार, अदिक डगालगोळ मा झळीगोळ.

3ना रा यहोवा हेसुर इन घोषणा माळाईन. नीव तान परमेश्वर उन महिमा अक मान्सी!

4आव चट्टान हुन, आऊन क्याल्सा खरा आद; अदिक आऊन सप्पा हादी न्याय इन आद. आव सच्चा ईश्वर हुन, आऊन दा कुटीलता हैलेच, आव न्यायी अदिक सीधा आन.

5लेकीन ईदा राज्य अन लॉकुर ट्याळा अदिक तिर्छा आर; ईंदुर बिगळुसेग्यार; ईंदुर आऊन चिकोर आल्लच; ईद आंदुर्द कलंक हुन.

6हे मुढ़ अदिक निर्बुद्धि लॉकुरा, येन नीव यहोवा अक ईद बदला कोळतीर? येन आव नीन आप्प आल्लच, याव नीनी कोंडान? आव नीनी बनुस्यान अदिक स्थिर भी माळ्यान.

7प्राचिन काल इन दिनगोळी याद माळी, पीढ़ी पीढ़ी इन सालगोळी केळी; तान आप्प उक केळी, अदिक अद नीमी हेळ्यान; तान श्याणा लॉकुर से सवाल माळी, अदिक आंदुर नीन से अंद बुट्टार.

8याग परमप्रधान ऊंद ऊंद राज्य अक निज निज भाग वाट्स कोंडुन, अदिक मंळसागोळी अलग अलग बसुसदुन, आग आव द्याश द्याश इन लॉकुर्द सीमागोळ इस्राएलीगोळ्द गिनती इन अनुसार ठहरूसदुन.

9यतिकी यहोवा अन अंश आऊन प्रजा हुन; याकूब आऊन निवळुस्द निज भाग हुन.

10आव आऊक आळी दा, अदिक सुनसान अदिक गरजुवाळेर देल तुम्द मरुभूमि दा नोळदुन; आव आऊन नाकु दी ईतकु आऊन रक्षा माळदुन, अदिक तान कण्ण इन पुतली इन घाई आऊन सुधि ईटदुन.

11ह्यांग गीधाळ तान ग्वादा अक आलगाळ्स आलगाळ्सकु तान पाड्डगोळ म्याकुच म्याकुच मंडरूसतद, हांगा आव तान पिका फैलुसकु आऊक तान परगोळ मा नेग्द बुट्टुन.

12यहोवा आबना अच आऊन अगुवाई माळतेला ईत्तुन, अदिक आऊन सांगुळ यावारा दुसरा द्‍याव ईला ईरोन.

13आव आऊक धरती इन ऊचा-ऊचा जागागोळ मा सवार माळसुसदुन, अदिक आऊक केईगोळ उपज तिन्सदुन; आव आऊक चट्टान दा टु शयद अदिक चकमक इन चट्टान दा टु याण्णा नेक्सदुन.

14गोसीगोळ्द दही, अदिक भेड़-मर्रीगोळ्द हाल, मेम्नागोळ्द चरबी, व्हात अदिक बाशान इन राज्य अन म्यांडागोळ अदिक गोदी इन उत्तम से उत्तम हीट्ट भी; अदिक नी अंगुर इन रास्सा कुडुतोग्या.

15लेकीन यशूरून मोटा आगकु ल्यात्त होडुली हतदुन; नी मोटा अदिक धष्ट-पुष्ट आगेद, अदिक चरबी देल तुम्मेद; आग आव तान सृजनहार ईश्वर उक तजुस बुट्टुन, अदिक तान उद्धार मूल चट्टान इक तुच्छ जान्सदुन.

16आंदुर दुसरा द्यावगोळी मान्सकु अदुर दा जलन उपज माळदुर; अदिक घृणित कर्म माळकु आऊक सिट्ट तोर्सदुर.

17आंदुर पिशाचगोळ साटी जो ईश्वर ईला ईरोर बलि येर्सदुर, अदिक आंदुर साटी आंदुर पराया द्यावगोळ ईरोर, आंदुर रा व्हाशेर-व्हाशेर द्यावगोळ ईरोर जो थ्वाळासा अच दिनगोळ देल प्रगट आगीदुर, अदिक यार देल आंदुर पुर्वजगोळ यागलु अंजीदील.

18याता चट्टान देल नी पैदा आद अदरी नी मार्तोद, अदिक ईश्वर यार देल नीन उत्पत्ति आत आऊक भी नी मार्तोग्या.

19ई मातगोळी नोळकु यहोवा आंदरी तुच्छ जान्सदुन, यतिकी आऊन पार-पोरगोळ आऊक सिट्ट तोर्सीदुर.

20आग आव अंदुन, ना आंदुर से तान बाय होच बुळाईन, अदिक नोळाईन कि आंदुर अन्त ह्यांग आदीत, यतिकी ई राज्य अन लॉकुर हापाळ ट्याळा अदिक ध्वाका कोळावाळेर पार उर.

21आंदुर ईत्ता वस्तु मान्सकु जो ईश्वर आल्लच, नान दा जलन पैदा माळदुर, अदिक तान व्यर्थ वस्तुगोळ्द द्वारा नानी सिट्ट तोर्सदुर. इदुरसाटी ना भी आंदुर द्वारा जो नान प्रजा आल्लच आंदुर मन दा जलन पैदा माळाईन; अदिक ऊंद मूढ़ राज्य अन द्वारा आंदरी सिट्ट तोर्साईन.

22यतिकी नान कोप इन बेक्की भळकुसकु येदाद, जो पाताल इन तह ताका होततेला होदीत, अदिक धरती तान उपज समेत भस्म आगेदीत, अदिक पहाळीगोळ्द नीवगोळ दा भी बेक्की हच बुट्टीत.

23ना आंदुर मा विपत्ति मा विपत्ति कळाईन; अदिक आंदुर मा ना तान सप्पा तीरगोळी बिळाईन.

24आंदुर अकाल देल दुबला आगेदार, अदिक अंगारगोळ देल अदिक कठिन महारोगगोळ देल ग्रसित आगेदार; अदिक ना आंदुर मा जनावरगोळ्द हल्ल हचुसाईन, अदिक धुळा मा रेंगसावाळा हावगोळ्द जयर बिट्ट बुळाईन.

25व्हार्या आंदुर तलवार देल सोत्तार, अदिक कोठरीगोळ बुळ्क अंज्क देल; येन कुवारा अदिक येन कुवार्तेर, येन हाल कुडावाळा चिग्द अदिक येन हण्ण चुट्टीवाळेर, सप्पा ईदा प्रकार बरबाद आदार.

26ना अंदीदीन, कि ना आंदरी दुर दुर ताका तितर-बितर माळाईन, अदिक मंळसागोळ दा टु आंदुर याद ताका मिटुस बुळाईन;

27लेकीन नानी दुश्मनगोळ्द चिळ इन अंज्क ईरोद, हींग आगबाळुल कि द्रोही इदरी उलटा सम्सकु ईद अनली हतुल, नाव तांदा बाहुबल देल प्रबल आदेव, अदिक ईद सप्पा यहोवा देल आगीदील.

28ईद राज्य युक्तिहीन रा आद, अदिक ईंदुर दा समझ हई हैलेच.

29भला आगाईत कि ईंदुर बुद्धिमान ईरायदुर, कि इदरी सम्सेगायदुर, अदिक तान अन्त इन विचार माळायदुर!

30अगर आंदुर चट्टान अच आंदरी मार ईला बुळाईत, अदिक यहोवा आंदरी दुसरा अन कय दा माळ ईला बुळायदुन; रा ईद ह्यांग आग सकाईत कि आंदुर हजार इन, पीछा ऊंद मंळसा माळायदुन, अदिक आंदुर हत्त हजार इक येढ्ढ मंळसा तुकाळ्स बुळायदुर?

31यतिकी ह्यांग नाम चट्टान आव हांग आंदुर चट्टान हैलेच, चाहे नाम दुश्मन अच येती न्यायी ईरबाळुल.

32यतिकी आंदुर दाखलता सदोम उन दाखलता से होळ्त, अदिक अमोरा अन अंगुर इन बेली दाकळोद हुन; आंदुर अंगुर विषभरा, अदिक अऊर गुच्छा केय आव,

33आंदुर अंगुर इन रास्सा हावगोळ्द जयर घाई, अदिक करीद नाग घाई जयरिला आद.

34येन ईद मात नान मन दा संचित, अदिक नान भण्डारगोळ दा मुहरबन्द हैलेच?

35पलटा ताकोमोद अदिक बदला कोळोद नांदा क्याल्सा हुन, ईद आंदुर काल फिसलुसा होती प्रगट आदीत; यतिकी आंदुर विपत्ति इन दिन हात्ती आद, अदिक जो दुख आंदुर मा बिळावाळा आद अव शीघ्र बरेत्याव.

36“यतिकी याग यहोवा नोळ्यान कि नान प्रजा अन शक्ति होगतेला ईत्त, अदिक येन बन्धुआ अदिक येन स्वाधीन, आंदुर दा याऊ ऊळ्दकु ईतीदील, आग यहोवा तान लॉकुर न्याय माळ्यान, अदिक तान दासगोळ बारा दा तरस तिंदान.”

37आग आव अंदान, आंदुर द्यावगोळ येल्याव, मतलब अद चट्टान यल यदुर मा आंदुर्द भरोसा ईरोद,

38जो आंदुर बलिदानगोळ्द चरबी तिनतोगोर, अदिक आंदुर चढ़ावागोळ्द अंगुर इन रास्सा कुडुतोगोर? आंदुर अच येदकु नीम सहायता माळुल, अदिक नीम आड़ आगुल!

39इदुरसाटी ईग नीव नोळ कोमी कि ना अच आव हुईन, अदिक नान सांगुळ यातोदु द्याव हैलेच; ना अच कोंद बुळतीन, अदिक ना अच जीत्ता भी माळतीन; ना अच घायल माळतीन, अदिक ना अच चंगा भी माळतीन; अदिक नान कय दा टु याऊ बिळ्स सकालुन.

40यतिकी ना तान कय स्वर्ग दी येब्सकु अनतीन, अदिक ना अनन्त काल इन साटी जीत्ता आईन,

41इदुरसाटी अगर ना बिजली इन तलवार मा सान हुडुकु झलकुसाइन, अदिक न्याय तान कय दा ताकोम कोमाईन, रा तान द्रोहीगोळ से बदला ताकोमाईन, अदिक तान दुश्मनगोळी बदला कोळाईन.

42ना तान तीरगोळी रक्ता देल मतवाला माळाईन, अदिक नान तलवार मास तिंदीत अद रक्ता सोद्द मंळसा अदिक बन्दीगोळ्द अदिक अद मास दुश्मनगोळ्द ऊद्द चुट्टीवाळेर प्रधानगोळ्द ईत्तीत.

43हे राज्य राज्य अन लॉकुरा, आऊन प्रजा अन सांगुळ आनन्द मनुसी; यतिकी आव तान दासगोळ्द रक्ता अन पलटा ताकोंडान, अदिक तान द्रोहीगोळी बदला कोट्टान, अदिक तान द्याश अदिक तान प्रजा अन पापगोळी मुच्च बुट्टान.

44ई हाळ इन सप्पा वचन मूसा नून उन पार यहोशू समेत बंदकु लॉकुरी केळ्सदुन.

मूसा अन आखरी निर्देश

45याग मूसा ई सप्पा वचन सप्पा इस्राएलीगोळ से अंद बुट्टुन, 46आग आव आंदुर से अंदुन, “यास मातगोळ ना ईंद नीम से चितुसकु अनतीन आ सप्पा मा तान तान मन हची, अदिक आंदुर्द मतलब ई व्यवस्था अन सप्पा मातगोळ्द मान्सदुर दा चौकसी माळोद आग्या तान चिकोरी कोळी. 47यतिकी ईद नीम साटी व्यर्थ क्याल्सा हैलेच, लेकीन नीम जीवन अच हुन, अदिक हींग माळदुर देल आ द्याश दा नीम उमर इन दिन हापाळ आदाव, यदुर अधिकारी आगली नीव यरदन आप्पाटी होगेतीर.”

48बाक अदा दिशी यहोवा मूसा से अंदुन, 49“आ अबारीम पहाळी इन नबो हेसुर इन चोटी मा, जो मोआब द्याश दा यरीहो इन मुंद आद, येरकु कनान द्याश, यदरी ना इस्राएलीगोळ्द निज जमीन माळ बुळतीन, अदरी नोळ कोम. 50आग ह्यांग नीन वार्ट हारून होर पहाळी मा सोतकु तान लॉकुर दा मिलुसेदुन, हांगा नी ई पहाळी मा येरकु सोतोद्या, अदिक तान लॉकुर दा मिलुसेद्या. 51इदुर कारण ईद आद कि सीन आळी दा, कादेश इन मरीबा हेसुर इन सोता मा, नीव येढ्ढु मुंदुर नान अपराध माळदीर, यतिकी नीव इस्राएलीगोळ बीच दा नानी पवित्र ठहरूसीदील. 52इदुरसाटी आ द्याश जो ना इस्राएलीगोळी कोळतीन, नी तान मुंद नोळ कोंड्या, लेकीन अल होग सकतीदील.”