Holiya Bible
व्यवस्थाविवरण 33
मूसा अन इस्त्राएलीगोळी आशिर्वाद कोळोद
जो आशीर्वाद परमेश्वर उन जन मूसा तान मृत्यु से पयले इस्राएलीगोळी कोट्टुन अद ईद हुन. आव अंदुन, यहोवा सीनै टु बंदुन, अदिक सेईर से आंदुर साटी प्रगट आदुन; आव पारान पहाळी मा टु तान तेज तोर्सदुन, अदिक लाखों पवित्र अन बीच दा टु बंदुन, आऊन ऊजवा कय देल आंदुर साटी ज्वालामय व्यवस्था होळ्त.
आव निश्चय तान लॉकुर से प्यार माळतान; आऊन सप्पा पवित्र लॉकुर नीन कय दा आर: आंदुर नीन कालगोळ हात्ती कुर्तकु ईरतार, ऊंद ऊंद नीन वचन देल लाभ नेगुतान.
मूसा नामी व्यवस्था कोट्टुन, अदिक अद याकूब उन मंडली इन निज भाग ठहरूस्त.
याग प्रजा अन मुख्य मुख्य मंळसा, अदिक इस्राएल इन कुल ऊंद सांगुळ आगकु जमा आदुर, आग आव यशूरून दा राजा ठहरूसदुन.
“रूबेन सायबाळुल उलटा जित्ता ईरूल, तरी भी आऊन ईलेर मंळसा थ्वाळासा ईरूल.”
अदिक यहूदा मा ईद आशिर्वाद आत जो मूसा अंदुन, “हे यहोवा, नी यहूदा अन केळ, अदिक अदरी आऊन लॉकुर हात्ती पोहचुस. अदिक तान साटी खुद तान कय देल लळुसदुन, अदिक नीना आऊन द्रोहीगोळ्द खिलाप आऊन सहायक आग.”
बाक लेवी इन बारा दा आव अंदुन, नीन तुम्मीम अदिक ऊरीम नीन भक्त इन हात्ती आद, यारी नी मस्सा दा परखुस कोंड, अदिक यार सांगुळ मरीबा हेसुर इन सोता मा नीन वाद विवाद आत;
“आव रा तान मोय आप्प उन बारा दा अंदुन, ना आंदरी अरालीन; अदिक ना रा आव तान वार्टुरी तान मान्सदुन, अदिक ना तान चिकोर चिळ्गेरी अरतुन. यतिकी आंदुर नीन मातगोळ मान्सदुर, अदिक आंदुर नीन वाचा अन पालन माळतार.”
आंदुर याकूब उक नीन नियम, अदिक इस्राएल इक नीन व्यवस्था कलस्यार; अदिक नीन मुंद धूप, अदिक नीन वेदी मा सर्वांग जनावर इक होमबलि माळ्यार.
“हे यहोवा, आऊन सम्पत्ति मा आशीष कोळ, अदिक आऊन कयगोळ्द स्यावा अक ग्रहण माळ; आऊन विरोधीगोळ अदिक दुश्मनगोळ्द नेळु मा हींग बडु कि आंदुर मात्त येळ सकबाळुल.”
बाक आव बिन्यामीन उन बारा दा अंदुन, “यहोवा अन आव प्रिय जन, आऊन हात्ती निडर वास माळ्यान; अदिक आव हागुल तीम आऊन मा सावली माळ्यान, अदिक आव आऊन बाक्कागोळ बीच ईरतोगतान.”
बाक यूसुफ उन बारा दा आव अंदुन, ईऊन द्याश यहोवा से आशीष हासिल माळुल, मतलब स्वर्ग इन अनमोल पदार्थ अदिक ओद, अदिक आ खोल नीर जो ल्यालमा आद,
अदिक सुर्य अन पकुस्द अनमोल काय, अदिक जो अनमोल पदार्थ मौसम इन उगुस्द उगुसताव,
अदिक प्राचीन पहाळीगोळ्द उत्तम पदार्थ, अदिक सनातन पहाळीगोळ्द अनमोल पदार्थ,
अदिक धरती अदिक जो अनमोल पदार्थ अदुर दा तुमकु आव, अदिक जो झाळी दा ईरतोगोद अदुर्द प्रसन्नता. ई सप्पा अन बारा दा यूसुफ उन ताल्ला मा, मतलब आऊंदा ताल्ला अन बेळदिंग मा, जो तान वार्टुर से न्यारा आगीदुन आशीष अच आशीष फलुसुल.
आव प्रतापी आन, मान्सी गोसी नव पहिलौठा हुन, अदिक आऊन सींग बनेला वस्ता अन घाई आव; आंदुर से आव द्याश द्याश इन लॉकुरी, उलटा धरती इन क्वाना ताका अन सप्पा मंळसागोळी मुच्च बुट्टान; आंदुर एप्रैम इन लाखों लाख, अदिक मनश्शे अन हजारो हजार आर.
बाक जबूलून उन बारा दा आव अंदुन, हे जबूलून, नी व्हार्या होळा होती, अदिक हे इस्साकार, नी तान ड्यारागोळ दा आनन्द माळ्या.
आंदुर द्याश द्याश इन लॉकुरी पहाळी मा कारस्यार; आंदुर अल धर्मयग्य माळ्यार; यतिकी आंदुर समुद्र अन धन, अदिक रेतु दा होचकु अनमोल पदार्थ देल लाभ नेगदार.
बाक गाद उन बारा दा आव अंदुन, धन्य आव आन जो गाद उक वाळुसतान! गाद रा सिंहनी इन घाई ईरतान, अदिक बाह अक, उलटा ताल्ला अन मुकुट ताका अक हर्द बुळतान.
अदिक आव पयला अंश रा तान साटी निवळुस बुट्टुन, यतिकी अल रईस इन योग्य भाग ईटकु ईरोद; आग आव प्रजा अन मुख्य मुख्य मंळसागोळ्द सांगुळ बंदकु यहोवा अन ठहरूस्द न्याय, अदिक इस्त्राएल इन सांगुळ आगकु आऊन नियम इन प्रतिपालन माळदुन.
बाक दान उन बारा दा आव अंदुन, दान रा बाशान से हारावाळा हुल्ल अन पाड्ड हुन.
बाक नप्ताली इन बारा दा आव अंदुन, “हे नप्ताली, नी जो यहोवा अन प्रसन्नता देल तृप्त, अदिक आऊन आशीष देल भरपुर आय, नी पश्चिम अदिक दक्षिण इन द्याश मा अधिकार ईरूल.”
बाक आशेर उन बारा दा आव अंदुन, आशेर पारगोळ्द बारा दा आशीष हासिल माळुल; आव तान वार्टुर दा प्रिय ईरूल, अदिक तान काल याण्णा दा मुळकुसुल.
नीन फाटक इन सिटकनी लॉहा अदिक पीतळा नव आदव, अदिक ह्यांग नीन दिन हांगा नीन शक्ति ईरूल.
हे यशूरून, ईश्वर उन तुल्य मात्त याऊ हैलेच, आव नीन सहायता माळली आकाश मा, अदिक तान प्रताप तोर्सतेला आकाश मण्डल मा सवार आगकु नळुतान.
अनादि परमेश्वर नीन गृहधाम हुन, अदिक ल्यालमा सनातन भुजागोळ आव. आव दुश्मनगोळी नीन मुंदु टु तेग्द बुळतान, अदिक अनतान, आंदरी सत्यानाश माळबुळ.
अदिक इस्राएल निडर बसुसकु ईरतद, अन्न अदिक व्हाशोद अंगुर इन रास्सा अन द्याश दा याकूब उन सोता आबना अच ईरतद; अदिक अदुर म्याकुच इन आकाश टु ओद बिळतोगतद.
हे इस्राएल, नी येन अच धन्य आय! हे यहोवा से उद्धार हासिल माळ्द प्रजा, नीन तुल्य याव आन? आव रा नीन सहायता अन साटी ढाल अदिक नीन प्रताप इन साटी तलवार हुन; नीन दुश्मन नीन सराहना माळ्यार, अदिक नी आंदुर ऊचा जागागोळी मेट्या.
Holiya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.