व्यवस्थाविवरण 34

मूसा अन मृत्यु

1बाक मूसा मोआब इन अराबा टु नबो पहाळी मा जो पिसगा अन ऊंद चोटी अदिक यरीहो अन मुंद आद, येरेदुन; अदिक यहोवा आऊक दान ताका अन गिलाद हेसुर इन सप्पा द्याश, 2अदिक नप्ताली इन पुरा द्याश, अदिक एप्रैम अदिक मनश्शे अन द्याश, अदिक पश्चिम इन समुद्र ताका अन यहूदा अन पुरा द्याश, 3अदिक दक्षिण द्याश, अदिक सोअर ताका अन यरीहो हेसुर इन खजुर इन नगर इन तराई, ईद सप्पा तोर्सदुन. 4आग यहोवा आऊन से अंदुन, याता द्याश इन बारा दा ना अब्राहम, इसहाक, अदिक याकूब से किर्या तिनकु अंदीदीन, कि ना इदरी नीन वंश इक कोळाईन अद ईदा हुन. ना इदरी नीनी साक्षात तोर्स बुटीन, लेकीन नी आप्पाटी आगकु होग सकतीदील. 5आग यहोवा अन अना हिसाब देल आऊन दास मूसा अल्या मोआब इन द्याश दा सोतोदुन, 6अदिक आव आऊक मोआब इन द्याश दा बेतपोर इन मुंद ऊंद तराई दा मुण्ण कोट्टुन; अदिक ईंद इन दिन ताका याऊ जान्सालुन कि आऊन कब्र येल्याद. 7मूसा तान मृत्यु उन समय ऊंद सौ ईप्पत साल इनव ईरोन; लेकीन ना रा आऊन कण्णगोळ धुंधला बिद्दव, अदिक ना आऊन पौरूष गोर्त आगित. 8अदिक इस्राएली मोआब इन अराबा दा मूसा अन साटी तीस दिन ताका वर्लतेला ईत्तुर; आग मूसा अन साटी वर्लली अदिक विलाप माळव दिन पुरा आदव.

9अदिक नून उन पार यहोशू बुद्धिमानी इन आत्मा देल परिपुर्ण ईरोन, यतिकी मूसा तान कय आऊन मा ईटीदुन; अदिक इस्राएली आ आग्या अन अनुसार जो यहोवा मूसा अक कोटीदुन अदुर मान्सतेला ईत्तुर. 10अदिक मूसा अन तुल्य इस्राएल दा हींग याऊ नबी येदीदील, यार से यहोवा आमने सामने मात माळदुन, 11अदिक आऊक यहोवा फिरोन अदिक आऊन सप्पा कर्मचारिगोळ मुंद अदिक आऊन पुरा द्याश दा, सप्पा चिन्ह अदिक चमत्कार माळली कळीदुन, 12अदिक आव सप्पा इस्राएलीगोळ नजर दा बलवन्त कय अदिक धोळ्द अंज्क इन क्याल्सा माळकु तोर्सदुन.