व्यवस्थाविवरण 15

सातवा साल: छुटकारा अन साल

(लैव्यव्यवस्था 25:1-7)

1“येळ येळ साल बितुसदुर मा नीव छुटकारा कोळतोगेतीर, 2मतलब जो यावारा कर्जा कोळावाळा तान मान्ना हातळववाळा अक येनारा उधार कोटीदान, आव अदरी बिट बुळुल; अदिक तान मान्ना हातळववाळा या वार्ट उन से अदरी बरबस तुमसुस बाळुल, यतिकी यहोवा अन हेसुर देल ई छुटकारा अन प्रचार आग्याद. 3परदेशी मंळसा से नी अदरी बरबस तुमसुस सकत्या, लेकीन जो येनारा नीन वार्ट उन हात्ती नींद ईरूल अदरी नी बिना तुमसुस्द बिट्ट बुळेत. 4नीन बीच दा यातोदु दरिद्र ईरतीदील, यतिकी याता द्याश इक नीन परमेश्वर यहोवा नीन भाग माळकु नीनी कोळतान, कि नी अदुर अधिकारी आगेग, अदुर दा आव नीनी हापाळ अच आशीष कोट्टान. 5ईट जरूरी आद कि नी तान परमेश्वर यहोवा अन मात चित्त हचकु केळ्या, अदिक ई सप्पा आग्यागोळ्द मान्सदुर दा जो ना ईंद नीनी केळ्सतीन चौकसी माळ्या. 6आग नीन परमेश्वर यहोवा तान वचन इन अनुसार नीनी आशीष कोट्टान, अदिक नी हापाळ राज्यगोळी उधार कोट्या, लेकीन नीनी उधार ताकोमोद बिळतीदील; अदिक नी हापाळ राज्यगोळ मा प्रभुता माळ्या, लेकीन अव नीन मा प्रभुता माळ सकतीदील.”

7“जो द्याश नीन परमेश्वर यहोवा नीनी कोळतान अदुर्द यातारा फाटक इन बुळ्क अगर नीन वार्टुर दा टु यावारा नीन हात्ती दरिद्र ईरूल, रा तान आ दरिद्र वार्ट उन साटी ना रा तान मन कठ्ठर माळेत, अदिक ना तान मुठका कसुसेत; 8याता वस्तु उन कमी आऊक आगुल, आऊन याट जरवत ईरूल आट जरूर तान कय ढीला माळकु आऊक उधार कोळेत. 9सचेत ईर कि नीन मन दा ईत्ता अधम चिन्ता समुस बाळुल, कि सातवा साल जो छुटकारा अन साल आद अव हात्ती आद, अदिक तान नजर नी तान आ दरिद्र वार्ट दी क्रुर माळकु आऊक येनु कोळतीदील, अदिक आव नीन खिलाप यहोवा अन दोहाई कोळुल, रा ईद नीन साटी पाप ठहरूसीत. 10नी आऊक जरूर कोळेत, अदिक आऊक कोळा होती नीन मन इक बेकार हतबाळुल; यतिकी ई मात इन कारण नीन परमेश्वर यहोवा नीन सप्पा क्याल्सागोळ दा यदुर दा नी तान कय हच्या नीनी आशीष कोट्टान. 11नीन द्याश दा दरिद्र रा हमेशा सिक्यार; इदुरसाटी ना नीनी ईद आग्या कोळतीन, कि नी तान द्याश दा तान दीन-दरिद्र वार्टुरी तान कय ढीला माळकु जरूर दान कोळेत.”

12“अगर नीन यावारा वार्टबन्धु, मतलब यावारा इब्री या इब्रिन, नीन कय देल मारूल, अदिक आव आर साल नीन स्यावा माळ कोंडान, रा सातवा साल आऊक तान हात्ती टु स्वतंत्र माळकु होगगोळेत. 13अदिक याग नी आऊक स्वतंत्र माळकु तान हात्ती टु होगगोट्या आग आऊक खाली कय होगगोळ बाळेत; 14उलटा तान भेड़-मर्रीगोळ, अदिक खलियान, अदिक शयद इन कुण्ड दा टु आऊक हापाळ कोळेत; नीन परमेश्वर यहोवा नीनी ह्यांग आशीष कोटीदान अदुर्दा अनुसार आऊक कोळेत. 15अदिक ई मात इक याद ईटेत कि नी भी मिस्त्र द्याश दा दास ईर्या, अदिक नीन परमेश्वर यहोवा नीनी बिळ्स बुट्टुन; ई कारण ना ईंद नीनी ईद आग्या केळ्सतीन. 16अदिक अगर आव नीन से अदिक नीन घराना से प्यार ईटतीदान, अदिक नीन सांगुळ खुशी देल ईरतीदान, अदिक ई कारण नीन से अनली हतुल, ‘ना नीन हात्ती टु होगतीदील,’ 17रा सुतारी हुडुकु आऊन किव कवाळ मा हचकु खॉदरा माळेत, आग आव हमेशा नीन दास बन्सकु ईत्तान. अदिक तान दासगीत इन से भी हींगा माळेत. 18याग नी आऊक तान तान से स्वतंत्र माळकु होगगोट्या, आग आऊक बिटबुळोद नीनी कठिन होगबाळुल; यतिकी आव आर साल येढ्ढ क्याल्सा माळावाळेर बराबर नीन स्यावा माळ्यान. अदिक नीन परमेश्वर यहोवा नीन सप्पा क्याल्सागोळ दा नीनी आशीष कोट्टान.”

पहिलौठा जनावरगोळ्द अर्पण

19“नी गोसीगोळ अदिक भेड़-मर्रीगोळ्द यास पहिलौठा नर आव अव सप्पा अक तान परमेश्वर यहोवा अन साटी पवित्र ईटेत; तान गोसीगोळ्द पहिलौठा दा टु यातोदु क्याल्सा ताकोम बाळेत, अदिक ना तान भेड़-मर्रीगोळ्द पहिलौठा अन चुट्टी कातरूसेत. 20आ जागा मा जो नीन परमेश्वर यहोवा निवळुस कोंडान नी यहोवा अन मुंद तान तान घराना समेत हर साल अदुर्द मास तिनेत. 21लेकीन अगर अदुर दा यातोदारा प्रकार इन दोष ईरूल, मतलब अद लंगळा या कुढ्ढ ईरूल, या अदुर दा मात्त यातोदारा अच प्रकार इन बुराई इन दोष ईरूल, रा अदरी तान परमेश्वर यहोवा अन साटी बलि येर्स बाळेत. 22अदरी तान फाटक इन बुळ्क तिनेत; शुद्ध अदिक अशुद्ध येढ्ढु प्रकार इन मंळसा जसा चिकारा अदिक हरिण इन मास तिनतार हांगा अदुर्द भी तिन सक्यार. 23लेकीन अदुर रक्ता तिनबाळेत; अदरी नीर इन घाई जमीन मा रीचुस बुळेत.”