व्यवस्थाविवरण 14

शोक मनुसोद वर्जित विधी

1“नीव तान परमेश्वर यहोवा अन पारगोळ हुईर; ईदुरसाटी सोद्द मंळसागोळ कारण न रा तान शरीर चीरूसेतीर अदिक ना भऊगोळ्द चुट्टी मुंडन माळेतीर. 2यतिकी नी तान परमेश्वर यहोवा अन साटी ऊंद पवित्र समाज हुय, अदिक यहोवा नीनी धरती माकळव समस्त द्याशगोळ्द लॉकुर दा टु तान निज सम्पत्ति आगोर साटी निवळुस कोंडान.”

शुद्ध अदिक अशुद्ध जनावर

(लैव्यव्यवस्था 11:1-47)

3“नी यातोदारा घिनोना वस्तु तिन बाळेत. 4जो जनावर नीव तिन सकतीर अव ईव हुव, मतलब वस्ता-गोसी, भेड़-मर्री, 5हरिण, चिकारा, कोळी काक्का, जंगली मर्री, सांभर, नीलगाय, अदिक बनेला भेड़. 6ईदुरसाटी जनावरगोळ दा टु यास जनावरगोळ चिरा या फाका खुरवाळा अदिक कवरी माळावाळा ईरताव अऊर मास नीव तिन सकतीर. 7लेकीन कवरी माळावाळा या चिरा खुरवाळा दा टु ई जनावरगोळी, मतलब ऊट, खरहा, अदिक शापान इक तिन बाळेतीर, यतिकी ई पागुर रा माळताव लेकीन चिरा खुर इनव ईरालव, ई कारण अव नीम साटी अशुद्ध आव. 8बाक हंदी जो चिरा खुर इन ईरतद लेकीन कवरी माळाल, ई कारण अद नीम साटी अशुद्ध आद. नीव ना रा ईऊर्द मास तिनेतीर, अदिक ना ईऊर्द मुर्दा मुटेतीर.”

9“बाक यास नीर इन जीव आव अऊर दा टु नीव ईवरी तिन सकतीर, मतलब यार्द पिका अदिक छिलका ईरताव. 10लेकीन यास बिना पिका अदिक छिलका अन ईरताव अवरी नीव तिन बाळेतीर; यतिकी अव नीम साटी अशुद्ध आव.”

11“सप्पा शुद्ध पक्षीगोळ्द मास रा नीव तिन सकतीर. 12लेकीन ईऊर्द मास तिन बाळेतीर, मतलब गीधाळ, लाकुळतोंड्या, कुरर; 13गरुड़, गीधाळ अदिक भाति-भाति नव शाही, 14अदिक भाति-भाति नव सप्पा काग्गगोळ; 15शुतुरमुर्ग, तहमास, जलकुक्कुट, अदिक भाति-भाति नव बाज; 16श्यांळ्‍द अदिक धोळ्द येढ्ढु जाती इन पिंजोळ्ला अदिक उल्लु; 17धनेश, गिधाळ, हाड़गील; 18सारस, भाति-भाति नव बगलागोळ, हुदहुद, अदिक चमगादळ. 19अदिक यास रेंगसावाळा जीव आव अव सप्पा नीम साटी अशुद्ध आव; अव तिनकु आगबाळुल. 20लेकीन सप्पा शुद्ध पिकावाळेर्द मास नीव तिन सकतीर.”

21“जो तान मृत्यु देल सोतोगुल अदरी नीव तिन बाळेतीर; अदरी तान फाटकगोळ बुळ्क यातारा परदेशी इक तिनोर साटी कोळ सकतीर, या यावारा दुसरा अन कय देल मार सकतीर; लेकीन नी रा तान परमेश्वर यहोवा अन साटी पवित्र समाज हुय. मर्री इन पाटरु अदुर मोय इन हाल दा बेईस बाळेतीर.”

दशमांश इन नियम

22“बींजा अन सप्पा उपज दा टु जो हर साल केई दा उपज आगुल अदुर दशमांश जरूर ब्यार्र माळकु ईटेतीर. 23अदिक याता जागा अक नीन परमेश्वर यहोवा तान हेसुर इन निवास ठहरूसोर साटी निवळुस कोमुल अदुर दा तान अनाज, अदिक व्हाशोद अंगुर इन रास्सा, अदिक जैतुन इन याण्णा अन दशमांश, अदिक तान वस्ता-गोसी अदिक भेड़-मर्रीगोळ्द पहिलौठा तान परमेश्वर यहोवा अन मुंद तिनतोगेतीर; यदुर देल नीव आऊन अंज्क हमेशा मानसोद कलतीर. 24लेकीन अगर अद जागा यदरी नीन परमेश्वर यहोवा तान हेसुर बन्सकु ईटोर साटी निवळुस कोंडान हापाळ दुर ईरूल, अदिक ई कारण अलीद यात्रा नीन साटी ईट ऊद्द आगुल कि नी तान परमेश्वर यहोवा अन आशीष देल सिक्द वस्तुगोळ अल वय सकतीदील, 25रा अदरी मारकु, पैस्यागोळी कटकु, कय दा हुडुकु आ जागा मा होगेत जो नीन परमेश्वर यहोवा निवळुस कोंडान, 26अदिक अल वस्ता-गोसी, या भेड़-मर्री, या अंगुर इन रास्सा, या सार्रा, या यातोदारा प्रकार इन वस्तु येती ईरबाळुल, जो नीन मन चाहासीत, अदरी अवा पैस्या देल कोंडकु तान घराना समेत तान परमेश्वर यहोवा अन मुंद तिनकु आनन्द मनुसेत. 27अदिक तान फाटकगोळ्द बुळ्कळोद लेवीगोळी बिळबाळेत, यतिकी नीन सांगुळ आऊन यातोदारा भाग या अंश ईरतीदील. 28मुर मुर साल बितुसदुर मा तिसरा साल इन उपज इन सप्पा दशमांश तेगुकु तान फाटकगोळ्द बुळ्क संघरूसकु ईटेतीर; 29आग लेवी यार्द नीन सांगुळ यातोदु नीज भाग या अंश ईरतीदील अद, अदिक जो परदेशी, अदिक अनाथ, अदिक रांड्यागोळ नीन फाटकगोळ्द बुळ्क ईरूल, आंदुर भी बंदकु व्हाट्ट तीम तिनुल; यदुर देल नीन परमेश्वर यहोवा नीन सप्पा क्याल्सा दा नीनी आशीष कोळुल.”