व्यवस्थाविवरण 13

1“अगर नीन बीच दा यावारा भविष्यवक्ता या कान्सा नोळावाळा प्रगट आगकु नीनी यातोदारा चिन्ह या चमत्कार तोर्सुल, 2अदिक याता चिन्ह या चमत्कार इक प्रमाण ठहरूसकु आव नीन से अनुल, ‘बर नाव दुसरा द्यावगोळ्द अनुयायी आगकु, यार देल नी ईगास ताका अनजान ईत्त, अऊर्द उपासना माळाती,’ 3आग नीव आ भविष्यवक्ता या कान्सा नोळावाळा अन वचन मा यागलु कीव हच बाळेतीर; यतिकी नीम परमेश्वर यहोवा नीम परीक्षा ताकोंडान, यदुर देल ईद जान्स कोम, कि ईंदुर नान से तान पुरा मन अदिक पुरा जीव इन सांगुळ प्यार ईटतार या ईला?” 4नीव तान परमेश्वर यहोवा अन हींद नळेतीर, अदिक आऊन अंज्क मान्सेतीर, अदिक आऊन आग्यागोळ मा नळेतीर, अदिक आऊन वचन मान्सेतीर, अदिक आऊन स्यावा माळेतीर, अदिक आऊन से अच लपटुसकु ईरेतीर. 5अदिक हींग भविष्यवक्ता या कान्सा नोळावाळा जो नीमी नीम आ परमेश्वर यहोवा से तिर्गुसकु, याव नीमी मिस्त्र द्याश दा टु तेगदुन अदिक गुलामी अन मान्ना दा टु बिळस्यान, नीन आवा परमेश्वर यहोवा अन हादी टु बयकुसोद मात माताळावाळा ठहरूस्यान, ई कारण आव कोन्सुसकु आगुल. ई रीती देल नी तान बीच दा टु ईत्ता बुराई इक दुर माळ बुळेत.

6“अगर नीन सगा वार्ट, या पार, या पोर, या नीन हिंग्स, या जीवलग नीन यावारा संगी निराला दा नीनी ईद अंदकु फुसलुसली हतुल, कि बर नाव दुसरा द्यावगोळ्द उपासना या पूजा माळाता, यारी ना रा नी अदिक ना नीन पुर्वजगोळ जान्सोर, 7चाहे आंदुर नीम हात्ती ईरावाळेर आस पास इन लॉकुर्द चाहे धरती इन ऊंद क्वाना टु हुडुकु दुसरा क्वाना ताका दुर दुर इन ईरावाळेर्द द्यावगोळ आगुल, 8रा नी आऊन मान्स बाळेत अदिक ना आऊन मात केळेत, अदिक ना आऊन मा तरस तिनेत अदिक ना कोमलता तोर्सेत, अदिक ना आऊक होचकु ईटेत; 9आऊक जरूर घात माळेत; आऊक घात माळली पयले नीन कय येळुल, हींद सप्पा मुंदुर्द कय येळुल. 10आऊन मा हींग पथराव माळेत कि आव सोतोगुल, यतिकी आव नीनी नीन आ परमेश्वर यहोवा से जो नीनी गुलामी अन मान्ना मतलब मिस्त्र द्याश दा टु तेगुकु तंदान, बयकुसोद कोशिश माळ्यान. 11अदिक सप्पा इस्राएली केळकु अंज्क माळ्यार, अदिक ईत्ता बेकार क्याल्सा बाक यागलु नीन बीच दा माळतीदील.”

12“अगर नीन यातोदारा नगर इन बारा दा, यदरी नीन परमेश्वर यहोवा नीनी ईरोर साटी कोळतान, ईत्ता मात नीन केळदुर दा बरूल, 13कि यास अधम मंळसागोळ नींदा बीच दा टु होटकु तान नगर इन निवासीगोळी ईद अंदकु बयकुस बुटार, कि बरी नाव दुसरा द्यावगोळ्द यार देल ईगास ताका अनजान ईत्तेव उपासना माळाती, 14रा केळकुळ माळेतीर, अदिक ढुंढ्सेतीर, अदिक जरूर पता हचेतीर; अदिक अगर ई मात सही ईरूल, अदिक येनारा भी सक ईरबाळुल कि नीन बीच दा ईत्ता घिनोना क्याल्सा माळकु आगतद, 15रा जरूर आ नगर इन निवासीगोळी तलवार देल कोंद बुळेत, अदिक जनावर समेत जो अदुर दा ईरूल अदुर्द तलवार देल सत्यानाश माळेत. 16अदिक अदुर दाकळव सप्पा लुट चौक इन बीच दा जमा माळकु आ नगर इक लुट समेत तान परमेश्वर यहोवा अन साटी मान्सी सर्वांग होम माळकु होताकेत; अदिक अद हमेशा साटी डीह ईरूल अद बाक बसुसकु आगबाळुल. 17अदिक यातोदारा सत्यानाश इन वस्तु नीन कय दा हतबाळुल; यदुर देल यहोवा तान भळकुस्द कोप देल शांत आगकु ह्यांग आव नीन पुर्वजगोळ से किर्या तिंदीदुन हांगा नीन से दया अन व्यवहार माळुल, अदिक दया माळकु नीनी गिनती दा वाळुसुल. 18ईद आग आदीत याग नी तान परमेश्वर यहोवा अन यास आग्यागोळ ना ईंद नीनी केळ्सतीन अव सप्पा अक मानस्या अदिक जो नीन परमेश्वर यहोवा अन नजर दा ठीक आद अदा माळ्या.”