व्यवस्थाविवरण 12

ऊंदा आराधना स्थल

1जो द्याश नीम पुर्वजगोळ्द परमेश्वर यहोवा नीमी अधिकार दा ताकोमली कोटान, अदुर दा यागास ताका नीव धरती मा जीत्ता ईत्तीर आगासताका ई विधीगोळ अदिक नियमगोळ्द मान्सदुर दा सावधान ईरेतीर. 2याता राज्यगोळ्द नीव अधिकारी आदीर अदुर लॉकुर ऊचा-ऊचा पहाळीगोळ या टीलागोळ मा, या यातारा प्रकार इन हिरवा मार्र इन ल्यालमा, यास जागागोळ दा तान द्यावगोळ्द उपासना माळतार, आ सप्पा मुंदुरी नीव पुरा रीती देल नष्ट माळ बुळेतीर; 3आंदुर वेदीगोळी केळ्द बुळेतीर, आंदुर खम्बागोळी मुर्द बुळेतीर, आंदुर अशेरा हेसुर इन मूर्तिगोळी बेक्की दा होताक बुळेतीर, अदिक आंदुर द्यावगोळ्द अगुळ्द मूर्तिगोळी कडुकु केळ्द बुळेतीर, कि आ द्याश दा टु आंदुर हेसुर तक्के मिटुसेगुल. 4बाक ह्यांग आंदुर माळतार, नीव तान परमेश्वर यहोवा अन साटी हांग माळबाळेतीर. 5लेकीन जो जागा नीम परमेश्वर यहोवा नीम सप्पा कुल दा टु निवळुस कोंडान, कि अल तान हेसुर कायम ईटुल, आऊन अदा निवास स्थान इन हात्ती होगतोगेतीर; 6अदिक अल्या नीव तान होमबलि, अदिक मेलबलि, अदिक दशमांश, अदिक नेग्द भेंट, अदिक मन्नत इन वस्तुगोळ, अदिक स्वेच्छाबलि, अदिक गोसी-वस्तागोळ अदिक भेड़-मर्रीगोळ्द पहीलौठा ओयतोगेतीर; 7अदिक अल्या नीव तान परमेश्वर यहोवा अन मुंद भोजन माळेतीर, अदिक तान तान घराना समेत आ सप्पा क्याल्सागोळ मा, यऊर दा नीव कय हचीदीर, अदिक यऊर मा नीम परमेश्वर यहोवा अन आशीष सिकीदाद, खुशी मनुसेतीर. 8ह्यांग नाव आजकल ईल जो क्याल्सा यारी भाऊसतद अदा माळतार हांग नीव माळबाळेतीर; 9जो विश्रामस्थान नीम परमेश्वर यहोवा नीम हिस्सा दा कोळतान अल रा नीव ईगास ताका पोहचुसीदील. 10लेकीन याग नीव यरदन आप्पाटी होगकु आ द्याश दा यदुर भागी नीम परमेश्वर यहोवा नीमी माळतान बसुसेगी, अदिक आव नीम नाकु दीकळोद सप्पा दुश्मनगोळ से नीमी विश्राम कोळुल, 11अदिक नीव निडर ईर सक्कीर, आग जो स्थान नीम परमेश्वर यहोवा तान हेसुर इन निवास ठहरूसोर साटी निवळुस कोमुल अदुर दा नीव तान होमबलि, अदिक मेलबलि, अदिक दशमांश, अदिक नेग्द भेंटगोळ; अदिक मन्नगोळ्द सप्पा उत्तम वस्तुगोळ जो नीव यहोवा अन साटी संकल्प माळीर, मतलब यास वस्तुगोळ्द आग्या ना नीमी केळ्सतीन अव सप्पा अक अल्या ओयतोगेतीर. 12अदिक अल नीव तान पार पोरगोळी अदिक दास दासीगीतेर समेत तान परमेश्वर यहोवा अन मुंद खुशी मनुसेतीर, अदिक जो लेवीगोळ नीम फाटकगोळ दा ईत्तार आंदुर भी खुशी मनुस्यार, यतिकी आऊन नीम सांगुळ यातोदारा निज भाग या अंश ईरतीदील. 13अदिक सावधान ईरेत कि नी तान होमबलिगोळी हर ऊंद जागा मा जो नोळदुर दा बंदाव येर्सबाळेत; 14लेकीन जो स्थान नीन यातोवारा कुल दा यहोवा निवळुस कोमुल अल्या तान होमबलिगोळी येर्सतोगेत, अदिक याता याता क्याल्सा अन आग्या ना नीनी केळ्सतीन अदरी अल्या माळेत,

15“लेकीन नी तान सप्पा फाटकगोळ्द बुळ्क तान जीव इन इच्छा अदिक तान परमेश्वर यहोवा अन कोळ्द आशीष इन अनुसार जनावर कोंदकु तिन सक्या, शुद्ध अदिक अशुद्ध मंळसा येढ्ढु मुंदुर तिन सक्यार, जसा कि चिकार अदिक हरिण इन मॉदरा. 16लेकीन अदुर रक्ता तिन बाळेतीर; अदरी नीर इन घाई जमीन मा चेल बुळेतीर. 17बाक तान अनाज, या व्हाशोद अंगुर इन रास्सा, या जैतुन इन याण्णा अन दशमांश, अदिक तान वस्ता-गोसी, या भेड़-मर्रीगोळ्द पहिलौठा, अदिक तान मन्नत इन यातोदारा वस्तु, अदिक तान स्वेच्छाबलि, अदिक नेग्द भेंटगोळ तान सप्पा फाटकगोळ्द बुळ्क तिन बाळेतीर; 18अवरी तान परमेश्वर यहोवा अन मुंद अदा जागा मा यदरी आव निवळुसुल तान पार पोरगोळ अदिक दास दासगीतेर्द, अदिक जो लेवी नीन फाटकगोळ्द बुळ्क ईत्तार आंदुर सांगुळ तिनेत, अदिक नी तान परमेश्वर यहोवा अन मुंद तान सप्पा क्याल्सागोळ मा यदुर दा कय हचीद्या आनन्द मनुसेत. 19अदिक सावधान ईरेत कि यागास ताका नी जमीन मा जीत्ता ईत्या आगासताका ताका लेवीगोळी बीळ बाळेत.”

20“याग नीन परमेश्वर यहोवा तान वचन इन अनुसार नीन द्याश वाळुसुल, अदिक नीन जीव मास तिनोद चाहासुल, अदिक नी विचार माळली हत्या, कि ना मास तिनाईन, आग जो मास नीन जीव चाहासीत अदा तिन सक्या. 21जो जागा नीन परमेश्वर यहोवा तान हेसुर बन्सकु ईटोर साटी निवळुस कोमुल अद अगर नीन से हापाळ दुर ईरूल, रा जो वस्ता-गोसी, भेड़-मर्री यहोवा नीनी कोटीदान, अऊर दा टु जो येनारा नीन जीव चाहासीत, अदरी नान आग्या अन अनुसार कोंदकु तान फाटक इन बुळ्क तिन सक्या. 22ह्यांग चिकारागोळ अदिक हरिण इन मास तिनकु आगतद हांग अच अवरी भी तिन सक्या, शुद्ध अदिक अशुद्ध येढ्ढु प्रकार इन मंळसागोळ अऊर मास तिन सक्यार. 23लेकीन अऊर रक्ता यातोदु प्रकार देल तिन बाळेत; यतिकी रक्ता जो हुन अद जीव अच हुन, अदिक नी मास इन सांगुळ जीव यागल्यारा भी तिन बाळेत. 24अदरी तिन बाळेत; अदरी नीर इन घाई जमीन मा चेल बुळेत. 25नी अदरी तिन बाळेत; इदुरसाटी कि अद क्याल्सा माळदुर देल जो यहोवा अन नजर दा ठीक आद नीन अदिक नीन बाद्दा नीन वंश इन भी भला आगुल. 26लेकीन याग नी यातोदारा वस्तु पवित्र माळ्या, या मन्नत मानस्या, रा ईत्ता वस्तुगोळ हुडुकु आ जागा अक होगेत यदरी यहोवा निवळुस बुट्टान, 27अदिक अल तान होमबलि इन मास अदिक रक्ता येढ्ढु उक तान परमेश्वर यहोवा अन वेदी मा येर्सेत, अदिक मेलबलिगोळ्द रक्ता अदुर वेदी मा रीचुसकु अऊर्द मास तिनेत. 28ई मातगोळी यऊर्द आग्या ना नीनी केळ्सतीन चित्त हचकु केळ, कि याग नी अद क्याल्सा माळ्या जो नीन परमेश्वर यहोवा अन नजर दा भला अदिक बेस आद, आग नीन अदिक नीन बाद्दा नीन वंश इन भी हमेशा भला आगतेला ईरूल.”

मूर्तिपूजा अन खिलाप चेतावनी

29याग नीन परमेश्वर यहोवा आ राज्यगोळी यऊर्द अधिकारी आगली नी होगेत्या नीन मुंदु टु नष्ट माळुल, अदिक नी अऊर्द अधिकारी आगकु आंदुर द्याश दा बसुसेगुल, 30आग सावधान ईरेत, ईलारा हींग आगबाळुल कि अऊर्द सत्यानाश आगदुर बाद्दा नी भी अऊर घाई फसुसेग, मतलब ईद अंदकु आंदुर द्यावगोळ्द संबन्ध दा ईद केळकुळ माळबाळेत, कि आ राज्य अन लॉकुर तान द्यावगोळ्द उपासना याता रीती देल माळतोगोर? ना भी हांगा माळाईन. 31नी तान परमेश्वर यहोवा से हींग व्यवहार माळबाळेत; यतिकी यास प्रकार इन क्याल्सागोळ देल यहोवा घृणा माळतान अदिक दुश्मनी ईटतान, आ सप्पा अक आंदुर तान द्यावगोळ साटी माळ्यार, ईल ताका कि तान पार पोरगोळी भी आंदुर तान द्यावगोळ साटी बेक्की दा हाक्कु होताक बुळतार.

32“यास मातगोळ्द ना नीमी आग्या कोळतीन अवरी सावधान आगकु मान्सतोगेतीर; अदिक ना रा येनारा अऊर दा वाळुसेतीर अदिक ना अऊर दा टु येनारा घटुसेतीर.”