व्यवस्थाविवरण 11

प्रभु उन महानता

1“इदुरसाटी नी तान परमेश्वर यहोवा से हापाळ प्यार ईटेत, अदिक जो येनारा आव नीनी सोपस्यान अदुर्द, मतलब आऊन विधीगोळ, नियमगोळ, अदिक आग्यागोळ्द नित्य पालन माळेत. 2अदिक नीव ईंद ईद सोच विचार माळकोमी यतिकी ना रा नीम चिकोर चिणगेर से अनालीन, यार ना रा येनारा नोळ्यार अदिक ना जानस्यार कि नीम परमेश्वर यहोवा येन येन ताड़ना माळदुन, अदिक ह्यांग महिमा, अदिक ताकतवर कय, अदिक वाळुस्द भुजा तोर्सदुन, 3अदिक मिस्त्र दा अलेव राजा फिरोन उक ह्यांग ह्यांग चिन्ह तोर्सदुन, अदिक आऊन सप्पा द्याश दा ह्यांग ह्यांग चमत्कार इन क्याल्सा माळदुन; 4अदिक आव मिस्र अन सेना अन घ्वाळागोळ अदिक रथगोळ से येन माळदुन, मतलब याग आंदुर नीम पीछा माळोर आग आव आंदरी क्याचाँद समुद्र दा मुरकुळ्सकु याता प्रकार देल नष्ट माळ बुट्टुन, कि ईंद इन दिन ताका आंदुर खोज खबर हैलेच; 5अदिक नीम ई जागा दा पोहचुसोर ताका आव आळी दा नीम से येन येन माळदुन; 6अदिक आव रूबेनी एलीआब उन पार दातान अदिक अबीराम से येन येन माळदुन; मतलब धरती तान बाय तेरूकु आंदुर घराना, अदिक ड्यारागोळ, अदिक सप्पा अनुचरगोळ समेत सप्पा इस्राएलीगोळ्द नोळ्त-नोळ्त ह्यांग नुंग कोम्त; 7लेकीन यहोवा अन ई सप्पा धोड्ड धोड्डेव क्याल्सागोळी नीव तान कण्णगोळ देल नोळीर.”

प्रतिग्यात द्याश इन आशीषगोळ

8“ई कारण यास आग्यागोळ ना ईंद नीमी केळ्सतीन अव सप्पा अक मान्सतोगेतीर, इदुरसाटी कि नीव सामर्थी आगकु आ द्याश दा यदुर अधिकारी आगोर साटी नीव आप्पाटी होगेतीर प्रवेश माळकु अदुर अधिकारी आगेगी, 9अदिक आ द्याश दा हापाळ दिन ताका ईर सक्कीर, यदरी नीमी अदिक नीम वंश इक कोळोद किर्या यहोवा नीम पुर्वजगोळ से तिंदीदुन, अदिक अदुर दा हाल अदिक शयद इन धारागोळ वाहुसताव. 10नोळी, याता द्याश इन अधिकारी आगली नीव होगेतीर अद मिस्त्र द्याश घाई हैलेच, यल टु होटकु बंदीर, यल नीव बींजा बोऊसतोगीर अदिक हिरवा साग इन केई इन रीती इन अनुसार तान काल देल नालीगोळ माळकु सीप्सतोगीर; 11लेकीन याता द्याश इन अधिकारी आगली नीव आप्पाटी होगदुर मा आईर अद पहाळगोळ अदिक तराईगोळ्द द्याश हुन, अदिक आकाश इन माळ इन नीर देल सीप्सकु आगतद; 12अद हींग द्याश आद यदुर्द नीन परमेश्वर यहोवा अक सुधि ईरतद; अदिक साल इन सुरवात टु हुडुकु आखरी ताका नीन परमेश्वर यहोवा अन नजर अदुर मा हमेशा हतकु ईरतद.”

13“अदिक अगर नीव नान आग्यागोळी जो ईंद ना नीमी केळ्सतीन ध्यान देल केळकु, तान पुरा मन अदिक सप्पा जीव इन सांगुळ, तान परमेश्वर यहोवा से प्यार ईटी अदिक आऊन स्यावा माळतेला ईरी, 14रा ना नीम द्याश दा माळा अन सुरवात अदिक आखरी येढ्ढु समय इन माळा अक तान तान समय मा बरसुसाईन, यदुर देल नी तान अनाज, व्हाशोद अंगुर इन रास्सा, अदिक टटका याण्णा संगरूस सक्या. 15अदिक ना नीन जनावरगोळ साटी नीन मैदान दा काड्डा अन उपज माळसुसाईन, अदिक नी व्हाट्ट तीम तिंद्या अदिक सन्तुष्ट ईत्या. 16इदुरसाटी तान बारा दा सावधान ईरेत, हींग आगबाळुल कि नीम मन धॉका तिनुल, अदिक नीव बयकुसकु दुसरा द्यावगोळ्द पुजा माळली हती अदिक अवरी दण्डवत माळली हती, 17अदिक यहोवा अन कोप नीम मा भळकुसुल अदिक आव आकाश इन माळ बन्द माळबुळुल, अदिक जमीन तान उपज कोळबाळुल अदिक नीव आ उत्तम द्याश दा टु जो यहोवा नीमी कोळतान राटनेरी नष्ट आगेगी. 18इदुरसाटी नीव नान ई वचन तान तान मन अदिक जीव दा धारण माळकु ईटेतीर अदिक चिन्ह अन रूप दा तान कयगोळ मा कटेतीर अदिक अव नीम कण्णगोळ बीच दा टीका अन क्याल्सा कोळुल. 19अदिक नीव मान्या कुर्तकु हादी मा नळुत, मिंग्त-येळ्त ईऊर्द चर्चा माळकु तान चिकोरी कल्सतोगेतीर. 20अदिक इवरी तान तान मान्ना अन चौखट इन बाजुगोळ अदिक तान फाटकगोळ म्याकुच लिख्सेतीर; 21इदुरसाटी कि याता द्याश इन बारा दा यहोवा नीन पुर्वजगोळ से किर्या तिनकु अंदीदुन, कि ना अदरी नीमी कोळाईन, अदुर दा नीव अदिक नीमोर चिकोर दीर्घायु ईरूल, अदिक यागास ताका धरती इन म्याकुच इन आकाश बन्सकु ईत्तीत आगासताका ताका अव भी बन्सकु ईत्ताव. 22इदुरसाटी अगर नीव ई सप्पा आग्यागोळ्द मान्सदुर दा जो ना नीमी केळ्सतीन पुरा चौकसी माळकु तान परमेश्वर यहोवा से प्यार ईटी, अदिक आऊन सप्पा हादीगोळ मा नळी, अदिक आऊन से चिपकुसकु ईरी, 23रा यहोवा आ सप्पा द्याशगोळी नीम मुंदु टु तेगु बुट्टान, अदिक नीव तान से धोळ्द अदिक सामर्थी द्याशगोळ्द अधिकारी आगेदीर. 24याता याता जागा मा नीम काल इन तरकाल बिळुल अव सप्पा नीम्द अच आगेदव, मतलब आळी टु लबानोन ताका, अदिक परात हेसुर इन महानद टु हुडुकु पश्चिम इन समुद्र ताका नीम सीमा ईत्तीत. 25नीम मुंद यावारा भी निदुर सकतीदील, यतिकी याट जमीन मा नीम काल बिद्दाव आ सप्पा जमीन मा ईरावाळेर मन दा नीम परमेश्वर यहोवा तान वचन इन अनुसार नीम कारण आंदुर दा अंज्क अदिक घबराहट पैदा माळ बुट्टान.”

26“केळी, ना ईंद इन दिशी नीम मुंद आशीष अदिक शराप येढ्ढु ईट बुळतीन. 27मतलब अगर नीव तान परमेश्वर यहोवा अन ई आग्यागोळी जो ना ईंद नीमी केळ्सतीन मान्सी, रा नीम मा आशीष आदीत, 28अदिक अगर नीव तान परमेश्वर यहोवा अन आग्यागोळी मान्सतीदील, अदिक याता हादी इन आग्या ना ईंद केळ्सतीन अदरी मारूकु दुसरा द्यावगोळ हींद आगेदीर यारी नीव अरालीर, रा नीम मा शराप बिद्दीत. 29अदिक याग नीन परमेश्वर यहोवा नीनी आ द्याश दा पोहचुसुल यदुर अधिकारी आगली नी होगदुर मा आय, आग आशीष गरिज्जीम पहाळी मा टु अदिक शराप एबाल पहाळी मा टु केळसेत. 30येन अव यरदन इन आप्पाटी, पश्चिम दी, अराबा अन निवासी कनानीगोळ द्याश दा, गिलगाल इन मुंद, मोरे अन बांज मार्रगोळ्द हात्ती हैलेच?” 31नीव रा यरदन इन आप्पाटी इदुरसाटी होगदुर मा आईर, कि जो द्याश नीम परमेश्वर यहोवा नीमी कोळतान अदुर अधिकारी आगेगी; अदिक नीव अदुर अधिकारी आगकु अदुर दा निवास माळीर; 32ईदुरसाटी यास विधीगोळ अदिक नियम ना ईंद नीमी केळ्सतीन अव सप्पा अक मान्सदुर दा चौकसी ईटेतीर.