व्यवस्थाविवरण 10

कल्ल इनव व्हाशव पाटीगोळ

(निर्गमन 34:1-10)

1“आ समय यहोवा नान से अंदुन, ‘पयला पाटीगोळ घाई कल्ल इन मात्त येढ्ढ पाटीगोळ कोदुर कोम, अदिक अवरी हुडुकु नान हात्ती पहाळी इन म्याकुच होटबर, अदिक हुळ्ली इन ऊंद सन्दुक भी माळसुस कोम. 2अदिक ना आ पाटीगोळ मा अवा वचन लिख्साईन, जो आ पयला पाटीगोळ मा ईरव, यवरी नी मुर्द बुट, अदिक नी अवरी आ सन्दुक दा ईटेत.’ 3आग ना बाबरी इन हुळ्ली इन ऊंद सन्दुक माळसुसदीन, अदिक पयला पाटीगोळ घाई कल्ल इन मात्त येढ्ढ पाटीगोळ कोदुरदीन आग अवरी कय दा हुडुकु पहाळी मा येरेदीन. 4अदिक जो हत्त वचन यहोवा सभा अन दिशी पहाळी मा बेक्की इन न्याड्या दा टु नीम से अंदीदुन, अवा आव पयला अन घाई आ पाटीगोळ मा लिख्सदुन, अदिक अवरी नानी सोप्स बुट्टुन. 5आग ना पहाळी मा टु ल्यालमा ईळुकु बंदीन, अदिक पाटीगोळी तान माळसुस्द सन्दुक दा ईट बुट्टीन; अदिक यहोवा अन आग्या अन अनुसार अव अल्या ईटकु आव.”

6“आग इस्राएली याकानियागोळ्द भाय दा टु कूच माळकु मोसेरा ताका बंदुर. अल हारून सोतोदुन, अदिक आऊक अल्या मुण्ण कोटकु आत; अदिक आऊन पार एलीआजर आऊन जागा मा याजक इन क्याल्सा माळली हतदुन. 7आंदुर अल टु कूच माळकु गुदगोदा अक, अदिक गुदगोदा टु योतबाता अक नळदुर, ई द्याश दा नीर इन गांगागोळ आव. 8आ समय यहोवा लेवी कुल अक इदुरसाटी ब्यार्र माळदुन कि आंदुर यहोवा अन वाचा अन सन्दुक नेगु तोगुल, अदिक यहोवा अन हात्ती निदुरकु आऊन स्यावा टहल माळतोगुल; अदिक आऊन हेसुर देल आशीर्वाद कोळतोगुल, याता प्रकार कि ईंद इन दिन ताका आगेतला बरेत्याद. 9ई कारण लेवीगोळी तान वार्टुर सांगुळ यातोदारा निज अंश या भाग सिकीदील; यहोवा अच आंदुर निज भाग हुन, ह्यांग कि नीन परमेश्वर यहोवा आंदुर से अंदीदुन.”

10“ना रा पयले अन घाई आ पहाळी मा च्यालीस दिन अदिक च्यालीस ईळ्लक ऊंजेरकु ईत्तीन, अदिक आ घन भी यहोवा नान केळदुन, अदिक नीनी नष्ट माळोद मनसा बिट बुट्टुन. 11बाक यहोवा नान से अंदुन, ‘येळ, अदिक नी ई लॉकुर्द अगुवाई माळ, कि याता द्याश इक कोळोद ना आंदुर पुर्वजगोळ से किर्या तिनकु अंदीदीन अदुर दा आंदुर होगकु अदरी तान अधिकार दा माळ कोमुल.’”

परमेश्वर उन मांग

12“ईग, हे इस्त्राएल, नीन परमेश्वर यहोवा नीन से इदुर अलावा मात्त येन चाहासतान, कि नी तान परमेश्वर यहोवा अन अंज्क मान्स अदिक आऊन सप्पा हादीगोळ मा नळु, आऊन से प्यार ईट, अदिक तान पुरा मन अदिक तान पुरा जीव देल आऊन स्यावा माळ, 13अदिक यहोवा अन जो जो आग्या अदिक विधी ना ईंद नीनी केळ्सतीन अवरी ग्रहण माळ, यदुर देल नीन भला आगुल? 14केळ, स्वर्ग अदिक सबसे ऊचा स्वर्ग भी, अदिक धरती अदिक अदुर दा जो येनारा आद, अद सप्पा नीन परमेश्वर यहोवा अंद अच हुन; 15तरी भी यहोवा नीन पुर्वजगोळ से स्नेह अदिक प्यार ईटदुन, अदिक आंदुर बाद्दा नीम लॉकुरी जो आंदुर औलाद हुईर सप्पा द्याश इन लॉकुर बीच दा टु निवळुस बुट्टुन, ह्यांग कि ईंद इन दिन प्रगट आद. 16इदुरसाटी तान तान दिल इन खतना माळी, अदिक मुंद जिद्दी ईरबाळी. 17यतिकी नीम परमेश्वर यहोवा आवा ईश्वरगोळ्द परमेश्वर अदिक प्रभुगोळ प्रभु हुन, आव महान पराक्रमी अदिक भय योग्य ईश्वर हुन, जो यारदु पक्ष माळालुन अदिक ना घूस ताकोमतान. 18आव अनाथगोळ अदिक रांड्यागोळ्द न्याय चुकुसतान, अदिक परदेशीगोळ से हींग प्यार ईटतान कि आंदरी तिनोद अदिक कपळा कोळतान. 19इदुरसाटी नीव भी परदेशीगोळ से प्रेम भाव ईटेतीर; यतिकी नीव भी मिस्त्र द्याश दा परदेशी ईरीर. 20तान परमेश्वर यहोवा अन अंज्क मान्सेतीर; आऊंदा स्यावा माळेतीर अदिक आऊन से अच चिपकुसकु ईरेतीर, अदिक आऊंदा हेसुर इन किर्या तिनेतीर. 21आवा नीम स्तुति इन लायक आन; अदिक आवा नीन परमेश्वर हुन, याव नीन सांगुळ अव धोळ महत्व अन अदिक भयानक क्याल्सा माळ्यान यवरी नी तान कण्णगोळ देल नोळ्या. 22नीन पुर्वज याग मिस्र दा होदुर आग सत्तर अच मंळसा ईरोर; लेकीन ईग नीन परमेश्वर यहोवा नीन गिनती आकाश इन तारागोळ घाई हापाळ माळ बुटान.”