Holiya Bible
व्यवस्थाविवरण 9
लॉकुर्द अनाग्याकारिता
“हे इस्राएल, केळ, ईंद नी यरदन आप्पाटी इदुरसाटी होगावाळा आय, कि ईत्ता राज्यगोळी जो नीन से धोड्डेव अदिक सामर्थी आव; अदिक ईत्ता धोळ नगरगोळी यऊर्द शहरपनाह आकाश से मात हेळताव, तान अधिकार दा ताकोम कोमुल. अऊर दा धोड्डेर-धोड्डेर अदिक ऊद्द-ऊद्द लॉकुर मतलब अनाकवंशी ईरतार यार हालत नी जान्सत्या, अदिक आंदुर बारा दा नी ईद केळ्या, कि अनाक वंशीगोळ्द मुंद याव ठहरूस सकतान? इदुरसाटी ईंद नी ईद जान्स कोम जो नीन मुंद भस्म माळावाळा बेक्की इन घाई पार होगव आन आव नीन परमेश्वर यहोवा हुन; अदिक आव आंदुर सत्यानाश माळ्यान, अदिक आव आंदरी नीन मुंद वत्त बुट्टान; अदिक नी यहोवा अन वचन इन अनुसार आंदरी आ द्याश दा टु तेगुकु राटनेरी इच नष्ट माळ बुट्टान.”
“याग नीन परमेश्वर यहोवा आंदरी नीन मुंदु टु तेग्द बुट्टान आग ईद विचार माळबाळेत कि यहोवा नीन न्याय इन कारण नीनी ई द्याश इन अधिकारी आगली तंदान, लेकीन आ जातीगोळ्द दुष्टता अन कारण सेल अच यहोवा आंदरी नीन मुंदु टु तेगुतान. नी जो आंदुर द्याश इन अधिकारी आगली होगेत्या, इदुर कारण नीन न्याय या मन इन सिधाई हैलेच; नीन परमेश्वर यहोवा जो आ जातीगोळी नीन मुंदु टु तेगुतान, अदुर कारण आंदुर दुष्टता हुन, अदिक ईद भी कि जो वचन आव अब्राहम, इसहाक, अदिक याकूब, नीन पुर्वजगोळी किर्या तिनकु कोटीदुन, अदरी आव पुरा माळोद चाहासतान. इदुरसाटी ईद जान्स कोम कि नीन परमेश्वर यहोवा, जो नीनी अद वळ्लीद द्याश कोळतान कि नी अदुर अधिकारी आग, अदरी आव नीन न्यायीपन इन कारण कोळालुन; यतिकी नी रा ऊंद जिद्दी राष्ट्र हुय. ई मात इक याद ईट अदिक यागल्यारा भी मारूबाळेत, कि आळी दा नी याता याता रीती देल तान परमेश्वर यहोवा अक क्रोधित माळ्द; अदिक याता दिन टु नी मिस्त्र द्याश दा टु होट्या यागास ताका नीव ई स्थान मा पोहचुसीदील आगासताका ताका यहोवा अन विरोध अच माळतेला बंदीर. बाक होरेब पहाळी उन हात्ती भी नीव यहोवा अक क्रोधित माळदीर, अदिक आव क्रोधित आगकु नीमी नष्ट माळोद चाहासोन. याग ना आ वाचा अन कल्ल इन पाटीगोळी जो यहोवा नीम से कटीदुन ताकोमोर साटी पहाळी इन म्याकुच येरेदीन, आग च्यालीस दिन अदिक च्यालीस ईळ्लक पहाळी मा का ईत्तीन; अदिक ना रा रोट्टी तिंदीन ना नीर कुळदीन. अदिक यहोवा नानी तांदा कय इन लिख्सद कल्ल इन येढ्ढु पाटीगोळी सोप्स बुट्टुन, अदिक अवा वचन यवरी यहोवा पहाळी इन म्याकुच बेक्की इन न्याड्या दा सभा अन दिशी नीम से अंदीदुन अव सप्पा अऊर मा लिख्सकु ईरव. अदिक च्यालीस दिन अदिक च्यालीस ईळ्लक इन बीतुसदुर मा यहोवा कल्ल इन अव येढ्ढ वाचा अन पाटीगोळ नानी कोट बुट्टुन. अदिक यहोवा नान से अंदुन, ‘येळ, ईल टु झटपट ल्यालमा होग; यतिकी नीन प्रजा अन लॉकुर यारी नी मिस्र दा टु तेगुकु तंद्या आंदुर बिगळुसेग्यार; याता हादी मा नळोद आग्या ना आंदरी कोटीदीन अदरी आंदुर झटपट बिट बुटार मतलब आंदुर तुरन्त तान साटी ऊंद मूर्ति घळुस बुटार.’
“बाक यहोवा नान से भी अंदुन, ‘ना आ लॉकुरी नोळ कोंडीन, आंदुर जिद्दी राष्ट्र नोर लॉकुर उर; इदुरसाटी ईग नानी नी रोक्सबाळ, कि ना आंदरी नष्ट माळ बुळाईन, अदिक धरती इन म्याकुच टु आंदुर हेसुर या चिन्ह ताका मिटुस बुळाईन, अदिक ना आंदुर से वाळुसकु ऊंद धोळ्द अदिक सामर्थी राष्ट्र नीन देल अच पैदा माळाईन.’ आग ना हींदळा काल देल पहाळी टु ईळुतेला नळदीन, अदिक पहाळी बेक्की देल दयकुसोद; अदिक नान येढ्ढु कय दा वाचा अन येढ्ढु पाटीगोळ ईरव. अदिक ना नोळदीन कि नीव तान परमेश्वर यहोवा अन खिलाप महापाप माळदीर; अदिक तान साटी ऊंद पाड्डा घळुसकु बनुस बुट्टीर, अदिक तुरन्त आ हादी से यदुर मा नळोद आग्या यहोवा नीमी कोटीदुन अदरी नीव बिट बुट्टीर. आ ना आ येढ्ढु पाटीगोळी तान येढ्ढु कय देल हुडुकु भिट बुट्टीन, अदिक नीम कण्ण इन मुंद अवरी मुर्द बुट्टीन. आग नीम आ महापाप इन कारण यदरी माळकु नीव यहोवा अन नजर दा बुराई माळदीर अदिक आऊक सिट्ट तरूसुसीदीर, ना यहोवा अन मुंद बाय इन भार देल बिदोदीन अदिक पयला अन घाई, मतलब च्यालीस दिन अदिक च्यालीस ईळ्लक ताका ना रा रोट्टी तिंदीन अदिक ना नीर कुळदीन. ना रा यहोवा अन आ कोप अदिक जल-जलाहट देल अंजीन, यतिकी आव नीम से अप्रसन्न आगकु नीम सत्यानाश माळदुर मा ईरोन. लेकीन यहोवा आ घन भी नान केळ कोंडुन. अदिक यहोवा हारून से ईट कोपित आदुन कि आऊन भी सत्यानाश माळोद चाहासदुन; लेकीन अदा समय ना हारून उन साटी भी प्रार्थना माळदीन. अदिक ना अद पाड्डा यदरी बन्सकु नीव पापी आगेगीदीर हुडुकु, बेक्की दा हाक्कु भस्म माळ बुट्टीन; अदिक बाक अदरी आरू आरूकु हींग चकनाचुर माळ कोंडीन कि अद धुळा अन घाई जीर्ण आगेत; अदिक अदुर आ राखळ इक आ गांगा दा भिट बुट्टीन जो पहाळी टु होटकु ल्यालमा वाहुसतद.”
“बाक तबेरा, अदिक मस्सा, अदिक किब्रोत-हत्तावा दा भी नीव यहोवा अक सिट्ट तरसुसीदीर. बाक याग यहोवा नीमी कादेशबर्ने टु ईद अंदकु कळुदुन, ‘होगकु आ द्याश इन यदरी ना नीमी कोटीन अधिकारी आगेगी,’ आग भी नीव तान परमेश्वर यहोवा अन आग्या अन खिलाप झगळा माळदीर अदिक ना रा आऊन विश्वास माळदीर, अदिक आऊन मात भी मान्सीदील. याता दिशी टु ना नीमी अरूतीन आ दिशी टु नीव यहोवा से बाय अच मुर्सतेला बंदीर”.
“ना यहोवा अन मुंद च्यालीस दिन अदिक च्यालीस ईळ्लक बाय इन भार देल बिदकु ईत्तीन, यतिकी यहोवा अंद बुटीदुन, कि आव नीम सत्यानाश माळ्यान. अदिक ना यहोवा से ईद प्रार्थना माळदीन, ‘हे प्रभु यहोवा, तान प्रजारूपी निज भाग, यारी नी तान महान प्रताप देल बिळसुस्कु तंद्या, अदिक यारी नी तान ताकतवर कय देल मिस्र दा टु तेग्द बुट्या, आंदरी नष्ट माळबाळ. तान दास अब्राहम, इसहाक, अदिक याकूब उक याद माळ; अदिक ई लॉकुर्द कठोरता, अदिक दुष्टता, अदिक पाप मा नजर तिर्गुसबाळ, यदुर देल हींग आगबाळुल कि याता द्याश टु नी नामी तेगुकु तंद्या, अलेर लॉकुर अनली हतुल, कि यहोवा आंदरी आ द्याश दा यदुर कोळोद वचन आंदरी कोटीदुन पोहचुस सकीदील, अदिक आंदुर से दुश्मनी भी ईटतोगोन, ईदा कारण देल आव आंदरी आळी दा तेगुकु कोंद बुट्टुन. ई लॉकुर नीन प्रजा अदिक निज भाग उर, यारी नी तान धोळ्द सामर्थ्य अदिक ताकतवर भुजा अन द्वारा तेगुकु तन कोंड्या.’”
Holiya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.