व्यवस्थाविवरण 8

उत्तम द्याश

1“जो जो आग्या ना ईंद नीनी केळ्सतीन अव सप्पा मा नळोद चौकसी माळेत, इदुरसाटी कि नीव जीत्ता ईरी अदिक वाळुस्त ईरी, अदिक याता द्याश इन बारा दा यहोवा नीम पुर्वजगोळ से किर्या तिंदान अदुर दा होगकु अदुर हक्कदार आगेगी. 2अदिक याद ईट कि नीन परमेश्वर यहोवा आ च्यालीस साल दा नीनी पुरा आळी इन हादी दा टु इदुरसाटी तंदुन, कि आव नीनी नम्र बनुसुल, अदिक नीन परीक्षा माळकु ईद जान्स कोमुल कि नीन मन दा येन येन आद, अदिक कि नी आऊन आग्यागोळ्द पालन माळ्या या ईला. 3आव नीनी नम्र बनुसदुन, अदिक हस्तकु भी आग गोट्टुन, बाक आव मन्ना, यदरी न नी अदिक ना नीन पुर्वजगोळ जानसोर, अदा नीनी तिन्सदुन; इदुरसाटी कि आव नीनी कलसुल कि मंळसा सिर्फ रोट्टी देल अच जीत्ता ईरालुन, लेकीन जो जो वचन यहोवा अन बाय दा टु होळताव अऊर देल अच आव जीत्ता ईरतान. 4ई च्यालीस साल दा नीन कपळा हाळव आगीदील, अदिक ना नीन काल बातव. 5बाक तान मन दा ईद रा विचार माळ, कि ह्यांग यावारा तान पार उक ताड़ना कोळतान हांग अच नीन परमेश्वर यहोवा नीनी ताड़ना कोळतान. 6इदुरसाटी तान परमेश्वर यहोवा अन आग्यागोळ्द पालन माळतेला आऊन हादी मा नळेतीर, अदिक आऊन अंज्क मान्सतेला ईरेतीर. 7यतिकी नीन परमेश्वर यहोवा नीनी ऊंद उत्तम द्याश दा ओयेत्यान, जो नीर इन गांगागोळ्द, अदिक तराईगोळ अदिक पहाळीगोळ दा टु होळ्द गयरा-गयरा सोतागोळ्द द्याश आद. 8बाक अद गोदी, जवारी, अंगुर, अंजीरगोळ, अदिक अनारगोळ्द द्याश आद; अदिक याण्णावाळा जैतुन अदिक शयद इन भी द्याश हुन. 9आ द्याश दा अनाज इन कमी आगतीदील, अदिक ना अदुर दा नीनी यातोदु चिज इन कमी होदीत; अलेव कल्लगोळ लॉहा नव आव, अदिक अलेव पहाळी दा टु नी तांबा अगुळकु तेगु सक्या. 10अदिक नी व्हाट्टा तीम तिंद्या, अदिक आ उत्तम द्याश इन कारण जो नीन परमेश्वर यहोवा नीनी कोट्टान अदरी धन्य मानस्या.”

प्रभु उक मारोद खिलाप चेतावनी

11“इदुरसाटी सावधान ईरेत, ईलारा हींग आगबाळुल कि तान परमेश्वर यहोवा अक मार्तकु आऊन जो जो आग्या, नियम, अदिक विधी ना ईंद नीनी केळ्सतीन अऊर्द पालन माळोद बिळबाळेत; 12हींग आगबाळुल कि याग नी तिनकु तृप्त आद्या, अदिक वळ्लेव वळ्लेव मान्ना बन्सकु अऊर दा ईरली हत्या, 13अदिक नीन गोसी-वस्तागोळ अदिक भेड़-मर्रगोळ्द बढ़ती आगुल, अदिक नीन व्हान्ना, बेळ्ली, अदिक नीन सप्पा प्रकार इन धन वाळुसेगुल, 14आग नीन मन दा अहंकार समुसेगुल, अदिक नी तान परमेश्वर यहोवा अक मार्तोद्या, जो नीनी गुलामी अन मान्ना मतलब मिस्त्र द्याश दा टु तेगुकु तंदान, 15अदिक आ धोळ्द अदिक अंज्क बरापरी आळी दा टु तंदान, यल तेज जयरीला हाव अदिक चेळ आव अदिक बीना नीर इन वंळगींद द्याश दा आव नीन साटी चकमक इन चट्टान दा टु नीर तेगदुन, 16अदिक नीनी आळी दा मन्ना तिन्सदुन, यदरी नीमोर पुर्वजगोळ जान्सोर भी ईला, इदुरसाटी कि आव नीनी नम्र बनुसुल, अदिक नीन परीक्षा माळकु आखरी दा नीन भला अच माळुल. 17अदिक ईलारा हींग आगबाळुल कि नी सोचली हत्या कि ईद सम्पत्ति नांद अच सामर्थ्य अदिक नांद अच भुजबल देल नानी हासिल आत. 18लेकीन नी तान परमेश्वर यहोवा अक याद ईटेत, यतिकी आवा आन जो नीनी सम्पत्ति हासिल माळोद सामर्थ्य इदुरसाटी कोळतान, कि जो वाचा आव नीन पुर्वजगोळ से तिनकु कटीदुन अदरी पुरा माळुल, ह्यांग ईंद प्रगट आद. 19अगर नी तान परमेश्वर यहोवा अक मार्तकु दुसरा द्यावगोळ्द हींद आगेद्या, अदिक अऊर्द उपासना अदिक अवरी दण्डवत माळ्या, रा ना ईंद नीमी चेतावनी कोळतीन कि नीव नि:सन्देह नष्ट आगेदीर. 20याता राज्यगोळी यहोवा नीम हात्ती टु नष्ट माळदुर मा आन, अऊर दा घाई नीव भी तान परमेश्वर यहोवा अन वचन ईला मान्सदुर कारण नष्ट आगेदीर.”