व्यवस्थाविवरण 7

प्रभु उन तान लॉकुर

(निर्गमन 34:11-16)

1“बाक याग नीन परमेश्वर यहोवा नीनी आ द्याश दा यदुर अधिकारी आगली नी होगदुर मा आय पोहचुसुल अदिक नीन मुंदु टु हित्ती, गिर्गाशी, एमोरी, कनानी, परिज्जी, हिब्बी, अदिक यबूसी हेसुर इनव हापाळ सा राष्टगोळी मतलब नीम से धोड्डेव अदिक सामर्थी येळु राष्ट्रगोळी तेग्द बुळुल, 2अदिक नीन परमेश्वर यहोवा आंदरी नीन द्वारा हारूस बुळुल, अदिक नी आंदुर मा जय हासिल माळ कोम; आग आंदरी पुरा रीती देल नष्ट माळ बुळेत; आंदुर से ना वाचा कटेत, अदिक ना आंदुर मा दया माळेत. 3अदिक ना आंदुर से मद मांगणी माळेत, ना तान पोर इन मदा आंदुर पारगोळ सांगुळ माळेत, अदिक ना आंदुर पोर इक तान पार उन साटी मदा माळकु तरेत. 4यतिकी आंदुर नीन पार उक नान हींद नळुली बयकुस्यार, अदिक दुसरा द्यावगोळ्द उपासना माळसुस्यार; अदिक ई कारण देल यहोवा अन कोप नीम मा भळकुसीत, अदिक आव तुरन्त नीन सत्यानाश माळ बुट्टान. 5आ लॉकुर से हींग बरताव माळेत, कि आंदुर वेदीगोळी केळ्द बुळेत, आंदुर खंबागोळी मुर्द बुळेत, आंदुर अशेरा हेसुर इन मूर्तिगोळी कळ्द कळ्दकु केळ्द बुळेत, अदिक आंदुर्द अगुळ्द मूर्तिगोळी बेक्की दा होताक बुळेत. 6यतिकी नी तान परमेश्वर यहोवा अन पवित्र प्रजा हुय; यहोवा धरती तिमुर्द सप्पा द्याशगोळ लॉकुर दा टु नीनी निवळुस कोंडान कि नी आऊन प्रजा अदिक निजी धन ठहरूसुल. 7यहोवा जो नीम से स्नेह माळकु नीमी निवळुस बुट्टुन, इदुर कारण ईद ईला ईरोद कि नीव गिनती दा अदिक सप्पा द्याश इन लॉकुर से यक्कुल ईरीर, लेकीन नीव रा सप्पा द्याश इन लॉकुर से गिनती दा थ्वाळासा अच ईरीर; 8यहोवा जो नीमी ताकतवर कय इन द्वारा गुलामी अन मान्ना दा टु, अदिक मिस्र अन राजा फिरोन उन कय दा टु बिळ्सकु तेगुकु तंदुन, इदुर कारण ईदा आद कि आव नीम से प्यार ईटतान, अदिक आ किर्या अक भी पुरा माळोद चाहासतान जो आव नीम पुर्वजगोळ से तिंदीदुन. 9इदुरसाटी जान्सकोम कि नीन परमेश्वर यहोवा अच परमेश्वर हुन, ईव विश्वासयोग्य ईश्वर हुन; जो आऊन से प्यार ईटतार अदिक आऊन आग्यागोळ मान्सतार आंदुर सांगुळ आव हजार पीढ़ी ताका तान वाचा अन पालन माळतान, अदिक आंदुर मा करूणा माळतेला ईरतान; 10अदिक जो आऊन से दुश्मनी ईटतार आव आंदुर नोळ्त आंदुर से बदला ताकोमकु नष्ट माळ बुळतान; तान दुश्मन उन बारा दा आव समय माळतीदील, आऊन नोळ्त अच आऊन से बदला ताकोंडान. 11इदुरसाटी ई आग्यागोळ, विधीगोळ, अदिक नियमगोळी, जो ना ईंद नीनी याद दिलुसतीन, मान्सदुर दा अदुर्द पालन माळेत.”

आग्या पालन इनव आशीषगोळ

(व्यवस्थाविवरण 28:1-14)

12“अदिक नीव जो ई नियमगोळी केळकु मान्सीर अदिक ईऊर मा नळदीर, रा नीन परमेश्वर यहोवा भी आ करूणामय वाचा अन पालन माळ्यान यदरी आव नीन पुर्वजगोळ से किर्या तिनकु कटीदुन; 13अदिक आव नीन से प्यार ईट्यान, अदिक नीनी आशीष कोट्टान, अदिक गिनती दा वाळुस्यान; अदिक जो द्याश आव नीन पुर्वजगोळ से किर्या तिनकु नीनी कोळली अंदान अदुर दा आव नीन औलाद मा, अदिक अन्न, व्हाशोद अंगुर इन रास्सा, अदिक टटका याण्णा ईव सप्पा, जमीन इन उपज मा आशीष कोळतोदान, अदिक नीन गोसी-वस्ता अदिक भेड़-मर्रगोळ्द बढ़ती माळ्यान. 14नी सप्पा द्याश इन लॉकुर से यक्कुल धन्य आद्या; नीन बीच दा ना मंळसा ना आर्त निर्वंश ईत्तार, अदिक नीन जनावरगोळ दा भी हींग याऊ ईरतीदील. 15अदिक यहोवा नीन से सप्पा प्रकार इन रोग दुर माळ्यान; अदिक मिस्र नव बेकार बेकार महामारीगोळ यवरी नी अरूत्या अऊर दा टु यवरी भी नीनी हत गोळतिदील, ई सप्पा नीन दुश्मनगोळी का हत्याव. 16अदिक द्याश द्याश इन यास लॉकुरी नीन परमेश्वर यहोवा नीन वश दा माळ बुट्टान, नी आ सप्पा मुंदुर्द सत्यानाश माळेत; आंदुर मा दया देल नजर हाकबाळेत, अदिक ना आंदुर द्यावगोळ्द उपासना माळेत, ईलारा नी फंदा दा फसुसेद्या.”

17“अगर नी तान मन दा सोच्या, कि अव राष्ट्रगोळ जो नान से यक्कुल आव; रा ना अवरी ह्यांग द्याश दा टु तेगु सकाईन? 18तरी भी आंदुर से अंजबाळेत, जो येनारा नीन परमेश्वर यहोवा फिरोन से अदिक पुरा मिस्र से माळदुन अदरी हाकुन टाकुन याद ईटेत. 19जो धोळ धोळ परीक्षा अन क्याल्सा नी तान कण्णगोळ देल नोळ्द, अदिक याता चिन्हगोळ, अदिक चमत्कारगोळ, अदिक याता ताकतवर कय, अदिक वाळुस्द भुजा अन द्वारा नीन परमेश्वर यहोवा नीनी तेगुकु तंदुन, अऊर अनुसार नीन परमेश्वर यहोवा आ सप्पा लॉकुर से भी यार से नी अंजत्या माळ्यान. 20इदुर से यक्कुल नीन परमेश्वर यहोवा आंदुर न्याड्या दा बर्रागोळ भी कळ्यान, ईल ताका कि आंदुर दा टु जो ऊळ्दकु होचकोंडार आंदुर भी नीन मुंदु टु नष्ट आगेदार. 21आंदुर से अंजबाळेत; यतिकी नीन परमेश्वर यहोवा नीन न्याड्या आन, अदिक आव महान अदिक भय योग्य ईश्वर हुन. 22नीन परमेश्वर यहोवा आ जातीगोळी नीन मुंदु टु धीरू-धीरू तेग्द बुट्टान; रा नी एकदम से आंदुर अन्त माळ सकतीदील, ईलारा बनुस्त पशु वाळुसकु नीन नुसक्यान माळ्याव. 23तरी भी नीन परमेश्वर यहोवा आंदरी नीन से हारूस बुट्टान, अदिक यागास ताका आंदुर नष्ट आगेगालुर आगासताका ताका आंदरी यक्कुल व्याकुल माळतेला ईत्तान. 24अदिक आव आंदुर राजागोळी नीन कय दा माळ्यान, अदिक नी आंदुर भी हेसुर धरती मा टु मिटुस बुट्या; आंदुर दा टु यावारा भी नीन मुंद निदुर सकतीदील, अदिक आखरी दा नी आंदुर्द सत्यानाश माळ बुट्या. 25आंदुर द्यावगोळ्द अगुळ्द मूर्तिगोळ नीव बेक्की दा होताक बुळेतीर; जो बेळ्ली या व्हान्ना अऊर मा मळुसकु ईत्तीत अऊर्द लालच माळकोम बाळेतीर, ईलारा नी अऊर कारण फंदा दा फसुस्या; यतिकी ईत्ता वस्तुगोळ नीम परमेश्वर यहोवा अन नजर दा घृणित आव. 26अदिक यातोदारा घृणित वस्तु तान मान्या तरबाळेत, ईलारा नी भी अदुर घाई नष्ट आगेगोद वस्तु ठहरूस्या; अदरी सत्यानाश इन वस्तु जान्सकु अदुर से घृणा माळेत अदिक अदरी यागल्यारा भी चाहासबाळेत; यतिकी अद अशुद्ध वस्तु आद.”